SIANTSIR A NO HO HIA: Nyankopɔn n’Asɛm a yesũa no dɛ ankorankor no boa hɛn ma ‘yehu nokwar no ne tɛtɛr no nye tsentsen nye krɔn no, nye bun no.’ (Eph 3:18) Ɔsan so boa hɛn ma yɛkɔ do dzi mu na yenndzi dzɛm biara wɔ wiadze bɔn yi mu, na ‘yekura nkwasɛm no mu’ dzendzenndzen. (Php 2:15, 16) Nyankopɔn n’Asɛm a hɛnankasa sũa no ma yenya ho kwan dze paw nsɛm a yehia dɛ ankorankor. Yɛbɛyɛ dɛn dze hɛn ber edzi dwuma yie na yeenya mfaso pii efi Bible no a yebosũa na yɛakenkan no mu?

MBRƐ EBƐYƐ NO:

• Hyɛ nyiyimu ahorow bi nsew na kyerɛw dza esũa efi Bible a woara dze sũa adze no mu no gu krataa anaa elɛktrɔnek efir bi do

• Aber a erekenkan Nyankopɔn n’Asɛm no bisa woho dɛ: ‘Woana? Ebɛnadze? Aber bɛn? Henfa? Ebɛnadze ntsi a? Ebɛn kwan do?’

• Hwehwɛ nokwasɛm no. Fa edwindadze a yɛdze yɛ nhwehwɛmu a ewɔ no hwehwɛ Bible mu asɛntsir anaa nyiyimu bi a epɛ no

• Dwendwen dza ekenkan no ho na hu siantsir a asɛm no fa woara woho

• Fa dza isũa no dzi dwuma wɔ wo dabiara da asetsena mu.—Lu 6:47, 48

HWƐ VIDEO A WƆATO DZIN KƆ DO ‘KURA MU’ DZENDZENNDZEN​—DZE NAM ANKORANKOR ADZESUA A OTU MPON DO NO, NA YIYI NSƐMBISA A ODZIDZI DO YI ANO:

• Ebɛn nsɛm na binom akã afa ankorankor adzesũa ho?

• Ebɛnadze ntsi na ɔsɛ dɛ yɛdze mpaabɔ hyɛ ankorankor adzesũa biara a yɛbɛyɛ no ase?

• Ebɛnadze na obotum aboa hɛn ma yaatse Bible mu asɛm bi ase yie?

• Ebɛnadze na yebotum dze ahyehyɛ ndzɛmba ahorow nsew wɔ hɛn Bible a yɛdze sũa adze no mu?

• Sɛ yerusũa Nyankopɔn n’Asɛm no a, ebɛnadze ntsi na no ho hia dɛ yɛdwendwen ho?

• Ebɛnadze na ɔsɛ dɛ yɛdze dza yesũa no yɛ?