1-2. Ebɛnadze ntsi na yebotum aka dɛ hɛn asɛm akɛyɛ tse dɛ aberantsɛ a yɛaka no ho asɛm wɔ nkyekyɛmu 1 no?

 FA NO dɛ awerɛhosɛm bi ato aberantsɛ bi a wɔwoo no too sika mu. Dza osii nye dɛ, da kor bi n’awofo nyaa akwanhyia ma hɔn beenu no nyina wuwui. Na ogu do rusu ne maame na ne papa no, ɔnkɔ nkɛtse a saana n’awofo edzi ebusua sika no nyina ma woegya no kaw buruburoo. Ntsi dɛ nkyɛ n’awofo begya no sika no, kaw mbom na wɔdze gyaa no. Na da biara so nna hɔn a n’awofo dze hɔn kaw no gyina no kɔn do regye hɔn sika ma onnya beebiara mmfa ne tsir mmfa. Na kaw no ne kɛse so dze, nna orunntum nntua ara da na oeewu.

² Kwan bi do no, hɛn asɛm akɛyɛ tse dɛ aberantsɛ yi. Ebɛnadze ntsi na yɛreka dɛm? Aber a Jehovah bɔɔ hɛn awofo a wodzi kan Adam na Eve no, nna bɔn biara nnyi hɔnho. Afei so, nna wɔtse Paradise fɛfɛɛfɛw bi mu. (Gen. 1:27; 2:​7-9) Nna nkyɛ wobotum atsena ase daa na hɔn enyi so aagye afebɔɔ. Naaso awerɛhosɛm nye dɛ, Adam na Eve yɛɛ Jehovah do asoɔdzen. Dɛm ntsi, Jehovah paam hɔn fii Eden ture no mu, na hokwan a wɔwɔ dɛ wɔbɛtsena ase daa no so fii hɔn nsa. Ebɛn egyapadze na wɔdze gyaa hɛn? Bible no ka dɛ: “Dɛ mbrɛ bɔn nam nyimpa kor [Adam] do baa wiadze, na owu nam bɔn do bae no, dɛm na owu twaa mu baa nyimpa nyina do, dɛ hɔn nyina ayɛ bɔn ntsi.” (Rom. 5:12) Ntsi egyapadze a Adam dze egya hɛn nye bɔn, na bɔn ntsi na yewu no. Bɔn a Adam dze egya hɛn  no tse dɛ kaw kɛse bi, na nokwasɛm nye dɛ, hɛn mu biara nnyi hɔ a obotum etua dɛm kaw no da.—Ndw. 49:8.

3. Ebɛnadze ntsi na wobotum dze hɛn bɔn atoto ‘kaw’ ho?

³ Jesus dze bɔn totoo ‘kaw’ ho. (Matt. 6:12; Luke 11:4) Sɛ yɛyɛ bɔn a, ɔtse dɛ mbrɛ yɛdze Jehovah kaw. Na ɔsɛ dɛ yetua dɛm kaw no ɔkwan biara do, annyɛ dɛm a gyedɛ yɛdze hɛn nkwa twa do.—Rom. 6:​7, 23.

4. (a) Sɛ nyimpa a bɔn wɔ hɔnho no ennya mboa emmfi beebiara a, nkyɛ ebɛn asɛm bɔto hɔn? (Ndwom 49:​7-9) (b) Sɛ Bible no dze kasafua “bɔn” dzi dwuma a, ɔkyerɛ dɛn? (Hwɛ adakaba a wɔato dzin “Bɔn” no.)

⁴ Dza Adam na Eve hweree no, nyimpa biara nnyi hɔ a obotum ama hɛn nsa aaka da. (Kenkan Ndwom 49:​7-9.) Sɛ yeennya mboa emmfi beebiara a, nkyɛ yennyi enyidado dɛ daakye bi yɛbɛtsena ase daa anaa nkyɛ yennyi enyidado dɛ sɛ yewu a wobenyan hɛn. Nkyɛ sɛ yewu a, enyidado biara nnyi hɔ mma hɛn bio, dɛ mbrɛ sɛ mbowa wu a, enyidado biara nnyi hɔ mma hɔn no.—Ɔsɛnk. 3:19; 2 Pet. 2:12.

