1. Bible mber mu no, nna ebɛnadze nye hɔn edziban tsitsir?

 EHWƐ Bible mu a, edziban a nna nkorɔfo taa dzi nye paanoo. (Gen. 14:18; Luke 4:4) Nokwasɛm nye dɛ, nna paanoo yɛ edziban tsitsir, ntsi nna ɔtɔ da a Bible no dze “paanoo” gyina hɔ ma edziban. (Matt. 6:11) Nna paanoo dzi akotsen wɔ anwanwadze ebien bi a Jesus yɛe no mu. (Matt. 16:​9, 10) Dɛm anwanwadze ebien yi mu kor na wɔaka ho asɛm wɔ John tsir 6 no. Yɛrobɔbɔ dɛm kyerɛwnsɛm yi ho nkɔmbɔ kakra na yaahwɛ dza yebotum esua efi mu.

2. Nna ebɛnadze ntsi na ɔsɛ dɛ Jesus ma nyimpadodow bi edziban?

² Jesus n’asomafo no kɛkaa asɛmpa no wɔ beebi. Aber a wowiei no, Jesus nye hɔn faa hɛmba na wotwaa Galilee Po no dɛ wɔrekɛhyɛ beebi akɛgye hɔn ahom. (Mark 6:​7, 30-32; Luke 9:10) Wɔkɛhyɛɛ beebi a hɔ yɛ dzinn wɔ Bethsaida. Naaso wɔannkyɛr na nyimpadɔm no tsee dɛ Jesus nye n’asomafo no wɔ hɔ, ntsi wɔkɔr hɔn nkyɛn. Naaso Jesus ammpam hɔn, mbom onyaa hɔn ho adagyer na ɔkaa Ahendzi no ho asɛmpa kyerɛɛ hɔn. Afei so, ɔsaa hɔn a wɔyar no yarba. Nna adze resa na nna esuafo no nnhu mbrɛ dɛm nyimpadodow no besi enya edziban edzi. Obotum aba dɛ nna hɔn mu binom wɔ edziban kakra wɔ hɔnho. Naaso, nna ɔsɛ dɛ hɔn mu dodowara kɔ nkuraase a ɔbembɛn no mu kɔtɔ edziban dzi. (Matt. 14:15; John 6:​4, 5) Nna Jesus bɛyɛ dɛn?

JESUS YƐƐ ANWANWADZE BI MA NYIMPADƆM NO NYAA PAANOO DZII

3. Ebɛnadze na Jesus kaa kyerɛɛ n’asomafo no dɛ wɔnyɛ mma nyimpadɔm no? (Hwɛ mfonyin no so.)

³ Jesus kaa kyerɛɛ n’asomafo no dɛ: “Ɔnnsɛ dɛ wɔkɔ; homara hom mma hɔn biribi ma wondzi.” (Matt. 14:16) Naaso nna iyi  bɛyɛ dzen ama asomafo no. Osiandɛ nna mbarimba a wɔwɔ mu no nkotsee mpo yɛ bɛyɛ 5,000. Na sɛ yɛdze mbofra na mbaa ka ho a, nna ɔsɛ dɛ wɔma nyimpa bɛyɛ 15,000 edziban. (Matt. 14:21) Asomafo no mu kor a wɔfrɛ no Andrew kaa dɛ: “Banyimba kakraba bi wɔ ha a ɔwɔ baali paanoo enum na nam nkakraba ebien. Naaso dɛm nyimpa pii yi dze, iyi bɛyɛ hɔn dɛn?” (John 6:9) Nna ehiafo na nyimpa pii taa dzi paanoo a wɔdze baali ayɛ. Na ɔbɛyɛ dɛ dɛm nam nkakraba ebien no so, nna wɔahyɛ no nkyen ma no mu awow. Naaso, paanoo na nam a nna abofra no wɔ no, nna ɔronnso dɛm nyimpadɔm yi.

