ADZESUA ASƐM 35
NDWOM 123 Brɛ Woho Adze Ma Nyankopɔn Ne Nhyehyɛɛ
Mbrɛ Wobotum Aboa Hɔn A Woeyi Hɔn Efi Asafo No Mu No
“Hɔn a wɔwɔ sor no enyi gye paa aber a ɔdzebɔnyɛnyi kor enu noho no. Hɔn enyi gye wɔ iyi ho kyɛn atseneneefo 99 a onnhia dɛ wonu hɔnho.”—LUKE 15:7.
DZA YEBOSUA
Yɛbɔhwɛ siantsir a ohia dɛ woyi binom fi asafo no mu, nye dza mpanyimfo botum ayɛ dze aboa hɔn ma woeenu hɔnho, na wɔaasan abɔsom Jehovah bio.
1-2. (a) Hɔn a wɔyɛ bɔn a no mu yɛ dur na wonnu hɔnho no, Jehovah hu hɔn dɛn? (b) Ebɛnadze na Jehovah pɛ dɛ ndzebɔnyɛfo yɛ?
ƆNNYƐ ndzeyɛɛ nyina na Jehovah pen do; ɔnnsosɔw bɔn do. (Ndw. 5:4-6) Ɔhwɛ kwan dɛ yɛdze mbra a ɔwɔ n’Asɛm Bible no mu no bɔbɔ hɛn bra. Jehovah nyim dɛ bɔn wɔ hɛnho, ntsi ɔnnhwɛ kwan dɛ yɛbɛyɛ hɛn adze pɛpɛɛpɛ. (Ndw. 130:3, 4) Naaso iyi nnkyerɛ dɛ ‘emumuyɛfo a wɔafa n’adom ho dze bɔ ehuhubra no,’ ɔpen dza wɔyɛ no do. (Jude 4) Bible no ma no mu da hɔ dɛ ‘wɔbɛsɛɛ emumuyɛfo’ wɔ Amagedon ko no mu.—2 Pet. 3:7; Nyi. 16:16.
2 Naaso, Jehovah mmpɛ dɛ ɔsɛɛ obiara. Dɛ mbrɛ yeedzi kan esusu ho wɔ Ɔweɔn-Aban yi mu no, Bible no ka no pen dɛ Jehovah ‘pɛ dɛ obiara nu noho.’ (2 Pet. 3:9) Asafo mu mpanyimfo nya hɔn a wɔayɛ bɔn no ho abotar na wɔboa hɔn ma wɔsesa hɔn akwan na wɔsan bɔsom Jehovah. Wɔyɛ dɛm dze suasua Jehovah. Naaso awerɛhosɛm nye dɛ, ɔnnyɛ hɔn a wɔyɛ bɔn no nyina na wonu hɔnho. (Isa. 6:9) Binom kɔ do ara yɛ bɔn ɔmmfa ho mbɔdzen a asafo mu mpanyimfo bɔ dɛ wɔbɔboa hɔn ma woeenu hɔnho no. Sɛ ɔba no dɛm a, ebɛnadze na ɔsɛ dɛ asafo mu mpanyimfo yɛ?
“HOM NYI NYIMPA BƆN NO MFI HOM MU”
3. (a) Hɔn a wɔyɛ bɔn a wonnu hɔnho no, Bible no ka dɛ ɔsɛ dɛ wɔyɛ hɔn dɛn? (b) Sɛ woyi ɔdzebɔnyɛnyi bi fi asafo no mu a, ebɛnadze ntsi na yebotum aka dɛ ɔnoara na ɔpɛ no dɛm?
3 Sɛ ɔdzebɔnyɛnyi bi nnu noho a, dza ɔsɛ dɛ asafo mu mpanyimfo yɛ ara nye dɛ wɔdze asɛm a ɔwɔ 1 Corinthfo 5:13 no bɛyɛ edwuma. Hɔ ka dɛ: “Hom nyi nyimpa bɔn no mfi hom mu.” Iyi kyerɛ dɛ nyimpa noara na ɔpɛ dɛ woyi no fi asafo no mu; dza oduae no, ɔno ara na oetwa no. (Gal. 6:7) Ebɛnadze ntsi na yebotum aka dɛm? Osiandɛ, mbɔdzen a mpanyimfo no kɔr do bɔe dɛ nkyɛ wɔdze roboa no ma woeenu noho no, ɔammfa ne tsir anngye. (2 Ahe. 17:12-15) Mbom, ɔkɔr do dze ne ndzeyɛɛ kyerɛɛ dɛ ɔmmpɛ dɛ ɔdze Jehovah ne mbra yɛ edwuma.—Deut. 30:19, 20.
