1-2. Sɛ abofra bi bisa n’awofo hɛn gyedzi ho nsɛm a, ɔsɛ dɛ awofo no yɛ hɔn adze dɛn?

 NYIMPA pii gye to mu dɛ mbatsetse wɔ hɔ yi, ɔnnda famu; ɔgye edwumadzen paa. Sɛ eyɛ ɔwofo a eretsetse abofra kakraba a, yɛma wo ayekoo wɔ edwumadzen a ereyɛ dze aboa wo ba no ma ne gyedzi aayɛ dzen no ho. (Deut. 6:​6, 7) Aber a wo ba no rinyin no, bi a obebisa wo hɛn gyedzi ho nsɛm. Bi tse dɛ siantsir a Bible no ka dɛ ɔnnsɛ dɛ yɛyɛ ndzɛmba ahorow bi no.

² Ahyɛse no dze, bi a nsɛm a wo ba no bebisa no bɛhaw wo kakra. Annhwɛ mpo a, nsɛm a ɔtse dɛm no bɛma enya adwen dɛ gyama wo ba no nnhyɛ da ara nngye Nyankopɔn na Bible no nndzi. Naaso asɛm no nye dɛ, sɛ mbofra rinyin a, no ho hia paa dɛ wobisabisa nsɛm ama wɔaahyɛ hɔn gyedzi dzen. (1 Cor. 13:11) Ntsi mma mma nsɛm a wo ba no bebisa no mma w’akoma nntu, mbom hu no dɛ ɔyɛ hokwan a enya a edze bɔboa wo ba no ma ɔaadwen akɔ ekyir, mbrɛ ɔbɛyɛ a ɔbɛhyɛ gyedzi a ɔwɔ wɔ Nyankopɔn na Bible no mu no dzen.

3. Ebɛnadze na yebosusu ho wɔ adzesua yi mu?

³ Adzesua yi mu no, yɛbɔhwɛ dza awofo botum ayɛ dze aboa hɔn mba ma (1) woeenya gyedzi kɛse wɔ Nyankopɔn na Bible no mu, (2) woeehu siantsir a ɔsɛ dɛ wɔdze dza Bible no ka no bɔ hɔn bra, na (3) woeetum akyerɛkyerɛ dza wɔgye dzi no mu akyerɛ afofor. Afei so, yebosusu siantsir a no ho hia dɛ mbofra bisa nsɛm no ho, na yaahwɛ ndzɛmba ahorow bi a awofo botum nye hɔn mba abɔ mu ayɛ a ɔbɛma woenya hokwan nye hɔn abɔ hɛn gyedzi ho nkɔmbɔ.

BOA WO BA MA ONNYA GYEDZI KƐSE WƆ NYANKOPƆN NA BIBLE NO MU

4. Ebɛn nsɛm na abofra bi botum ebisa, na ebɛnadze ntsi a?

⁴ Awofo a wɔyɛ Christianfo no nyim dɛ gyedzi wɔ hɔ yi, wɔmmfa nnwo. Ntsi sɛ wɔgye Nyankopɔn dzi a, ɔno nnkyerɛ dɛ hɔn ba no so  bɛgye Nyankopɔn edzi. Wɔwoo wo no, nna ɔnnyɛ adze a ewɔ Jehovah mu gyedzi, na dɛmara so na ɔtse wɔ wo ba no n’afamu. Ber rokɔ do no, wo ba botum ebisa wo nsɛm bi tse dɛ: ‘Yesi dɛn hu dɛ Nyankopɔn wɔ hɔ? Mubotum agye dza Bible ka no edzi paa?’ Nokwasɛm nye dɛ, Bible no ankasa hyɛ hɛn nkuran dɛ yɛmfa hɛn adwen nyɛ edwuma na ‘yɛnsɔ adze nyina nhwɛ.’ (Rom. 12:1; 1 Thess. 5:21) Ntsi, ebɛn kwan na ebɛfa do aboa wo ba ma ɔaahyɛ ne gyedzi mu dzen?

