Tse dɛ hɛn asafo nhyiamu ahorow no, asɛnka nhyiamu so yɛ nhyehyɛɛ a Jehovah dze kenyan hɛn kɔ ɔdɔ nye ndwuma pa mu. (Heb 10:24, 25) Ɔwɔ dɛ ne tsentsen yɛ minitsi enum kesi esuon​—ber a wɔdze bɛkyekyɛ enuanom no, wɔdze bɛkyekyɛ asaasesin, na wɔdze bɔbɔ mpaa nyina so ka ho. (Sɛ wɔyɛ asafo nhyiamu bi ansaana wɔayɛ asɛnka nhyiamu no a, ɔno mpo dze ɔwɔ dɛ asɛnka nhyiamu no yɛ tsiabaa koraa.) Ɔwɔ dɛ onua a ɔbɔhwɛ asɛnka nhyiamu do no siesie nsɛm bi a hɔn a wɔbɔkɔ asɛnka dɛm da no botum dze edzi dwuma. Dɛ nhwɛdo no, sɛ enuanom pii kɔ asɛnka wɔ dapɛn bi ewiei a, gyedɛ Memenda a odzi hɔ bio no ana wɔaasan akɔ asɛnka. Ntsi wɔ Memenda asɛnka nhyiamu ase no, bi a dza enuanom botum nye fiewura bi abɔ ho nkɔmbɔ no ara na obehia dɛ hom susu ho. Ebɛn nsɛm afofor so na bi a hom botum esusu ho?

• Mbrɛ yebotum abɔ nkɔmbɔ ho nhwɛdo bi a ɔwɔ Hɛn Asɛnka Nye Christianfo Asetsena​—Nhyiamu Dwumadzi Nwoma no mu

• Mbrɛ yebotum dze asɛm bi a woesi ndaansa yi ara anaa amandzɛɛbɔ bi ahyɛ nkɔmbɔ ase

• Mbrɛ yebesi ebua asɛm bi a nkorɔfo taa dze yi hɔnho ano wɔ hɛn asaasesin no mu

• Mbrɛ yebesi ebua obi a ɔnngye nndzi dɛ Nyankopɔn wɔ hɔ, obi a ɔgye adandandzi dzi, obi a ɔkã kasa fofor, anaa obi a ɔwɔ ɔsom bi a bi nnyi hɛn asaasesin mu no mu

• Mbrɛ yebesi dze ɔfã bi a ɔwɔ jw.org, JW Library^® app, anaa Bible no mu bedzi dwuma

• Mbrɛ yebesi dze edwindadze bi a ɔwɔ Edwindadze Etsitsir A Yɛdze Kyerɛkyerɛ mu no bedzi dwuma

• Mbrɛ yebesi ayɛ asɛnka edwuma no n’afã ahorow bi tse dɛ tɛlefon do adasedzi, krataakyerɛw, bagua mu adasedzi, sankɔhwɛ, anaa Bible adzesua

• Nkaakaasɛm a obotum aboa hɛn ma yaayɛ ahwɛyie, yaadandan hɛn nsɛm mu, yaada suban pa edzi, yeenya adwempa, anaa biribi fofor a ɔtse dɛm

• Adzesua anaa video bi a ɔwɔ Ma W’enyi Nku Akenkan Na Nkyerɛkyerɛ Ho nwomaba no mu

• Mbrɛ yebesi ahyɛ obi a yɛnye no nam asɛnka mu no nkuran na yaaboa no

• Kyerɛwsɛm bi a ɔfa asɛnka edwuma no ho anaa asɛnka edwuma no ho suahu bi a ɔhyɛ nkuran