Nna me maame na me papa yɛ Catholicfo mapa, kyerɛ dɛ, nna wɔmfa hɔn som nndzi agor koraa. Naaso aber a wobohunii wɔ Bible mu dɛ Nyankopɔn ne dzin dze Jehovah no, hɔn beenu no bɛyɛɛ Jehovah Adasefo a wɔyɛ nsi. Nna me papa yɛ kapentanyi. Nna ɔtaa dze dua yɛ Jesus no honyi, naaso obohun nokwar no, ogyaae. Nna fie a yɛtse mu no yɛ aborɔsan, ntsi me papa dze kapenta edwuma no ho nyimdzee a ɔwɔ no siesiee aborɔsan no n’ase hɔ dze yɛɛ Ahendzi Asa. Nna iyi nye Ahendzi Asa a odzi kan wɔ San Juan del Monte a ɔwɔ Philippines man no n’ahenkurow Manila mu.

Wɔwoo me afe 1952. Meyɛ abofra no, m’awofo kyerɛkyerɛɛ me Jehovah ho adze. Nna ɔyɛ biribi a wɔnye mo nuanom mpanyimfo beesuon no yɛ dada. Nna mowɔ enuanom mbanyimfo baanan na mbasiafo baasa. Mirinyin no me papa hyɛɛ me nkuran dɛ menkenkan Bible no. Ɔkaa kyerɛɛ me dɛ menkenkan tsir kor da biara, na ɔnye me suaa asafo nwoma ahorow pii so. Ɔwɔ mu ara a, nna m’awofo ma ahwɛfo akwantufo nye Bethelfo bɛda hɛn fie. Sɛ nna dɛm enuanom yi bɛsera hɛn a, hɔn suahu ahorow a wɔnye hɛn kyɛ no hyɛ hɛn nkuran, na ɔma hɛn enyi gye. Na iyi na okenyaan hɛn nyina ma yɛdze Jehovah no som dzii kan wɔ hɛn asetsena mu no.

M’awofo dze nokwardzi soom Jehovah, na musuaa ndzɛmba pii fii hɔn hɔ. Yarba bi bɔɔ me maame ma owuu yayaayaw, na ɔno ekyir no menye me papa hyɛɛ akwampaa edwuma no ase wɔ afe 1971. Naaso, wɔ afe 1973 no, me papa so wui; dɛm aber no nna medzi mfe 20. M’awofo hɔn wu no maa midzii awerɛhow paa, na ɔmaa metsee nka dɛ mayɛ ankonam. Naaso enyidado a ‘otsim na onnhinhim’ a ɔwɔ Bible mu no boaa me ma awerɛhow annhyɛ mo do, na mbom ɔboaa me ma motwee bɛɛn Jehovah. (Heb. 6:19) Me papa wui no, wɔannkyɛr koraa na wɔkaa kyerɛɛ me dɛ monkɔsom dɛ ɔkwampaafo tsitsir wɔ supɔw bi a wɔatsew no ho a wɔfrɛ no Coron do; ɔwɔ Palawan mantɔw no mu.

Mokɔr Coron no, nna medzi mfe 21. Aber a mukodur supɔw no do no, muhun dɛ enyinam ahoɔdzen na pipe ho yɛ dzen wɔ hɔ, na afei so nna kaar na moto a ɔwɔ hɔ no nnhyɛ da ara nndɔɔ so. Iyi yɛɛ me nwanwa osiandɛ nna kurow mu ara na matsena ntsi nna m’adwen  yɛ me dɛ, mbrɛ kurow mu asetsena tse no, dɛmara so na ɔtse wɔ beebiara. Nna enuanom a wɔwɔ hɔ no nndɔɔ so, na nna ɔkwampaafo biara nnyi hɔ a menye no bɔkɔ asɛnka, ntsi ɔtɔ da a nna ɔsɛ dɛ mankotsee na mokɔ. Bosoom a odzi kan no dze, mefee m’ebusuafo na m’anyɛnkofo paa. Sɛ adze sa na mupue kegyina paado na mema me tsir do hwɛ nworaba a ɔwɔ wimu no a, ebɔhwɛ no nna nyinsuwa nam m’enyiwa ho. Nna ɔyɛ me dɛ mingyaa dwumadzi a wɔdze ahyɛ me nsa no hɔ, na mensan m’ekyir nkɔ fie.