5. Ebɛn kwan do na hɛn Egya a ɔdɔ hɛn no etua hɛn akaw ama hɛn? (Hwɛ mfonyin no.)

⁵ Ma yɛnsan nkɔ mfatoho a yɛaka ho asɛm wɔ nkyekyɛmu kor no mu no do. Yɛmfa no dɛ papa bi a ɔwɔ sika paa aka akyerɛ aberantsɛ no dɛ obotua ne kaw no nyina ama no. Ehwɛ a, aberantsɛ no bɛtse nka dɛn? Ekyingye biara nnyi ho dɛ, n’enyi bɛgye paa na ɔbɛgye ato mu dɛ papa no mboa no. Bɔn a Adam dze egya hɛn no akɛyɛ tse dɛ kaw bi. Naaso enyigyesɛm nye dɛ hɛn Egya Jehovah a ɔdɔ hɛn no akyɛ hɛn adze bi dze etua dɛm kaw no ama hɛn. Jesus kaa dɛm akyɛdze yi ho asɛm dɛ: ‘Nyankopɔn dɔ wiadze paa ntsi na ɔdze ne Ba a ɔwoo no kor no mae, ama obiara a ɔbɛgye no edzi no annsɛɛ, na mbom oeenya daa nkwa.’ (John 3:16) Dɛm akyɛdze kor yi ara so ma yɛnye Jehovah ntamu yɛ kama.

6. Ebɛn Bible mu nsɛmfua na yebosusu ho wɔ adzesua yi mu, na ebɛnadze ntsi a?

⁶ Jehovah si dɛn dze dɛm akyɛdze soronko yi tua hɛn bɔn anaa hɛn “akaw” ma hɛn? Ma yɛnhwɛ ndzɛmba bi a Bible no aka dɛ Nyankopɔn ayɛ. Bible no ka dza Nyankopɔn ayɛ no mu bi ho asɛm dɛ ɔnye hɛn aka abɔ mu, ɔapata ama hɛn, ɔama hɛn werdam, ɔagye hɛn, na oebu hɛn bem. Yebosusu dza dɛm nsɛm yi mu biara kyerɛ ho wɔ adzesua yi mu. Sɛ yɛdwendwen dɛm nsɛm yi ho a, ɔbɛma hɛn enyi asɔ dza Jehovah ayɛ a ɔma otum dze bɔn kyɛ no paa.

JEHOVAH NYE HƐN AKA ABƆ MU

7. (a) Ebɛn adze fofor bio na Adam na Eve hweree aber a wɔyɛɛ bɔn no? (b) Osiandɛ yɛyɛ Adam na Eve hɔn mba ntsi, ebɛnadze paa na yehia? (Romefo 5:​10, 11)

⁷ Aber a Adam na Eve yɛɛ bɔn no, hokwan a  nna wɔwɔ dɛ wɔbɛtsena ase daa no bɔɔ hɔn. Ɔnnyɛ iyi nkotsee o, ebusuabɔ kamakama a nna wɔnye hɔn Egya Jehovah wɔ no so sɛɛe. Ahyɛse no dze, nna Adam na Eve ka Nyankopɔn n’ebusua no ho. (Luke 3:38) Naaso aber a wɔyɛɛ Jehovah do asoɔdzen no, Jehovah tuu hɔn fii n’ebusua no mu na iyi maa wɔnye no ntamu tsetsewee. Dɛm aber no dze, nna wonnyi ba biara. (Gen. 3:​23, 24; 4:1) Osiandɛ yɛyɛ Adam na Eve hɔn mba ntsi, ohia dɛ yɛnye Jehovah ka bɔ mu. (Kenkan Romefo 5:​10, 11.) Dza iyi kyerɛ nye dɛ, ɔsɛ dɛ yɛnye Jehovah nya ebusuabɔ papa. Nhwehwɛmu nwoma bi ka dɛ asɛm “ka bɔ mu” a wɔdze dzii dwuma wɔ dɛm kyerɛwsɛm yi mu no, sɛ ekɔ Greek kasa mu a, obotum akyerɛ dɛ “obi nye ne tamfo bi bɔbɔ mu ma wɔaabɛyɛ anyɛnkofo.” Na enyigyesɛm so nye dɛ, Jehovah na odzii kan tuu dɛm anamɔn yi. Ɔyɛɛ no dɛn?

NHYEHYƐƐ A JEHOVAH DZE EGU AKWAN MU AMA YƐNYE NO AAKA ABƆ MU

8. Sɛ Bible no ka mpata anaa mpatadze a, ɔkyerɛ dɛn?

⁸ Ɔapata ama hɛn. Sɛ Bible no ka mpata anaa mpatadze a, dza ɔkyerɛ nye nhyehyɛɛ a Jehovah dze egu akwan mu mbrɛ ɔbɛyɛ a ɔnye nyimpa ndzebɔnyɛfo ntamu bɛsan ayɛ papa bio. Sɛ nna Jehovah botum dze adze bi apata biribi a, nna ɔsɛ dɛ dɛm ndzɛmba ebien no nyina no bo yɛ kor. Sɛ ne nyina no bo yɛ kor a, ɔno dza ɔyewee anaa ɔsɛɛe no, nna obotum dze kor no ahyɛ ananmu pɛpɛɛpɛ. Greek Kyerɛwnsɛm no so dze kasafua mpatadze dzi dwuma dze kyerɛ biribi a Jehovah yɛe ama oeetum asan nye nyimpa afa nyɛnko bio.—Rom. 3:25.