5. Ebɛnadze na awofo botum ayɛ dze aboa hɔn ba ma ɔaagye dza Bible no ka no edzi? (Romefo 12:2)

⁵ Hyɛ wo ba no nkuran ma nankasa nhwehwɛ dase a ɔkyerɛ dɛ dza Bible no kyerɛkyerɛ no yɛ nokwar. (Kenkan Romefo 12:2.) Sɛ wo ba bisa wo asɛm bi a, fa dɛm hokwan no boa no ma ɔmfa edwindadze a yɛdze yɛ nhwehwɛmu tse dɛ Watch Tower Publications Index na Buukuu A Jehovah Adasefo Dze Yɛ Nhwehwɛmu no nhwehwɛ n’asɛmbisa no ho mbuae. Sɛ ɔhwɛ Buukuu A Jehovah Adasefo Dze Yɛ Nhwehwɛmu no mu a, obohu asɛntsir bi a wɔato dzin “Bible No,” na sɛ ɔhwɛ ne fa a ɔyɛ “Nyankopɔn Na Ɔmaa Wɔkyerɛwee” hɔ a, ɔbɔboa no ma oeenya dase a ɔkyerɛ dɛ Bible no nnyɛ nwoma bi ara kɛkɛ a nyimpa akyerɛw, na mbom ɔyɛ ‘Nyankopɔn n’Asɛm.’ (1 Thess. 2:13) Dɛ mfatoho no, obotum ayɛ tsetse Assyria kurow Nineveh ho nhwehwɛmu. Mber bi a etwa mu no, Bible ho abemfo bi kaa dɛ nna Nineveh kurow biara nnyi hɔ. Naaso wɔ 1850 mfe no mu hɔ beebi no, hɔn a wotutu famu hwehwɛ tsetse ndzɛmba no kohun biribi a ɔkyerɛ dɛ dza Bible ka fa Nineveh kurow no ho no yɛ nokwar. (Zeph. 2:​13-15) Sɛ ɔpɛ dɛ ohu mbrɛ nkɔnhyɛ a ɔfa Nineveh kurow no ne sɛɛ ho no sii baa mu a, obotum akenkan asɛm a wɔato dzin “Ana Inyim?” a ɔwɔ November 2021 Ɔweɔn-Aban no mu no. Sɛ ɔdze dza osua fi asafo nwoma ahorow mu no toto dza ɔwɔ encyclopedia ahorow na mbuukuu ahorow mu no ho a, ɔbɛma gyedzi a ɔwɔ wɔ Bible no mu no ayɛ kɛse.

6. Awofo bɛyɛ dɛn aboa hɔn ba ma oeehu dɛ dza Bible no ka no yɛ nokwar? Ma iyi ho mfatoho. (Hwɛ mfonyin no so.)

⁶ Boa wo ba no ma nankasa ndwen ho nhu dɛ dza Bible no ka no yɛ nokwar. Awofo botum afa akwan ahorow pii do nye hɔn mba abɔ Bible anaa Nyankopɔn mu gyedzi a wobenya no ho nkɔmbɔ. Akwan ahorow no bi nye dɛn? Hom botum nye hom ba no akɔ beebi a wɔkora tsetse ndzɛmba do, beebi a woeduadua ndua nye nhyiren asorɔtow anaa Bethel. Dɛ mfatoho no, sɛ hom kɔ beebi a wɔkora tsetse ndzɛmba do anaa hom hwɛ ho mfonyin anaa video wɔ intanɛt do, na ihu biribi a osii wɔ tsetse mber mu anaa edwindze bi a osi do dua dɛ Bible mu asɛm bi yɛ nokwar a, ibotum atwe wo ba no n’adwen esi do. Dɛm a ebɛyɛ no botum aboa no ma gyedzi a ɔwɔ wɔ Bible no mu no aayɛ kɛse. Ibotum so aka Moab Abopon no ho asɛm akyerɛ no. Dɛm abopon no edzi mfe 3,000, na Nyankopɔn ne dzin Jehovah wɔ do. Nkorɔfo tu kwan kɔhwɛ dɛm abopon yi wɔ Louvre Museum a ɔwɔ Paris, France no. Afei so, sɛ ekɔ hɛn Wiadze Nyina Edwumayɛbea Tsir a  ɔwɔ Warwick, New York no a, ibohu Moab Abopon no bi wɔ hɔ. Naaso ɔno dze ɔnnyɛ abopon no ankasa, mbom wɔhwɛɛ abopon no do na wɔdze yɛe. Ɔwɔ beebi a woyi ndzɛmba edzi kyerɛ a wɔato dzin “The Bible and the Divine Name” no. Sɛ ehwɛ abopon no do a, ibohu dɛ wɔakyerɛw wɔ do dɛ Moabhen Mesha tseew etua wɔ Israel do. Na dɛm pɛpɛɛpɛ na Bible no so ka. (2 Ahe. 3:​4, 5) Sɛ wo ba no ankasa dze n’enyiwa hu dase ahorow a ɔkyerɛ dɛ dza Bible no ka no nyinara yɛ nokwar a, ɔbɔboa no ma ne gyedzi aayɛ dzen.—Fa toto 2 Mbermunsɛm 9:6 ho.

