Ana eyɛ obi a eyɛ ber nyina som edwuma no bi a edzi mfe 23 kesi 65? Ana ewɔ apɔwmudzen papa, na ibotum asom wɔ beebiara a mboa ho hia? Sɛ dɛm na ɔtse wɔ w’afamu dze a, ana esusu ho pɛn dɛ ebɔkɔ Ahendzi Asɛmpakafo Skuul no bi anaa? Ofitsi aber a wɔdze skuul no bɔbɔɔ adze no, awarfo nye mbarimba na mbaa esigyafo pii na wɔakɔ bi. Naaso yehia mbarimba esigyafo pii ma wɔaakɔ skuul yi bi. Serɛ Jehovah na ɔmma nya ɔpɛ kɛse a edze bɔsɔ n’enyi na eesũasua ne Ba no. (Nd 40:8; Mt 20:28; Heb 10:7) Afei susu ndzɛmba a obotum esiw wo kwan no ho, na hwɛ mbrɛ ibotum eyi dɛm ndzɛmba no efi w’akwan mu.

Henfa na hɔn a wɔakɔ skuul yi bi no tum kɔsom? Wɔma hɔn a woewie skuul yi bi no kɔsom wɔ mbea ahorow a wɔkã kasa fofor, anaadɛ wɔma wɔyɛ baguamu adasedzi tsitsir no bi. Wɔma binom kɛhyɛ amansin do ahwɛfo bi ananmu som asafo bi, wɔyɛ binom so amansin do ahwɛfo, na wɔma binom so som dɛ asɛmpatserɛwfo. Aber a erodwendwen ndzɛmba a ibotum ayɛ wɔ Jehovah no som mu ho no, ɔmbra dɛ ebɛkã asɛm a nkɔnhyɛnyi Isaiah kãe yi bi dɛ: “Emi nye yi; soma me ɛ.”​—Isa 6:8.

HWƐ VIDEO A WƆATO DZIN ASƐMPATSERƐWFO​—EDWUMAYƐFO WƆ OTWABER MU NO, NA YIYI NSƐMBISA A ODZIDZI DO YI ANO:

• Wosi dɛn paw asɛmpatserɛwfo?

• Ebɛn edwuma pa na asɛmpatserɛwfo reyɛ?

• Nhyira ahorow a ɔwɔ asɛmpatserɛw edwuma no mu no bi nye dɛn?