1-2. Ebɛn ndzɛmba na otum ma yesu?

 OBIARA nnyi hɔ a ɔnntseew nyinsuwa da. Ɔtɔ da a, hɛn enyi tum gye araa ma ɔdan su mpo. Bi a isui aber a etsee enyigyesɛm bi anaa biribi tsitsir bi sii wɔ w’asetsena mu no. Obotum aba dɛ aber a ewoo fofor no so, ɔyɛɛ wo dɛw araa ma isui. Anaadɛ aber a ekaa enyigyesɛm bi a osii wɔ w’abrabɔ mu, anaa ihyiaa wo nyɛnko bi a ihun no akyɛr paa no, w’enyi gyee araa ma isui.

² Naaso mpɛn pii no, yaw a wɔahyɛ hɛn akoma mu ma no na ɔma yesu. Bi nye dɛ, sɛ obi ma hɛn nsa si famu a, otum hye hɛn ma yesu. Afei so, sɛ yarba bi a wɔabɛtsena hɛn do no ama yɛrefa yaw mu paa, anaa hɛn dɔfo bi a woewu no ama awerɛhow araa na yeridzi a, obotum ayɛ hɛn yaw araa ma yeesu. Biribi dɛmara na ɔtoo nkɔnhyɛnyi Jeremiah aber a Babylonfo sɛɛ Jerusalem no. Jeremiah kaa dɛ: “M’enyiwa kyi nyinsuwa esutsen gu famu . . . M’enyiwa wora nsu gu famu, na onngyaa, ɔnntow mu.”—Kwa. 3:​48, 49.

3. Sɛ Jehovah hu dɛ n’asomfo ruhu amandze a, ɔtse nka dɛn? (Isaiah 63:9)

³ Ofitsi aber a wɔwoo hɛn dze besi ndɛ, mpɛn dodow a awerɛhow ahyɛ hɛn do ma yeesu nyinara, Jehovah nyim. Bible no ma hɛn awerɛhyɛmu dɛ ohu ndzɛmba a ɔyɛ yaw a ɔto n’asomfo no nyina. Na sɛ yesu frɛ no dɛ ɔmboa hɛn a, otsie hɛn. (Ndw. 34:15) Naaso ɔnnyɛ iyi nkotsee na Jehovah yɛ o. Jehovah tse dɛ ɔwofo bi a ɔdɔ ne mba. Ntsi sɛ ohu dɛ yerusu a, ɔyɛ no yaw paa na ɔyɛ ntsɛm yɛ biribi dze boa hɛn.—Kenkan Isaiah 63:9.

4. Woananom na yɛrebɛka hɔn ho asɛm, na ebɛnadze na hɔn asɛm no bɛma yeehu afa Jehovah ho?

 ⁴ Sɛ yɛhwɛ Bible no mu a, Jehovah ma yehu dza ɔyɛe aber a n’asomfo kyii nyinsuwa no. Yerubosusu Hannah, David, na Ɔhen Hezekiah hɔn asɛm no ho. Ebɛnadze na ɔmaa wosui? Aber a wosui frɛɛ Jehovah no, ebɛnadze na ɔyɛe? Na sɛ yeridzi awerɛhow, obi ama hɛn nsa esi famu anaa asɛm bi a wɔato hɛn no ama yɛtse nka dɛ hɛn enyidado nyinara asa a, hɔn asɛm no besi dɛn akyekye hɛn werɛ?

ABER A IRIDZI AWERƐHOW

5. Asɛm a ɔtoo Hannah no maa ɔtsee nka dɛn?

⁵ Ɔhaw ahorow a Hannah hyiae a ɔmaa odzii awerɛhow na osui no dze, pii kwa. Kor nye dɛ no kun waar ɔbaa fofor kaa no ho. Nna wɔfrɛ dɛm ɔbaa yi Peninnah. Nna Peninnah kyir Hannah kɔkɔɔkɔ, na nna ɔmmpɛ n’enyim ahwɛ mpo. Sɛ nna iyi nkotsee nye Hannah ne haw a, nkyɛ ɔbɛfa no dɛmara. Naaso dza ɔsɛɛ asɛm no koraa mpo nye dɛ, nna Hannah nnyi ba. Naaso Peninnah dze, nna ɔwɔ mba pii. (1 Sam. 1:​1, 2) Gyedɛ Peninnah ennhu Hannah nna ɔdze ne mba no robɔ no ekutsia. Sɛ ɔwo nye Hannah a, nkyɛ ebɛyɛ dɛn? Asɛm yi yɛɛ Hannah yaw paa ma ɔno ntsi nna ‘osu, na onndzidzi.’ Afei so, ‘no werɛ howee’ paa.—1 Sam. 1:​6, 7, 10.

