CHRISTIANFO ASETSENA
Mbrɛ Yebotu Mpon Wɔ Asɛnka Mu—Bible Adzesua A Onntu Mpon A Yebegyaa Yɛ
SIANTSIR A OHIA: Ɔsɛ dɛ nkorɔfo bɔ Jehovah ne dzin ama woeenya nkwa. (Ro 10:13, 14) Naaso, nnyɛ obiara a ɔpen do dɛ obosũa Bible no na ɔbɛpɛ dɛ ɔdze Jehovah ne gyinapɛn ahorow bɔ ne bra. Wɔ asɛnka mu no, yɛdze hɛn ber a ɔsom bo no dzi dwuma yie dze boa hɔn a wɔpɛ ankasa dɛ wɔyɛ nsakyer a ɔbɔsɔ Jehovah n’enyi no. Wɔ ber dodow bi a ɔsɛ mu no, sɛ Bible suanyi bi ennya nkɔenyim dɛ mbrɛ ɔfata a, nyansa wɔ mu dɛ yebotwa adzesua no mu, na ama yɛdze hɛn mber no aaboa hɔn a Jehovah rotwe hɔn aba n’ahyehyɛdze no mu no mbom. (Joh 6:44) Ɔwɔ mu, ekyir yi sɛ nyimpa no yɛ nsakyer na ɔda no edzi dɛ ɔka hɔn a “woeyi hɔn ama onnyiewiei nkwa” no ho dze a, ɔno yefi dɛw nyinara mu nye no bɔtoa Bible adzesua no do.—Adw 13:48.
MBRƐ IBESI AYƐ NO:
-
Kamfo osuanyi no wɔ ɔpɛ a ɔwɔ dɛ obenya nokwar no ho nyimdzee no ho.—1Ti 2:4
-
Ma onhu mfaso a ɔwɔ do dɛ ɔdze dza orusũa no bedzi dwuma.—Lu 6:46-49
-
Jesus ne bɛ a ɔfa duafo no ho no, fi ɔdɔ mu na enye no nsusu ho, na ma onsusu adze a ɔmma onnya nkɔenyim no ho.—Mt 13:18-23
-
Kyerɛkyerɛ siantsir a irutwa adzesua no mu no kyerɛ no wɔ kwan bi do a ɔrennhaw no
-
Ma onhu dɛ ɔwɔ mu ara a, ebɔbɔ afa no hɔ ahyɛ no nkuran, na sɛ daakye bi onya nkɔenyim a, enye no bɔtoa adzesua no do
HWƐ VIDEO NO, NA YIYI NSƐMBISA A ODZIDZI DO YI ANO:
-
Wɔ nkɔmbɔ no mu no, ebɛnadze na ɔkyerɛ dɛ nna suanyi no rinnya nkɔenyim?
-
Ebɛn kwan do na dawurbɔfo no faa do boaa suanyi no ma ɔbɛtsee ase dɛ ɔsɛ dɛ ɔyɛ nsakyer?
-
Dawurbɔfo no yɛɛ dɛn maa suanyi no hun dɛ aber biara a ɔbɛyɛ krado no, obotum ama wɔaahyɛ adzesua no ase bio?