Ɔweɔn-Aban a ɔbae wɔ afe yi mu no, agye ber akenkan ne nyinara anaa? Ɔnodze, hwɛ dɛ ibotum eyiyi nsɛmbisa a odzidzi do yi ano a:

Jehovah bu mbaa dɛn?

Ɔnye mbaa dzi no yie, na ommbu hɔn dɛ mbanyimfo ho hia kyɛn hɔn. Nyankopɔn tsie mbaa hɔn asɛm, na ɔdwen mbrɛ wosi tse nka nye ɔhaw ahorow a wohyia no ho paa. Afei so, ɔdze edwuma ahyɛ hɔn nsa dɛ wɔnyɛ.—w24.01, nkr. 15-16.

Ephesusfo 5:7 ka dɛ: “Mma hom nye hɔn nnya anyɛnkofa biara.” Yebesi dɛn dze dɛm asɛm yi ayɛ edwuma?

Nna ɔsomafo Paul robɔ hɛn kɔkɔ dɛ ɔnnsɛ dɛ yɛfa hɔn a wɔbɛma ayɛ dzen ama hɛn dɛ yebedzi Jehovah ne mbra do no nyɛnko. Dɛm nkorɔfo yi bi botum ayɛ hɔn a yɛnye hɔn bɔ enyim na enyim anaa hɔn a yɛnye hɔn bɔ wɔ sohyial media do no.—w24.03, nkr. 22-23.

Ebɛn atorsɛm ahorow na ɔsɛ dɛ yɛhwɛ hɛnho yie wɔ ho?

Sɛ hɛn anyɛnkofo a wɔwɔ adwen pa no ennya abotar annhwehwɛ asɛm bi mu yie na wɔka ho asɛm kyerɛ hɛn a, ɔsɛ dɛ yɛyɛ ahwɛyie. Afei so, ɔsɛ dɛ yɛhwɛ yie paa aber a obi a yennyim no wɔ beebiara asɛnd hɛn email bi, anaa aber a yeehyia awaafo a wɔyɛ hɔn ho dɛ hɔn enyi gye asɛmpa no ho no.—w24.04, kr. 12.

Mbrɛ Jehovah besi ebu Ɔhen Solomon nye hɔn a wɔsɛɛ hɔn wɔ Sodom na Gomorrah na Nsuyirii no mu no atsɛn no, ebɛnadze na yenyim fa ho, na ebɛnadze na yennyim?

Yerunntum nnka nnsi no pi dɛ Jehovah asɛɛ hɔn korakora. Naaso, yenyim dɛ Jehovah nyim hɔn asɛm no nyina, na ɔwɔ ehumbɔbɔr so paa.—w24.05, nkr. 3-4.

Ebɛn awerɛhyɛmu na nyim a yenyim dɛ Nyankopɔn yɛ “Ɔbotan no” ma yenya? (Deut. 32:4)

Yebotum dze Jehovah ayɛ hɛn guandɔbea. Yebotum dze hɛnho ato no do osiandɛ odzi no bɔhyɛ do aber nyina. Na osiandɛ ɔnnsesa no suban nye dza ɔabɔ ne tsirmu so dɛ ɔbɛyɛ no ntsi, yebotum aka dɛ onnhinhim.—w24.06, nkr. 26-28.

Sɛ itu kɔ asafo fofor mu a, ebɛnadze na obotum aboa wo ma w’enyi aaka?

Fa woho to Jehovah do, na nya awerɛhyɛmu dɛ, dɛ mbrɛ ɔboaa n’asomfo wɔ tsetse mber mu no, ɔbɔboa woara so. Mma mmfa asafo a efi mu no nntoto asafo fofor a akɔ mu no ho. Fa woho hyɛ dwumadzi ahorow a ɔkɔ do wɔ asafo no mu no mu, na bɔ mbɔdzen hwehwɛ anyɛnkofo afofor.—w24.07, nkr. 26-28.

Ebɛnadze na yebotum esua efi mfatoho ebiasa a ɔwɔ Matthew tsir 25 no mu?

Mfatoho a ɔfa nguan na mpɔnkye ho no ma yehu dɛ ɔsɛ dɛ yedzi Jehovah nokwar. Mfatoho a ɔfa mbaabun enyansafo na mbaabun nkwaseafo no ho no ma yehu dɛ ɔsɛ dɛ yesiesie hɛnho na yɛma hɛn enyi da hɔ. Na mfatoho a ɔfa talɛnt ho no so ma yehu dɛ ɔsɛ dɛ yɛyer hɛnho yɛ edwuma a wɔdze ahyɛ hɛn nsa no yie.—w24.09, nkr. 20-24.

Abrandaa a nna ɔwɔ Solomon n’asɔrfie no enyim no, nna ne tsentsen yɛ ahen?

Tsetse nsaano nkyerɛwee ahorow bi mu no, sɛ ehwɛ asɛm a ɔwɔ 2 Mbermunsɛm 3:4 no a, ibohu “basafa 120.” Kyerɛ dɛ, nna ofi abrandaa no no sor dze besi famu yɛ bɛyɛ mita 53 (anamɔn 175). Naaso nkyerɛwee afofor a yebotum dze hɛnho ato do no ka dɛ nna ɔyɛ “basafa 20.” Kyerɛ dɛ, nna ɔyɛ mita 9 (anamɔn 30). Sɛ yɛhwɛ asɔrfie ne ban no ne sin enyim a, ɔbɛyɛ dɛ nna abrandaa no ne tsentsen yɛ basafa 20.—w24.10, kr. 31.

Sɛ wɔka dɛ ɔsɛ dɛ asafo mu somfo yɛ obi a ne ‘yer yɛ kor’ a, ɔkyerɛ dɛn? (1 Tim. 3:12)

Ɔkyerɛ dɛ ɔbaa kortsee na ɔsɛ dɛ ɔwar no, na ɔnnsɛ dɛ ɔyɛ obi a ɔbɔ edwaman. Afei so, ɔnnsɛ dɛ ɔma mbaa afofor nya adwen dɛ ɔpɛ hɔn.—w24.11, kr. 19.

Ebɛnadze ntsi na yebotum aka dɛ ɔnnyɛ asɛm a ɔwɔ John 6:53 no na yegyina do dze dzi Ewuradze Ewimbir Edzidzi afahyɛ no?

John 6:53 ma yehu siantsir a ohia dɛ yedzi Jesus no honam na yɛnom no bɔgyaa. Afe 32 H.B na Jesus kaa dɛm asɛm yi kyerɛɛ Jewfo a nna wɔwɔ Galilee a nna ɔsɛ dɛ wonya no mu gyedzi no. Afe kor ekyir na ɔnye n’asomafo no dzii Ewuradze Ewimbir Edzidzi no. Na dɛm aber no, hɔn a nna Jesus nye hɔn bedzi adze wɔ sor no na nna ɔnye hɔn rekasa.—w24.12, nkr. 10-11.