CHRISTIANFO ASETSENA
Mbrɛ Ibesi Aboa Hɔn A Atoyerɛnkyɛm Bi Ato Hɔn No
Ndaansa yi dze, atoyerɛnkyɛm taa sisi paa. Ntsi sɛ atoyerɛnkyɛm bi si a, yɛyɛ nhyehyɛɛ pa a yebotum afa do aboa hɛn nuanom ama biribiara etum akɔ do kama. Osian iyi ntsi, Akwankyerɛ Kuw no ayɛ nhyehyɛɛ ma wɔatsew Atoyerɛnkyɛm Ber Mu Mboa Dwumadzibea wɔ Bethel ahorow nyina mu.
Sɛ enuanom a wɔwɔ Atoyerɛnkyɛm Ber Mu Mboa Dwumadzibea no mu no tse dɛ atoyerɛnkyɛm bi esi wɔ beebi a, wɔfrɛ asafo mu mpanyimfo a wɔwɔ dɛm bea no ntsɛmara hwɛ mboa a enuanom a wɔwɔ hɔ no behia. Sɛ ndzɛmba asɛɛ wɔ hɔ paa ma ntsi enuanom a wɔwɔ hɔ no nkotsee runntum nnsiesie a, Bethel bɛyɛ nhyehyɛɛ ma enuanom a wɔfata abɔhwɛ ma wɔaayɛ edwuma no. Enuanom a Bethel beyi hɔn yi behia etuhoakyɛfo ma wɔaaboa hɔn. Bi so a, wɔbɛma enuanom dze ndzɛmba pɔtsee bi a wɔdze bɔboa hɔn a atoyerɛnkyɛm ato hɔn no aba, anaaso mpo dɛ wɔbɛpɛ dɛm ndzɛmba yi bi atɔ na wɔdze ama enuanom no.
Sɛ enuanom dze hɔn pɛ yɛ ndzɛmba aber a atoyerɛnkyɛm bi esi no a, mpɛn pii no ɔma enuanom a ɔwɔ dɛ wɔyɛ dɛm edwuma no hɔn berɛ yɛ gyan, yɛsɛɛ sika na ɔma ndzɛmba yɛ basaa. Naaso sɛ yedzi nhyehyɛɛ a yɛaka ho asɛm yi do a, ɔma biribiara kɔ do pɛpɛɛpɛr.
Enuanom a Bethel beyi hɔn dɛ wɔmbɔboa no botum akyerɛ sika na etuhoakyɛfo dodow a wobehia ayɛ edwuma no. Wobotum so nye aban mpanyimfo a wɔwɔ bea atoyerɛnkyɛm esi no esusu nsɛm ho, na wɔaaboa ma edwuma no aakɔ do ntsɛntsɛm. Ntsi sɛ atoyerɛnkyɛm bi si a, onnyi dɛ obiara dze ne pɛ gyegye sika anaa ndzɛmba afofor anaa ɔkɔ hɔ dɛ ɔrokɔboa enuanom a hɔnho aka no gyedɛ wɔama no kwan dɛ ɔnyɛ dɛm.
Naaso mbrɛ ɔtse biara no, yɛpɛ dɛ yɛboa hɛn nuanom aber a atoyerɛnkyɛm bi ato hɔn no. (Heb 13:16) Hɛn nuanom no dze, wɔda hɛn akoma do papaapa! Ntsi ebɛnadze na yebotum ayɛ dze aboa hɔn wɔ atoyerɛnkyɛm ber mu? Adze a ohia paa a yebotum ayɛ nye dɛ yɛbɔbɔ mpaa ama hɔn a hɔnho aka no nye etuhoakyɛfo a wɔroboa no. Yebotum so eyi ntoboa dze aboa wiadze nyina som edwuma no. Akwankyerɛ Kuw no ayɛ nhyehyɛɛ dɛ Bethel ahorow no nkyerɛ mbrɛ wɔdze ntoboa ahorow yi bedzi dwuma yie. Sɛ yɛpɛ dɛ yetu hɛnho ma kɔboa ndwuma a ɔtse dɛm so a, ɔwɔ dɛ yɛhyehyɛ Local Design/Construction Volunteer Application (DC-50) fɔɔm no bi.
HWƐ VIDEO A WƆATO DZIN NSUYIRII BI A ƆSƐƐ NDZƐMBA PAA WƆ BRAZIL NO, NA YI ASƐMBISA A ODZI DO YI ANO:
Jehovah Adasefo yɛɛ ndzɛmba ahorow pii boaa hɔn nuanom a wɔwɔ Brazil aber a nsuyirii bi sɛɛ ndzɛmba wɔ hɔ wɔ afe 2020 mu no. Dza wɔyɛe no, no mu hendze na ɔkaa w’akoma?