Mber a ɔtsetse dɛm mu no, nna mifi m’akoma mu ka dza ɔhaw me biara kyerɛ Jehovah. Nna ɔyɛ a mekaakaa nsɛm bi a ɔhyɛ nkuran a mekenkanee wɔ Bible nye hɛn nwoma ahorow no mu. Nna asɛm a ɔwɔ Ndwom 19:14 no taa ba me tsirmu. Mubohun dɛ sɛ modwendwen ndzɛmba a ɔsɔ Jehovah n’enyi tse dɛ no ndwuma na no suban ahorow no ho a, ɔbɛyɛ ‘mo Botan na mo Pomfo.’ Asɛm bi a ɔwɔ Ɔweɔn-Aban bi mu a n’asɛntsir nye “You Are Never Alone” a no boaa me. Mekenkaan no mpɛn pii. Mber a ɔtse dɛm mu no, nna ɔtse dɛ mbrɛ Jehovah nkotsee na menye no wɔ hɔ, na iyi maa minyaa hokwan dze bɔɔ no mpaa, dze suaa adze, na modwendween dza musuae no ho.

Mukodur Coron no, wɔannkyɛr biara na mebɛyɛɛ asafo mu panyin. Nna mankotsee nye asafo mu panyin wɔ hɔ, ntsi dapɛn biara nna mohwɛ Theocracy Ɔsom Skuul, Ɔsom Nhyiamu, Asafo Buukuu Mu Adzesua, nye Ɔweɔn-Aban Adzesua no do. Afei so, nna mema bagua mu ɔkasa dapɛn biara. Dɛm aber yi dze, nna dwumadzi a ogu mo do no adɔɔ so araa ma mutwa moho mpo a, onntwa na akantam matse nka dɛ mayɛ ankonam!

Asɛnka edwuma a meyɛe wɔ Coron no soow aba, na ekyir yi, wonumaa me Bible esuafo binom mpo. Naaso mihyiaa ɔhaw ahorow bi so. Ɔtɔ da a, nna ɔsɛ dɛ me nantsew fitsi anapa kesi ewiaber ana mekodu asaasesin a morokɔ mu no mu, na sɛ mukodu hɔ mpo a nna minnyim beebi a mebɛda. Nna nsupɔw nketsenketse beberee ka asafo no n’asaasesin ho. Ntsi nna metaa dze hɛmba a engine bɔ ho twa kwan kɔ dɛm nsaasesin ahorow no mu. Mpɛn pii no, nna ehum tu dzendzenndzen wɔ po no do, naaso yɛrekasa yi nna minnyim epo guar so o! Naaso wɔ ɔhaw yi nyina mu no, Jehovah bɔɔ mo ho ban na ɔboaa me so. Ekyir yi, mubohun dɛ saana nna Jehovah risiesie me ama ɔhaw akɛse a mibehyia wɔ mo dwumadzi a odzi hɔ mu no.

Afe 1978 mu no, wɔnye me kɔr ɔman bi a wɔfrɛ no Papua New Guinea do; ɔda Australia n’etsifi afamu. Papua New Guinea man no mu dze, nkoko nkotsee na ne kɛse so reyɛ ayɛ tse dɛ Spain. Mukodur hɔ no, mubohun dɛ nkorɔfo dodow a wɔwɔ ɔman no mu no yɛ ɔpepem ebiasa na wɔka kasa bɔbor 800 wɔ ɔman no mu, na iyi maa moho boow me. Enyigyesɛm nye dɛ, nna nkorɔfo pii tum ka kasa a wɔfrɛ no Melanesian Pidgin; wɔtaa frɛ no Tok Pisin.

Wɔnye me kɔr asafo bi a wɔka Borɔfo kasa mu. Nna dɛm asafo yi wɔ ɔman no n’ahenkurow Port Moresby mu. Naaso wɔannkyɛr koraa na mifii hɔ kɔr asafo bi a wɔka Tok Pisin kasa mu, na megyee enyim ara suaa kasa no. Dza wɔdze kyerɛ me no, nna medze kɔ asɛnka na iyi boaa me ma musuaa kasa no ntsɛntsɛm. Wɔannkyɛr biara na mehyɛɛ ase dɛ merema bagua mu ɔkasa wɔ Tok Pisin kasa mu. Mukodur Papua New Guinea no, woenndzi afe kor mpo na wɔkaa kyerɛɛ me dɛ monsom dɛ ɔmansin do hwɛfo wɔ nsafo ahorow a wɔka Tok Pisin kasa no mu; nna dɛm nsafo ahorow yi abɔ apetse wɔ mantɔw akɛseakɛse ahorow no mu. Iyi yɛɛ me nwanwa o!

