Osiandɛ David dze noho too Jehovah do ntsi, odzii Goliath do konyim. (1Sa 17:45) Jehovah wɔ ɔpɛ dɛ ɔdze n’ahoɔdzen bɔboa n’asomfo nyinara. (2Mb 16:9) Dɛ nkyɛ yɛdze hɛnho bɔto hɛn suahu nye ndzɛmba a yetum yɛ do no, ɔwɔ dɛ yɛdze hɛnho to mboa a Jehovah dze ma hɛn no do mbom. Ibesi dɛn ayɛ dɛm? Ibotum ayɛ ndzɛmba ebiasa a odzidzi do yi:

• Taa bɔ mpaa. Onnyi dɛ ebɔ mpaa dze serɛ bɔnfakyɛ nkotsee, na mbom ɔwɔ dɛ eserɛ ahoɔdzen a edze begyina nsɔhwɛ ano so. (Mt 6:12, 13) Onnyi dɛ ebɔ mpaa serɛ Jehovah dɛ onhyira gyinae a esisi no do nkotsee, na mbom ansaana ibesisi gyinae afofor so no serɛ no dɛ ɔmma wo akwankyerɛ nye nyansa a edze bɛyɛ dɛm.​—Jas 1:5

• Yɛ nhyehyɛɛ fa kenkan Bible no na sũa. Kenkan Bible no da biara da. (Nd 1:2) Gye ber dwendwen nkorɔfo a hɔnho nsɛm wɔ Bible mu no ho, na fa dza isũa fi hɔn asɛm no mu no yɛ edwuma. (Jas 1:23-25) Sɛ erobɔkɔ asɛnka a, mma mmfa woho nnto dza inyim dada no do, mbom gye ber siesie woho yie. Sũa dza wobosũa wɔ asafo nhyiamu ase no yie ansaana aakɔ, na iyi bɛma enya nhyiamu no do mfaso kɛse

• Enye Jehovah n’ahyehyɛdze no mbɔ anan. Hwehwɛ akwankyerɛ afofor a ahyehyɛdze no dze ma no, na fa yɛ edwuma ntsɛmara. (Nk 9:17) Tsie afotu nye akwankyerɛ a asafo mu mpanyimfo dze ma no.​—Heb 13:17

HWƐ VIDEO A WƆATO DZIN ONNYI DƐ YESURO ƆTAA BIARA NO, NA YIYI NSƐMBISA A ODZIDZI DO YI ANO:

• Ebɛn ndzɛmba na nna enuanom no mu biara suro?

• Ebɛnadze na ɔboaa hɔn ma wodzii hɔn suro no do?