1. Ebɛnadze ntsi na yebotum esua biribi efi hɔn a hɔn enyi efir no hɔ?

 HƐN nyina hia afotu a obotum aboa hɛn ma yeesisi gyinae a no ho hia wɔ asetsena mu. Yebotum enya dɛm afotu yi mu beberee efi asafo mu mpanyimfo nye Christianfo afofor a hɔnho akokwaa hɔ. Sɛ dɛm enuanom yi enyin kyɛn hɛn a, ɔnnsɛ dɛ yenya adwen dɛ hɔn mber etwa mu ntsi hɔn afotu no rommboa hɛn ndɛ. Jehovah pɛ dɛ yesua biribi fi hɔn a hɔn enyi efir no hɔ. Osiandɛ hɔn enyi efir ntsi, wɔwɔ suahu na nyansa kyɛn hɛn.—Job 12:12.

2. Ebɛnadze na yebosusu ho wɔ adzesua yi mu?

² Tsetse no, Jehovah nam n’asomfo anokwafo a hɔn enyi efir do hyɛɛ no nkorɔfo nkuran na ɔmaa hɔn akwankyerɛ. Dɛm anokwafo yi mu bi nye Moses, David, nye ɔsomafo John. Mbarimba yi anntsena ase wɔ ber kor mu. Afei so, ɔsor nsɛm a osisii wɔ hɔn mu biara asetsena mu. Aber a wɔaka kakra ma woewu no, wotuu nkyirmba fo. Dɛm mbarimba anokwafo yi mu biara maa ɔdaa edzi dɛ ohia paa dɛ yetsie Nyankopɔn. Jehovah maa wɔkyerɛɛw nsɛm a wɔkae no wɔ Bible no mu mbrɛ ɔbɛyɛ a yebotum esua biribi efi mu. Ɔmmfa ho mfe a yeedzi no, sɛ yɛgye ber susu hɔn afotu no ho a, ɔbɔboa hɛn paa. (Rom. 15:4; 2 Tim. 3:16) Adzesua yi mu no, yɛbɔhwɛ nsɛm a otwa tun a dɛm mbarimba baasa yi kae ana woruwu nye dza yebotum esua efi mu.

‘AMA AATSENA ASE AKYƐR’

3. Ebɛn hokwan ahorow na Moses nyae?

³ Moses yeer noho soom Jehovah no nkwa nda nyina. Nna ɔyɛ nkɔnhyɛnyi, ɔtsɛmbuafo, ɔsafohen nye abakɔsɛm kyerɛwfo. Nna Moses wɔ suahu paa. Afei so, Jehovah maa ɔgyee Israelfo no fii nkowaasom mu wɔ Egypt na ɔdze n’enyi hun anwanwadze  pii a Jehovah yɛe no. Jehovah maa ɔkyerɛɛw nwoma enum a odzi kan a ɔwɔ Bible mu no, nye Ndwom 90. Obotum aba dɛ noara so na ɔkyerɛɛw Ndwom 91 nye Job nwoma no.

4. Woananom na Moses hyɛɛ hɔn nkuran, na ebɛnadze ntsi na ɔyɛɛ dɛm?

⁴ Aber a nna Moses edzi mfe 120 a nna aka kakra ma oeewu no, ɔboaboaa Israelfo no ano na ɔkaa hɔn ndzɛmba a nna Jehovah ayɛ ama hɔn no. Hɔn mu bi wɔ hɔ a, aber a nna wɔyɛ mbaabun no, wɔdze hɔn enyi hun anwanwadze pii a Jehovah yɛe nye mbrɛ osii twee Egyptfo no hɔn asowa. (Ex. 7:​3,4) Aber a Jehovah paa Po Memen no mu ma wɔfaa mu na ɔsɛɛ Pharaoh n’asogyafo no, wɔdze hɔn enyi hunii. (Ex. 14:​29-31) Afei so aber a nna wɔwɔ sar no do no, Jehovah hwɛɛ hɔn do na ɔbɔɔ hɔn ho ban so. (Deut. 8:​3, 4) Nna ɔrennkyɛr ma Israelfo no aakɔ Anohoba Asaase no do, ntsi nna Moses pɛ dɛ ɔhyɛ hɔn nkuran ana oewu. a