7-8. (a) Mbrɛ abɔdze a woetwa hɛnho ehyia no si yɛ fɛw no, ebɛnadze na yebotum esua efi mu? Ma iyi ho mfatoho. (Hwɛ mfonyin no so.) (b) Nsɛmbisa a obotum aboa wo ba ma ɔaahyɛ gyedzi a ɔwɔ dɛ Nyankopɔn na ɔbɔɔ ndzɛmba nyinara no mu dzen no, bi nye dɛn?

⁷ Hyɛ wo ba no nkuran ma ɔndwendwen ndzɛmba a Jehovah abɔ no ho. Sɛ enye wo ba nam beebi a ndua na nhyiren wɔ anaa hom nam efuw bi mu a, boa no ma ɔmfa n’adwen nsi mbrɛ abɔdze ahorow si tse no do. Ebɛnadze ntsi a? Osiandɛ mbrɛ abɔdze ahorow si tse no ma yehu dɛ nyia ɔyɛe no nyim nyansa paa na ɔaben so. Dɛ mfatoho no, sɛ ehwɛ mbrɛ nwaba n’abon tse anaa ehwɛ nhyiren ahorow bi, ahataw ahorow bi, nye mbrɛ nworabakuw ahorow bi tse no a, ibohu dɛ hɔn nyina wɔ kwan pɔtsee bi a wɔafa do ayɛ no. Abɔdzenyansahufo dze mfe pii esua mbrɛ dɛm ndzɛmba ahorow yi si tse no ho adze. a

⁸ Sɛ wɔrekyerɛ wo ba abɔdzenyansahu ho adze wɔ skuul a, obohu dɛ abɔdze no mu beberee wɔ hɔ a, mbrɛ wɔtse no ma yehu dɛ wodzi mbra ahorow pɔtsee bi do. Sɛ yɛfa ndua dɛ mfatoho a, no mu piinara wɔ kwan pɔtsee bi a wɔfa do nyin. Sɛ wɔhyɛ ase dɛ worinyin a, hɔn mu paa ma wonya nkorbata. Sɛ nkorbata no so nyin a, ɔno so no mu paapaa ma wonya biribi a wɔfrɛ no mbabaa. Dɛm kwan kor yi ara na nkorbata anaa mbabaa fofor biara a ɔbɛba no bɛfa do. Borɔfo kasa mu no, wɔfrɛ iyi fractals. Ɔnnyɛ ndua nkotsee na wɔfa dɛm kwan yi do nyin, mbom abɔdze afofor bi so fa dɛm kwan yi do nyin. Mbra a abɔdze dzi do ma ɔno ntsi wotum nyin ma ɔyɛ fɛw no, woana na ɔhyehyɛe? Sɛ wo ba no kɔ do dwendwen dɛm asɛm yi ho a, ɔbɔboa no ma gyedzi a ɔwɔ dɛ Nyankopɔn na ɔbɔɔ ndzɛmba nyinara no mu aayɛ dzen. (Heb. 3:4) Aber a wo ba no rinyin no, ibotum ebisa no asɛm bi tse dɛ, “Sɛ Nyankopɔn na ɔbɔɔ hɛn dze a, ɔno innhu dɛ nyansa wɔ mu dɛ yɛbɛgye ato mu dɛ mbra ahorow a ɔahyehyɛ ama hɛn no sɛ yedzi do a hɛn enyiwa bɛgye a?” Aber a ebisa no dɛm ewie no, ibotum ama oeehu dɛ mbra ahorow a yehia ama hɛn enyiwa aagye no, Nyankopɔn dze ne nyinara ama hɛn wɔ Bible no mu.