9. Ebɛn nhyehyɛɛ na Jehovah dze guu akwan mu ama oeetum dze Israelfo no hɔn bɔn akyɛ hɔn?

⁹ Nna Jehovah pɛ dɛ ɔnye Israelfo no ntamu yɛ papa, ntsi ɔdze nhyehyɛɛ bi guu akwan mu a nna obotum egyina do dze hɔn bɔn akyɛ hɔn. Tsetse no, nna Israelfo no dzi Mpata Da no afe biara. Sɛ odu dɛm da no a, nna sɔfopanyin no gyina amamfo no ananmu dze mbowa bɔ afɔr. Naaso mbowa so dze, wosi dɛn dze pata nyimpa no bɔn? Nokwasɛm nye dɛ, nna mbowa a wɔdze bɔ afɔr no runntum mpata nyimpa no bɔn korakora. Naaso sɛ nna Israelfo no nu hɔnho na wɔbɔ afɔr a Jehovah pɛ dɛ wɔbɔ no a, nna ɔdze hɔn bɔn bɛkyɛ hɔn. (Heb. 10:​1-4) Afei so, nna dɛm nhyehyɛɛ yi nye bɔn ho afɔr ahorow a nna Israelfo no taa bɔ no ma wɔkaa dɛ bɔn wɔ hɔnho, na wohia biribi a ɔbɛpepa hɔn bɔn korakora.

10. Ebɛn nhyehyɛɛ na Jehovah yɛe mbrɛ ɔbɛyɛ a obotum dze bɔn akyɛ korakora?

¹⁰ Jehovah yɛɛ nhyehyɛɛ bi a obotum ama ɔdze bɔn akyɛ korakora. Dza ɔyɛe nye dɛ ɔmaa no Dɔba no ‘bɔɔ afɔr prɛko dze soaa nyimpa pii hɔn bɔn.’ (Heb. 9:28) Jesus dze ‘no nkwa yɛɛ werdam dze gyee nyimpa beberee.’ (Matt. 20:28) Naaso werdam koraa mpo, ɔyɛ ebɛnadze?

JEHOVAH AMA HƐN WERDAM NO

11. (a) Sɛ Bible no ka werdam a, ɔkyerɛ dɛn? (b) Nna ebɛn ndzɛmba na obotum ama obi etua werdam no?

¹¹ Bible no ma yehu dɛ werdam yɛ biribi a wotua dze pata obi anaa wotua dze siesie nkorɔfo ntamu. a Ntsi nna Jehovah botum afa werdam no do ama adasamba nsa aka dza wɔahwer no. Ebɛnadze ntsi na yɛreka dɛm? Dɛ mbrɛ yeebohu no, aber a Adam na Eve yɛɛ bɔn no, hokwan a nna wɔwɔ dɛ wɔbɛtsena ase daa no bɔɔ hɔn na wɔbɛyɛɛ nyimpa so a bɔn wɔ hɔnho. Ntsi nna ɔsɛ dɛ werdam no bo no nye dza Adam na Eve hweree no no bo yɛ pɛ. (1 Tim. 2:6) Dɛm ntsi nna ɔsɛ dɛ obi a obotua werdam no yɛ ɔbarimba bi a (1) bɔn biara nnyi  noho; (2) obotum atsena ase daa wɔ asaase yi do; na (3) ɔayɛ krado dɛ obowu na ɔdze no nkwa aabɔ afɔr ama hɛn. Ntsi nna dɛm ndzɛmba ebiasa yi na obotum ama obi dze no nkwa aapata ama hɛn anaa ɔdze no nkwa esi dza yɛhweree no ananmu.