5. Nsɛm a otwa tun a Moses kae wɔ Deuteronomy 30:​19, 20 no, ebɛn awerɛhyɛmu na ɔmaa Israelfo no nyae?

⁵ Ebɛn asɛm na Moses kae? (Kenkan Deuteronomy 30:​19, 20.) Nna daakye papabi da Israelfo no enyim. Nna Jehovah botum ama Israelfo no aatsena ase akyɛr wɔ asaase a ɔdze ahyɛ hɔn bɔ no do. Na hom mma yɛnka, nna dɛm asaase no do yɛ fɛw ankasa. Afei so, nna wodua adze wɔ do a ɔyɛ prɔmprɔm. Moses kaa asaase no ho asɛm dɛ: “Nkurow akɛse fɛɛfɛw a nnyɛ ɔwo na ekyekyeree, nye adan a ndzepa nyinara ahyɛ no amaama a nnyɛ ɔwo na edze hyɛɛ mu, nye mbura a woetutu a nnyɛ ɔwo na itutui, wenyin nture nye olive ndua a nnyɛ ɔwo na etsetsɛwee.”—Deut. 6:​10, 11.

6. Ebɛnadze ntsi na Nyankopɔn maa aman afofor dzii Israelfo do konyim?

⁶ Afei so, Moses bɔɔ Israelfo no kɔkɔ. Ɔmaa wohun dɛ sɛ wobotum akɔ do atsena asaase fɛɛfɛw no do a, ɔsɛ dɛ wotsie Jehovah ne mbransɛm. Moses hyɛɛ hɔn nkuran dɛ ‘wɔmfa nkwa.’ Sɛ nna wobotum ayɛ dɛm a, gyedɛ wotsie Jehovah na ‘wɔtakyer no ho.’ Naaso, Israelfo no enntsie Jehovah. Ntsi odur beebi no, Nyankopɔn maa Assyriafo nye Babylonfo dzii hɔn do konyim, na wɔfaa hɔn dze hɔn kɛyɛɛ nkowaa.—2 Ahe. 17:​6-8, 13, 14; 2 Mber. 36:​15-17, 20.

7. Ebɛnadze na yebotum esua efi nsɛm a Moses kae no mu? (Hwɛ mfonyin no so.)

⁷ Ebɛnadze na yebotum esua efi asɛm yi mu? Sɛ yetsie Jehovah a, yebenya nkwa. Hɛn asɛm akɛyɛ tse dɛ Israelfo no aber a nna wɔaka kakra ma woeedu Anohoba Asaase no do no. Hɛn so, ɔrennkyɛr na yaakɔ wiadze fofor a Nyankopɔn dze ahyɛ hɛn bɔ no mu. Dɛm aber no dze, wiadze nyina bɛdan paradise. (Isa. 35:1; Luke 23:43) Jehovah beyi Abɔnsam na n’esunsum fi nyinara efi hɔ. (Nyi. 20:​2, 3) Ɔsom biara a ɔkyerɛkyerɛ atorsɛm fa Jehovah ho no befi hɔ. (Nyi. 17:16) Nyimpa aban a ndɛ wɔretseetsee nkorɔfo nyina, wobeyi hɔn efi hɔ. (Nyi. 19:​19, 20) Jehovah remma kwan ma otuatsewnyi biara nntu ne nan nnsi Paradise hɔ. (Ndw. 37:​10, 11) Dɛm aber no, obiara dze Jehovah ne mbra a asɛm biara nnyi ho no bɛyɛ edwuma. Iyi bɛma koryɛ na asomdwee atsena asaase yi do. Obiara bɔdɔ ne nyɛnko na ɔaagye ne nyɛnko so edzi. (Isa. 11:9) Nokwasɛm nye yi, yɛrohwɛ Paradise kwan dzendzenndzen. Na inyim a, sɛ yetsie Jehovah a, yɛrenntsena paradise asaase do mfe kakraabi pɛ o, mbom yɛbɛtsena do daa.—Ndw. 37:29; John 3:16.

