Sɛ efa nyɛnko a, ebɛn su ahorow na ebɛpɛ dɛ ɔda no edzi? Ekyingye biara nnyi ho dɛ w’enyiwa bɛgye obi a odzi nokwar, ne yamu yie, na obue ne nsamu no ho. Jehovah wɔ dɛm su ahorow yi nyina bi. (Ex 34:6; Adw 14:17) Sɛ ebɔ no mpaa a, otsie. Aber biara a ibehia mboa no, ɔboa wo. (Nd 18:19, 35) Sɛ efom no a, ɔdze kyɛ wo. (1Jo 1:9) Nyew, Jehovah yɛ nyɛnko berɛbo ampa!

Ibesi dɛn abɛyɛ Jehovah ne nyɛnko? Sũa noho adze dze nam n’Asɛm no a ebɛkenkan no do. Kã w’akoma mu nsɛm nyina kyerɛ no. (Nd 62:8; 142:2) Ndzɛmba ahorow a no ho hia Jehovah no, ma dɛm ndzɛmba no nsom bo mma woara so. Dɛm ndzɛmba no bi nye ne Ba no, n’Ahendzi no, nye no bɔhyɛ ahorow a ɔfa daakye ho no. Kã Jehovah ho asɛm kyerɛ nkorɔfo. (De 32:3) Sɛ enye Jehovah nya ebusuabɔ a no mu yɛ dzen a, ɔbɛyɛ wo nyɛnko daa.​—Nd 73:25, 26, 28.

HWƐ VIDEO A WƆATO DZIN MBABUN​—‘HOM NSƆ NHWƐ NA HOM NHU DƐ JEHOVAH YE’ NO, NA YIYI NSƐMBISA A ODZIDZI DO YI ANO:

• Ibesi dɛn esiesie woho ama ahodohyira nye enuma?

• Afofor a wɔwɔ asafo no mu no besi dɛn aboa wo ma eetum asom Jehovah?

• Ebɛn kwan do na asɛnka edwuma no hyɛ ebusuabɔ a enye Jehovah wɔ no mu dzen?

• Ebɛn ɔsom ho kwan ahorow na ɔwɔ hɔ ma wo?

• Ebɛnadze na w’enyi sɔ wɔ Jehovah ho?