4. Ebɛnadze na yebotum esua efi John 6:​11-13 mu? (Hwɛ mfonyin ahorow no so.)

⁴ Nna Jesus pɛ dɛ ɔma nyimpadɔm no biribi ma wodzi. Dɛm ntsi ɔkaa kyerɛɛ hɔn dɛ wɔntsenatsena sar no do ekuwekuw. (Mark 6:​39, 40; kenkan John 6:​11-13.) Afei Jesus bɔɔ mpaa guu paanoo na nam no do dze daa n’Egya ase. Sɛ ɔdaa Nyankopɔn ase a ɔfata, osiandɛ sɛ ehwɛ mu ankasa a nna ɔno na ɔama hɔn nsa aka paanoo na nam no. Hɛn so, ɔsɛ dɛ yesuasua Jesus na aber biara a yebenya edziban no, sɛ nkorɔfo wɔ hɔ o, sɛ nkorɔfo nnyi hɔ o, yɛbɔ mpaa ansaana yeedzidzi. Ɔno ekyir no, Jesus maa n’esuafo no kyekyɛɛ edziban no maa nkorɔfo no, na wodzidzii mee. Bi mpo kae, na Jesus maa wɔboaboaa ano mbrɛ ɔbɛyɛ a wobotum edzi no ber fofor amma wɔaannsɛɛ kwa. Dɛ mbrɛ Jesus yɛe no, hɛn so, ɔsɛ dɛ yɛdze ndzɛmba a yɛwɔ no dzi dwuma yie. Sɛ eyɛ ɔwofo a, ibotum nye wo mba esusu dɛm asɛm yi ho mbrɛ ɔbɛyɛ a wobohu siantsir a ohia dɛ wɔbɔ mpaa ana woedzidzi, wɔyɛ nkorɔfo papa, na wofi hɔn akoma mu kyɛ adze.

5. Aber a Jesus yɛɛ anwanwadze maa nyimpadɔm no, nna ebɛnadze na wɔpɛ dɛ wɔyɛ, naaso ebɛnadze na Jesus yɛe?

 ⁵ Kwan a Jesus faa do kyerɛkyerɛe nye anwanwadze ahorow a ɔyɛe no maa nyimpadɔm no ho dwuruuw hɔn. Nna wonyim dɛ Moses edzi kan aka dɛ Nyankopɔn bɛma nkɔnhyɛnyi tsitsir bi aba, ntsi bi a nna hɔn adwen yɛ hɔn dɛ, ‘Jesus nye dɛm nkɔnhyɛnyi no.’ (Deut. 18:​15-18) Ntsi, bi so a iyi maa wonyaa adwen dɛ sɛ Jesus bɛyɛ hɔn hen a, ɔbɛma ndzɛmba akɔ yie ama hɔn na obotum ama ɔman mu no nyina mpo eenya edziban edzi. Dɛm ntsi, nna nyimpadɔm no pɛ dɛ “wɔkyer [Jesus] na wɔyɛ no ɔhen.” (John 6:​14, 15) Dɛm aber no, nna Romefo na wodzi tum wɔ Jewfo no do. Ntsi sɛ Jesus peen do ma wɔyɛɛ no ɔhen a, nkyɛ ɔbɛkyerɛ dɛ ɔdze noho roforafora amanyɛsɛm a nna ɔrokɔ do no mu. Jesus peen do anaa? Oho. Bible no ka dɛ, ‘Jesus fii hɔ na ɔkɛhyɛɛ bepɔw no do.’ Nkyɛ wɔrehyɛ Jesus ma ɔdze no ho ahyɛ amanyɛsɛm mu, naaso ɔannyɛ. Ɔwɔ dɛ yesua biribi fi dza ɔyɛe no mu.