8. Ebɛn kwan do na Nyankopɔn no bɔhyɛ a ɔfa daa nkwa ho no boaa asɛmpatserɛwnyi bi? (Jude 20, 21)

⁸ Nyankopɔn no bɔhyɛ a ɔfa daa nkwa ho no, sɛ yɛkɔ do dwendwen ho a, ɔbɔboa hɛn ma yaatakyer Nyankopɔn ho ɔmmfa ho ɔhaw  biara a yebehyia no. (Kenkan Jude 20, 21.) Dɛm bɔhyɛ kor yi ara so botum aboa hɛn ma yaako etsia mberɛwyɛ biara a yɛwɔ no. Nna mberɛwyɛ bi retseetsee onua bi a ɔdze mfe pii ayɛ asɛmpatserɛw edwuma no wɔ Africa no. Asɛm a ɔkae nye dɛ: “Mubohun dɛ sɛ mannyɛ me mberɛwyɛ no ho biribi a, murunntum nnya daa nkwa. Iyi maa meyeer moho dɛ mobɔko etsia me mberɛwyɛ no. Ntsi mobɔɔ Jehovah mpaa mpɛn pii dɛ ɔmboa me. Na ampaara so ɔaboa me ma metum edzi me mberɛwyɛ no do.”

“AMA AAYƐ PRƆMPRƆM”

9. Ebɛn ɔhaw na David hyiae wɔ n’asetsena mu?

⁹ Nna David yɛ ɔhen kɛse. Afei so, nna ɔyɛ ɔdwontofo, awensɛm kyerɛwfo, ɔsabarimba nye nkɔnhyɛnyi. David faa ɔhaw beberee mu. Nna Ɔhen Saul rohwehwɛ David eku no. Iyi kɔr do mfe pii, ntsi nna ɔsɛ dɛ David dze noho suma. Ekyir yi, aber a ɔbɛyɛɛ ɔhen no, nna ne ba Absalom so pɛ dɛ otu no adze do. Ntsi nna ɔsɛ dɛ oguan amma woeennku no. Ɔmmfa ho ɔhaw ahorow a David hyiae nye mfom a odzii no, ɔkɔr do dzii Nyankopɔn nokwar kesii dɛ owui. Jehovah kaa David ho asɛm dɛ: “Ɔbarimba a mankasa m’akoma da no ho.” Dɛm ntsi sɛ yetsie David n’afotu no a, hɛn nsa rinnsi famu da!—Andw. 13:22; 1 Ahe. 15:5.

10. Ebɛnadze ntsi na David tuu ne ba Solomon a nna oribedzi n’adze no fo?

¹⁰ Hom mma yensusu afotu a David dze maa ne ba Solomon a nna oribedzi n’adze no ho. Jehovah yii Solomon a nna ɔyɛ aberantsɛ no dɛ onsi asɔrfie mbrɛ ɔbɛyɛ a nkorɔfo bɔsom Nyankopɔn wɔ hɔ. (1 Mber. 22:5) Nna Solomon behyia ɔhaw ahorow. Ntsi ebɛn asɛm na David kaa kyerɛɛ no? Hom mma yɛnhwɛ.

11. Ebɛn afotu na David dze maa Solomon wɔ 1 Ahemfo 2:​2, 3, na aber a Solomon dze dɛm afotu no yɛɛ edwuma no, ebɛnadze na ofii mu bae? (Hwɛ mfonyin no so.)

¹¹ Ebɛn asɛm na David kae? (Kenkan 1 Ahemfo 2:​2, 3.) David kaa kyerɛɛ ne ba no dɛ sɛ otsie Jehovah a, obesi no yie. Na ampaara so, ndzɛmba kɔr yie maa Solomon mfe pii. (1 Mber. 29:​23-25) Solomon sii asɔrfie fɛfɛɛfɛw bi na ɔkyerɛɛw Bible no bi. Nna onyim nyansa paa, na ahonyadze a nna ɔwɔ so dze, wɔnnka. Iyi ntsi, ɔgyee dzin paa. (1 Ahe. 4:34) Naaso dɛ mbrɛ David kae no, sɛ nna obesi Solomon yie a, gyedɛ ɔkɔ do ara tsie Jehovah Nyankopɔn. Naaso awerɛhosɛm nye dɛ ekyir yi Solomon kɔsoom abosom. Dɛm ntsi ɔhweer Jehovah n’enyim adom. Na iyi maa nyansa a nna ɔdze bobu atsɛntsenenee ama ne mamfo no bɔɔ no.—1 Ahe. 11:​9, 10; 12:4.

