Sɛ edze video nye nsɛmbisa ahorow a ɔwɔ Ibotum Enya Enyigye Daa! buukuu no mu no ridzi dwuma a, w’enyi nngye anaa? Na ɔfa a wɔato dzin “Binom Ka Dɛ,” “Dza Ebɛyɛ,” nye “Hwehwɛ Pii Ka Ho” no so ɛ, ihu no dɛn? Ebɛn afa afofor so na ibotum dze edzi dwuma wɔ asɛnka mu?​—Mt 28:19, 20.

Video Nye Ndzɛmba Afofor: Buukuu yi, yɛwɔ dza wɔaprent wɔ hɔ. Sɛ enye obi reyɛ adzesua wɔ dza wɔaprent no mu a, ibesi dɛn ehu video nye ndzɛmba afofor a ɔwɔ adzesua bi mu no wɔ bea kor? Dza ibotum ayɛ nye yi: Hwɛ buukuu yi ne elɛktrɔnek dze no mu, na bɔ ɔfa etsitsir anan no mu kor do. Sɛ ehwɛ nsɛntsir a wɔahyehyɛ wɔ dɛm ɔfa no ase a, ibohu ɔfa bi a wɔato dzin “Video Nye Ndzɛmba Afofor.” Sɛ ebɔ do a, ibohu video nye ndzɛmba afofor a ɔwɔ dɛm ɔfa no mu no nyinara wɔ hɔ. (Hwɛ mfonyin 1.)

Biribi a ɔboa wo ma ihu buukuu no ne “Printed Edition”: Sɛ enye obi rusua adze na ibue buukuu no wɔ elɛktrɔnek efir bi do a, ɔyɛ a ofi ber to ber no ibotum ahwɛ buukuu no ne “Printed Edition” anaa dza wɔprent no so aber a adzesua no rokɔ do no. Sɛ ibue adzesua asɛm bi a, bɔ dot ebiasa a ɔwɔ w’enyimfa do wɔ sor hɔ no do, na san so bɔ beebi a wɔakyerɛw “Printed Edition” no do. Obobue dza wɔprent no bi ama wo. Mbrɛ woesi ahyehyɛ adzesua nsɛm no wɔ iyi mu no boa wo ma ihu mbrɛ adzesua no n’afa ahorow no foa asɛntsir a hom rususu ho no do. Sɛ epɛ dɛ esan kɔ w’ekyir a, bɔ dot ebiasa a ɔwɔ w’enyimfa do wɔ sor hɔ no do bio, na san bɔ beebi a wɔakyerɛw “Digital Edition” no do.

“Aso Mubotum?”: Dɛm ndakaba ebien yi wɔ ɔfa anan no n’ase. Ɔboa ma yehu dza ɔwɔ dɛ suanyi no yɛ ana oeetum nye asafo no abɔ mu akɔ asɛnka, na ɔaafata ama enuma. (Hwɛ mfonyin 2.)

Nsɛm Bi A Wɔakyerɛ Mu: Dɛm ɔfa yi kyerɛkyerɛ nsɛntsitsir bi a ɔwɔ adzesua asɛm bi mu no kɔ ekyir. Sɛ ehwɛ buukuu yi ne elɛktrɔnek dze no mu a, ibohu link bi wɔ asɛm bi a wɔakyerɛkyerɛ mu biara ase. Sɛ ebɔ do a, ɔbɛsan nye wo akɔ beebi a nna woedu wɔ adzesua asɛm no mu. (Hwɛ mfonyin 2.)