Jehovah bu awar ntam enyibersɛm papaapa. Ɔakã dɛ ɔwɔ dɛ okun na ɔyer tsena bɔ mu daa. (Mt 19:5, 6) Nyankopɔn no nkorɔfo pii wɔ enyigye wɔ hɔn awar mu. Naaso, awar biara nnyi hɔ a odzi mũ. Nsɛndzendzen botum asoɛr. Nkorɔfo pii susu dɛ sɛ awarfo bi rihyia nsɛndzendzen wɔ hɔn awar mu a, ɔwɔ dɛ wɔtsetsew mu anaa wogyaa awar, naaso ɔnnsɛ dɛ yenya dɛm adwen no bi. Christianfo awarfo besi dɛn abɔ hɔn awar ho ban?

Susu ndzɛmba etsitsir enum yi ho.

1. Bɔ w’akoma ho ban dze nam dɛ ibokwetsir dɛ edze woho bɛhyehyɛ afofor anaa edze ndzɛmba a ɔbrasɛɛ wɔ mu no bɛgyegye w’enyi. Ndzɛmba ahorow bi a ɔtsetse dɛm no botum asɛɛ awar.​—Mt 5:28; 2Pe 2:14.

2. Hyɛ anyɛnkofa a enye Nyankopɔn wɔ no mu dzen, na ma ɔpɛ a ewɔ dɛ ebɔsɔ n’enyi wɔ w’awar mu no nyɛ kɛse.​—Nd 97:10.

3. Kɔ do hyɛ nyimpasu fofor no, na fi ayamuyie mu yɛ ndzɛmba nketsenketse bi a ɔbɛma wo hokafo no n’enyi agye.​—Col 3:8-10, 12-14.

4. Da obu na enyidzi edzi wɔ wo kasaa mu.—Col 4:6.

5. Fi ɔdɔ na ntseasee mu fa dza ɔsɛ wɔ awar mu no ma.​—1Co 7:3, 4; 10:24.

Sɛ Christianfo dzi hɔn awar nyi a, nna wɔrehyɛ Jehovah a ɔyɛ awar Hyehyɛfo no enyimnyam.

HWƐ VIDEO A WƆATO DZIN ƆSƐ DƐ YƐDZE ‘ABOTAR TU MBIRIKA’ NO​—TU MBIRIKA NO DƐ MBRƐ NO HO MBRA TSE NO, NA YIYI NSƐMBISA A ODZIDZI DO YI ANO:

• Ɔwɔ mu dɛ awar bi n’ahyɛse botum ayɛ enyigye dze, naaso ebɛn nsɛndzendzen na obotum asoɛr?

• Ebɛn kwan do na Bible mu ngyinadonsɛm botum aboa hɔn a wɔtse nka dɛ enyigye nnyi hɔn awar mu no?

• Ebɛn mbra ahorow na Jehovah ahyehyɛ afa awar ho?

• Sɛ awar bi botum asɔ a, ebɛnadze na ɔwɔ dɛ awarfo beenu no nyina yɛ?