Sɛ yɛtse afofor ase, yehu hɔn ehiadze, hɔn suban, na yɛtse mbrɛ wosi tse nka no ase a, ɔkyerɛ dɛ yɛreda nkãtse edzi. Sɛ yɛtse nka ma afofor a, wohu. Sɛ yebotum ada dɛm su yi edzi a, ɔwɔ dɛ yenya ɔpɛ dɛ yɛbɔboa afofor. Sɛ yɛda nkãtse edzi wɔ asɛnka mu a, nna yerusũasua Jehovah no dɔ na ne ntseasee, na iyi bɛma nkorɔfo atwe abɛn no.​—Php 2:4.

Nkãtse a wɔda no edzi no nnyɛ nkyerɛkyerɛ bi kɛkɛ; ɔwɔ dɛ otum da edzi wɔ hɛn ndzeyɛɛ mu, mbrɛ yesi tsie asɛm, mbrɛ yesi kasa, mbrɛ yesi totow hɛn nsa, nye mbrɛ yesi yɛ hɛn enyim nyina mu. Sɛ yefi hɛn akoma mu dwen afofor ho a, nna ɔkyerɛ dɛ yɛreda nkãtse edzi. Ɔwɔ dɛ yɛhyɛ ndzɛmba a hɔn enyi gye ho, dza wɔgye dzi nye tsebea a wɔwɔ mu no nsew. Yebotum dze nyansahyɛ na mboa a wohia ama hɔn naaso onnyi dɛ yɛhyɛ hɔn dɛ wɔnyɛ nsakyer. Sɛ hɔn a yɛkã asɛm no kyerɛ hɔn no gye mboa a yɛdze ma hɔn no to mu a, ɔma yenya enyigye kɛse wɔ asɛnka edwuma no mu.

HWƐ VIDEO A WƆATO DZIN NYA DƐW A ƆWƆ ESUAFOYƐ EDWUMA MU NO BI​—TU MPON WƆ WO NKYERƐKYERƐ MU​—DA NKÃTSE EDZI NO, NA YIYI NSƐMBISA A ODZIDZI DO YI ANO:

• Neeta sii dɛn daa nkãtse edzi aber a Sandy kaa ekyir wɔ ber a wɔhyɛɛ dɛ wobehyia mu esũa adze no?

• Neeta sii dɛn daa nkãtse edzi aber a Sandy kãa dɛ ɔaberɛ ntsi orunnsũa adze no?

• Neeta sii dɛn daa nkãtse edzi aber a Sandy kãa dɛ ɔnodze ɔkeka ne ndzɛmba bɔ mu no?