6. Ebɛnadze na Hannah yɛe a ɔboaa no ma onyaa awerɛkyekyer?

⁶ Ebɛnadze na ɔkyekyee Hannah no werɛ? Adze kor a ɔboaa no nye dɛ ɔkɔr beebi a nna ntamadan no wɔ kɔsoom Jehovah. Aber a ɔkɔr hɔ no, ɔbɛyɛ dɛ ntamadan no n’abangua n’ano hɔ beebi na okegyinae “na oyii mpaa maa [Jehovah], na osuu yayaayaw.” Ɔserɛɛ Jehovah dɛ: ‘Hwɛ w’afonabaa n’amandzehu, na kaa me.’ (1 Sam. 1:10b, 11) Hannah huee n’akoma mu nsɛm nyina guu Jehovah n’enyim. Hwɛ mbrɛ nna asɛm no besi ayɛ Jehovah yaw aber a ohun dɛ ne babaa a ɔda n’akoma do no rikyi nyinsuwa no!

7. Aber a Hannah kaa dza ɔwɔ n’akoma mu kyerɛɛ Jehovah no, ebɛn awerɛkyekyer na onyae?

⁷ Aber a Hannah huee n’akoma mu nsɛm nyina guu Jehovah n’enyim na Ɔsɔfopanyin Eli so maa no awerɛhyɛmu dɛ Jehovah betsie ne mpaabɔ no, ɔtsee nka dɛn? Bible no ka dɛ: “Ɔbaa no sii mu kɔr no kwan, na okedzidzii, na n’enyim annyɛ awerɛhow bio.” (1 Sam. 1:​17, 18) Ɔwɔ mu dɛ atseetsee a Hannah faa mu no emmfi hɔ dze, naaso n’akoma tɔɔ ne yamu. Ɔdaan ne haw no nyinara too Jehovah do. Jehovah hun ne haw no nyinara, ɔtsee no su no, na ekyir yi, ohyiraa no ma otumii nyinsenee.—1 Sam. 1:​19, 20; 2:21.

8-9. Dɛ mbrɛ Hebrewfo 10:​24, 25 ma yehu no, ebɛnadze ntsi na ɔsɛ dɛ yɛyɛ dza yebotum biara kɔ asafo nhyiamu ase? (Hwɛ mfonyin no so.)

⁸ Dza yesua fi mu. Ɔhaw a erefa mu no ama awerɛhow ahyɛ wo do ma irikyi nyinsuwa anaa? Bi a wo busuanyi bi anaa wo nyɛnko bi  ewu ma iridzi awerɛhow. Sɛ asɛm bi a ɔtse dɛm to wo a, bi a ebɛpɛ dɛ etsew woho kɛhyɛ beebi, na ntseasee so wɔ mu. Naaso, dɛ mbrɛ yenyim no, aber a Hannah kɔr beebi a ntamadan no wɔ no, onyaa awerɛkyekyer nye nkuranhyɛ. Ntsi woara so, ɔtɔ da na sɛ ndzɛmba nnkɔ yie mma wo na ekɔ Christianfo nhyiamu ase a, ibotum enya awerɛkyekyer wɔ hɔ. (Kenkan Hebrewfo 10:​24, 25.) Bible mu nsɛm a yɛtse wɔ hɔ no, Jehovah dze kyekye hɛn werɛ, na otum boa hɛn ma yeyi hɛn adwen fi ndzɛmba a ɔma yedzi awerɛhow no do. Sɛ hɛn haw no emmfi hɔ amonmu hɔ ara mpo a, obotum aboa hɛn ma hɛn akoma aatɔ hɛn yamu.

