Mfonyin ahorow a wɔdze dzi dwuma no tum ma nyia ɔrohwɛ no yɛ aso ma dza wɔrekyerɛ no no, ɔtse ase, na ɔmma no werɛ so mmfir. Hɛn Kyerɛkyerɛfo Kunyin, Jehovah, dze mfonyin dzii dwuma dze kyerɛkyerɛɛ esuadze etsitsir bi mu. (Ge 15:5; Jer 18:1-6) Dɛmara so na Ɔkyerɛkyerɛfo Kɛse, Jesus, so dze dzii dwuma. (Mt 18:2-6; 22:19-21) Ndaansa yi, mfonyin ahorow a wɔdze ayɛ edwuma ma mfaso aba do papaapa no, no mu kor nye video. Ana edze video ahorow reyɛ edwuma yie dze akyerɛkyerɛ wo Bible esuafo?

Woesiesie video ahorow du dɛ ɔmboa hɛn ma yɛnkyerɛkyerɛ esuadze ahorow a ɔwɔ Asɛmpa A Ofi Nyankopɔn Nkyɛn! nwomaba no mu. Sɛ ehwɛ nwomaba no mu a, ibohu nsɛmbisa ahorow bi a wɔdze dubir akyerɛw no akɛse, na dɛm nsɛmbisa yi no mu bi na wɔdze ayɛ video ahorow no n’asɛntsir. Sɛ ekɔ jw.org do a, Asɛmpa nwomaba no a ibotum akenkan wɔ do no, ɔwɔ afã ahorow bi a ɔkaa hɛn ber a ɔsɛ dɛ yeyi video no mu biara. Afei so, sɛ ehwɛ Edwindadze Etsitsir A Yɛdze Kyerɛkyerɛ no mu a, ibohu nwoma ahorow bi a yɛdze sũa Bible, na dɛm nwoma yi so, wɔayɛ video ahorow aka ho.

Ana enye wo Bible suanyi rususu Bible mu asɛntsir bi ho, naaso ɔyɛ dzen ma no dɛ ɔbɛtse ase? Anaa wo Bible suanyi no rihyia nsɔhwɛ pɔtsee bi? Hwehwɛ video ahorow a ɔwɔ jw.org® na JW Broadcasting® do no mu na pɛ dza ɔbɔboa no. Bi a ibotum nye wo Bible suanyi no abɔ mu ahwɛ no mu kor na hom eesusu ho.

Bosoom biara, woyi video afofor edzi. Aber a erohwɛ no, dwendwen kwan a ebɛfa do dze ayɛ edwuma aber a erekyerɛkyerɛ afofor no ho.