Aber a wiadze bɔn yi reba n’ewiei no, yɛhwɛ kwan dɛ nyimpa bɛtaa asoɛr etsia etumfo, na basabasayɛ, emumuyɛsɛm, nsɛmbɔndzi nye akokoeko so benya nkɔenyim. (Ny 6:4) Yebesi dɛn esiesie hɛnho ama nsɛm a ɔtsetse dɛm a obesisi daakye no?

• Hwɛ hu dɛ enye Jehovah ntamu ebusuabɔ no yɛ papa: Hwehwɛ Bible mu nsɛm ahorow a ɔbɛma ahotodo a ewɔ wɔ Jehovah nye n’ahyehyɛdze no mu no ayɛ dzen, na ɔbɛsan so aboa wo amma enngyina ɔfã biara ekyir. (Mbɛ 12:5; jr-TW 125-126 ¶23-24) Ndɛ nye ber a ɔsɛ dɛ yɛnye enuanom nya anyɛnkofa a no mu yɛ dzen.​—1Pe 4:7, 8

• Hwɛ hu dɛ ewɔ ndzɛmba a ibotum dze ahwɛ woho: Hwehwɛ ndzɛmba kakra a ibehia no gu hɔ, na sɛ ɔba dɛ irunntum mmpuei a, woho annkyer wo. Afei so ɔwɔ dɛ idzi kan hu beebi a sɛ asɛm bi si a iboguan afa. Ɔwɔ mu ara a, ɔyɛ a hwɛ ndzɛmba a edze ahyɛ baag mu esi hɔ no, na hwɛ dɛ ndzɛmba bi tse dɛ gloves, nose mask na sika hyɛ mu. Hwɛ dɛ ewɔ mpanyimfo no nɔmba, na hɔn so wɔwɔ wodze.​—Isa 32:2; g17.5-TW 3-7

Aber a nkorɔfo asoɛr etsia etumfo no, kɔ do yɛ ndzɛmba a ɔbɛma enye Jehovah ntamu ebusuabɔ no ayɛ papa. (Php 1:10) Mma nnkyinkyin, gyedɛ no ho ebehia dɛ ifi beebi a ewɔ no kɔ beebi fofor. (Mt 10:16) Ɔyɛ a enye afofor nkyɛ edziban nye ndzɛmba bi a ewɔ no.​—Ro 12:13.

HWƐ VIDEO A WƆATO DZIN ANA ESIESIE WOHO AMA ATOYERƐNKYƐM BIARA A OBESI NO? NA YIYI NSƐMBISA A ODZIDZI DO YI ANO:

• Sɛ atoyerɛnkyɛm bi si a, ebɛn kwan na Jehovah bɛfa do aboa hɛn?

• Ansaana atoyerɛnkyɛm bi besi no, ebɛn ndzɛmba na yebotum ayɛ dze esiesie hɛnho?

• Yebesi dɛn aboa hɔn a atoyerɛnkyɛm ama hɔnho aka no?