⁹ Sɛ yɛkɔ asafo nhyiamu ase a, hɛn nuanom Christianfo ma yɛtse nka dɛ yaaba fie. Wɔma yehu dɛ hɛn asɛm yɛ hɔn asɛm, wɔdwen hɛn ho na wɔdɔ hɛn so, na iyi hyɛ hɛn nkuran. (1 Thess. 5:​11, 14) Ɔwodze ma yɛnhwɛ asɛm a onua kwampaafo tsitsir bi a ne yer wui yayaayaw no kae. Ɔkaa dɛ: “Meda ho ara su. Ɔtɔ da a, mutum tsew moho kɛhyɛ beebi na musu. Naaso sɛ mokɔ asafo nhyiamu ase a, minya nkuranhyɛ paa. Nsɛm a ɔyɛ dɛw a enuanom no ka kyerɛ me nye mbuae a wɔma wɔ asafo nhyiamu ase no kyekye mo werɛ paa na ɔka m’akoma to me yamu. Sɛ adwendwen hyɛ mo do dɛ dɛn ara mpo na sɛ minya ara kodu asafo nhyiamu ase a, nna moho adwe me fɔmm.” Sɛ yɛkɔ asafo nhyiamu ase a, Jehovah botum afa hɛn nuanom do aboa hɛn.

10. Sɛ awerɛhow hyɛ hɛn do paa a, ebɛnadze na yebotum ayɛ dze esuasua Hannah?

¹⁰ Adze fofor so a Hannah yɛe a ɔboaa no ma onyaa awerɛkyekyer nye dɛ, ɔbɔɔ Jehovah mpaa na ohuee n’akoma mu nsɛm nyina guu n’enyim. Woara so, ibotum abɔ Jehovah mpaa na ‘aatow wo dadwen nyina egu no do’ na eenya awerɛhyɛmu dɛ obetsie wo. (1 Pet. 5:7) Armed robbers kum akyerɛbaa bi no kun yayaayaw. Akyerɛbaa no kaa dɛ: “Asɛm no bubuu m’akoma. Nna ɔyɛ me dɛ murunntum nnsi me dadaw mu bio da. Nna mobɔ mo sor Egya Jehovah a ɔdɔ me no mpaa, na iyi kyekyee mo werɛ paa. Ɔtɔ da a, nna munnhu dza mennka mpo, naaso nna ɔtse me ase. Ntsi sɛ nna mobɔ no mpaa a, ɔma m’akoma tɔ me yamu. Sɛ nna awerɛhow hyɛ mo do ma meyɛ basaa a, mobɔ mpaa serɛ no dɛ ɔmma me asomdwee. Sɛ mobɔ mpaa wie a, mutum hu dɛ m’ahom aka moho na afei mutum toa dza nna mereyɛ biara do.” Sɛ ekɔ Jehovah n’enyim na edze su ka wo haw kyerɛ no a, ohu wo nyinsuwa no na ɔtse yaw a iridzi wɔ w’akoma mu no ase. Sɛ wo haw no emmfi hɔ mpo a, Jehovah botum aka w’akoma ato wo yamu na ɔaaboa wo ma eenya asomdwee. (Ndw. 94:19; Phil. 4:​6, 7) Na sɛ ohu dɛ emia w’enyi rigyina ɔhaw a erefa mu no ano a, obehyira wo.—Heb. 11:6.

ABER A OBI AMA WO NSA ESI FAMU

11. Atseetsee a David faa mu no maa ɔtsee nka dɛn?

¹¹ David n’asetsena mu no, ndzɛmba pii tseetsee no ma okyii nyinsuwa. Nna David n’atamfo dɔɔ so, na n’anyɛnkofo nye n’ebusuafo mpo a nna ɔgye hɔn dzi no maa ne nsa sii famu. (1 Sam. 19:​10, 11; 2 Sam. 15:​10-14, 30) Odur beebi mpo no, ɔkaa dɛ: “Maberɛ na m’apensi; anadwe biara mema me mpa taa nsu mu; medze me nyinsuwa fɔw me dabew.” Ebɛnadze na ɔmaa David tsee nka dɛm? Ɔkaa dɛ nna ‘n’atamfo retseetsee no.’ (Ndw. 6:​6, 7) Ndzɛmba bɔn a nkorɔfo dze yɛɛ David no yɛɛ no yaw paa, ntsi sɛ nna ɔbɔ n’enyiwa a, nyinsuwa nkotsee.

