Sɛ ehwɛ nhyiren fɛɛfɛw bi, nworaba a ɔwɔ wimu, anaa nsu bi a osian fi bepɔw bi do gu famu ne dede a, ana ihu Ɔbɔadze no nsaano edwuma? Abɔdze a woetwa hɛn ho ehyia no da Jehovah ho adze a wonnhu, kyerɛ dɛ no suban a wonnhu no edzi pefee. (Ro 1:20) Sɛ yɛgye ber dwendwen dza yɛdze hɛn enyiwa hu no ho a, ɔma yehu Jehovah no tum, no dɔ, ne nyansaa, nye n’atsɛntsenenee. Afei so ɔma yehu n’ayamuyie.​—Nd 104:24.

Jehovah ne nsaano edwuma no mu hendze na ihu no da biara? Sɛ etse kurow mu mpo a, ibotum ehu nnoma anaa ndua. Sɛ yɛgyen hɛn enyi hwɛ Jehovah n’abɔdze a, obotum aboa hɛn ma yaatsew hɛn dadwen do, yɛdze hɛn adwen eesi ndzɛmba a no ho hia no do, na obotum so ama gyedzi a yɛwɔ wɔ Jehovah mu dɛ obotum ahwɛ hɛn ndɛ dze ekesi daa no mu aayɛ kɛse. (Mt 6:25-32) Sɛ ewɔ mba a, boa hɔn ma wonhu Jehovah no su ahorow a ɔyɛ nwanwa no. Sɛ yenya enyisɔ ma abɔdze a woetwa hɛn ho ehyia no a, yɛbɛbɛn Ɔbɔadze no kɛse.​—Nd 8:3, 4.

HWƐ VIDEO A WƆATO DZIN ABƆDZE MU ANWANWADZE DA NYANKOPƆN N’ENYIMNYAM EDZI​—KAN NA KƆLA, NA AFEI YIYI NSƐMBISA A ODZIDZI DO YI ANO:

• Ebɛnadze na ɔma yehu kɔla ahorow?

• Ebɛnadze na ɔma kɔla ahorow bi sesa osian beebi a igyina rohwɛ no ntsi?

• Ebɛnadze ntsi na yehu kɔla asorɔtow asorɔtow wɔ wimu?

• Sɛ ehwɛ beebi a etse no a, ebɛn abɔdze na ne kɔla yɛ wo fɛw papaapa?

• Ebɛnadze ntsi na ɔsɛ dɛ yɛgye ber hwɛ Nyankopɔn n’abɔdze ahorow no yie?