1-2. (a) Ebɛnadze nye bɔn, na woana na obotum aboa hɛn ma yeedzi do konyim? (Hwɛ “Asɛm Bi A Wɔakyerɛkyerɛ Mu” so.) (b) Ebɛnadze na yebosusu ho wɔ adzesua yi nye adzesua nsɛm afofor a ɔwɔ Ɔweɔn-Aban yi mu no mu? (Hwɛ asɛm a wɔato dzin “Akenkamfo Nhyɛ No Nsew” a ɔwɔ Ɔweɔn-Aban yi mu so.)

 IBESI dɛn ehu dɛ Jehovah Nyankopɔn dɔ wo paa? Sɛ epɛ dɛ inya dɛm asɛmbisa yi ho mbuae a, nna ɔno dza Jehovah ayɛ dze agye wo efi bɔn na owu mu no, gye ber sua ho adze. Bɔn a yɛ ɔtamfo bi a ne tsirmu yɛ dzen paa. Nyimpa biara nnyi asaase yi do a obotum dze nankasa n’ahoɔdzen ako etsia bɔn na oeedzi do konyim. Mbrɛ ɔtse nye dɛ, bɔn wɔ hɛn nyina ho. Da biara yɛyɛ bɔn, na bɔn ntsi na yewu no. (Rom. 5:12) Naaso asɛmpa bi wɔ hɔ. Jehovah botum aboa hɛn ma yeedzi bɔn do konyim korakora. Nokwasɛm nye dɛ, obotum aboa hɛn ampa!

² Bɛyɛ mfe 6,000 nye yi na Jehovah Nyankopɔn aboa nyimpa ma wɔako etsia bɔn. Ebɛnadze ntsi na ɔreyɛ dɛm? Asɛm no ara nye dɛ ɔdɔ hɛn, na ɔhyɛɛ ase dɛ ɔrodɔ hɛn no so dze, ɔnnyɛ ndɛ. Ntsi ɔayɛ ndzɛmba pii dze aboa hɛn mbrɛ ɔbɛyɛ a yebotum ako etsia bɔn. Nyankopɔn nyim dɛ bɔn akatua nye owu. Naaso ɔmmpɛ dɛ yewu, mbom ɔpɛ dɛ yɛtsena ase daa. (Rom. 6:23) Na inyim biribi a, Jehovah pɛ dɛ woara so etsena ase afebɔɔ. Adzesua yi mu no, yebosusu nsɛmbisa ebiasa bi ho: (1) Ebɛn enyidado na Jehovah ama nyimpa a bɔn wɔ hɔnho no enya? (2) Nyimpa a bɔn wɔ hɔnho a Bible no ka hɔnho asɛm no, wosii dɛn nyaa Jehovah n’enyim adom? (3) Ebɛnadze na Jesus ayɛ dze agye nyimpa a bɔn wɔ hɔnho efi bɔn na owu mu?

 EBƐN ENYIDADO NA JEHOVAH AMA NYIMPA A BƆN WƆ HƆNHO NO ENYA?

3. Ɔbaa no dɛn na hɛn awofo a wodzi kan no yɛɛ bɔn?

³ Aber a Jehovah bɔɔ ɔbarimba na ɔbaa a wodzi kan no, nna ɔpɛ dɛ hɔn enyi gye. Ntsi ɔkaa hɔn beenu no bɔɔ mu dɛ awarfo, ɔmaa hɔn beebi a hɔ yɛ fɛw ma wɔtsenae, na ɔdze edwuma papabi so hyɛɛ hɔn nsa. Nna ɔpɛ dɛ wɔwo hyɛ asaase yi do ma, na wɔma asaase yi nyina dan paradise tse dɛ Eden ture no. Adze kor bi pɛ na ɔkaa dɛ mma wɔnnyɛ. Nna ɔnnyɛ dzen koraa dɛ wobedzi dɛm ahyɛdze no do. Jehovah bɔɔ hɔn kɔkɔ dɛ, sɛ wɔyɛ asoɔdzen bu dɛm ahyɛdze no do a, wobowuwu. Hɛn nyina nyim dza osii. Ɔbɔfo bi a nna ɔnndɔ Nyankopɔn na ɔmmpɛ hɔn asɛm daadaa hɔn. Awerɛhosɛm nye dɛ, Adam na Eve tsiee ɔbɔfo yi n’asɛm. Nna hɔn Egya no dɔ hɔn paa. Naaso wɔanngye no enndzi, ntsi na wɔkɛyɛɛ bɔn no. Na dɛ mbrɛ yenyim no, dza Jehovah kae no baa mu pɛpɛɛpɛ. Ofitsi da a Adam na Eve yɛɛ bɔn no, ɔhaw a ofii dza wɔyɛe no mu bae no ammpa hɔnho da. Wɔbɔɔ akɔkora na aberwa, na ewiei koraa no wowuwui.—Gen. 1:​28, 29; 2:​8, 9, 16-18; 3:​1-6, 17-19, 24; 5:5.