4. Sɛ woyi ɔdzebɔnyɛnyi bi a onnu noho fi asafo no mu a, ebɛnadze ntsi na wɔma ho nkaabɔ?
4 Sɛ woyi ɔdzebɔnyɛnyi a onnu noho no fi asafo no mu a, wɔma nkaabɔ wɔ asafo no mu ma enuanom hu dɛ dɛm nyimpa no nnyɛ Jehovah Dasefo bio. a Ɔnnyɛ siantsir a wɔma dɛm nkaabɔ no nye dɛ wɔdze bogu ɔdzebɔnyɛnyi no n’enyim ase. Mbom wɔyɛ dɛm ama enuanom eetum edzi Bible mu ahyɛdze a ɔka dɛ ‘mma wɔnye nyimpa a ɔtse dɛm no nndzi afora anaa wɔnye no nndzidzi mpo’ no do. (1 Cor. 5:9-11) Siantsir papa bi ntsi na Jehovah dze dɛm ahyɛdze yi mae. Ɔsomafo Paul kyerɛɛw dɛ: “Mbɔrkaw kakra kaw mbɔr no nyina.” (1 Cor. 5:6) Sɛ woennyi ndzebɔnyɛfo a wonnu hɔnho no emmfi asafo no mu a, binom benya adwen dɛ sɛ hɔnara so wɔammfa Jehovah ne mbra annyɛ edwuma a ɔnnyɛ hwee.—Mbɛ. 13:20; 1 Cor. 15:33.
5. Sɛ woyi obi fi asafo no mu a ɔsɛ dɛ yehu no dɛn, na ebɛnadze ntsi a?
5 Ntsi, sɛ woyi onua b bi fi asafo no mu a, ɔsɛ dɛ yehu nyimpa no dɛn? Yɛnye no rommbɔ dze, naaso ɔsɛ dɛ yɛkaa dɛ wɔakyea, naaso ommbui. Ɔyɛ oguan bi a ɔayew kɛkɛ, na mbom ɔnnsɛɛ. Sɛ oguan bi twe noho fi nguankuw no ho a, ɔkɔ kɔ koraa a, obotum asan aba. Afei so ɔnnsɛ dɛ hɛn werɛ fir dɛ, nyimpa a ɔtse dɛm no hyiraa noho do maa Jehovah. Biribi na ɔama sesei onntum nndzi bɔ a ɔhyɛɛ Jehovah no do, na ɔno na ɔma asɛm no yɛ hu no. (Ezek. 18:31) Naaso yenyim dɛ, Jehovah n’ehumbɔbɔr da ho wɔ hɔ yi ara dze, enyidado wɔ hɔ dɛ nyimpa a ɔtse dɛm no bɛsan aba bio. Sɛ dɛm dze a, ebɛnadze na asafo mu mpanyimfo botum ayɛ dze akyerɛ dɛ wɔwɔ dɛm enyidado no?