Mbea a nna nsafo ahorow no wowɔ no, nna no mu twe paa, ntsi nna ɔsɛ dɛ meyɛ ɔmansin ehyiadzi ahorow pii ho nhyehyɛɛ, na mututu akwan pii so. Ahyɛse  no, nna metse nka dɛ mayɛ ankonam osiandɛ nna mowɔ ɔman fofor do, kasa a wɔka no so a, menntse, na nna ɔsor hɔn amambra so. Osiandɛ nna asaase no yɛ nkoko ara nko, na kaar akwan nndeda hɔ ntsi nna murunntum mmfa kaar nntutu akwan nkɛserasera asafo ahorow no, gyedɛ wimhɛn nkotsee. Dɛm ntsi mpɛn pii no, nna ɔsɛ dɛ mofow wimhɛn dze tu kwan dapɛn biara. Ɔtɔ da a, ebɔhwɛ no, nna mankotsee na metsena wimhɛn kakraba bi a no ho awe nkandar mu. Sɛ nna metse wimhɛn a ɔtsetse dɛm mu rutu kwan a, me yamu tum hyehye me araa kesi dɛ mubodu; sɛ medze hɛmba so rutu kwan a, nna dɛmara na ɔyɛ me.

Dɛm aber no nna nyimpa kakraabi na wɔwɔ tɛlefon, ntsi sɛ nna mepɛ dɛ menye nsafo ahorow no dzi nkitaho a, nna mekyerɛw hɔn nkrataa. Mpɛn pii no, nna mukodu hɔ ansaana hɔn nsa aka me nkrataa no, ntsi ɔyɛ a nna mibisabisa kurow mu hɔfo no ma wɔkyerɛ me beebi a enuanom no tse. Naaso aber biara a mubohu enuanom no, nna wɔdze enyigye gye me fɛw do, na nna iyi ma muhu dɛ me berɛ nyina annyɛ gyan. Muhun dɛ Jehovah aboa me wɔ akwan pii do, na iyi maa ebusuabɔ a menye no wɔ no mu bɛyɛɛ dzen.

Asafo nhyiamu a odzi kan a mokɔree wɔ supɔw bi a wɔfrɛ no Bougainville do no, awarfo bi baa me nkyɛn na nna wɔresereserew, na wobisaa me dɛ, “Ekaa hɛn a?” Nna mekaa dɛ midzii dɛm awarfo yi dase aber a mokɔr Port Moresby fofor no. Menye hɔn hyɛɛ ase suaa Bible no, naaso ekyir yi, mekaa kyerɛɛ onua bi a ɔwɔ kurow mu hɔ dɛ ɔntoa adzesua no do. Dɛm aber yi dze, nna woenuma hɔn beenu no nyina! Mfe ebiasa a midzii wɔ Papua New Guinea no, minyaa nhyira beberee, na iyi yɛ no mu kor.

Ansaana mirifi Coron wɔ 1978 no, mihyiaa akyerɛbaa hoɔfɛwfo bi a ɔdwen nyimpa ho; nna wɔfrɛ no Adel. Nna ɔyɛ daa kwampaafo, na nna ɔwɔ mba beenu; hɔn dzin dze Samuel na Shirley. Ber kor no ara so, nna ɔrohwɛ ne maame a wɔabɔ aberwa no. May 1981 mu no, mesanee kɔr Philippines kɔwaar Adel. Yɛwaree no, yɛbɔɔ mu yɛɛ daa akwampaa edwuma no na yɛbɔɔ mu hwɛɛ ebusua no so.

Ɔwɔ mu dɛ nna mowɔ ebusua dze, naaso wɔ afe 1983 mu no, wɔsanee kaa kyerɛɛ me dɛ monkɔsom dɛ ɔkwampaafo tsitsir wɔ Linapacan Supɔw no do; ɔwɔ Palawan mantɔw no mu. Hɛn ebusua no nyina tui kɛtsenaa dɛm supɔw a nna wɔatsew no ho yi, na nna Adasefo biara nnyi hɔ. Bɛyɛ afe kor ekyir no, Adel ne maame wui. Naaso, yɛkɔr do ara yeer hɛnho wɔ asɛnka edwuma no mu, na ɔno na ɔboaa hɛn ma yegyinaa awerɛhow no ano. Yɛhyɛɛ ase nye nkorɔfo beberee suaa Bible no wɔ Linapacan na wonyaa nkɔenyim paa. Naaso wɔannkyɛr koraa na yebohun dɛ yebehia Ahendzi Asa kakraba bi wɔ hɔ. Dɛm ntsi hɛnankasa sii bi. Yɛkɔr hɔ no, mfe ebiasa pɛ ekyir no, nyimpa 110 baa Nkaadzi no bi, na iyi maa hɛn enyi gyee. Yefii hɔ no, hɔn mu beberee nyaa nkɔenyim ma wonumaa hɔn.