BOA WO BA MA ONHU DƐ MFASO WƆ DO DƐ ƆDZE DZA BIBLE NO KA NO BƆBƆ NE BRA

9. Dza Bible no aka dɛ ɔnnsɛ dɛ yɛyɛ no, ebɛnadze na obotum ama abofra bi n’adwen mu aayɛ no konsee wɔ ho?

⁹ Dza Bible no ka dɛ ɔnnsɛ dɛ yɛyɛ no, wo ba no botum ebisa wo ho asɛm. Sɛ ɔba no dɛm a, bɔ  mbɔdzen dɛ ibohu siantsir a oribisa wo dɛm asɛm no. Ehwɛ a, gye ara na ɔnngye dza Bible no ka no nnto mu, anaa sɛ ɔba no dɛ ɔnkyerɛkyerɛ dza ɔgye dzi no mu nkyerɛ afofor a na ɔyɛ dzen ma no? Mbrɛ ɔtse biara no, ibotum nye no esua Ibotum Enya Enyigye Daa! buukuu no, na iyi botum aboa wo ba no ma oeehu dɛ mfaso wɔ do dɛ ɔdze dza Bible no ka no bɛyɛ edwuma. b

10. Ebɛnadze na ibotum ayɛ dze aboa wo ba no ma oeehu dɛ ɔsɛ dɛ ɔma ɔnye Jehovah ntamu yɛ kama?

¹⁰ Boa wo ba no ma ɔmfa Jehovah nyɛnko dzendzenndzen. Aber a enye wo ba no rusua Bible no, ibotum dze nsɛmbisa na mfatoho a ɔwɔ Ibotum Enya Enyigye Daa! buukuu no mu no edzi dwuma, mbrɛ ɔbɛyɛ a ibohu dza ɔwɔ n’akoma mu. (Mbɛ. 20:5) Dɛ mfatoho no, wɔ adzesua 8 no mu no, wɔdze Jehovah toto nyɛnko bi a ɔdwen hɛn ho a ɔka nsɛm a obotum abɔ hɛn ho ban na wɔaaboa hɛn kyerɛ hɛn no ho. Ntsi sɛ enye no kenkan 1 John 5:3 no wie a, ibotum ebisa no dɛ, “Sɛ yenyim dɛ Jehovah yɛ Nyɛnko papa dɛm a, nna ɔno sɛ ɔka dɛ yɛnyɛ biribi a, ɔsɛ dɛ yebu no dɛn?” Bi a ebɛka dɛ dɛm asɛmbisa yi dze, ɔnnyɛ dzen dɛ obi beyi ano. Naaso asɛmbisa a ɔtse dɛm no botum aboa wo ba no ma oeehu dɛ osiandɛ Nyankopɔn dɔ hɛn ntsi na ɔhyehyɛ mbra ma hɛn no.—Isa. 48:​17, 18.