DZA ASAFO MU MPANYIMFO YƐ DZE BOA HƆN A WOEYI HƆN EFI ASAFO NO MU
6. Sɛ woyi obi fi asafo no mu a, ebɛn anamɔn na mpanyimfo no botu dze aboa no?
6 Sɛ woyi obi fi asafo no mu a, asafo mu mpanyimfo gyaa n’asɛm ma no dɛ ɔnoara nduadua mu nkesi dɛ obohu kwan na ɔasan aba Jehovah ne nkyɛn bio anaa? Ɔnntse dɛm koraa! Sɛ wɔrobɔ ɔdzebɔnyɛnyi bi a onnu noho no amandzɛɛ dɛ wobeyi no efi asafo no mu a, egyinatukuw a no mufo yɛ mpanyimfo no ma ohu ndzɛmba a ɔsɛ dɛ ɔdze gu akwan mu ama oeetum asan aba asafo no mu bio. Nnyɛ iyi nkotsee na mpanyimfo no yɛ dze boa no. Mpɛn pii no dza wɔyɛ nye dɛ, wɔma nyimpa no hu dɛ wɔpɛ dɛ abosoom kakraabi ekyir no wɔsan hyia no hwɛ dɛ oenya adwensesa bi anaa. Sɛ ɔdzebɔnyɛnyi no gye to mu dɛ wɔnye no nhyia bio a, ɔno ber a mpanyimfo no behyia no no, wobefi hɔn akoma nyinara mu ahyɛ no nkuran dɛ onnu noho na ɔnsan mbra asafo no mu. Sɛ wɔnye no hyia bio dɛm aber no na onnuu noho mpo a, mpanyimfo no bɛsan ayɛ nhyehyɛɛ bio ma wɔaasan ehyia no na wɔaahyɛ no nkuran dɛ onnu noho.
7. Sɛ mpanyimfo no nye obi a woeyi no efi asafo no mu no ridzi a, ebɛnadze na wɔyɛ dze suasua Jehovah n’ayamuhyehye? (Jeremiah 3:12)
7 Sɛ mpanyimfo no nye obi a woeyi no efi asafo no mu no ridzi a, wɔda Jehovah n’ayamuhyehye no bi edzi. Sɛ yɛbɛkaa a, aber a tsetse Israelfo no yɛɛ bɔn no, Jehovah anntsena hɔ anntweɔn dɛ wondzi kan ntu anamɔn bi ansaana ɔaboa hɔn. Mbom no, ɔno Jehovah na odzii kan tuu anamɔn dze boaa hɔn ber mpo a nna hɔnara wɔnnyɛɛ biribiara a ɔkyerɛ dɛ woenu hɔnho no. Adzesua asɛm a otsia ebien wɔ Ɔweɔn-Aban yi mu no, yehun dɛ Jehovah kaa kyerɛɛ nkɔnhyɛnyi Hosea dɛ ɔnsan nkɛfa ne yer a nna ogu do reyɛ bɔn a no mu yɛ dur no na ɔnye no ntsena. Dza Jehovah yɛe yi ma yehu dɛ ɔwɔ ayamuhyehye paa. (Hos. 3:1; Mal. 3:7) Asafo mu mpanyimfo suasua Jehovah, ntsi wɔpɛ paa dɛ hɔn a wɔayɛ bɔn no nu hɔnho. Dɛm ntsi wɔbɔ mbɔdzen dɛ wɔrennyɛ biribiara a ɔbɛma wɔayɛ dzen ama ɔdzebɔnyɛnyi no dɛ obonu noho.—Kenkan Jeremiah 3:12.
8. Ebɛn kwan do na Jesus ne mfatoho a ɔfa ɔba dzesɛɛfo ho no ma yɛtse Jehovah n’ayamuhyehye na n’ehumbɔbɔr ase yie? (Luke 15:7)
8 Jesus ne mfatoho a ɔfa ɔba dzesɛɛfo ho no mu no, ekaa mbrɛ papa no sii yɛɛ n’adze no a? Aber a ohun ne ba no ara pɛr na “ɔdze mbirika kɛyɛɛ no etuu na ofeew n’ano.” (Luke 15:20) Hyɛ no nsew dɛ, egya no anntweɔn ma ne ba no ammbɛserɛ bɔnfakyɛ. Mbom dɛ mbrɛ egya biara a ɔdɔ ne ba bɛyɛ no, ɔno mbom na odzii kan tuu anamɔn kehyiaa ne ba no. Anamɔn a ɔtse dɛmara na mpanyimfo no tu dze boa hɔn a wɔatwe hɔnho efi Jehovah ho no. Wɔpɛ dɛ dɛm nguan a wɔayew yi nyinara ‘san ba fie.’ (Luke 15:22-24, 32) Sɛ obi a ɔayɛ bɔn no san ba Jehovah ne nkyɛn a, Jehovah, Jesus, abɔfo no nye hɔn a wɔwɔ asafo no mu no nyinara enyi gye!—Kenkan Luke 15:7.
