Ɔman a Mary na no kun John a tse mu no, nkorɔfo pii fi Philippines bɛtsena hɔ yɛ edwuma, na Mary na no kun enyi gye ho dɛ wɔbɛka asɛmpa no bi akyerɛ hɔn. Aber a nna COVID-19 yarba no taa mu no, Mary tumii nye nkorɔfo pii hyɛɛ ase suaa Bible no. Ɔnnyɛ ɔman a ɔtse mu no nkotsee na ɔnye nkorɔfo suaa Bible no. Mbom ɔnye nkorɔfo a wɔwɔ aman afofor do so suaa adze. Ɔyɛɛ no dɛn?

Nna ɔyɛ a Mary bisa ne Bible esuafo no dɛ, “Inyim obi fofor so a n’enyi bɛgye ho dɛ obosua Bible no anaa?” Sɛ wɔka dɛ nyew a, nna ɔaka dɛ ɔpɛ dɛ ɔnye hɔn kasa. Sɛ yebisa dɛm asɛm yi a, mpɛn pii no biribi papabi tum fi mu ba. Ebɛnadze ntsi na yɛreka dɛm? Osiandɛ nkorɔfo a hɔn enyi gye Nyankopɔn n’Asɛm ho no, mpɛn pii no wɔpɛ dɛ wɔka dza worusua no ho asɛm kyerɛ hɔn ebusuafo nye hɔn anyɛnkofo. Ɔnodze asɛm a ɔyɛ a Mary bisa no, ebɛnadze na woefi mu aba?

Mary ne Bible suanyi bi a wɔfrɛ no Jasmin maa Mary nyaa nkorɔfo baanan nye hɔn suaa Bible no. Nna wɔfrɛ hɔn mu kor Kristine. Nna n’enyi gye ne Bible adzesua no ho araa ma ɔkaa dɛ wɔnye no nsua adze mpɛn ebien wɔ dapɛn no mu. Aber a Mary bisaa Kristine dɛ onyim obi fofor so a n’enyi bɛgye ho dɛ obosua Bible no, Kristine kaa dɛ, “Nyew, mebɛma enye m’anyɛnkofo binom akasa.” Adapɛn kakraabi ntamu no, nna Kristine ama Mary nye n’anyɛnkofo baanan bi a wɔpɛ dɛ wosua Bible no akasa. Ekyir yi, Kristine maa Mary nye n’anyɛnkofo afofor so kasae, na dɛm anyɛnkofo no so maa Mary nye hɔn anyɛnkofo kasae.

Nna Kristine pɛ dɛ n’ebusuafo a wɔwɔ Philippines no so sua Bible no bi. Ntsi ɔkaa Bible adzesua no ho asɛm kyerɛɛ ne babaa Andrea. Ahyɛse no dze, nna Andrea n’adwen yɛ no dɛ, ‘Jehovah Adasefo yɛ sumase kuw bi, wɔnngye Jesus nndzi, na Ahyɛmu Dadaw no nkotsee na wɔdze kyerɛkyerɛ.’ Naaso aber a odzi kan a wɔnye no suaa adze no ara na ohun dɛ saana adwen a ɔwɔ wɔ Adasefo ho no nntsen. Aber biara a wɔnye no bosua adze na obosua biribi fofor efi Bible no mu no, dza ɔka nye dɛ, “Sɛ Bible no aka nkotsee dze a, ɔkyerɛ dɛ ɔyɛ nokwar.”

Ekyir yi, Andrea maa Mary nye n’anyɛnkofo beenu na n’edwumamunyi bi kasae, na hɔn so hyɛɛ ase suaa Bible no. Nna Andrea nye ne papa no nua basia bi a wɔfrɛ no Angela tse. Nna n’enyi efura. Nna Mary innyim mpo dɛ sɛ ɔnye Andrea rusua adze a, otsie bi. Da kor bi, Angela kaa kyerɛɛ Andrea dɛ ɔnka nkyerɛ Mary dɛ noara so pɛ dɛ osua Bible no bi. Nna Angela n’enyi gye dza orusua no ho paa. Bosoom kor pɛ ntamu no, otumii kyeer kyerɛwnsɛm pii guu ne tsirmu, na nna ɔpɛ  dɛ osua adze mpɛn anan wɔ dapɛn no mu! Andrea boaa no ma ɔhyɛɛ ase tsiee asafo nhyiamu wɔ video kɔnferɛns do, na nna ɔyɛ dɛm dapɛn biara.

Mary hyɛɛ no nsew dɛ aber biara a ɔnye Kristine bosua adze no, nna ohu dɛ no kun Joshua nenam hɔ. Ntsi Mary bisaa no dɛ ɔpɛ dɛ ɔbɛka ho ma wosua Bible no anaa. Joshua kaa dɛ, “Mepɛ dɛ mitsie bi ara kɛkɛ, mbom hwɛ na eemmbisabisa me nsɛm, annyɛ dɛm a mobɔsoɛr akɔ.” Naaso wɔhyɛɛ adzesua no ase no, bɛyɛ minitsi enum pɛ ntamu no, nna oebisa nsɛm pii asen Kristine. Ntsi noara so kaa dɛ wɔnye no nsua Bible no bi.

Mary n’asɛm a nna obisa no maa onyaa nkorɔfo pii a nna hɔn enyi gye ho dɛ wobosua Bible no. Hɔn mu pii wɔ hɔ a ɔyɛɛ nhyehyɛɛ ma enuanom afofor nye hɔn suaa adze. Sɛ yɛka ne nyina bɔ mu a, Mary nye nkorɔfo 28 hyɛɛ ase suaa Bible no, na nna dɛm nkorɔfo yi wɔ aman ahorow anan do.

April 2021 na wonumaa Mary ne Bible suanyi a wɔfrɛ Jasmin; ɔno nye osuanyi a odzi kan a yɛkaa no ho asɛm no. May 2022 so na wonumaa Kristine, na ɔsaan n’ekyir kɔr Philippines nye n’ebusua kɛtsenae. Mbaa beenu bi a ɔnam Kristine do ma Mary nye hɔn suaa adze no, wonumaa hɔn so. Wonumaa Kristine abosoom kakraabi ekyir no, wonumaa Angela so, na seseiara ɔyɛ daa kwampaafo. Kristine no kun Joshua, hɔn babaa Andrea, nye esuafo afofor pii so rinya nkɔenyim wɔ hɔn adzesua no mu na wɔrotwe bɛn Jehovah kɛse.

Asomafo no hɔn aber do no, sɛ nna nkorɔfo tse asɛmpa no a, wɔka ho asɛm kyerɛ hɔn ebusuafo nye hɔn anyɛnkofo. (John 1:​41, 42a; Andw. 10:​24, 27, 48; 16:​25-33) Ntsi ebɛnadze ntsi na imbisa wo Bible esuafo nye afofor a hɔn enyi gye ho dɛ wobosua Bible no dɛ, “Inyim obi fofor so a n’enyi bɛgye ho dɛ obosua Bible no anaa?” Bi a woara so, sɛ ibisa asɛm bi a ɔtse dɛm a, obotum ama eenya nkorɔfo pii nye hɔn esua Bible no.