6. Ebɛnadze na yebotum ayɛ dze esuasua Jesus? (Hwɛ mfonyin no so.)

⁶ Ndɛ, yenyim dɛ obiara rennka nnkyerɛ hɛn dɛ yɛnyɛ anwanwadze ma edziban pii mbra anaa yɛnsa nkorɔfo yarba. Afei so, worunntum nnhyɛ hɛn dɛ yɛmbɛyɛ ɔhen anaa ɔmampanyin. Naaso bi a wɔbɛhyɛ hɛn dɛ yɛntow aba anaa yɛntaa obi a wosusu dɛ ɔbɛma ndzɛmba akɔ yie no ekyir. Naaso yebotum esua biribi efi  dza Jesus yɛe no mu. Wɔammfa noho annhyɛ amanyɛsɛm mu, na ekyir yi mpo ɔkaa dɛ: “M’ahendzi mmfi wiadze yi mu.” (John 17:14; 18:36) Christianfo a wɔwɔ hɔ ndɛ no bɔ mbɔdzen dɛ wobosuasua dza Jesus yɛe no. Yɛtaa Nyankopɔn n’Ahendzi no ekyir, yɛka ho asɛm kyerɛ nkorɔfo na yɛbɔ mpaa dɛ ɔmbra. (Matt. 6:10) Hom mma yɛnsan nhwɛ anwanwadze a Jesus yɛe a ɔmaa nyimpa pii nyaa paanoo dzii no bio, na yɛnhwɛ adze fofor so a yebotum esua efi mu.

“PAANOO NO HO ASƐM”

7. Ebɛnadze na Jesus yɛe, na asomafo no so yɛɛ dɛn wɔ ho? (John 6:​16-20)

⁷ Aber a Jesus maa nyimpadɔm no edziban wiei no, ɔmaa n’asomafo no fii hɔ, na wɔfaa hɛmba kɔr Capernaum, naaso nankasa dze ɔfowee kɔr bepɔw no do. Iyi amma nyimpadɔm no nsa annka no ennsi no hen. (Kenkan John 6:​16-20.) Aber a asomafo no nam po no do no, ehum kɛse bi tui, na iyi maa po no do yɛɛ begyabegya. Jesus nantseew po no do kɔr hɔn nkyɛn na ɔkaa kyerɛɛ ɔsomafo Peter dɛ noara so nnantsew do mbra ne nkyɛn. (Matt. 14:​22-31) Aber a Jesus foow hɛmba no, ehum no gyaae. Esuafo no ho dwuruuw hɔn paa, na wɔkaa dɛ: “Ampa, eyɛ Nyankopɔn ne Ba.” a (Matt. 14:33) Dza ɔyɛ nwanwa nye dɛ, aber a Jesus maa nyimpadɔm no edziban no, asomafo no annka dɛ ɔyɛ Nyankopɔn ne Ba, mbom aber a ɔnantseew po no do no na wɔkaa dɛm asɛm no. Ɔwodze hwɛ asɛm bi a Mark kae faa dza osii yi ho. Ɔkyerɛwee dɛ: “Na iyi maa [asomafo no] hɔnho dwuruuw hɔn papaapa osiandɛ wɔanntse paanoo no ho asɛm no ase. Nna hɔn akoma nnyae nntsee ase.” (Mark 6:​50-52) Nokwasɛm nye dɛ, tum soronko a Jehovah dze maa Jesus no, nna wonnyim anwanwadze afofor a obotum dze ayɛ. Naaso asɛm yi sii no, wɔannkyɛr biara na Jesus sanee kaa anwanwadze a ɔyɛe a ɔmaa nyimpa pii nyaa paanoo dzii no ho asɛm, na ɔmaa yehun dza yebotum esua efi dɛm asɛm no mu.