12. Ebɛnadze na yebotum esua efi nsɛm a David kae no mu?

¹² Ebɛnadze na yebotum esua efi asɛm yi mu? Sɛ yetsie Jehovah a, obesi hɛn yie. (Ndw. 1:​1-3) Ɔwɔ mu, Jehovah nnhyɛɛ hɛn mu biara bɔ dɛ ɔbɛma yeenya sika pii, na yaagye dzin dɛ Solomon. Naaso sɛ yetsie hɛn Nyankopɔn no a, ɔbɛma  hɛn nyansa a yebotum dze esisi gyinae pa. (Mbɛ. 2:​6, 7; Jas. 1:5) Sɛ yɛpɛ dɛ yesi gyinae fa edwuma a yɛbɛyɛ, skuul a yɛbɔkɔ, dza yɛdze bɛgyegye hɛn enyi nye sika ho a, Jehovah n’afotusɛm botum aboa hɛn paa. Afei so sɛ yɛdze n’afotusɛm yɛ edwuma a, yɛnye ne ntamu bɔkɔ do ayɛ kama na yaatsena ase daa. (Mbɛ. 2:​10, 11) Bio so, yebenya anyɛnkofo papa na yɛnye hɛn ebusuafo enyi bɛgye.

13. Ebɛnadze na Carmen yɛe a ɔmaa osii no yie wɔ n’asetsena mu?

¹³ Akyerɛbaa bi a wɔfrɛ no Carmen tse Mozambique. Nna n’adwen yɛ no dɛ sɛ ɔkɔ skuul kɔ ekyir a, obesi no yie wɔ abrabɔ mu. Ntsi ɔkɔr university na okosuaa adansi ho adze. Ɔkaa dɛ: “Nna m’enyi gye dza murusua no ho. Naaso skuul no gyee me ber nyina, na nna ɔma meberɛ so. Nna mokɔ skuul anapa 7:30 naaso mobɔpon no, nna wɔabɔ ewimbir 6:00. Nna ɔyɛ dzen ma me dɛ mobɔkɔ asafo nhyiamu, na iyi maa menye Jehovah ntamu yɛɛ basaa. Nna mutum hu paa dɛ morosom ewuranom beenu.” (Matt. 6:24) Ɔbɔɔ n’asɛm no ho mpaa na ɔyɛɛ ho nhwehwɛmu wɔ asafo nwoma ahorow mu. Ɔkaa dɛ: “Afotu a no mu da hɔ a asafo mu mpanyimfo nye me maame dze maa me no boaa me paa. Ntsi misii gyinae dɛ mibegyaa university no na medze me ber nyina aasom Jehovah. Iyi boaa me ma misisii gyinae pa wɔ m’asetsena mu, na munnuu moho”

14. Ebɛn asɛm na Moses na David nyina kae?

¹⁴ Nna Moses na David dɔ Jehovah. Afei so, nna hɔn beenu no nyina nyim dɛ ohia dɛ wotsie Jehovah. Ntsi nsɛm a otwa tun a wɔkae no mu no, wɔhyɛɛ hɔn a nna wɔnye hɔn rekasa no nkuran dɛ wonsuasua hɔn na wɔntakyer Jehovah hɔn Nyankopɔn ho. Wɔsanee so bɔɔ hɔn a nna wɔnye hɔn rekasa no kɔkɔ dɛ sɛ wɔannkɔ do annsom Jehovah a worinnya n’enyim adom, na nhyira ahorow a ɔdze ahyɛ hɔn bɔ no so, hɔn nsa rennka. Hɛn so, hɔn afotu no botum aboa hɛn paa. Mfe pii ekyir no, Jehovah no somfo fofor bi so maa yehun mfaso a ɔwɔ do dɛ yebedzi Nyankopɔn nokwar.

