SIANTSIR A NO HO HIA: Tɛlefon do adasedzi yɛ kwan tsitsir kor a yɛfa do ‘dzi asɛmpa no ho dase kofee.’ (Adw 20:24) * Ɔboa hɛn ma yetum dzi dase aber a tsebea ahorow bi remma hɛn kwan mma yenntum nnkɛsera obi nndzi no dase no.

MBRƐ EBƐYƐ NO:

• Siesie woho. Paw asɛntsir bi a ɔfata. Afei kyerɛw nsɛntsitsir a ebɛpɛ dɛ ekã ho asɛm no to hɔ. Afei so, sɛ ɔkɛba no dɛ bi a efir bi na ɔbɛfa aber a afrɛ no a, siesie asɛm tsiabaa bi a ebɛkã dze akyerɛ siantsir a efrɛe no mu to hɔ. Ɔyɛ papa dɛ ebɛtsena pon bi ho, na ahwɛ ehu dɛ ndzɛmba a ibehia no nyina gu do; tse dɛ nsɛntsitsir a epɛ dɛ ekã ho asɛm no, nye elɛktrɔnek efir a ebue JW Library^® anaa jw.org^® wɔ do prɛko

• Sie abotar. Kasa dɛ mbrɛ ekasa dabiara no. Serew na yɛ w’adze tse dɛ mbrɛ nyimpa no botum ehu wo. Kwetsir dɛ ibegyinagyina wɔ wo kasaa mu dɛ mbrɛ ɔnnsɛ. Ɔbɛyɛ papa dɛ enye nyimpa kor anaa ebien bi bɔbɔ mu ayɛ edwuma. Sɛ fiewura no bisa asɛm bi a, san so si asɛmbisa no do bio ma ompue wɔ w’ano, mbrɛ ɔbɛyɛ a obi a ɔka woho no bɛtse na ɔaaboa wo ma ahwehwɛ mbuae no

• Yɛ sankɔhwɛ ho nhyehyɛɛ to hɔ. Sɛ nyimpa no kyerɛ asɛm no ho enyigye a, ibotum egya no asɛmbisa bi a ibobua wɔ ber fofor a ebɛsan afrɛ no no. Ibotum so dze nwoma pɔtsee bi afa e-mail do amona no, warankasa botum dze akɛma no, anaa ibotum dze amona no. Anaadɛ ibotum dze hɛn video ahorow anaa nsɛm bi a ɔwɔ hɛn nwoma ahorow mu no bi afa tɛst mɛsegye anaa e-mail do ama no. Wɔ ber a ɔfata mu no, ibotum akã biribi fofor bi a ɔwɔ hɛn wɛbsaet no do no ho asɛm akyerɛ no