11. Ebɛnadze na ibotum ayɛ dze aboa wo ba ma oeehu dɛ mfaso wɔ do dɛ ɔdze Bible mu afotusɛm bɛyɛ edwuma? (Mbɛbusɛm 2:​10, 11)

¹¹ Mfaso a yenya aber a yetsie Bible mu afotusɛm no, enye wo ba no nsusu ho. Sɛ enye wo ba no bɔ mu kenkan Bible anaa hom yɛ daa asɛm a, ɔyɛ a hom nsusu mbrɛ Bible mu afotusɛm esi aboa hom ebusua no ho. Dɛ mfatoho no, ibotum aboa no ma oeehu dɛ sɛ ɔyer noho yɛ edwumadzen na odzi nokwar a, ɔbɔboa nankasa. (Heb. 13:18) Afei so, ibotum ama oeehu dɛ sɛ yɛdze Bible mu afotusɛm yɛ edwuma a, ɔma yenya apɔwmudzen papa na hɛn enyiwa so gye. (Mbɛ. 14:​29, 30) Sɛ ema wo ba no hu mfaso a ɔwɔ do dɛ yɛdze Bible mu afotusɛm bɛyɛ edwuma a, ɔbɛma n’enyiwa agye ho dɛ noara so dze bɛyɛ edwuma.—Kenkan Mbɛbusɛm 2:​10, 11.

12. Ebɛn kwan do na papa bi boa ne ba ma ohu dɛ sɛ ɔdze Bible mu afotusɛm yɛ edwuma a ɔbɔboa nankasa?

¹² Papa bi a ɔwɔ France a wɔfrɛ no Steve nye ne yer boaa hɔn babanyin Ethan ma obohun dɛ osiandɛ Jehovah dɔ hɛn ntsi na ɔhyehyɛ mbra ma hɛn no. Dza ɔkae nye dɛ: “Ɔyɛ a yebisa no nsɛm bi tse dɛ, ‘Ebɛnadze ntsi na Jehovah pɛ dɛ yedzi dɛm mbra yi do? Ebɛn kwan do na iyi kyerɛ dɛ ɔdɔ hɛn? Na sɛ enndzi dɛm mbra yi do a, ebɛn asɛm botum esi?’” Nsɛm a ɔtse dɛm a wɔnye Ethan bɔ ho nkɔmbɔ no aboa no ma nankasa abɛgye edzi paa dɛ dza Jehovah ka no yɛ nokwar. Steve toaa n’asɛm no do dɛ: “Dza osi hɛn enyi do nye dɛ yɛbɔboa Ethan ma oeehu dɛ nyansa a wɔahyɛ Bible no mu ma no, nyimpa biara nnyi wiadze yi mu a ɔwɔ bi.”

13. Ebɛnadze na awofo botum ayɛ dze aboa hɔn ba ma ɔdze Bible mu afotusɛm aayɛ edwuma? Ma ho mfatoho.

¹³ Boa wo ba ma ɔmfa Bible mu afotusɛm nyɛ edwuma. Fa no dɛ wɔama wo ba no dwumadzi bi dɛ ɔnkɛkenkan buukuu bi wɔ skuul, naaso bi a hɔn a buukuu no ka hɔn ho asɛm no, wɔyɛ ndzɛmba ahorow bi a Jehovah n’enyi nngye ho. Bi nye dɛ wɔbɔ edwaman na hɔn akoko so haw hɔn, naaso ebɔhwɛ no, nna mbrɛ woesi akyerɛw buukuu no ma ɔyɛ tse dɛ mbrɛ bɔn biara nnyi dza wɔyɛ no ho ntsi yebotum esuasua hɔn. Sɛ ɔba no dɛm a, ibotum ebisa wo ba no dɛ, ‘Sɛ Jehovah hu dɛ nkorɔfo reyɛ dɛm a, ɔtse nka dɛn?’ (Mbɛ. 22:​24, 25; 1 Cor. 15:33; Phil. 4:8) Asɛm a ɔtse dɛm a wo ba no bɔdwen ho no bɔboa no ma oeehu dɛ nyansa wɔ mu paa dɛ otsie Jehovah. Iyi botum aboa wo ba no ma oeedzi ne kyerɛkyerɛnyi na no skuulfo dase aber a wɔrekenkan dɛm buukuu no wɔ skuul no.