12. Dɛ mbrɛ Ndwom 56:8 ma yehu no, nna ebɛnadze na David nyim?

¹² Ɔmmfa ho ɔhaw a David hyiae nyina ekyir no, nna onyim dɛ Jehovah dɔ no. Ɔkyerɛɛw dɛ: ‘Jehovah bɛtse mo sufrɛ.’ (Ndw. 6:8) Mber bi so, David kaa asɛm a ɔwɔ Ndwom 56:8 no, na dɛm asɛm yi ka akoma paa. (Kenkan.)  Asɛm a ɔkae no ma yehu dɛ Jehovah dɔ hɛn paa na ɔdwen mbrɛ yesi tse nka ho. David kaa dɛ nna ɔtse dɛ mbrɛ Jehovah dze ne nyinsuwa no egu toa mu anaa ɔrekyerɛw ho asɛm egu buukuu bi mu. Nna David nyim dɛ Jehovah hu yaw biara a ɔrefa mu no na no werɛ rimmfir. Nna David gye dzi dɛ no sor Egya no dɔ no. Afei so, nna David nyim dɛ ɔnnyɛ ɔhaw a ɔrefa mu no nkotsee na ohu, na mbom onyim mbrɛ osi tse nka so.

13. Sɛ nkorɔfo yɛ adze ma ɔyɛ hɛn yaw anaa wɔma hɛn nsa si famu a, ebɛn awerɛhyɛmu na yebotum enya? (Hwɛ mfonyin no so.)

¹³ Dza yesua fi mu. Obi a egye no dzi ayɛ adze ma wɔayɛ wo yaw paa anaa wɔama wo nsa esi famu anaa? Bi a obi a enye no renantsew ahwɛ dɛ wobotum awar no etwa nhyehyɛɛ no mu awerɛfirmu. Anaa bi a wo kun anaa wo yer egyaa wo yayaayaw ma w’akoma ebubu. Anaadɛ bi a obi a edɔ no paa egyaa Jehovah som. Ɔwodze ma yɛnhwɛ asɛm bi a ɔtoo onua bi. Ne yer kɛfaa banyin fofor na owiee no ogyaa no hɔ. Onua no kaa dɛ: “Asɛm no tɔɔ mo do, na nna ɔyɛ me dɛ gyama moroso daa. Mo werɛ howee, mo bo fuwii na metsee nka dɛ gyama mfaso biara nnyi mo do.” Woara so, sɛ obi ama wo nsa esi famu anaa ɔayɛ adze ma wɔahye wo paa a, ka w’akoma to wo yamu, na nya awerɛhyɛmu dɛ Jehovah dze, orinngyaa wo da. Onua no kaa dɛ: “Mebohu dɛ nyimpa dze ɔyɛ nyimpa, obotum ama wo nsa eesi famu naaso Jehovah dze, ɔyɛ hɛn Botantsim. Papa mu o, bɔn mu o, otsim mbrɛ otsim. Na hɔn a wodzi no nokwar no so dze, orinngyaa hɔn dabiarada.” (Ndw. 37:28) Afei so kaa dɛ, nyimpa biara runntum nndɔ wo nnkyɛn Jehovah. Sɛ obi ma wo nsa si famu a, ɔbɛyɛ wo yaw dze, naaso sɛ ɔyɛ wo yaw dɛ dɛn ara mpo a, orunntum nnsɛɛ ɔdɔ a Jehovah wɔ ma wo no. (Rom. 8:​38, 39) Asɛm a ɔsɛ dɛ ema ɔtsena w’adwen mu nye dɛ: Ɔmmfa ho dza obi dze ayɛ wo biara no, wo sor Egya no dze, ɔdɔ wo.