9. Ebɛnadze na Jehovah tu ndzebɔnyɛfo fo dɛ wɔnyɛ?
9 Dze besi ha yi, yeehu dɛ Jehovah mma ɔdzebɔnyɛnyi bi a onnu noho no kwan ma ɔnntsena n’asafo no mu. Naaso sɛ ɔba no dɛm a, ɔnnkyerɛ dɛ wɔatow hɔn akyen. Ɔpɛ dɛ wɔsan ba ne nkyɛn. Hosea 14:4 no ma yehu mbrɛ Jehovah si tse nka fa hɔn a wonu hɔnho wɔ hɔn bɔn ho no ho. Hɔ ka dɛ: ‘Mebɛsa hɔn yarba na worimmfi m’ekyir bio. Mebɛpra me yamu adɔ hɔn, osiandɛ m’ebufuw adan efi hɔn do.’ Dɛm asɛm yi ntsi, mpanyimfo no hwehwɛ adze biara a ɔbɛma woehu dɛ obi enu noho. Na dɛmara so na ɔsɛ dɛ dɛm asɛm yi ka hɔn a woefi Jehovah ne nkyɛn no ma wɔyɛ no ntsɛm san ba.
10-11. Ebɛn mbɔdzen na asafo mu mpanyimfo bɔbɔ dze aboa hɔn a woyii hɔn fii asafo no mu akyɛr no?
10 Hɔn a woyii hɔn fii asafo no mu akyɛr no so ɛ, ebɛnadze na asafo mu mpanyimfo botum ayɛ dze aboa hɔn? Dɛm nkorɔfo no mu bi wɔ hɔ a, bɔn a ɔnam do ma woyii hɔn fii asafo no mu no, woegyaa yɛ. Binom so mpo wɔ hɔ a, dza wogyinaa do yii hɔn fii asafo no mu no, wɔnnkaa. Mbrɛ ɔtse biara no, mpanyimfo no bɔbɔ mbɔdzen ahwehwɛ hɔn ekyir kwan na wɔaakɛsera hɔn. Sɛ wɔkɛsera hɔn a, wobotum mpo nye hɔn abɔ mpaa na woeefi hɔn akoma mu ahyɛ hɔn nkuran paa dɛ wɔnsan mbra asafo no mu bio. Sɛ obi fii asafo no mu akyɛr paa a, ɔno yebotum aka dɛ ɔnye Jehovah ntamu asɛɛ paa, ntsi obehia mboa. Ntsi sɛ ɔka dɛ ɔpɛ dɛ ɔsan ba asafo no mu bio a, mpanyimfo no botum ayɛ nhyehyɛɛ ma obi nye no eesua adze aber mpo a wɔnngyee no no. Mbrɛ asɛm no tse biara no, mpanyimfo no nkotsee na ɔsɛ dɛ wɔyɛ Bible adzesua a ɔtse dɛm ho nhyehyɛɛ.
11 Asafo mu mpanyimfo suasua Jehovah n’ayamuhyehye no. Ntsi wɔbɔ mbɔdzen hwehwɛ hɔn a woefi asafo no mu dodow biara a wobotum, na wɔhyɛ hɔn nkuran dɛ wɔnsan mbra Jehovah ne nkyɛn. Sɛ obi a ɔayɛ bɔn no nu noho na ogyaa no bɔn no yɛ a, wobotum agye no ntsɛmara.—2 Cor. 2:6-8.
12. (a) Ebɛn nsɛm ahorow mu na ɔsɛ dɛ asafo mu mpanyimfo yɛ ahwɛyie paa? (b) Ebɛnadze ntsi na ɔnnsɛ dɛ yenya adwen dɛ ndzebɔnyɛfo binom wɔ hɔ a, Jehovah runnhu hɔn mbɔbɔr da? (Hwɛ ase hɔ asɛm no so.)