“MINNYI DƐW BIARA A ƆKYƐN IYI”

15. Ebɛn nsɛm na osisii wɔ ɔsomafo John n’asetsena mu?

¹⁵ Nna John ka Jesus Christ n’asomafo no ho, na nna Jesus pɛ n’asɛm paa. (Matt. 10:2; John 19:26) Aber a nna Jesus reyɛ no som edwuma no nyina nna John ka no ho, na onyaa hokwan  hun anwanwadze ahorow a Jesus yɛe no. Afei so, wɔ mber a no mu yɛ dzen mu no, ɔkɔr do dzii Jesus n’ekyir. Aber a woruku Jesus no, nna n’enyi tua. Afei so aber a wonyaan Jesus no, ohunii. Bio so, ohun aber a anokwafo kakraabi tserɛɛw Christiansom mu wɔ asomafo no hɔn aber do kesii dɛ ‘wɔkaa asɛmpa no kyerɛɛ abɔdze nyina wɔ wiadze yi mu’ no.—Col. 1:23.

16. Woananom na nkrataa a John kyerɛwee no aboa hɔn?

¹⁶ John no nkɔkoraber mu no, onyaa hokwan kyerɛɛw Nyankopɔn n’asɛm no bi. Ɔno na ɔkyerɛɛw “Jesus Christ ne Nyikyerɛ” a ɔyɛ nwanwa no. (Nyi. 1:1) Ɔnoara so na ɔkyerɛɛw John Asɛmpa no. Afei so, Jehovah maa ɔkyerɛɛw nkrataa ebiasa bi. Ɔsomafo John kyerɛɛw ne krataa a otsia ebiasa no kɛmaa Christiannyi nokwafo bi a wɔfrɛ no Gaius. Nna John pɛ n’asɛm paa na ɔfaa no dɛ ne ba. (3 John 1) Dɛm aber no, ɔbɛyɛ dɛ nna John afa Christianfo pii dɛ ne mba. Dza dɛm ɔbarimba nokwafo yi kyerɛwee no ahyɛ Jesus n’ekyirdzifo nkuran dze ebesi ndɛ.

17. Dɛ mbrɛ 3 John 4 no ma yehu no, ebɛnadze na ɔma hɛn enyi gye paa?

¹⁷ Ebɛn asɛm na John kyerɛwee? (Kenkan 3 John 4.) John kaa dɛ sɛ yetsie Nyankopɔn a, ɔdze enyigye ba. Aber a John kyerɛɛw ne krataa a otsia ebiasa no, nna nyimpa binom retserɛw ator nkyerɛkyerɛ mu. Afei so nna wɔdze mpaapaamu reba asafo no mu. Naaso, nna binom so da ho ara “nam nokwar no mu.” Dɛm enuanom yi tsiee Jehovah na ‘wɔnantsewee dɛ mbrɛ n’ahyɛdze no tse.’ (2 John 4, 6) Ɔnnyɛ John nkotsee na dɛm Christianfo anokwafo yi maa n’enyi gyee, na mbom wɔmaa Jehovah so n’enyi gyee paa.—Mbɛ. 27:11.

18. Ebɛnadze na yebotum esua efi asɛm a John kyerɛwee no mu?

¹⁸ Ebɛnadze na yebotum esua efi asɛm yi mu? Sɛ yɛkɔ do dzi Jehovah nokwar a, hɛn enyi bɛgye na afofor so enyi bɛgye. (1 John 5:3) Sɛ yehu dɛ dza yɛreyɛ no ma Jehovah n’enyi gye a, ɔma hɛn so hɛn enyi gye. Sɛ Jehovah hu dɛ yɛatwe hɛnho efi ndzɛmba a obotum asɔ hɛn ahwɛ ho, na yɛdze nokwardzi robɔ hɛn bra a, ɔma n’enyi gye. (Mbɛ. 23:15) Ɔma abɔfo a wɔwɔ sor no so enyi gye. (Luke 15:10) Hɛn so, sɛ yehu dɛ hɛn nuanom Christianfo dze nokwardzi rosom Jehovah aber mpo a worihyia nsɔhwɛ anaa wɔretan hɔn enyi no a, ɔma hɛn enyi gye. (2 Thess. 1:4) Afei, sɛ woyi Satan no wiadze bɔn yi fi hɔ a, hɛn enyi bɛgye na hɛn akoma so bɔtɔ hɛn yamu osiandɛ yedzii Jehovah nokwar kesii ase.