12. Ebɛnadze ntsi na Jesus tumii tuaa werdam no?

¹² Ndzɛmba ebiasa bi na ɔmaa Jesus tumii tuaa werdam no. Ɔno nye yi: (1) Nna bɔn biara nnyi noho, kyerɛ dɛ, “ɔannyɛ bɔn.” (1 Pet. 2:22) (2) Osian iyi ntsi, nna obotum atsena asaase do daa. (3) Nna ɔayɛ krado dɛ obowu na ɔdze no nkwa aato hɔ ama hɛn. (Heb. 10:​9, 10) Aber a Jesus baa asaase yi do no, nna ɔyɛ nyimpa a bɔn biara nnyi noho tse dɛ aber a wɔbɔɔ Adam fofor no. (1 Cor. 15:45) Ntsi Jesus wui no, ɔdze no nkwa pataa Adam no bɔn no, kyerɛ dɛ, ɔdze no nkwa hyɛɛ dza Adam hweree no ananmu. (Rom. 5:19) Iyi ntsi Bible no ka Jesus ho asɛm dɛ ɔbɛyɛɛ “Adam a odzi ekyir.” Ntsi nna onnhia dɛ obi a bɔn nnyi noho san tua dza Adam hweree no bio. Osiandɛ nna Jesus ewu “prɛkopɛr.”—Heb. 7:27; 10:12.

13. Nhyehyɛɛ a Jehovah yɛe dze pataa hɛn bɔn nye werdam no, ebɛn nsonsonee na ɔwɔ mu?

¹³ Ɔnodze yembisa dɛ, nhyehyɛɛ a Jehovah yɛe dze pataa hɛn bɔn nye werdam no, nsonsonee bi wɔ mu anaa? Nyew. Mpatadze ho nhyehyɛɛ no yɛ dza Nyankopɔn yɛe ama adasamba nye no ntamu aasan ayɛ papa bio. Naaso werdam no dze, ɔyɛ biribi a Nyankopɔn tuae ama oeetum apata adasamba hɔn bɔn. Dza otuae no nye Jesus no bɔgyaa a ɔsom bo a ohuei gui maa hɛn no.—Eph. 1:7; Heb. 9:14.

JEHOVAH AGYE HƐN NA OEBU HƐN BEM

14. Ebɛnadze na yebosusu ho, na ebɛnadze ntsi a?

¹⁴ Nhyehyɛɛ a Jehovah yɛe dze patae maa hɛn no, ebɛn mfaso na yenya fi mu? Bible no dze nsɛm ahorow bi kyerɛkyerɛ mfaso a yenya fi mu no mu. Ɔwɔ mu dɛ dza dɛm nsɛm ahorow yi kyerɛ no dzi nsɛ dze, naaso no mu biara ma yehu biribi pɔtsee bi fa nhyehyɛɛ a Jehovah yɛe dze patae maa hɛn no ho. Yebosusu dɛm nsɛm yi ho, na yaahwɛ mfaso a yenya fi mu.

15-16. (a) Sɛ Bible no ka dɛ “wɔagye hɛn” a, ɔkyerɛ dɛn? (b) Dɛm asɛm yi ma yɛtse nka dɛn?

¹⁵ Sɛ Bible no ka dɛ wɔagye hɛn a, dza ɔkyerɛ nye dɛ yɛadze hɛnho osian werdam no a woetua no ntsi. Ɔsomafo Peter kaa iyi ho asɛm dɛ: “Hom nyim dɛ wɔammfa ndzɛmba a ɔprɔw, dwetɛ anaa sika na wɔdze gyee hom fii hom abrabɔ gyangyan a hom egyanom dze gyaa hom no mu. Na mbom Christ bɔgya a ɔsom bo no a, dɛ eguambaa a dzɛm nye nkekaa nnyi no ho.”—1 Pet. 1:​18, 19.

¹⁶ Osian werdam no ntsi, wobotum agye hɛn efi bɔn na owu nsamu. (Rom. 5:21) Ɔyɛ hɛn dɛw paa dɛ Jehovah dze Jesus no bɔgyaa anaa no nkwa a ɔsom bo no agye hɛn efi bɔn na owu nsamu. Nokwasɛm nye dɛ, hɛn enyi sɔ adze a Jehovah na Jesus ayɛ ama hɛn no paa.—1 Cor. 15:22.

17-18. (a) Sɛ wɔka dɛ woebu hɛn bem a, ɔkyerɛ dɛn? (b) Ebɛn mfaso na iyi ma yenya?

¹⁷ Sɛ Jehovah bu hɛn bem a, dza ɔkyerɛ nye dɛ bɔn a yɛayɛ nyina oegyaa mu ma wɔaka anaa ɔapepa efi hɔ. Sɛ Jehovah yɛ dɛm a, ɔno nnkyerɛ dɛ oebu ne mbra a ɔfa atsɛntsenenee ho no do. Afei so, ɔnnyɛ biribi a yɛayɛ na ɔma Jehovah bu hɛn dɛ atseneneefo. Dɛmara so na sɛ ogyaa hɛn bɔn mu ma ɔka a, ɔno nnkyerɛ dɛ ɔsosɔw bɔn do. Mbom, osiandɛ yɛgye dza Jehovah na Jesus nyina yɛe dze tuaa werdam no dzi ntsi na ɔdze hɛn bɔn kyɛ hɛn no.—Rom. 3:24; Gal. 2:16.