4. Ebɛnadze ntsi na Jehovah roboa hɛn ma yɛako etsia bɔn? (Romefo 8:​20, 21)

⁴ Jehovah maa wɔkyerɛɛw awerɛhosɛm a osii no too hɔ ama yeesua biribi efi mu. Dɛm asɛm no ma yehu siantsir a Jehovah kyir bɔn no. Bɔn twe hɛn fi hɛn Egya Jehovah ho, na bɔn ara so na ɔdze hɛn kɔ owu mu no. (Isa. 59:2) Iyi ntsi na ɔbɔfo otuatsewnyi Satan a ɔkɛfaa dɛm ɔhaw yi nyina bae no n’enyi gye bɔn ho na ɔyɛ dza obotum biara dɛ ɔbɛma nkorɔfo ayɛ bɔn no. Ntsi aber a Adam na Eve yɛɛ bɔn no, bi a Satan n’adwen yɛɛ no dɛ oedzi konyim wɔ Eden ture no mu, kyerɛ dɛ, ɔasɛɛ dza Jehovah abɔ ne tsirmu dɛ ɔbɛyɛ ama adasamba no. Naaso nna onnyim dza Jehovah no dɔ botum ayɛ. Nyankopɔn annsesa dza nna ɔabɔ ne tsirmu dɛ ɔbɛyɛ ama Adam na Eve hɔn mba no. Ɔdɔ nyimpa ankasa, ntsi hɔ ara na ɔyɛɛ nhyehyɛɛ bi a ɔbɛma adasamba enya enyidado. (Kenkan Romefo 8:​20, 21.) Nna Jehovah nyim dɛ Adam na Eve hɔn mba no bi bɔdɔ no, na wɔaaserɛ no dɛ ɔmboa hɔn ma wɔnko ntsia bɔn. Ɔyɛ hɔn Egya, na ɔnoara so na ɔbɔɔ hɔn. Ntsi ɔdze nhyehyɛɛ bi guu akwan mu mbrɛ ɔbɛyɛ a wobotum abɛn no na ɔaagye hɔn efi bɔn mu. Ebɛn nhyehyɛɛ na Jehovah dze guu akwan mu?

5. Ebɛn aber na Jehovah maa nyimpa a bɔn wɔ hɔnho nyaa enyidado? Kyerɛkyerɛ mu. (Genesis 3:15)

⁵ Kenkan Genesis 3:15. Jehovah amma Satan ammfa no ho enndzi koraa. Aber a Adam na Eve yɛɛ bɔn ara pɛ na Jehovah kaa dɛ ɔbɛsɛɛ Satan, na iyi maa adasamba nyaa enyidado. Nyankopɔn hyɛɛ nkɔm dɛ ‘asenyi’ bi bɛba abɛgye adasamba. Ewiei koraa no, nna asenyi no bɛpɛkyɛw Satan ne tsir, na obesiesie ɔhaw biara a etuatsew a ɔkɔr do wɔ Eden ture no mu no akɛfa aba no. (1 John 3:8) Naaso, nna asenyi no bɛfa yaw mu kakra. Ɔno nye dɛ nna Satan bedzi kan asɔw n’anantsir, kyerɛ dɛ, nna ɔbɛma oeku no. Nna iyi bɛma Jehovah edzi yaw paa. Naaso nna Jehovah ayɛ krado dɛ ɔbɛfa dɛm yaw no mu. Osiandɛ nna dɛm asenyi no wu no na ɔbɛgye adasamba efi bɔn na owu mu.

NYIMPA A BƆN WƆ HƆNHO A BIBLE NO KA HƆNHO ASƐM NO, WOSII DƐN NYAA JEHOVAH N’ENYIM ADOM?