12 Naaso wɔ nsɛm ahorow bi mu dze, ɔsɛ dɛ mpanyimfo no yɛ ahwɛyie paa ansaana wɔagye obi. Dɛ mfatoho no, sɛ obi a ɔpɛ dɛ ɔsan ba no seesee abofra, ɔbɛyɛɛ ɔwaafo anaa ɔnam nyansakwan do gyaa awar a, ɔsɛ dɛ mpanyimfo no hwɛ hu dɛ oenu noho ampa. (Mal. 2:14; 2 Tim. 3:6) Ɔsɛ dɛ wɔyɛ dɛm dze bɔ enuanom a wɔaka wɔ asafo no mu no ho ban. Ber kor no ara so, ɔsɛ dɛ yɛkaa dɛ obiara a ɔayɛ bɔn na oenu noho ampaara na oegyaa bɔn no yɛ no, Jehovah bɛgye no aba ne nkyɛn bio. Ntsi ɔwɔ mu dɛ ɔsɛ dɛ mpanyimfo yɛ ahwɛyie ansaana wɔagye hɔn a wɔyɛɛ bɔn a no mu yɛ dur tse dɛ dza yeedzi kan aka ho asɛm no dze, naaso ɔnnsɛ dɛ wonya adwen dɛ hɔn a wɔayɛ bɔn a ɔtsetse dɛm no, Jehovah runnhu hɔn mbɔbɔr da. c—1 Pet. 2:10.
DZA ENUANOM A WƆWƆ ASAFO NO MU NO BOTUM AYƐ
13. Mbrɛ yesi yɛ hɛn adze aber a mpanyimfo no akasa akyerɛ onua bi nye mbrɛ yesi yɛ hɛn adze aber a woeyi obi efi asafo no mu no, ebɛn nsonsonee na ɔwɔ mu?
13 Dɛ mbrɛ yesusuu ho wɔ adzesua a odzi iyi enyim mu no, ɔtɔ da a wɔma nkaabɔ dɛ wɔakasa akyerɛ onua anaa akyerɛbaa bi. Sɛ yɛtse nkaabɔ a ɔtse dɛm a, yebotum akɔ do nye nyimpa a ɔtse dɛm no abɔ, osiandɛ oenu noho na oegyaa no bɔn no yɛ. (1 Tim. 5:20) Ɔda ho ara ka asafo no ho, na ohia enuanom no hɔn nkuranhyɛ ama ɔaakɔ do ayɛ dza ɔtsen. (Heb. 10:24, 25) Naaso sɛ woyi obi fi asafo no mu dze a, ɔno n’asɛm nko. Yɛnye dɛm nyimpa no “nndzi afora” anaa yɛnye no mmbɔ na yɛnye no “nndzidzi mpo.”—1 Cor. 5:11.
14. Sɛ woyi obi fi asafo no mu a, enuanom binom botum esi gyinae dɛ wɔbɛyɛ dɛn? (Hwɛ mfonyin no so.)
14 Dza yeesusu ho yi kyerɛ dɛ sɛ woyi obi fi asafo no mu a yɛrennkasa no ho koraa? Nnyɛ dɛm na yɛreka. Nyew, yɛnye dɛm nyimpa no rommbɔ. Naaso sɛ nyimpa no yɛ Christiannyi bi no busuanyi anaa nna ɔyɛ ne nyɛnko paa a, ɔno Christiannyi no botum dze ne tsibowa a ɔdze Bible no atsetse no esi gyinae dɛ ɔbɔto nsa afrɛ no aba asafo nhyiamu ase anaadɛ ɔrennyɛ dɛm. Na sɛ dɛm nyimpa ba so ɛ? Nkan no a nkyɛ yerinnkyia no. Naaso wɔ iyi so mu no, ɔsɛ dɛ Christiannyi biara dze ne tsibowa a ɔdze Bible no atsetse no no si dza ɔbɛyɛ ho gyinae. Binom hɔn tsibowa bɛma hɔn kwan ma oeekyia nyimpa no anaa ɔaama no akɔaba aba nhyiamu no ase. Naaso yɛnye no rennkasa tsentsen biara anaa yɛnye no rommbɔ.
Christianfo botum egyina hɔn tsibowa a wɔdze Bible no atsetse no no do esi gyinae dɛ wɔbɔto nsa afrɛ obi a woeyi no efi asafo no mu no aba asafo nhyiamu ase anaa wɔrennyɛ dɛm. Afei so, sɛ nyimpa no ba a, bi a wobekyia no kakra dze ama no akɔaba anaa wɔrennyɛ dɛm (Hwɛ nkyekyɛmu 14)
15. Woananom na 2 John 9-11 ka hɔnho asɛm no? (Hwɛ adakaba a wɔato dzin “ Nna Bɔn Kor No Ara Na John Na Paul Reka Ho Asɛm Anaa?” no so.)