14. Ebɛn awerɛkyekyesɛm na ɔwɔ Ndwom 34:18?

¹⁴ Asɛm a David kae wɔ Ndwom 34:18 no so botum akyekye hɛn werɛ aber a obi ama hɛn nsa esi famu no. (Kenkan.) Nhwehwɛmu nwoma bi ka dɛ “hɔn a hɔn sunsum abotow’’ a kyerɛwsɛm yi reka hɔn ho asɛm no botum akyerɛ “hɔn a wonnyi enyidado biara.” Hɔn a obi ayɛ adze ma wɔahye hɔn paa a wɔtse nka dɛm no, ebɛnadze na Jehovah yɛ dze boa hɔn? Sɛ ɔwofo bi a ɔdɔ ne ba hu dɛ ne ba rusu a, ɔka no fua na ɔka n’akoma to ne yamu. Dɛmara so na Jehovah twe “bɛn” hɛn aber a oehu dɛ obi ayɛ hɛn adze ma wɔayɛ hɛn yaw paa anaa wɔama hɛn nsa esi famu no. Jehovah ma yehu dɛ hɛn asɛm yɛ n’asɛm, na ɔayɛ krado dɛ ɔbɔboa hɛn. Sɛ Jehovah hu dɛ hɛn akoma ebubu anaa yeridzi yaw a, noho per no dɛ ɔbɛkyekye hɛn werɛ na ɔaaka hɛn akoma ato hɛn yamu. Afei  so, Jehovah ama yeehu ndzɛmba papa a ɔbɛyɛ ama hɛn daakye, ntsi sɛ yɛdze hɛn adwen si do a, ɔbɔboa hɛn ma yeetum egyina ɔhaw a yerihyia no ano.—Isa. 65:17.

ABER A ETSE NKA DƐ W’ENYIDADO NYINARA ASA

15. Ebɛnadze na ɔmaa Hezekiah sui?

¹⁵ Judahhen Hezekiah dzii mfe 39 no, yarba bi a no mu yɛ dzen bɔɔ no. Jehovah somaa nkɔnhyɛnyi Isaiah dɛ ɔnkɔ nkɛka nkyerɛ Hezekiah dɛ ne yarba no dze no bɔkɔ owu mu. (2 Ahe. 20:1) Nna ɔtse dɛ mbrɛ Hezekiah n’enyidado nyinara asa. Aber a Hezekiah tsee dɛm asɛm yi no, osui paa, na ofii n’akoma mu bɔɔ Jehovah mpaa serɛɛ no dɛ ɔmboa no.—2 Ahe. 20:​2, 3.

16. Jehovah tsee Hezekiah no sufrɛ no, ebɛnadze na ɔyɛe maa no?

¹⁶ Jehovah tsee Hezekiah no sufrɛ no na no ho yɛɛ no mbɔbɔr, na ɔkaa kyerɛɛ no dɛ: “Matse wo mpaabɔ, mehu wo nyinsuwa: hwɛ mebɛsa wo yarba.” Jehovah hun Hezekiah mbɔbɔr na ɔsomaa Isaiah dɛ ɔnkɛka nkyerɛ no dɛ ɔbɔto no nkwa nda mu na ɔbɛma ɔagye Jerusalem efi Assyriafo nsamu.—2 Ahe. 20:​4-6.

17. Jehovah si dɛn wowaw hɛn aber a yarba bi a no mu yɛ dzen abɔ hɛn no? (Ndwom 41:3) (Hwɛ mfonyin no so.)

¹⁷ Dza yesua fi mu. Innya yarba bi a wɔabɔ wo n’ano edur anaa? Ka ho asɛm kyerɛ Jehovah wɔ mpaabɔ mu, na sɛ ereka ho asɛm na isu mpo a, mfom biara nnyi ho. Bible no ma yenya awerɛhyɛmu dɛ “ehumbɔbɔr Egya nye awerɛkyekyer nyina Nyankopɔn no” bɛkyekyer hɛn werɛ wɔ hɛn ahohia nyina mu. (2 Cor. 1:​3, 4) Ndɛ, yɛnnhwɛ kwan dɛ Jehovah beyi hɛn haw nyinara efi hɔ, naaso yebotum enya awerɛhyɛmu dɛ ɔbɔwowaw hɛn. (Kenkan Ndwom 41:3.) Jehovah dze no sunsum krɔnkrɔn no boa hɛn ma yenya ahoɔdzen, nyansa nye akomatɔyamu, na iyi boa hɛn ma yetum gyina hɛn haw no ano. (Mbɛ. 18:14; Phil. 4:13) Afei so, ɔnam n’Asɛm Bible no do ma hɛn enyidado dɛ ɔrennkyɛr obeyi yarba nyinara efi hɔ.—Isa. 33:24.