BOA WO BA MA ONTUM NKYERƐKYERƐ NE GYEDZI MU

14. Ebɛn asɛm na sɛ Christiannyi ɔbabun bi nye obi robɔ ho nkɔmbɔ a obotum ama ɔaabɔ hu, na ebɛnadze ntsi a?

¹⁴ Ɔtɔ da a, suro ntsi obotum ayɛ dzen ama Christianfo mbabun dɛ wɔbɛkyerɛkyerɛ hɔn  gyedzi mu. Sɛ worusua adandandzi ho adze wɔ skuul na ɔba no dɛ wɔnkyerɛkyerɛ hɔn gyedzi mu a, nna wɔabɔ hu. Ebɛnadze ntsi na ɔyɛ a ɔba no dɛm? Siantsir no nye dɛ, ɔyɛ a akyerɛkyerɛfo no ka adandandzi ho asɛm ma ɔyɛ tse dɛ ɔyɛ nokwasɛm araa ma. Sɛ eyɛ ɔwofo a, ibesi dɛn aboa wo ba ma oeenya ahotodo paa dɛ dza ɔgye dzi no yɛ nokwar?

15. Ebɛnadze na obotum aboa Christiannyi ɔbabun bi ma oeenya ahotodo paa dɛ dza ɔgye dzi no yɛ nokwar?

¹⁵ Boa wo ba ma onnya ahotodo paa dɛ dza ɔgye dzi no yɛ nokwar. Ɔnnsɛ dɛ nyim a wo ba no nyim dɛ Ɔbɔadze bi wɔ hɔ no ma n’enyi to. (2 Tim. 1:8) Ebɛnadze ntsi a? Siantsir nye dɛ, abɔdzenyansahufo pii mpo nyim dɛ abɔdze a nkwa wɔ mu no ammba ara kɛkɛ. Sɛ wɔhwɛ mbrɛ abɔdze a nkwa wɔ mu no bi si tse paa a, ɔma wɔgye to mu dɛ, iyi dze obi a onyim nyansa paa na ɔbɔe. Iyi ntsi, adandandzi nkyerɛkyerɛ a wɔkyerɛkyerɛ wɔ skuul pii mu wɔ wiadze yi mu beebiara no, wɔnngye nndzi. Sɛ wo ba no dwendwen dza ɔboaa enuanom binom ma wɔbɛgyee dzii dɛ obi na ɔbɔɔ adze no ho a, ɔbɔboa noara so ma ahotodo a ɔwɔ dɛ obi na ɔbɔɔ adze no no mu aayɛ dzen. c

16. Ebɛnadze na awofo botum ayɛ dze aboa hɔn ba ma ɔaakyerɛkyerɛ siantsir a ɔgye dzi dɛ Ɔbɔadze bi wɔ hɔ no mu? (1 Peter 3:15) (Hwɛ mfonyin no so.)

¹⁶ Boa wo ba ma ontum nkyerɛkyerɛ siantsir a ɔgye dzi dɛ Ɔbɔadze bi wɔ hɔ no mu. (Kenkan 1 Peter 3:15.) Ibotum nye wo ba no abɔ mu akenkan nsɛm a ɔba toatoa do wɔ jw.org a wɔato dzin “Young People Ask—Creation or Evolution?” no. Afei nsɛm ahorow a ɔwɔ hɔ a wo ba no botum egyina do akyerɛkyerɛ afofor dɛ Ɔbɔadze bi wɔ hɔ no, ibotum nye no esusu ho; hom botum ayɛ ho ɔyɛkyerɛ mpo. Naaso ma onhu dɛ sɛ ɔrekyerɛkyerɛ ne gyedzi mu akyerɛ no skuulfo a, ɔnnsɛ dɛ ɔnye hɔn gye kyim. Hyɛ no nkuran dɛ sɛ obi ma no kwan dɛ ɔnkyerɛkyerɛ ne gyedzi mu nkyerɛ no a, ɔmfa nsɛm a ɔtɔ asomu na ɔnnyɛ dzen so dɛ nkorɔfo bɛtse ase nyɛ edwuma. Dɛ mfatoho no, no skuulnyi bi botum aka dɛ: “Emi dza muhu na megye dzi, na Nyankopɔn so munnhun no da.” Sɛ ɔba no dɛm a, obotum aka dɛ: “Fa no dɛ enam kwaa bi mu, nna ehu bura bi a nsu wɔ mu. Kwaa no mmbɛn kurow mu koraa, naaso ihu dɛ wɔahyɛ da ara esiesie bura no kama. Ebɛn adwen na ibenya? Ntsi sɛ ibenya adwen dɛ bura no mpo obi na otui a, nna ɔno amansan yi nye ndzɛmba a nkwa wɔ mu no, ehwɛ a ɔnyɛ obi na ɔbɔe a?”