8-9. Nna ebɛnadze ntsi na nyimpadɔm no rohwehwɛ Jesus? (John 6:​26, 27)

⁸ Nyimpadɔm a Jesus maa hɔn edziban no, nna dza ohia hɔn ara nye edziban a wobenya edzi. Ebɛnadze ntsi na yɛreka dɛm? Adzekyee no, wohun dɛ Jesus nye asomafo no nnyi hɔ. Afei so, wohun dɛ hɛmba ahorow bi fi Tiberias aba. Ntsi wɔkɛtsenaa mu na wɔkɔr Capernaum dɛ wɔrokɔhwehwɛ Jesus. (John 6:​22-24) Ehwɛ a, Ahendzi a Jesus kaa ho asɛm kyerɛɛ hɔn no na wɔkɔr dɛ woriketsie ho nsɛm pii anaa? Oho. Mbom siantsir a wɔkɔree ara nye dɛ nna wɔpɛ dɛ Jesus ma hɔn edziban. Yesi dɛn hu dɛm?

⁹ Hom mma yɛnhwɛ dza osii aber a nyimpadɔm no kɔtoo Jesus wɔ beebi a ɔbɛn Capernaum no. Jesus kae sii hɔn enyim pen dɛ edziban a ɔdze maa hɔn no ntsi na wɔaba dɛ wɔrobɔhwehwɛ no no. Jesus maa wohun dɛ ‘paanoo a wodzii mee no’ yɛ “edziban a ɔsɛɛ.” Jesus tuu hɔn fo dɛ wɔnyɛ “edziban a ɔnnsɛɛ a ɔma onnyiewiei nkwa no ho edwuma” mbom. (Kenkan John 6:​26, 27.) Jesus kaa dɛ edziban a ɔtse dɛm no fi n’Egya hɔ. Aber a wɔtsee dɛ edziban botum ama woeenya onnyiewiei nkwa no, ɔbɛyɛ dɛ hɔnho dwuruuw hɔn paa. Bi a wobisaa hɔnho dɛ, ‘Ebɛn edziban paa na obotum ama yeenya onnyiewiei nkwa, na yebesi dɛn enya bi?’

10. Nna ebɛn “Nyankopɔn n’edwuma” na ɔsɛ dɛ nkorɔfo no yɛ?

¹⁰ Ɔda edzi dɛ dɛm Jewfo yi nyaa adwen dɛ ɔsɛ dɛ wɔyɛ biribi ama hɔn nsa aaka edziban a ɔtse dɛm. Bi a dza ɔbaa hɔn adwen mu nye ‘ndwuma’ a nna Moses Mbra no hwehwɛ  dɛ wɔyɛ no. Naaso Jesus kaa kyerɛɛ hɔn dɛ: “Nyankopɔn n’edwuma nye dɛ hom bɛgye obi a ɔsomaa no no edzi.” (John 6:​28, 29) Mbrɛ ɔtse nye dɛ, nna Jesus edzi kan aka dɛ ɔsɛ dɛ wɔgye obi a Nyankopɔn somaa no no dzi ansaana woenya “onnyiewiei nkwa.” (John 3:​16-18, 36) Ekyir yi, nna Jesus bɛka ndzɛmba afofor a sɛ yɛyɛ a ɔbɛma yeenya onnyiewiei nkwa no ho asɛm.—John 17:3.

11. Ebɛnadze na Jewfo no yɛe a ɔkyerɛ dɛ nna hɔn yafun ara na ohia hɔn? (Ndwom 78:​24, 25)

¹¹ “Nyankopɔn n’edwuma” ankasa a Jesus kyerɛkyerɛɛ Jewfo no dɛ wɔnyɛ no, wɔanngye annto mu. Wobisaa Jesus dɛ: “Ebɛn asɛnkyerɛdze na ebɛyɛ, ma yeehu na yaagye wo edzi?” (John 6:30) Wɔkaa dɛ hɔn nananom a wɔtsenaa ase wɔ Moses n’aber do no, nna da biara wodzi manna. (Neh. 9:15; kenkan Ndwom 78:​24, 25.) Ɔda edzi dɛ nna paanoo ankasa a wobenya edzi no ara na hɔn adwen wɔ do. Afei so, Jesus kaa “nokwar paanoo a ofi sor” a ɔma onnyiewiei nkwa no ho asɛm, na ɔmaa wohun dɛ dɛm paanoo yi dze, ɔnntse dɛ manna. (John 6:32) Nna hɔn yafun ara na ohia hɔn, ntsi onnyiewiei nkwa ho asɛm a nna Jesus reka akyerɛ hɔn no nyina no, nna ɔnnyɛ ɔno mpo na woritsie. Ebɛnadze na yebotum esua efi asɛm yi mu?