18. Sɛ irihyia ɔhaw bi a no mu yɛ dzen a, ebɛn kyerɛwsɛm na ɔkyekye wo werɛ paa? (Hwɛ adakaba a wɔato dzin “ Awerɛkyekyesɛm Bi A Obotum Aboa Hɛn Ma Yeegyaa Su” no.)

¹⁸ Asɛm a Jehovah kaa kyerɛɛ Hezekiah no kyekyee no werɛ. Hɛn so, Nyankopɔn n’Asɛm botum akyekye hɛn werɛ. Sɛ ɔhaw bi a yerihyia no ama yɛabotow a, nsɛm a Jehovah akora do wɔ n’Asɛm no mu no botum akyekye hɛn werɛ na wɔaka hɛn akoma ato hɛn yamu. (Rom. 15:4) Aber a wɔkaa kyerɛɛ akyerɛbaa bi a ɔwɔ Africa n’anee dɛ oenya cancer no, osui araa nko. Ɔkaa dɛ: “Asɛm a ɔwɔ Isaiah 26:3 no kyekyee mo werɛ paa. Mbrɛ ɔtse nye dɛ, ɔhaw a yerihyia no mu pii wɔ hɔ a, yerunntum nnyɛ ho hwee. Naaso dɛm kyerɛwsɛm no ma minya awerɛhyɛmu dɛ Jehovah botum ama hɛn asomu aadwe hɛn, na ɔaaboa hɛn ma yeegyina ɔhaw biara a yerihyia no ano.” Sɛ irihyia ɔhaw  bi a no mu yɛ dzen na ɔyɛ tse dɛ mbrɛ w’enyidado nyinara asa a, ebɛn kyerɛwsɛm na ɔkyekye wo werɛ?

19. Ebɛn daakye papabi na ɔda hɛn enyim rotweɔn hɛn?

¹⁹ Yɛtse nda a odzi ekyir n’ewiei paa na yebotum ahwɛ kwan dɛ ndzɛmba beberee botum ama yeesu. Naaso dɛ mbrɛ Hannah, David, na Ɔhen Hezekiah hɔn asɛm no ma yehu no, sɛ yekyi nyinsuwa a, Jehovah hu na ɔyɛ no yaw paa. Hɛn nyinsuwa som bo ma no. Ntsi sɛ yehyia ɔhaw bi na ɔma yɛbotow a, hom mma yɛnkɔ Jehovah n’enyim wɔ mpaabɔ mu na yenhue hɛn akoma mu nsɛm ngu n’enyim. Enuanom a wɔwɔ asafo no mu no so dɔ hɛn, ntsi ɔnnsɛ dɛ yɛtsew hɛnho fi hɔn ho da. Afei so, hom mma yɛmma awerɛkyekyesɛm a ɔwɔ Bible no mu no nkɔ do ara nkyekye hɛn werɛ. Yebotum enya awerɛhyɛmu dɛ sɛ yɛkɔ do dzi Jehovah nokwar a, obehyira hɛn. Dɛm nhyira no bi nye dɛ, daakye obeyi ndzɛmba a ɔma yesu no nyinara efi hɔ. Ntsi sɛ wo werɛ ahow, obi ama wo nsa esi famu anaa ɔhaw a irihyia no ama ayɛ tse dɛ mbrɛ w’enyidado nyina asa ma ɔno ntsi irikyi nyinsuwa a, nya awerɛhyɛmu dɛ Jehovah bɛpepa dɛm nyinsuwa no nyina efi hɔ. (Nyi. 21:4) Dɛm aber no, sɛ ihu dɛ obi rusu a, nna ɔkyerɛ dɛ n’enyi agye.