Ebɛn nsɛndzendzen na ihyia no da biara da? Aso eyɛ ebusuatsir bi a iridzi asodzi pii ho dwuma? Ana eyɛ baatankor bi a erobɔ mbɔdzen dɛ ebɔhwɛ w’ebusua? Ana eyɛ abofra bi a w’etsipɛmfo retseetsee wo wɔ skuul? Aso yarba anaa mpanyinyɛ retseetsee wo anaa? Ɔsor obiara na ne haw. Christianfo piinara na worihyia nsɔhwɛ ahorow wɔ ber kor no ara mu. Naaso, ɔrennkyɛr Jehovah bɛgye hɛn efi dɛm ɔhaw ahorow yi nyinara mu.​—2Co 4:16-18.

Onkesi dɛ dɛm aber no bɛba no, yenyim dɛ Jehovah tse ɔhaw ahorow a yɛrefa mu no ase na n’enyi sɔ hɛn nokwardzi nye abotar a yɛreda no edzi no. Afei so yenyim dɛ daakye obehyira hɛn kɛse, ntsi iyinom ma yenya awerɛkyekyer. (Jer 29:11, 12) Hɛn asɛm hia Jesus so papaapa. Aber a yeridzi dwuma ahorow a ɔhyɛ hɛn nsa dɛ Christianfo no, yenyim dɛ ɔama hɛn awerɛhyɛmu dɛ: “Menye hom wɔ hɔ.” (Mt 28:20) Sɛ yesie abotar dwendwen fahodzi a daakye yebenya wɔ Nyankopɔn n’Ahendzi no ase no ho a, ɔbɛhyɛ enyidado a yɛwɔ nye hɛn bo a yeesi dɛ yebegyina ɔhaw a yerihyia no ndɛ ano no mu dzen.​—Ro 8:19-21.

HWƐ VIDEO A WƆATO DZIN ABER A MFRAMA NO REBƐN NO, KƆ DO FA W’ADWEN SI JESUS DO!​—NHYIRA A AHENDZI NO DZE BƐBA DAAKYE NO, NA YIYI NSƐMBISA A ODZIDZI DO YI ANO:

• Adasamba sii dɛn twee hɔnho fii Nyankopɔn ho, na ebɛn nsunsuando na iyi dze aba?

• Ebɛn daakye na ɔwɔ hɔ ma hɔn a wodzi Jehovah nokwar no?

• Dɛm daakye fɛɛfɛw yi besi dɛn aba mu?

• Ebɛn nhyira na erohwɛ kwan dzendzenndzen wɔ wiadze fofor no mu?