DZA ƆSƐ DƐ YƐMA OHIA HƐN PAA

12. Ebɛnadze na Jesus yɛe a ɔma yehu dza no ho hia paa?

¹² Esuadze tsitsir a ɔwɔ John tsir 6 no mu nye dɛ, ɔsɛ dɛ yɛma yɛnye Jehovah ntamu anyɛnkofa no ho hia hɛn paa. Kaa dɛ, aber a Satan sɔɔ Jesus hwɛe no, Jesus maa ɔdaa edzi dɛ dza ohia nye dɛ yɛnye Jehovah ntamu bɛyɛ kama. (Matt. 4:​3, 4) Afei so, wɔ ne Bepɔw Do Asɛnka mu no, osii hia a ohia dɛ yɛnye Jehovah ntamu yɛ kama no do dua. (Matt. 5:3) Hɛn so, hɛn mu biara botum ebisa noho dɛ, ‘Mbrɛ misi bɔ me bra no ma ɔda edzi dɛ Nyankopɔn no som ho hia me kyɛn asetsena mu ndzɛmba anaa?’

13. (a) Ebɛnadze ntsi na mfom biara nnyi ho dɛ yebedzidzi? (b) Ebɛnadze na ɔsomafo Paul bɔɔ hɛn kɔkɔ wɔ ho? (1 Corinthfo 10:​6, 7, 11)

¹³ Sɛ yɛbɔ mpaa serɛ Jehovah dɛ ɔmma hɛn nsa nka edziban nye ndzɛmba a yehia wɔ asetsena mu a, mfom biara nnyi ho. (Luke 11:3) Sɛ yɛyer hɛnho yɛ edwuma a, ɔma hɛn nsa ka ‘dza yebedzi nye dza yɛbɔnom.’ Iyi ma hɛn enyi gye osiandɛ “Nyankopɔn nsamu na ofi.” (Ɔsɛnk. 2:24; 8:15; Jas. 1:17) Naaso ɔnnsɛ dɛ yɛma asetsena mu ndzɛmba yɛ adze tsitsir wɔ hɛn asetsena mu. Ɔsomafo Paul sii dɛm asɛm yi do dua aber a nna ɔrekyerɛw krataa akɛma Christianfo no. Ɔkaa nsɛm ahorow bi a osisii wɔ Israelfo no abakɔsɛm mu. Bi nye dza osii wɔ beebi a ɔbɛn Bepɔw Sinai no. Ɔsomafo Paul bɔɔ hɔn kɔkɔ dɛ, ‘ɔnnsɛ dɛ wɔma hɔn kɔn dɔ ndzebɔn dɛ mbrɛ Israelfo no hɔn kɔn dɔe no.’ (Kenkan 1 Corinthfo 10:​6, 7, 11.) Edziban a nna Israelfo no pɛ ntsi, wobuu anwanwadze a Jehovah yɛe maa hɔn no dɛ “ndzebɔn.” (Nka. 11:​4-6, 31-34) Afei so, aber a wɔrosom sika nantwiba no, wodzidzii, wɔnomee na wɔgyee hɔn enyi. (Ex. 32:​4-6) Nna ɔrennkyɛr ma wɔaasɛɛ Jerusalem nye n’asɔrfie no wɔ afe 70 H.B., ntsi Paul kyerɛɛw dɛm asɛm no dze bɔɔ Christianfo a nna wɔwɔ hɔ no kɔkɔ. Hɛn so yɛtse ewiei mber no mu na ɔrennkyɛr ma Jehovah aasɛɛ dɛm wiadze bɔn yi. Dɛm ntsi ɔsɛ dɛ yɛfa Paul n’afotu no enyibersɛm.