6. Ebɛnadze na mbarimba anokwafo bi tse dɛ Abel na Noah yɛe a ɔmaa wotumii bɛɛn Jehovah?

⁶ Ofitsi aber a nyimpa yɛɛ bɔn no, Jehovah dze no nkakrankakra ama nyimpa a bɔn wɔ hɔnho no ehu dza wɔyɛ a ɔbɛma wɔabɛn no. Mba mbanyimfo a Adam na Eve woo hɔn no, nna Abel na otsia ebien. Aber a n’awofo yɛɛ Jehovah do asoɔdzen ekyir no, ɔno nye nyimpa a odzi kan a ɔgyee Jehovah dzii. Nna Abel  dɔ Jehovah, na nna ɔpɛ dɛ ɔyɛ dza ɔsɔ n’enyi na ɔtwe bɛɛn no. Dɛm ntsi, ɔbɔɔ afɔr maa no. Nna Abel yɛ oguanhwɛfo, ntsi ɔdze no nguan mu mbakan no bi bɔɔ afɔr maa Jehovah. Jehovah gyee n’afɔrbɔ no too mu anaa? Nyew. Bible no ka dɛ: “N’enyi sɔɔ Abel nye n’afɔrbɔ no.” (Gen. 4:4) Ekyir yi, nyimpa binom a wɔdɔ Jehovah na wɔgye no dzi no bɔɔ afɔr maa no, na ɔno so gyee hɔn afɔr ahorow no too mu. Hɔn mu bi nye Noah. (Gen. 8:​20, 21) Afɔrbɔ ahorow a Jehovah gyee too mu no maa ɔdaa edzi dɛ nyimpa a bɔn wɔ hɔnho no botum enya Jehovah n’enyim adom na wɔaabɛn no ma wɔaayɛ yie. b

7. Nna Abraham ayɛ krado dɛ ɔdze nankasa ne ba bɔbɔ afɔr ama Jehovah. Ebɛnadze na dɛm asɛm yi ma yehu?

⁷ Jehovah kaa kyerɛɛ Abraham dɛ ɔmfa ne ba Isaac mbɔ afɔr mma no. Nna Abraham gye Jehovah dzi paa, naaso nna ɔnnda famu mma no dɛ ɔbɛyɛ biribi a ɔtse dɛm. Bi a dza Jehovah kaa kyerɛɛ no dɛ ɔnyɛ no haaw no na ɔmaa ɔyɛɛ basaa. Naaso, nna ɔayɛ krado dɛ obetsie no. Aber a ɔyɛɛ dɛ oruboku ne ba no ara na Nyankopɔn kaa kyerɛɛ no dɛ ongyaa. Naaso, Abraham n’asɛm no ma nyimpa a wɔgye Nyankopɔn dzi no nyina hu nokwasɛm tsitsir bi. Ɔno nye dɛ, nna Jehovah so ayɛ krado dɛ daakye ɔdze nankasa no Dɔba no bɔbɔ afɔr ama hɛn osiandɛ ɔdɔ hɛn paa.—Gen. 22:​1-18.

8. Afɔr ahorow a Moses Mbra no hyɛɛ dɛ wɔmbɔ no, ebɛnadze na ɔma yehu? (Leviticus 4:​27-29; 17:11)

⁸ Mfe pii ekyir no, Jehovah dze Moses Mbra no maa Israelfo no. Dɛm Mbra no mu no, nna ɔsɛ dɛ Nyankopɔn no nkorɔfo no dze mbowa ahorow bɔ afɔr dze pata hɔn bɔn. (Kenkan Leviticus 4:​27-29; 17:11.) Afɔr ahorow a nna wɔbɔ no maa ɔdaa edzi dɛ, nna Jehovah bɔbɔ afɔr kɛse bi daakye. Nna dɛm afɔrbɔ no bɛgye adasamba efi bɔn mu. Nyankopɔn maa no nkɔnhyɛfo no kae too hɔ dɛ, asenyi a wɔahyɛ no ho bɔ no bohu amandze na woeeku no. Afei so wɔkaa dɛ woboku no dɛ oguan a wɔdze no rokɔbɔ afɔr. Ekyir yi, ɔbɛdaa edzi dɛ Nyankopɔn no Dɔba no nye dɛm asenyi no. (Isa. 53:​1-12) Dwen ho hwɛ o, nna Jehovah dze nankasa no Dɔba no bɔbɔ afɔr dze agye adasamba efi bɔn na owu mu. Na woara so ka ho bi!

EBƐNADZE NA JESUS AYƐ DZE AGYE NYIMPA A BƆN WƆ HƆNHO?

