Ebɛnadze ntsi na hɛn enyi gye hɛn ɔmantɔw ehyiadzi ahorow a yɛyɛ no afe biara no ho dɛm? Dɛ mbrɛ nna ɔtse wɔ tsetse Israel no, ehyiadzi ahorow a yɛyɛ no ndɛ no ma yenya ho kwan nye hɛn mfɛfo agyedzifo mpempem pii bɔ mu som Jehovah. Nsɛm ahorow a hɛn nsa ka wɔ hɔ no boa hɛn ma yɛbɛn Jehovah, na hɛn enyi gye ne nyinara ho. Hɛn enyi sɔ ber a yenya nye hɛn anyɛnkofo na hɛn ebusuafo bɔ no so. Enyisɔ kɛse a yɛwɔ ma dɛm dwumadzi yi no ka hɛn ma yɛkɔ ehyiadzi no bi nda ebiasa no nyina.

Sɛ yenya ho kwan hyia mu dɛm a, ɔnnsɛ dɛ yɛdwen dza hɛn nko yebenya no ho, mbom ɔwɔ dɛ yɛdwen mbrɛ yebotum ada ɔdɔ edzi akyerɛ afofor so no ho. (Ga 6:10; Heb 10:24, 25) Sɛ yesuo abow bi mu ma hɛn nuabanyin anaa hɛn nuabaa bi, anaa yegya egua a yebehia no nkotsee to hɔ a, nna yɛreda no edzi dɛ yɛdwen afofor so ho. (Php 2:3, 4) Ehyiadzi ahorow no bue kwan soronko bi ma yetum dze nya anyɛnkofo afofor. Ansaana wɔbɛhyɛ dwumadzi no ase anaa ber a wɔapon anaa wɔ ahomgye no mu no, yebotum dze ayɛ hɛn botae dɛ yɛnye obi a yennyim no no bɛkasa. (2Co 6:13) Anyɛnkofa a yebenya no wɔ dɛm aber yi mu no botum atsena hɔ daa! Dza ɔkyɛn ne nyina no, sɛ nkorɔfo hu dɛ yɛreda ɔdɔ mapa edzi a, wobotum esi gyinae dɛ wɔbɛba abɛka hɛnho ma yaasom Jehovah.​—Joh 13:35.

HWƐ VIDEO A WƆATO DZIN “ƆDƆ MMBƆ ADZE DA”! AMANAMAN NTAMU EHYIADZI AHOROW NO, NA YIYI NSƐMBISA A ODZIDZI DO YI ANO:

• Ebɛn kwan do na wɔdaa ɔdɔ edzi kyerɛɛ hɔn a wɔmaa wɔkɔr afe 2019 amanaman ntamu ehyiadzi ahorow no bi no?

• Ebɛnadze ntsi na ɔdɔ na koryɛ a ɔwɔ Jehovah no nkorɔfo mu no da nsew?

• Ɔdɔ a ɔwɔ dɛ Christianfo da no edzi no, n’afã ahorow bɛn na Akwankyerɛ Kuw no mufo no maa ɔdaa edzi?

• Ebɛn kwan do na ɔdɔ a Christianfo da no edzi no aka hɛn nuanom a wɔwɔ Germany na South Korea no abɔ mu?

• Ɔwɔ dɛ yesi hɛn bo dɛ yɛbɛyɛ dɛn?