Epɛ dɛ inya dza isua no do mfaso paa? Ɔnodze nyansahyɛ a odzidzi do yi botum aboa wo ma edze w’adwen eesi dza irusua no do yie:

• Hwehwɛ beebi a sɛ etsena a, w’ahom bɛka woho. Sɛ ɔbɛyɛ yie a, pɛ beebi a hɔ nnyɛ basabasa na kandzea so wɔ hɔ a ibotum dze akenkan adze. Ibotum apɛ pon bi na aatsena ho, anaa epue akɛtsena beebi a w’ahom bɛka woho.

• Pɛ beebi a ibotum atsena a obiara rennhaw w’adwen. Nna Jesus taa soɛr “anapatutuutu” kɛhyɛ “beebi a obiara nnyi hɔ” kɔbɔ mpaa. (Mark 1:35) Sɛ irunntum nnya beebi a wankotsee botum akɛhyɛ esua adze a, ibotum ama w’ebusuafo anaa hɔn a enye hɔn tse fie no eehu mber a edze sua adze. Na serɛ hɔn dɛ sɛ dɛm ber no so a, mma wɔnnhaw w’adwen anaa wɔnnyɛ dede mmfa nnhaw wo.

• Bɔ mbɔdzen dɛ edze w’adwen besi dza irusua no do. Mma mma biribiara nntwetwe w’adwen. Sɛ edze wo fon anaa tablɛt rusua adze a, ibotum dze ato beebi a ɔrennyɛ dede anaa ibotum dze ato airplane mode mbrɛ ɔbɛyɛ a kɔɔl anaa tɛst mɛsegye biara runntum mmba do. Afei so, sɛ biribi a ɔsɛ dɛ idzi ho dwuma besi wo tsirmu aber a irusua adze a, ibotum akyerɛw ato hɔ na eedzi ho dwuma ekyir yi. Sɛ ɔyɛ dzen ma wo dɛ edze w’adwen bedzi dza irusua no ekyir so a, ibotum asoɛr akɛnantsew kakra anaa atwe wo mu kakra.