9. Ebɛnadze na asɛm a John Onumanyi no kae faa Jesus ho no ma yehu? (Hebrewfo 9:22; 10:​1-4, 12)

⁹ Aber a John Onumanyi a nna ɔyɛ Nyankopɔn no somfo no hun Jesus a ofi Nazareth wɔ afe 29 H.B. mu no, ɔkaa dɛ: “Hwɛ, Nyankopɔn n’Eguambaa no nye yi. Oyi nye nyia oyi wiadze no bɔn fi hɔ no!” (John 1:29) Asɛm a John Onumanyi no kae yi maa ɔdaa edzi dɛ Jesus nye asenyi a nna wɔahyɛ no ho nkɔm no. Nna ɔdze no nkwa bɔbɔ afɔr ama adasamba. Afei dze, nna nyimpa a bɔn wɔ hɔnho no botum enya enyidado papabi. Ɔno nye dɛ, nna wobotum adze hɔnho efi bɔn ho korakora.—Kenkan Hebrewfo 9:22; 10:​1-4, 12.

10. Ebɛnadze na Jesus yɛe dze kyerɛɛ dɛ ‘ɔbɛfrɛɛ’ ndzebɔnyɛfo?

¹⁰ Nkorɔfo a nna hɔn bɔn ayɛ adzesoa ama hɔn no, hɔn paa na Jesus dze n’adwen sii hɔn do. Ɔkaa kyerɛɛ hɔn dɛ wɔmbɛyɛ n’esuafo. Nna Jesus nyim dɛ ɔberɛ a adasamba rebrɛ nyina, bɔn ntsi a. Ntsi ɔbɛɛn mbarimba na mbaa a nna nkorɔfo nyim hɔn dɛ wɔyɛ ndzebɔnyɛfo paa no na ɔboaa hɔn. Ɔyɛɛ mfatoho bi, na ɔkaa dɛ: “Hɔn a wɔtse apɔw nnhia ɔyarsafo, mbom hɔn a wɔyar no na wohia.” Afei ɔdze kaa ho dɛ: “Mammbɛfrɛ atseneneefo, na mbom mebɛfrɛɛ ndzebɔnyɛfo.” (Matt. 9:​12, 13) Dza Jesus kae yi, dɛm pɛpɛɛpɛ na  ɔyɛe. Ɔbaa no a ɔdze ne nyinsuwa fɔɔw Jesus ne nan ho no, Jesus tɔɔ bo ara nye no kasae na ɔdze no bɔn kyɛɛ no. (Luke 7:​37-50) Afei so, Samarianyi ɔbaa no a Jesus nye no kasae wɔ bura bi ho no, nna Jesus nyim dɛ obu bra bɔn, naaso ɔkyerɛkyerɛɛ no nokwasɛm etsitsir bi. (John 4:​7, 17-19, 25, 26) Nyankopɔn maa Jesus tum ma ɔdze dzii owu a bɔn akɛfa aba no do konyim. Osii dɛn yɛɛ dɛm? Ɔno nye dɛ, Nyankopɔn maa Jesus tumii nyaan mbarimba, mbaa, mbofra nye mpanyimfo fii owu mu.—Matt. 11:5.

11. Nna ebɛnadze ntsi na ɔnnyɛ dzen dɛ ndzebɔnyɛfo bɛbɛn Jesus?

¹¹ Ɔnnyɛ nwanwa koraa dɛ nkorɔfo a nna wodzi bɔn no mpo tumii bɛɛn Jesus. Jesus daa tsema na ayamuhyehye edzi kyerɛɛ dɛm nkorɔfo no. Ntsi nna ɔnnyɛ dzen mma hɔn dɛ wɔbɛbɛn no. (Luke 15:​1, 2) Afei so, osiandɛ nna dɛm nkorɔfo no gye Jesus dzi ntsi, ɔkamfoo hɔn na ɔnye hɔn dzii no yie. (Luke 19:​1-10) Jesus hun nkorɔfo mbɔbɔr na ɔmaa wohun dɛ n’Egya wɔ ehumbɔbɔr paa. (John 14:9) Nsɛm a Jesus kae nye dza ɔyɛe no maa ɔdaa edzi dɛ, n’Egya a ɔwɔ ehumbɔbɔr no dɔ nyimpa, na ɔpɛ dɛ ɔboa hɔn ma wodzi bɔn do konyim. Jesus boaa ndzebɔnyɛfo mbrɛ ɔbɛyɛ a wobefi hɔn akoma mu asesa hɔn abrabɔ na woeebedzi n’ekyir.—Luke 5:​27, 28.

