Jehovah pɛ dɛ yefi ɔdɔ a yɛwɔ ma no no mu som no. (Mt 22:37, 38) Ɔyɛ ɔdɔ a Bible esuafo wɔ ma Nyankopɔn no na ɔboa hɔn ma wotum yɛ nsesa na wogyina ɔtaa ano pintsinn. (1Jo 5:3) Afei so, ɔdɔ a Bible esuafo wɔ ma Nyankopɔn no na opusuw hɔn ma wonuma hɔn.

Boa wo Bible esuafo ma wonhu dɛ Nyankopɔn dɔ hɔn. Bisa hɔn nsɛm bi tse dɛ: “Ebɛnadze na iyi ma ihu fa Jehovah ho?” anaadɛ “Ebɛn kwan do na iyi da ɔdɔ a Jehovah wɔ ma wo no edzi?” Boa hɔn ma wonhu mbrɛ Jehovah roboa hɔn ankasa. (2Mb 16:9) Kã suahu ahorow a ɔkyerɛ mbrɛ Jehovah ebua wankasa wo mpaabɔ ahorow ho asɛm kyerɛ hɔn, na hyɛ w’esuafo no nkuran ma wɔnhyɛ mbrɛ Jehovah bua hɔn mpaabɔ ahorow no nsew. Sɛ yehu dɛ hɛn Bible esuafo tse nka dɛ Jehovah dɔ hɔn, na hɔn so da no edzi dɛ wɔdɔ Jehovah na wɔpɛ dɛ wɔyɛ ne nyɛnko a, ɔma hɛn enyi gye papaapa.

HWƐ VIDEO A WƆATO DZIN BOA WO BIBLE ESUAFO MA WƆNYE JEHOVAH NNYA EBUSUABƆ NO, NA YIYI NSƐMBISA A ODZIDZI DO YI ANO:

• Ebɛn nsɛndzendzen na Sandy hyiae?

• Ebɛnadze na Neeta yɛe dze boaa Sandy?

• Ebɛnadze na Sandy yɛe dze dzii nsɛndzendzen no do?