Sɛ Bible esuafo botum asɔ Nyankopɔn enyi a, ɔsɛ dɛ wonya gyedzi a no mu yɛ dzen. (Heb 11:6) Yebotum dze Ibotum Enya Enyigye Daa! buukuu no aboa hɔn ma wɔaayɛ dɛm. Wɔ buukuu a yɛdze yɛ Bible adzesua yi mu no, ɔtwe adwen si kyerɛwnsɛm etsitsir bi do, ɔma nkyerɛkyerɛmu ahorow a no mu da hɔ, na nsɛmbisa a ɔma esuafo no susu nsɛm ho so wɔ mu. Afei so, video ahorow a ɔka akoma nye mfonyin ahorow a ɔyɛ fɛw so wɔ mu. Sɛ yɛboa hɛn esuafo ma wonya suban pa a Christianfo wɔ no bi, na wotum nye Nyankopɔn nya ebusuabɔ a, ɔbɛkyerɛ dɛ yɛdze dza ogya nntum nnhyew rotow hɔn fapem no do.​—1Co 3:12-15.

Binom susu dɛ worunntum mmfa Nyankopɔn nyɛnko, osiandɛ wɔmmfa hɔn enyi nnhu no. Dɛm ntsi ɔwɔ dɛ yɛboa hɔn ma wobenya gyedzi wɔ ɔdɔ Nyankopɔn, Jehovah mu.

HWƐ VIDEO A WƆATO DZIN FA “IBOTUM ENYA ENYIGYE DAA!” BUUKUU NO BOA NKORƆFO MA WONNYA GYEDZI WƆ JEHOVAH MU NO, NA YIYI NSƐMBISA A ODZIDZI DO YI ANO:

• Yesi dɛn hu dɛ akyerɛbaa no sũaa dza nna ɔdze rekɛkyerɛkyerɛ no suanyi no yie ansaana ɔrekɛsera no?

• Ebɛn nsɛmbisa afofor na ɔdze dzii dwuma dze boaa no suanyi no ma ɔkãa mbrɛ nna osi tse nka wɔ Isaiah 41:10, 13 ho?

• Video a wɔhwɛe nye kyerɛwnsɛm a wɔkenkanee no kaa osuanyi no dɛn?

Nyimpa pii nnyim mfaso a ɔwɔ werdam no do, anaaso dɛ wommbu werdam no dɛ ɔyɛ akyɛdze a Nyankopɔn dze ama hɛn mu biara. (Ga 2:20) Osian iyi ntsi, ɔwɔ dɛ yɛboa hɔn ma wonya gyedzi wɔ Jesus no werdam afɔrbɔ no mu.

HWƐ VIDEO A WƆATO DZIN FA “IBOTUM ENYA ENYIGYE DAA!” BUUKUU NO BOA NKORƆFO MA WONNYA GYEDZI WƆ JESUS MU NO, NA YIYI NSƐMBISA A ODZIDZI DO YI ANO:

• Yesi dɛn hu dɛ onua no sũaa dza nna ɔdze rekɛkyerɛkyerɛ no suanyi no yie ansaana ɔrekɛsera no?

• Ebɛn kwan do na ɔdze asɛm bi a ɔwɔ “Hwehwɛ Pii Ka Ho” ɔfã hɔ no boaa no suanyi no?

• Ebɛnadze ntsi na no ho hia paa dɛ hɛn esuafo no ankasa bɔ mpaa?