ƆYƐ a, ɔyɛ dzen ma wo dɛ ebɛgye ber esua adze dapɛn biara? Ɔtɔ da a, etse nka dɛ dza irusua no nnyɛ wo dɛw anaa adzesua afon wo anaa? Ɔnodze ɔnnyɛ wankotsee, osiandɛ hɛn nyina so ɔtɔ da a yɛtse nka dɛmara. Naaso ɔwodze, dwendwen ndzɛmba ahorow bi a yɛtaa yɛ no bi ho hwɛ. Bi tse dɛ eguar. Ɔgye mber na mbɔdzembɔ ana yeetum eguar, naaso sɛ yeguar wie a, hɛn ahom ka hɛnho paa! Yebotum dze hɛn Bible adzesua so atoto eguar ho. Bible no ka dɛ ɔtse dɛ mbrɛ yɛdze ‘asɛm no ayɛ nsu dze eguar ma hɛnho atsew’ kama. (Eph. 5:26) Ma yɛnhwɛ nyansahyɛ ahorow bi a obotum aboa wo ma wo Bible adzesua aayɛ wo dɛw:

• Yi ber pɔtsee bi a epɛ dɛ edze sua adze no si hɔ. Yenyim dɛ ‘ndzɛmba a no ho hia paa’ a ɔsɛ dɛ Christiannyi biara yɛ no, no mu kor nye dɛ ɔbɛgye ber esua Bible no. (Phil. 1:10) Dza ɔbɔboa wo mbrɛ ɔbɛyɛ a wo werɛ rimmfir ber a edze bosua adze no, ibotum akyerɛw ber na da no wɔ krataa bi do, na edze aabɔ beebi a ibohu. Ibotum dze afam wo noticeboard do anaa wo fridge ho. Anaa ibotum asɛt alarm wɔ wo fon do ama sɛ ber a edze bosua adze no so a, wɔakaa wo.

• Hu ber dodow a ibotum dze esua adze. Itum sua adze kyɛr anaa? Anaa ɔwodze, emmfa da kor nnsua ne nyina mbom isua no nkakrankakra? No mu biara no, wankasa nyim dza oye ma wo. Ntsi sɛ ereyɛ nhyehyɛɛ a edze bosua adze a, ɔyɛ a fa ɔno so ka ho. Sɛ ber a edze sua adze no so, na etse nka dɛ w’enyi ahaw a, ɔwodze mia w’enyi na sua adze minitsi du pɛ. Sɛ itum dze minitsi du pɛ mpo sua adze a, oye kyɛn dɛ irunnsua koraa. Afei so, sɛ itum mia w’enyi hyɛ ase ara pɛ a, bi a obekenyan wo ma eesua pii aka ho.—Phil. 2:13.

• Dzi kan hwehwɛ ndzɛmba a epɛ dɛ isua ho adze no to hɔ. Sɛ ber a edze sua adze no so ansaana adwendwen dza epɛ dɛ isua ho a, ɔbɛkyerɛ dɛ emmfa ‘mber a enya no nndzi dwuma yie.’ (Eph. 5:16) Ntsi ansaana w’adzesua ber no bɔso no, ibotum akyerɛw ndzɛmba ahorow bi a epɛ dɛ isua ho adze ato hɔ. Afei so, aber biara a asɛm bi a ɔkyer w’adwen so besi wo tsirmu no, ibotum akyerɛw ato hɔ. Bio so, aber biara a ibosua adze ewie no, sɛ inya nsɛm afofor bi so a ebɛpɛ dɛ isua ho adze kɔ ekyir a, ibotum akyerɛw aka dza ewɔ wɔ hɔ dada no ho. Sɛ eyɛ dɛm a, aber biara ibenya biribi esua ho adze.

• Ɔyɛ a sesa mu. Bɔ mbɔdzen dɛ ofi ber to ber no, ebɛsesa wo nhyehyɛɛ a edze sua adze no mu. Bi tse dɛ ber dodow a edze sua adze nye ndzɛmba a epɛ dɛ esua ho adze. Ɔnnyɛ dza ohia nye ber a edze sua adze, ber tsentsen a edze sua adze, anaa dza ibosua no. Mbom dza ohia nye dɛ ibosua adze dapɛn biara.

Nokwasɛm nye dɛ, sɛ yesua adze dapɛn biara a, ɔboa hɛn paa. Ɔboa hɛn ma yɛtwe bɛn Jehovah paa, na yehu mbrɛ yebesi esisi gyinae pa wɔ hɛn asetsena mu. Afei so, ɔma hɛn ahom ka hɛnho na ɔhyɛ hɛn dzen ma yɛkɔ do som Jehovah.—Josh. 1:8.