Ofitsi January 2018 na wɔdze mbrɛ yebotum abɔ nkɔmbɔ ho nhwɛdo aba Hɛn Asɛnka Nye Christianfo Asetsena​—Nhyiamu Dwumadzi Nwoma no enyim. Ebɛn kwan na yebotum afa do dze edzi dwuma?

Aber A Wɔama Wo Esuafo Dwumadzi: Ɔwɔ dɛ edze asɛmbisa, kyerɛwsɛm, nye asɛm a wɔdze ama dɛ wonsusu ho ber fofor no dzi dwuma. Naaso, iyi nnkyerɛ dɛ ɔwɔ dɛ ekyer nsɛm a wɔakã wɔ mbrɛ yebotum abɔ nkɔmbɔ ho video mu no gu wo tsir mu na ekã no pɛpɛɛpɛr. Ibotum dze mbue-enyim nsɛm fofor bi ahyɛ ase, ebisa asɛm no wɔ kwan fofor bi do, afa kwan fofor bi do nye wo fiewura no esusu asɛm kor no ara ho, nye dza ɔkeka ho. Sɛ wɔannkã dɛ fa nwoma bi a ɔwɔ Edwindadze Etsitsir A Yɛdze Kyerɛkyerɛ no mu mpo ma a, ibotum dze bi ama wo fiewura no wɔ wo dwumadzi no mu.

Wɔ Asɛnka Mu: Wɔayɛ mbrɛ yebotum abɔ nkɔmbɔ no dɛ ɔmboa hɛn ma yennya nsɛm a yebotum dze akɔ asɛnka. Sɛ obi kyerɛ asɛm no ho enyigye na ɔpɛ dɛ osũa pii ka ho a, ibotum dze sankɔhwɛ ho nhwɛdo a wɔdze ama no edzi dwuma na enye no atoa nkɔmbɔ no do. Ibotum ayɛ nsesa wɔ mbrɛ yebotum abɔ nkɔmbɔ ho nhwɛdo no mu, anaa mpo dɛ ibotum dze asɛm fofor bi koraa edzi dwuma. Aso asɛntsir bi a ɔwɔ bosoom fofor bi mu anaa kyerɛwsɛm fofor bi na nyimpa a wɔwɔ w’asaasesin mu no enyi bɛgye ho? Ana nyimpa a wɔwɔ w’asaasesin no mu no enyi gye ho dɛ wɔbɔbɔ asɛm bi a woesi ndaansa yi ara anaa biribi fofor bi a ɔtse dɛm a woesi ho nkɔmbɔ? Ɔmmfa ho kwan biara a ebɛfa do dze mbrɛ yebotum abɔ nkɔmbɔ no edzi dwuma no, adze a ɔsɛ dɛ edze yɛ wo botae nye dɛ “asɛmpa no ntsi,” ebɛyɛ dza ibotum biara na aama etum akã asɛm no akyerɛ afofor.​—1Co 9:22, 23.