Afe biara, Jehovah no nkorɔfo hwɛ kwan dɛ wobehyia mu na woeedzi Nkaadzi no. Adapɛn a odzi Nkaadzi no enyim nye adapɛn a odzi Nkaadzi no ekyir nyina mu no, yɛdze hokwan a yebenya biara yi Jehovah ayɛw na yɛda no ase dɛ ɔdze werdam no maa hɛn. (Eph 1:3, 7) Dɛ nhwɛdo no, yɛyer hɛnho paa to nsa frɛ nkorɔfo dɛ wɔmbra Nkaadzi no bi. Binom so wɔ hɔ a, wotum yɛ nhyehyɛɛ mbrɛ ɔbɛyɛ a wobotum ayɛ akwampaa aboafo na wɔdze ndɔnhwer 30 anaa 50 aka asɛmpa no wɔ March anaa April bosoom no mu. Aso epɛ dɛ edze ber pii yɛ asɛnka edwuma no wɔ Nkaadzi ber no mu? Ebɛnadze na ɔbɔboa wo ma eetum ayɛ iyi?

Mpɛn pii no, sɛ yesusu biribi ho a, yetum yɛ no yie. (Mbɛ 21:5) Ɔnnkyɛr biara na Nkaadzi ber no aso, ntsi dɛm aber yi ara na ɔsɛ dɛ yɛhyɛ ase siesie hɛnho. Hwehwɛ akwan a ibotum afa do ayɛ pii wɔ asɛnka edwuma no mu. Ibotum dze botae ahorow esisi w’enyi do na aadwendwen kwan a ibotum afa do edu botae ahorow yi ho. Ɔno ekyir no, serɛ Jehovah dɛ ɔmboa wo ma dzi nhyehyɛɛ a ayɛ no do.​—1Jo 5:14, 15.

Ebɛn akwan ahorow na ibotum afa do ayɛ pii wɔ asɛnka edwuma no mu wɔ Nkaadzi ber no mu?