17. Awofo bɛyɛ dɛn aboa hɔn ba ma oeetum aka nokwasɛm a ɔwɔ Bible mu no akyerɛ afofor? Fa mfatoho kyerɛkyerɛ mu.

 ¹⁷ Boa wo ba ma onhu kwan a ɔbɛfa do aka nokwasɛm a ɔwɔ Bible mu no akyerɛ afofor. (Rom. 10:10) Ibotum dze mbɔdzen a wo ba no robɔ dɛ ɔbɛkyerɛkyerɛ ne gyedzi mu no atoto obi a orusua mbrɛ wosi bɔ sanku ho. Obotum dze ndwom a no bɔ nnyɛ dzen ahyɛ ase, na nkakrankakra obohu sanku no bɔ yie. Dɛmara so na sɛ Christiannyi ɔbabun bi pɛ dɛ ɔkyerɛkyerɛ ne gyedzi mu kyerɛ obi a, obotum dze nsɛm a ɔnnyɛ dzen dɛ ɔbɛkyerɛkyerɛ mu no ahyɛ ase. Dɛ mfatoho no, obotum ebisa no skuulnyi bi dɛ: “Inyim dɛ ndzɛmba a abɔdzenyansahufo yɛ no, mpɛn pii no wɔhwɛ abɔdze do na wɔdze yɛ a? Ɔwodze, ma memfa video bi nkyerɛ wo.” Afei obotum eyi Aso Wɔbɔe? video ahorow no mu kor akyerɛ no. Owie a obotum aka dɛ: “Sɛ abɔdzenyansahufo hwɛ abɔdze do yɛ biribi ma wɔkamfo hɔn a, ɔno abɔdze nankasa so, woana na ɔsɛ dɛ yɛdze ho enyimnyamhyɛ no ma no?” Bi a nsɛm bi a ɔtse dɛm no bɛma no skuulnyi no enyi agye ho dɛ obosua Jehovah ho adze pii.

KƆ DO BOA WO BA MA ƆNHYƐ NE GYEDZI MU DZEN

18. Sɛ ɔwofo bi botum akɔ do aboa ne ba ma ɔaahyɛ gyedzi a ɔwɔ wɔ Nyankopɔn mu no dzen a, ebɛnadze na obotum ayɛ?

¹⁸ Hɔn a wɔnngye Jehovah nndzi ayɛ wiadze yi mu ma twom. (2 Pet. 3:3) Iyi ntsi awofo, sɛ hom nye hom mba rusua adze a, dza ɔbɔboa hɔn ma wɔaagye edzi dɛ Nyankopɔn n’Asɛm no yɛ nokwar na kwan a ɔpɛ dɛ yɛfa do bɔ hɛn bra no yɛ papa no, hom nhyɛ hɔn nkuran ma wonsua ho adze pii. Boa no ma ɔndwendwen ndzɛmba a Jehovah abɔ ho nkɔ ekyir mfa nhyɛ ne gyedzi dzen. Bio so, Bible mu nkɔnhyɛ ahorow a ɔyɛ nwanwa a wɔaba mu no, boa no ma ɔntse ase. Na dza ɔkyɛn ne nyinara no, enye no mbɔ mu mbɔ mpaa na ɔyɛ so a bɔ bi ma no. Sɛ hom yɛ dɛm a, hom botum enya awerɛhyɛmu paa dɛ mbɔdzen a hom robɔ dze aboa hom ba no ma ɔaahyɛ ne gyedzi mu dzen no, Jehovah behyira do.—2 Mber. 15:7.