Ɔyɛ hɛn enyigye dɛ yeenya nwomaba nye buukuu fofor a yɛdze bɛyɛ Bible adzesua! Yɛbɔ mpaa dɛ Jehovah nhyira mbɔdzen a yɛrobɔ dɛ yɛbɛpɛ esuafo pii no do. (Mt 28:18-20; 1Co 3:6-9) Yebesi dɛn dze dɛm edwindadze afofor yi ayɛ edwuma?

Osiandɛ Ibotum Enya Enyigye Daa! buukuu yi yɛ buukuu fofor a yɛdze bɛyɛ Bible adzesua no ntsi, ɔkyerɛ hɛn kwan fofor a yebotum afa do akyerɛkyerɛ. Aber a yerisiesie hɛnho akɛyɛ Bible adzesua nye ber a yɛnye obi reyɛ adzesua no, ɔwɔ dɛ yedzi akwankyerɛ ahorow a odzidzi do yi ekyir. *

• Hom nkenkan adzesua asɛm no nyinara na hom nsusu nsɛmbisa no ho

• Hom nkenkan kyerɛwnsɛm ahorow a wɔakyerɛ dɛ “kenkan” no, na boa osuanyi no ma onhu kwan a ɔbɛfa do dze ayɛ edwuma

• Hom nhwɛ video ahorow no na hom mfa nsɛmbisa ahorow a wɔdze ama no nsusu ho

• Aber biara a enye wo suanyi no bosũa adze no, bɔ mbɔdzen dɛ wobowie adzesua asɛm kor

Wɔ asɛnka mu no, dzi kan fa nwomaba no ma nyimpa no fa hwɛ dɛ n’enyi gye asɛm no ho anaa. (Hwɛ adakaba a wɔato dzin “ Mbrɛ Edze Ibotum Enya Enyigye Daa! Nwomaba No Bɛma Wɔ Nserahwɛ A Odzi Kan No Mu.”) Sɛ enye suanyi no bɔ mu sũa nwomaba no wie na ɔpɛ dɛ ɔtoa adzesua no do a, ma no buukuu no bi na enye no nhyɛ ase wɔ adzesua 04 no. Sɛ enye obi rusũa hɛn nwoma ahorow a yɛdze yɛ Bible adzesua no bi a, dan kɔ Ibotum Enya Enyigye Daa! buukuu no mu, na hwɛ beebi a ɔbɛfata dɛ enye no toa do.

HWƐ VIDEO A WƆATO DZIN AKƆABA BA WO BIBLE ADZESUA YI ASE NO, NA YIYI NSƐMBISA A ODZIDZI DO YI ANO:

• Ebɛnadze na esuafo no bosũa efi buukuu fofor yi mu?

• Ebɛnadze ntsi na ɔwɔ dɛ iyi dɛm video yi kyerɛ esuafo afofor?

• Ebɛn botae ahorow na obehia dɛ ehyɛ osuanyi no nkuran nkakrankakra ma ɔdze sisi n’enyiwa do na odu ho?​—Hwɛ adakaba a wɔato dzin “ Dza Ibosũa Nye Dza Ebɛyɛ Wɔ Ɔfã Biara”