14. Wiadze fofor no mu no, edziban ho asɛm bɔkɔ dɛn?

¹⁴ Aber a Jesus kaa dɛ yɛnserɛ Nyankopɔn dɛ ‘ɔmma hɛn edziban a yehia no ndɛ da yi’ no, ɔsanee kaa dɛ yɛnserɛ dɛ Nyankopɔn n’apɛdze nyɛ hɔ wɔ “asaase yi do dɛ mbrɛ ɔtse wɔ sor.” (Matt. 6:​9-11) Sɛ dɛm asɛm yi ba mu a, asetsena bɛyɛ dɛn? Bible no ma yehu dɛ dza Nyankopɔn pɛ no bi nye dɛ edziban pa bobu do wɔ asaase yi do. Dɛ mbrɛ Isaiah 25:​6-8 ma yehu  no, edziban pa bobu do wɔ Jehovah n’Ahendzi no mu. Ndwom 72:16 ka dɛ: “Wɔmma eburow piigyan mbra mbepɔw etsifi asaase no do.” Bi a erohwɛ kwan dzendzenndzen dɛ ebɔto paanoo bi a w’enyi gye ho anaadɛ ebɛyɛ edziban bi a ennyɛɛ bi da. Afei so, ibenya hokwan ayɛ wenyin nture na eedzi no mu aba. (Isa. 65:​21, 22) Na ɔnnyɛ wankotsee o, mbom nyimpa a wɔbɛtsena asaase yi do no nyina benya dɛm nhyira yi bi.

15. Sɛ wonyan ewufo a, ebɛn nkyerɛkyerɛ edwuma na ɔbɔkɔ do? (John 6:35)

¹⁵ Kenkan John 6:35. Ma yɛnsan nsusu hɔn a Jesus maa hɔn paanoo na nam ma wodzii no ho. Sɛ wonyan ewufo a, bi a yebehyia hɔn mu binom. Sɛ nna wɔnngye Jesus nndzi mpo a, bi a wobenyan hɔn. (John 5:​28, 29) Sɛ wonyan hɔn a, obehia dɛ wɔboa hɔn ma wɔtse asɛm a Jesus kae yi ase. Ɔkaa dɛ: “Emi nye nkwa paanoo no. Obiara a ɔba me nkyɛn no, ɔkɔm renndze no da.” Obehia dɛ wonya Jesus no werdam afɔrbɔ no mu gyedzi na wɔgye dzi dɛ ɔdze no nkwa too hɔ maa hɔn. Dɛm aber no, mbofra a wɔbɔwo hɔn nye hɔn a wobenyan hɔn no, no ho behia dɛ yɛkyerɛkyerɛ hɔn Jehovah ho adze. Hɛn enyi bɛgye paa dɛ yebenya hokwan ayɛ nkyerɛkyerɛ edwuma kɛse yi bi. Sɛ yɛreyɛ dɛm edwuma yi a, hɛn enyi bɛgye paa kyɛn dɛ yeridzi paanoo ankasa. Nokwasɛm nye dɛ, dɛm aber no ndzɛmba a ɔfa Jehovah no som ho no behia hɛn asen biribiara.

16. Ebɛnadze na yebosusu ho wɔ adzesua a odzi hɔ no mu?

¹⁶ Yeesusu nsɛm a ɔwɔ John tsir 6 no ne fa bi ho, naaso nna Jesus wɔ nsɛm pii a ɔpɛ dɛ yehu fa “onnyiewiei nkwa” ho. Nna ɔsɛ dɛ Jewfo a Jesus nye hɔn kasae no ma dɛm nsɛm no ho hia hɔn. Na dɛmara so na ɔsɛ dɛ yɛma ohia hɛn. Yɛbɔtoa John tsir 6 no ho nkɔmbɔ no do wɔ adzesua a odzi hɔ no mu.