15 Bi a binom bɛka dɛ, ‘Nkyɛ Bible no se sɛ Christiannyi bi kyia obi a ɔtse dɛm a, ɔyɛ ne ndzeyɛbɔn no ne fafafo bi a?’ (Kenkan 2 John 9-11.) Dza kyerɛwsɛm yi reka ho asɛm no fa awaafo nye hɔn a wɔgye enyim ara hyɛ bɔn ho nkuran no ho. (Nyi. 2:20) Dɛm ntsi sɛ obi gye enyim ara hyɛ awaafo nkyerɛkyerɛ anaa abrabɔ bɔn ho nkuran a, asafo mu mpanyimfo rennyɛ nhyehyɛɛ biara nkɛsera no. Ɔwɔ mu dɛ dɛm nyimpa no botum asesa dze, naaso kesi dɛ ɔbɛsesa no, yerinnkyia no anaa yɛronnto nsa mmfrɛ no dɛ ɔmbra asafo nhyiamu.
SUASUA MBRƐ JEHOVAH SI DA AYAMUHYEHYE NA EHUMBƆBƆR EDZI NO
16-17. (a) Ebɛnadze na Jehovah pɛ dɛ ndzebɔnyɛfo yɛ? (Ezekiel 18:32) (b) Sɛ asafo mu mpanyimfo roboa hɔn a wɔayɛ bɔn no a, ebɛnadze na wobotum ayɛ dze akyerɛ dɛ wɔnye Jehovah robɔ mu ayɛ edwuma?
16 Ebɛnadze na yeesua wɔ adzesua nsɛm enum a ɔwɔ Ɔweɔn-Aban yi mu no mu? Yeebohu dɛ Jehovah mmpɛ dɛ nyimpa biara bɛsɛɛ! (Kenkan Ezekiel 18:32.) Mbom no ɔpɛ dɛ ndzebɔnyɛfo san ba ne nkyɛn. (2 Cor. 5:20) Iyi ntsi na ofi tsetse nyinara Jehovah akɔ do ara ahyɛ n’asomfo a wɔtwe hɔnho fi no ho no nkuran dɛ wonnu hɔnho na wɔnsan mbra ne nkyɛn no. Asafo mu mpanyimfo so enya hokwan nye Jehovah abɔ mu reyɛ edwuma dze roboa ndzebɔnyɛfo ma woeenu hɔnho na wɔaasan aba Jehovah ne nkyɛn.—Rom. 2:4; 1 Cor. 3:9.
17 Sɛ ndzebɔnyɛfo nu hɔnho a, enyigye a ɔkɔ do wɔ sor no dze, ɔsɛ w’enyi! Aber biara a hɛn sor Egya Jehovah no nguan a wɔayew no mu kor bɛsan aba ne nkyɛn no, n’enyi gye paa. Sɛ yɛdwendwen mbrɛ Jehovah n’adom si dɔɔ so wɔ hɛn do, nye mbrɛ osi da ayamuhyehye na ehumbɔbɔr edzi kyerɛ hɛn no ho a, ɔma ɔdɔ a yɛwɔ ma no no kɔ do yɛ kɛse.—Luke 1:78.
NDWOM 111 Dza Ɔma Hɛn Enyi Gye
a Seseiara, yɛrennka dɛ woetu hɔn a wɔtse dɛm no. Mbom dɛ mbrɛ Paul n’asɛm a ɔwɔ 1 Corinthfo 5:13 kyerɛ no, yɛbɛka dɛ woeyi hɔn efi asafo no mu.
b Sɛ yɛka onua wɔ adzesua yi mu a, ogyina hɔ ma enuanom mbaa na mbanyin nyinara.
c Sɛ ehwɛ Bible mu a, wɔntoo ndzeyɛɛ biara dzin dɛ ɔyɛ bɔn a wɔmmfa nnkyɛ. Mbom ɔka dɛ bɔn a wɔnnkɛfa akyɛ nye dɛ obi bɛhyɛ da ara abɔ n’enyim biriw dɛ ɔbɔkɔ do ayɛ bɔn etsia Nyankopɔn daa. Jehovah na Jesus nkotsee na wobotum ebu obi atsɛn dɛ ɔayɛ bɔn a worunntum mmfa nnkyɛ no, na ɔnnyɛ hɛn.—Mark 3:29; Heb. 10:26, 27.