19. Ebɛn asɛm na akyerɛbaa bi a wɔfrɛ no Rachel no kaa faa hɔn a ɔaboa hɔn ma woebohu nokwar no ho? (Hwɛ mfonyin no so.)

¹⁹ Sɛ yɛka Jehovah ho asɛm kyerɛ nkorɔfo a,  ɔno so ma hɛn enyi gye paa. Akyerɛbaa bi a wɔfrɛ no Rachel tse Dominican Republic. Hokwan a ɔwɔ dɛ ɔbɛka hɛn Nyankopɔn Jehovah a yɛsom no no ho asɛm akyerɛ nkorɔfo no, ohu no dɛ ɔyɛ hokwan a ɔkyɛn biara. Ɔaboa nkorɔfo beberee ma wɔabɔsom Jehovah. Ɔkaa dɛ: “Sɛ muhu dɛ hɔn a maboa hɔn ma woebohu nokwar no gu do ara rosom Jehovah, wɔdze hɔnho nyina ato no do, na wɔayɛ nsesa wɔ hɔn asetsena mu mbrɛ ɔbɛyɛ a ɔbɛma n’enyi agye a, ɔma m’enyi gye araa ma meyɛ moho hwee ara ɔnnyɛ yie. Ndzɛmba a medze bɔɔ afɔr ana murutum akyerɛkyerɛ hɔn no, sɛ medze toto mbrɛ m’enyi si gye no ho a, dɛm ndzɛmba no nndur beebiara.”

NSƐM A MBARIMBA ANOKWAFO KAE ANA WORUWU NO BOTUM ABOA WOARA SO

20. Ebɛnadze na Moses, David, na John yɛe a hɛn so yɛyɛ bi?

²⁰ Moses, David, na John tsenaa ase wɔ tsetse mber no mu, na mbrɛ nna ndzɛmba tse wɔ hɔn aber do no, ɔnnyɛ dɛm na ɔtse wɔ hɛn aber yi do. Naaso ndzɛmba ahorow bi wɔ hɔ a wɔyɛe a hɛn so yɛyɛ bi. Bi nye dɛ wɔsoom nokwar Nyankopɔn no. Na dɛmara na hɛn so yɛyɛ. Afei so, dɛm mbarimba anokwafo yi bɔɔ Jehovah mpaa, wɔdze hɔnho too no do na wɔhwehwɛɛ no hɔ akwankyerɛ. Dɛmara na hɛn so yɛyɛ. Bio so, nna dɛm mbarimba yi wɔ ahotodo dɛ Jehovah hyira hɔn a wotsie no no, na ahotodo a ɔtse dɛmara na hɛn so yɛwɔ.

21. Afotu a mbarimba anokwafo bi tse dɛ Moses, David, na John dze mae no, sɛ yetsie a, ebɛn nhyira na yebenya?

²¹ Dɛm ntsi, nsɛm a mbarimba anokwafo yi kae ana woruwu no, hom mma yentsie ngu aso pa mu, na yɛmfa Nyankopɔn n’ahyɛdze mbɔ hɛn bra. Sɛ yɛyɛ dɛm a, obesi hɛn yie wɔ biribiara mu. Afei so, yebenya nkwa na ‘yɛbɛtsena ase akyɛr,’ kyerɛ dɛ yɛbɛtsena ase afebɔɔ. (Deut. 30:20) Bio so, hɛn enyi bɛgye paa dɛ yɛreyɛ dza ɔsɔ hɛn sor Egya a ɔdɔ hɛn no enyi, osiandɛ yenyim dɛ obedzi bɔ a ɔahyɛ hɛn nyina do ma wɔaabor dza yɛrohwɛ kwan no mpo.—Eph. 3:20.