Yɛwɔ video ahorow anan bi a ɔka Bible a yɛnye nkorɔfo sua no ho asɛm a yebotum dze edzi dwuma wɔ asɛnka mu. Ebɛnadze ntsi na wɔyɛɛ video yi mu biara?

• Ebɛnadze Ntsi Na Ɔsɛ Dɛ Isua Bible No?​—Video Mu No Nyina: Wɔyɛɛ dɛm video yi mbrɛ ɔbɛyɛ a ɔbɔboa nkorɔfo ma hɔn enyi agye Bible no ho ɔmmfa ho ɔsom biara a wɔwɔ mu no. Video yi hyɛ nkorɔfo nkuran dɛ wobotum enya nsɛmbisa a no ho hia paa wɔ asetsena mu no ho mbuae wɔ Bible no mu. Na dɛm nsɛmbisa a yɛreka ho asɛm yi, wɔakyerɛkyerɛ no mu kor mu wɔ video no mu. Afei so sɛ obi pɛ dɛ osua Bible no a, ɔbɛkyerɛ no dza ɔwɔ dɛ ɔyɛ.

• Ebɛnadze Ntsi Na Ɔsɛ Dɛ Isua Bible No? (dza woetwa no tsia): No mu nsɛm tse dɛ video mu no ara, mbom ne tsentsen nndu minitsi ebien mpo. Asaasesin bi wɔ hɔ a hɔn a wɔwɔ mu no nnyi adagyer koraa, ntsi sɛ yɛdze video yi yɛ edwuma wɔ mu a obotum aboa paa.

• Sɛ Yɛnye Obi Rusua Bible No A, Yɛyɛ No Dɛn?: Wɔayɛ video yi wɔ kwan bi do a ɔbɛma nkorɔfo hɔn enyi agye Bible adzesua a yɛnye nkorɔfo yɛ a wonntua hwee no ho. Ɔsan so bua nsɛm a nkorɔfo taa bisa fa Bible a yɛnye nkorɔfo sua no ho. Afei so, sɛ obi pɛ dɛ osua Bible no a ɔbɛkyerɛ no dza ɔwɔ dɛ ɔyɛ.

• Akɔaba Ba Wo Bible Adzesua Yi Ase: Wɔayɛ video yi dɛ yenyi nkyerɛ hɛn Bible esuafo. Ɔwɔ mu dɛ wɔatwe adwen esi video yi do wɔ Ibotum Enya Enyigye Daa! buukuu no ne krataafa ebien no dze, naaso yebotum eyi aber a yɛnye obi rubosua Ibotum Enya Enyigye Daa! nwomaba no so. Video yi ma yehu buukuu no no mu nsɛm na ɔma osuanyi no hu mbrɛ adzesua no bɔkɔ.

Ɔwɔ mu dɛ video yi mu biara wɔ dwuma a odzi, naaso ibotum eyi no mu biara akyerɛ obi anaa edze amona no aber biara a ɔfata. Ɔwɔ dɛ hɛn mu biara bɔ mbɔdzen hu mbrɛ ɔdze video ahorow yi mu biara bedzi dwuma yie wɔ asɛnka mu.