Mpaabɔ ahorow a Jehovah ebua dze, ɔnnyɛ na wɔ Bible no mu. Yebotum dze hɛn nsa esi hɛn bo aka dɛ, sɛ nna Nyankopɔn n’asomfo ka hɔn haw kyerɛ Jehovah na wohu dɛ ɔaboa hɔn a, nna ɔhyɛ hɔn gyedzi dzen paa. Ntsi hɛn so, sɛ yɛrobɔ mpaa a, ɔbɛyɛ papa dɛ yɛka dza ohia hɛn pɔtsee no ho asɛm kyerɛ Jehovah. Afei, ɔsɛ dɛ yɛdze hɛn enyi to famu na yɛhwɛ mbrɛ Jehovah besi ebua hɛn mpaabɔ no. Naaso ɔwɔ dɛ yɛma ɔtsena hɛn adwen mu dɛ, mbuae a Jehovah dze bɛma hɛn no botum ayɛ soronko efi dza yebisae no ho. Anaa mpo dɛ dza yebebisa no, ɔdze bɛma hɛn ma wɔaabor do. (2Co 12:7-9; Eph 3:20) Sɛ yebisa biribi fi Jehovah hɔ a, ebɛn mbuae na obotum dze ama hɛn?

• Obotum ama hɛn ahoɔdzen, akomatɔyamu, anaa gyedzi dze egyina ɔhaw no ano.​—Php 4:13

• Obotum ama hɛn nyansa ma yɛdze esi gyinae pa.​—Jas 1:5

• Obotum ama yeenya ɔpɛ na ahoɔdzen dze ayɛ tsebea no ho biribi.​—Php 2:13

• Sɛ dadwen hyɛ hɛn do a, obotum ama hɛn asomu aadwe hɛn.​—Php 4:6, 7

• Obotum ama afofor aakyekye hɛn werɛ na wɔaahyɛ hɛn nkuran, anaa wobotum aboa hɛn ma hɛn nsa aaka dza yehia.​—1Jo 3:17, 18

• Obotum aboa hɔn a yɛbɔ mpaa ma hɔn no.—Adw 12:5, 11

HWƐ VIDEO A WƆATO DZIN JEHOVAH ‘TSIE MPAABƆ’ NO, NA YIYI NSƐMBISA A ODZIDZI DO YI ANO:

• Sɛ yarba ntsi yenntum nnyɛ pii a, ebɛn nkuranhyɛsɛm na yebotum enya efi Onua Shimizu n’asɛm no mu?

• Yebesi dɛn esuasua Onua Shimizu?