12. Ebɛnadze na Jesus kae faa no wu no ho?

¹² Nna Jesus nyim dza ɔbɔto no. Ɔkaa kyerɛɛ n’ekyirdzifo no mpɛn pii dɛ wobeyi no ama, na wɔaabɔ no asɛndua mu. (Matt. 17:22; 20:​18, 19) Nna Jesus nyim dɛ John Onumanyi no aka dɛ n’afɔrbɔ no na obeyi adasamba bɔn efi hɔ, na dɛmara so na nkɔnhyɛfo no kae too  hɔ. Afei so, Jesus kaa dɛ sɛ wonyan no a, ‘ɔbɔtwe nyimpa ahorow nyina’ aba ne nkyɛn. (John 12:32) Sɛ nyimpa a bɔn wɔ hɔnho no gye to mu dɛ Jesus nye hɔn Wura, na wodzi n’anamɔn ekyir a, wobotum asɔ Jehovah n’enyi. Sɛ wɔyɛ dɛm a, ewiei koraa no, ‘wobeyi hɔn efi bɔn nkowaasom ase.’ (Rom. 6:​14, 18, 22; John 8:32) Dɛm ntsi, Jesus daa akokodur edzi, na ɔmaa kwan ma wokum no yayaayaw dze gyee hɛn nkwa.—John 10:​17, 18.

13. Ebɛn kwan na wɔfaa do kum Jesus, na ebɛnadze na no wu no ma yehu fa Jehovah Nyankopɔn ho? (Hwɛ mfonyin no so.)

¹³ Woyii Jesus mae, wɔkyeer no, wɔhyehyɛɛ no ahorba, wotwaa asɛm too no do, wobuu no kumfɔ na wɔyɛɛ no ayakayakadze so kaa ho. Afei, asogyafo dze no kɔr beebi a woboku no no, na wɔbɔɔ no asɛndua mu. Jesus miaa n’enyi faa dɛm atseetsee yi nyina mu. Aber a Jehovah hun dza nna wɔdze reyɛ Jesus no, ɔyɛɛ no yaw paa. Yaw a Jehovah faa mu no dze, nna ɔkyɛn Jesus nedze no mpo. Jehovah yɛ tum nyina wura, ntsi nkyɛ obotum agye Jesus naaso ɔannyɛ. Yenyim dɛ Jehovah dɔ Jesus paa. Naaso ebɛnadze ntsi na ɔmaa kwan ma wokum no Dɔba no? Ɔnnyɛ biribiara o, ɔyɛ ɔdɔ ntsi a. Jesus kaa dɛ: “Nyankopɔn dɔ wiadze paa, ntsi na ɔdze ne Ba a ɔwoo no kor no mae, ama obiara a ɔbɛgye no edzi no annsɛɛ, na mbom oeenya daa nkwa.”—John 3:16.

14. Ebɛnadze na Jesus no wu no ma yehu?

¹⁴ Jesus no wu no yɛ adanse a ɔkyerɛ dɛ Jehovah dɔ Adam na Eve hɔn asefo paa. Afei so, ɔkyerɛ dɛ Jehovah dɔ woara so paa. Ɔwodze hwɛ o, Jehovah faa yaw pii mu. Siantsir nye dɛ, ɔpɛ dɛ ɔgye wo fi bɔn na owu mu. (1 John 4:​9, 10) Nokwasɛm nye dɛ, ɔpɛ dɛ ɔboa hɛn mu biara ma yedzi bɔn do konyim!

15. Yebesi dɛn enya Jesus no werdam afɔrbɔ no do mfaso?

¹⁵ Jesus no werdam afɔrbɔ no nye akyɛdze a ɔsen biara a Nyankopɔn dze ama adasamba. Osian dɛm akyɛdze yi ntsi, Nyankopɔn botum dze hɛn bɔn akyɛ hɛn ma wɔaayɛ yie. Naaso sɛ ɔdze hɛn bɔn bɛkyɛ hɛn a, ɔsɛ dɛ yɛyɛ biribi. Ehwɛ a, ebɛnadze na ɔsɛ dɛ yɛyɛ? John Onumanyi no nye Jesus nankasa ma yehu dza ɔsɛ dɛ yɛyɛ. Wɔkaa dɛ: “Hom nnu homho, na ɔsor Ahendzi no abɛn.” (Matt. 3:​1, 2; 4:17) Ntsi sɛ yɛpɛ dɛ yɛko tsia bɔn, na yetum bɛn hɛn sor Egya a ɔdɔ hɛn no a, ɔsɛ dɛ yenu hɛnho. Naaso, sɛ wɔka dɛ obi enu noho a, ɔkyerɛ dɛn? Na sɛ yenu hɛnho a osi dɛn boa hɛn ma yɛko tsia bɔn? Yebenya dɛm nsɛmbisa yi ho mbuae wɔ adzesua a odzi hɔ no mu.