¹⁸ Sɛ Jehovah bu hɛn bem a, ebɛn mfaso na hɛn mu biara botum enya? Hɔn a woeyi hɔn dɛ wɔnye Jesus nkedzi adze wɔ sor no,  woebu hɔn bem dada na wɔabɛyɛ Nyankopɔn ne mba. (Titus 3:7; 1 John 3:1) Afei so, wɔdze hɔn bɔn akyɛ hɔn. Tsebea a wɔwɔ mu sesei no akɛyɛ tse dɛ mbrɛ wɔnnyɛɛ bɔn mpo da, na iyi ma wɔfata dɛ wɔkɔ Ahendzi no mu. (Rom. 8:​1, 2, 30) Hɔn a wɔwɔ enyidado dɛ wɔbɛtsena asaase yi do so, woebu hɔn bem na wɔabɛyɛ Nyankopɔn n’anyɛnkofo. Dɛmara na hɔn so, Jehovah dze hɔn bɔn akyɛ hɔn. (Jas. 2:​21-23) Nyimpadodow kɛse a wobenya hɔn tsir edzidzi mu wɔ Amagedon no, wobotum ahwɛ kwan dɛ worunnwu da. (John 11:26) Afei so, wobenyan “hɔn a wɔtsen” nye “hɔn a wɔnntsen” nyina efi ewufo mu. (Andw. 24:15; John 5:​28, 29) Ewiei koraa no, Jehovah n’asomfo anokwafo a wɔbɛtsena asaase yi do no nyina ‘benya enyimnyam fahodzi a ɔwɔ hɔ ma Nyankopɔn ne mba no bi.’ (Rom. 8:21) Nhyehyɛɛ a Jehovah dze egu akwan mu ama yɛnye no ntamu aayɛ papa no bɛma yeenya nhyira kɛse paa daakye. Dɛm nhyira no nye dɛ yebotum asan abɛyɛ hɛn Egya Jehovah ne mba a bɔn biara nnyi hɛnho.

19. Ebɛnadze ntsi na seseiara yɛwɔ enyidado? (Ibotum so ahwɛ adakaba a wɔato dzin “Dza Jehovah No Bɔnfakyɛ Kyerɛ” no.)

¹⁹ Mbrɛ ɔtse nye dɛ, mber bi a abɛsen kɔ no, nna hɛn asɛm tse dɛ aberantsɛ a yedzii kan kaa no ho asɛm wɔ adzesua yi n’ahyɛse no. Dza ɔwɔ nyina fii ne nsa, na n’awofo so gyaa no kaw buruburoo a nna nkyɛ onnkotum etua ara da. Naaso hɛn dze, yɛda Jehovah ase paa dɛ ɔaboa hɛn. Nhyehyɛɛ a ɔdze guu akwan mu mbrɛ ɔbɛyɛ a obotum dze hɛn bɔn akyɛ hɛn, nye Jesus a ɔmaa obowui maa hɛn ntsi, seseiara yɛwɔ enyidado. Sɛ yɛgye Jesus Christ dzi a, bɔn na owu rennye hɛn nnyɛ nkowaa. Afei so, Jehovah botum dze hɛn bɔn akyɛ hɛn ma wɔaayɛ tse dɛ mbrɛ yɛnnyɛɛ bɔn biara mpo da. Dza ɔkyɛn ne nyina no, seseiara mpo yebotum nye hɛn sor Egya Jehovah a ɔdɔ hɛn no ntamu ayɛ kamakama.

20. Ebɛnadze na yebosusu ho wɔ adzesua a odzi hɔ no mu?

²⁰ Sɛ yɛdwendwen dza Jehovah na Jesus ayɛ ama hɛn no ho a, ɔma enyisɔ a yɛwɔ ma hɔn no yɛ kɛse. (2 Cor. 5:15) Sɛ ɔnnyɛ hɔn a, nkyɛ yennyi enyidado biara. Naaso ebɛn kwan do na hɛn mu biara botum enya mbrɛ Jehovah dze bɔn kyɛ no do mfaso? Yebosusu dɛm asɛm yi ho wɔ adzesua a odzi hɔ no mu.