Ɔnnkɛkyɛr abotar a Jehovah enya ama hɔn a wɔwɔ wiadze bɔn yi mu no bɛba n’ewiei. Wɔbɛsɛɛ ator som, na amanaman no bɛka hɔnho abɔ mu ato ahyɛ Nyankopɔn no nkorɔfo do. Afei, Jehovah bɛsɛɛ ndzebɔnyɛfo no wɔ Har-Magedon ko no mu. Christianfo nyina rohwɛ kwan dɛ dɛm nsɛm etsitsir a ɔdze enyigye bɛbrɛ hɔn yi besisi.

Nokwasɛm nye dɛ, ɔnnyɛ dza obesisi wɔ ahohiahia kɛse no mu no nyina na yenyim. Bi nye dɛ yennyim ber pɔtsee a ahohiahia kɛse no bɛhyɛ ase. Afei so, yennyim nsɛm a wiadze etumfo no begyina do dze ato ahyɛ ator som do. Bio so, sɛ amanaman no to hyɛ Nyankopɔn no nkorɔfo do a, yennyim ber tsentsen a obedzi na yennyim adze pɔtsee a wɔdze bɛyɛ hɛn so. Nkyii so, yennyim kwan pɔtsee a Jehovah bɛfa do asɛɛ ndzebɔnyɛfo no wɔ Har-Magedon ko no mu.

Naaso, Kyerɛwnsɛm no ma yehu dza ɔwɔ dɛ yɛyɛ no ndɛ ama yeetum dze hɛnho ato Jehovah do na yeenya akokodur dze egyina nsɛm a obesisi daakye no ano. Dɛ nhwɛdo no, yenyim dɛ yɛtse “nda a odzi ekyir” no n’ewiei mu. (2Ti 3:1) Yenyim dɛ sɛ wɔto hyɛ ator som do a, “wobotwa nda no do tsia” mbrɛ ɔbɛyɛ a wɔrennsɛɛ nokwar som so nka ho. (Mt 24:22) Yenyim so dɛ Jehovah botwitwa agye no nkorɔfo. (2Pe 2:9) Afei so, yenyim dɛ Obi a Jehovah eyi no dɛ ɔnsɛɛ ndzebɔnyɛfo na ɔngye nyimpakuw kɛse no nkwa wɔ Har-Magedon ko no mu no yɛ obi a ɔtsen na noho yɛ dzen.—Ny 19:11, 15, 16.

Nsɛm a obesisi daakye no bɛma nyimpa ‘atotɔ akɔtɔmborɔnsa wɔ hu’ ntsi. Naaso, sɛ yɛkenkan mbrɛ Jehovah sii gyee no nkorɔfo mber bi a etwa mu no ho nsɛm nye nsɛm a ɔma yehu dza obesisi daakye na yɛdwendwen ho a, ɔbɔboa hɛn paa. Ɔbɔboa hɛn ma yɛdze akokodur aasoɛr egyina ‘na yaama hɛn tsir do,’ osiandɛ yɛwɔ ahotodo dɛ dɛm aber no nna hɛn nkwagye ber edu.—Lu 21:26, 28.