Nna ɔsomafo Paul na Timothy nyina yɛ asafo mu mpanyimfo. Paul kyerɛɛw krataa kɛmaa Timothy dɛ: “Mehyɛ wo wɔ Nyankopɔn nye Ewuradze Christ Jesus nye abɔfo a wɔasan mu eyi hɔn no enyim dɛ, hwɛ yinom yie, na mma nnyɛ tsirmsum, eso mma nnyɛ biribiara nyiyimu do.”—1 Tim. 5:21.

Hom mma yendzi kan nhwɛ abɔfo a dɛm asɛm yi mmfa hɔnho no. Ɔda edzi pefee dɛ ɔmmfa 144,000 no ho. Aber a Paul kyerɛɛw krataa kɛmaa Timothy no, nna Christianfo a wɔasera hɔn no mu biara nnyaa no sor akatua no. Nna asomafo no nye nkorɔfo afofor a wɔasera hɔn no nnyae mmbɛyɛɛ abɔfo, ntsi yerunntum nnka dɛ nna hɔn nye “abɔfo a wɔasan mu eyi hɔn” no.—1 Cor. 15:​50-54; 1 Thess. 4:​13-17; 1 John 3:2.

Afei so, “abɔfo a wɔasan mu eyi hɔn” no runntum nnyɛ abɔfo a wɔyɛɛ asoɔdzen wɔ Noah n’aber do no. Osiandɛ dɛm abɔfo yi kedzii Satan n’ekyir na wɔbɛyɛɛ esunsum fi, na Jesus mmpɛ hɔn asɛm koraa. (Gen. 6:2; Luke 8:​30, 31; 2 Pet. 2:4) Daakye, ɔbɔtow hɔn egu bun mu mfe 1,000, na ɔno ekyir no, wɔbɛsɛɛ hɔn nyina aka Abɔnsam ho.—Jude 6; Nyi. 20:​1-3, 10.

“Abɔfo a wɔasan mu eyi hɔn” a Paul kaa hɔn ho asɛm no, obotum aba dɛ wɔyɛ abɔfo a wɔwɔ sor a wɔboa “Nyankopɔn na Christ Jesus.” Osiandɛ Paul kaa Nyankopɔn na Christ Jesus ho asɛm wɔ nkyekyɛmu kor no ara mu.

Abɔfo anokwafo mpempem pii na wɔwɔ hɔ. (Heb. 12:​22, 23) Ɔnnsɛ dɛ yenya adwen dɛ hɔn nyina yɛ edwuma kor wɔ ber kor mu. (Nyi. 14:​17, 18) Kaa dɛ mber bi, Jehovah maa no bɔfoe kor pɛ kunkum Assyriafo asogyafo 185,000. (2 Ahe. 19:35) Ɔbɛyɛ dɛ wɔdze ahyɛ abɔfo binom so nsa dɛ ‘wɔmboaboa biribiara a ɔto fintsidua nye hɔn a wɔyɛ ndzɛmba bɔn no ano mfi Jesus n’Ahendzi no mu.’ (Matt. 13:​39-41) Bi a wɔdze ahyɛ abɔfo binom so nsa dɛ ‘wɔmboaboa hɔn a woeyi hɔn no ano’ nkɔ sor. (Matt. 24:31) Na binom so wɔ hɔ a, hɔn edwuma nye dɛ ‘wɔbɔhwɛ hɛn do wɔ hɛn akwan nyinara mu.’—Ndw. 91:11; Matt. 18:10; fa toto Matthew 4:11 ho; Luke 22:43.

“Abɔfo a wɔasan mu eyi hɔn” a wɔaka hɔn ho asɛm wɔ 1 Timothy 5:21 no, ɔbɛyɛ dɛ wɔyɛ abɔfo a wɔdze ahyɛ hɔn nsa dɛ wɔnyɛ ndwuma soronko bi mboa Nyankopɔn n’asomfo. Ansaana Paul rebɛka dɛm abɔfo yi ho asɛm no, nna oedzi kan dze afotu a ɔbɔboa asafo mu mpanyimfo ma woeetum edzi dwuma ahorow a ɔhyehyɛ hɔn nsa no ama hɔn. Na ɔkaa kyerɛɛ asafo no so dɛ ɔsɛ dɛ wobu asafo mu mpanyimfo no. Afei so, ɔkaa kyerɛɛ mpanyimfo no so dɛ, sɛ wɔreyɛ dwumadzi a ɔhyehyɛ hɔn nsa no a, ɔnnsɛ dɛ ‘wɔma hɔn tsirmu yɛ sum’ anaa ‘wɔyɛ nyiyimu.’ Bio so, nna ɔnnsɛ dɛ wɔper hɔnho sisi gyinae mbom nna ɔsɛ dɛ wɔtɔ hɔn bo ara dwen asɛm bi ho yie ansaana woesi ho gyinae. Paul maa mpanyimfo no hun siantsir a nna ohia paa dɛ wotsie n’afotu yi. Ɔkaa kyerɛɛ hɔn dɛ, edwuma a ɔhyɛ hɔn nsa a wɔreyɛ no, wogyina “Nyankopɔn nye Ewuradze Christ Jesus nye abɔfo a wɔasan mu eyi hɔn no enyim” na wɔreyɛ. Dɛm ntsi, ɔda edzi pefee dɛ edwuma a ɔhyehyɛ abɔfo binom so nsa nye dɛ wɔyɛ ndzɛmba bi dze boa asafo no. Dɛm ndzɛmba no bi nye dɛ, wɔbɔ asafo no ho ban, wodzi asɛnka edwuma no enyim, na dza wohu wɔ asafo no mu biara so, wɔbɔ Jehovah amandzɛɛ.—Matt. 18:10; Nyi. 14:6