Wiadze a yɛtse mu no ma yenya adwen dɛ gyama bɔn yɛ papa na papa so yɛ bɔn. (Isa 5:20) Awerɛhosɛm nye dɛ, nyimpa binom yɛ ndzɛmba bi a Jehovah kyir. Dɛm ndzɛmba no mu bi nye hɔn a hɔn bɔbea yɛ kor a wɔnye hɔnho nya nda mu nkitahodzi. Hɛn mba a wɔkɔ skuul no etsipɛmfo anaa afofor botum adaadaa hɔn ma woeedzi hɔn ekyir. Ibesi dɛn esiesie wo mba ma woeetum egyina dɛm sɔhwɛ yi nye nsɔhwɛ afofor a ɔtse dɛm no ano?

Ma wo mba nnya Jehovah ne gyinapɛn ho nyimdzee. (Le 18:3) Hwɛ mfe a wo mba no edzi nye hɔn nyimdzee na kyerɛkyerɛ hɔn dza Bible no kã fa banyin na basia ntamu nda ho no nkakrankakra. (De 6:7) Bisa woho dɛ: ‘Aso matsetse me mba no yie mbrɛ ɔbɛyɛ a sɛ obi pɛ dɛ osuo hɔn mu wɔ kwan bɔn bi do a wobohu? Aso wonyim siantsir a no ho hia dɛ wɔhyɛ ntar a ɔfata? Aso wonyim siantsir a ɔnnsɛ dɛ wɔma kwan ma obi hwɛ hɔn ho anaa ɔdze ne nsa ka hɔn adagyaw? Aso me mba no nyim dza wɔbɛyɛ aber a obi pɛ dɛ ɔma wɔhwɛ ponografi anaa ɔma wɔyɛ biribi a Jehovah mmpɛ?’ Sɛ ema wo mba no nya dɛm ndzɛmba ahorow yi ho nyimdzee ntsɛm a, ɔbɔboa hɔn ma woeekwetsir ɔhaw ahorow. (Mbɛ 27:12; Ɔsɛ 7:12) Sɛ etsetse wo mba no yie a, nna ereda no edzi dɛ w’enyiwa sɔ egyapadze a ɔsom bo a Jehovah dze ama wo no.​—Nd 127:3.

HWƐ VIDEO A WƆATO DZIN SI OFIE A OBETSIM​—BƆ WO MBA HO BAN FI “BƆN HO” NO, NA YIYI NSƐMBISA A ODZIDZI DO YI ANO:

• Ebɛnadze ntsi na ɔyɛ dzen ma binom dɛ wɔbɛkyerɛkyerɛ hɔn mba nda ho adze?

• Ebɛnadze ntsi na ɔsɛ dɛ awofo tsetse hɔn mba wɔ “Ewuradze setsie nye kasakyerɛ mu”?​—Eph 6:4

• Ebɛnadze na Jehovah n’ahyehyɛdze no ayɛ a ɔbɔboa awofo ma woeetum akyerɛkyerɛ hɔn mba nda ho adze?​—w19.05-TW 12, adakaba

• Ebɛnadze ntsi na ɔsɛ dɛ etaa nye wo mba bɔ nkɔmbɔ ansaana ɔhaw bi mpo aba?