Afe 1986 mu no, wɔnye me kɔr Culion supɔw no do; nna akwatafo wɔ hɔ paa. Ɔno ekyir no, wɔmaa Adel so bɛyɛɛ ɔkwampaafo tsitsir. Ahyɛse no, nna yesuro dɛ yɛbɛka asɛmpa no akyerɛ hɔn a kwata ayɛ hɔn no. Naaso enuanom a wɔwɔ hɔ no maa yenyaa awerɛhyɛmu dɛ, adɔktafo ahwɛ akwatafo no ma hɔn ho atɔ hɔn, ntsi ɔnnsɛ dɛ yesuro dɛ wɔdze hɔn yarba no bɛsan hɛn. Nna dɛm akwatafo yi mu bi kɔ asafo nhyiamu a wɔyɛ wɔ akyerɛbaa bi ne fie no bi. Afei dze, nna yensuro hɔn bio, ntsi yetumii kaa enyidado a ɔwɔ Bible mu no ho asɛm kyerɛɛ dɛm nkorɔfo a nna wɔtse nka dɛ Nyankopɔn na nyimpa eyi hɔn tokyen no. Na iyi maa hɛn enyi  gyee paa. Aber a yehun dɛ nyimpa a nna dɛm yarba yi atseetsee hɔn no enyi agye dɛ daakye wobotum enya apɔwmudzen a odzi mu no, ɔyɛɛ hɛn dɛw paa.—Luke 5:​12, 13.

Ebɛnadze na yɛyɛe dze boaa hɛn mba no ma hɔn enyi kae wɔ Culion? Dza menye Adel yɛe nye dɛ, yɛtoo nsa frɛɛ nkyerɛbaa beenu bi a wofi Coron ma wɔnye hɛn bɛtsenae mbrɛ ɔbɛyɛ a hɛn mba no botum enya fɛkuw pa. Nna Samuel, Shirley, na dɛm nkyerɛbaa beenu yi enyi gye wɔ asɛnka edwuma no mu paa, osiandɛ nna wɔnye mbofra pii sua adze. Na ber kor no ara so, nna emi na Adel so nye mbofra no hɔn awofo sua adze. Enyigyesɛm nye dɛ, odur beebi no nna yɛnye mbusua 11 sua adze. Hɛn enyi baa hɛnho do no, nna yɛnye nkorɔfo beberee rusua Bible no na worinya nkɔenyim so. Ntsi yetumii tseew asafo fofor!

Ahyɛse no, nna mankotsee na meyɛ asafo mu panyin wɔ dɛm mpotamu hɔ. Dɛm ntsi Bethel kaa kyerɛɛ me dɛ sɛ yɛkɔ asafo nhyiamu a, monhwɛ nyɛ biribiara mma adawurbɔfo no. Ntsi dapɛn biara nna dɛm na meyɛ ma adawurbɔfo baawɔtwe a wɔwɔ Culion no, nye adawurbɔfo baakron bi so a nna wɔwɔ Marily ekuraase no. Yɛdze hɛmba fi beebi a yɛwɔ no rokɔ hɔ a, nna yedzi ndɔnhwer ebiasa. Sɛ yɛkɔ asafo nhyiamu wɔ hɔ na yɛpon a, nna hɛn ebusua no dze ndɔnhwer pii nantsew mbepɔw mu kɔ ekuraase bi a wɔfrɛ no Halsey nye nkorɔfo kosua Bible no.

Nkakrankakra asɛnka edwuma a nna yɛreyɛ wɔ Marily na Halsey no soow aba pii, ntsi yesii Ahendzi Asa wɔ dɛm nkuraase ebien yi nyina. Dɛ mbrɛ enuanom a wɔwɔ Linapacan yɛe no, enuanom a nna wɔwɔ ha nye hɔn Bible esuafo so dze hɔn ahoɔdzen nye ndzɛmba pii bɔboae ma yɛdze sii Ahendzi Asa no. Nna Ahendzi Asa a ɔwɔ Marily no tum fa nyimpa 200, na nna yetum bue mu dze yɛ ɔmansin ehyiadzi so.

Afe 1993 mu no, aber a nna mbofra no enyinyin no, menye Adel hyɛɛ ɔmansin edwuma no ase wɔ Philippines. Afei wɔ afe 2000 mu no, mokɔr Asomfo Ntsetsee Skuul, na wɔtsetsee me mbrɛ ɔbɛyɛ a mubotum akyerɛ adze wɔ dɛm skuul no mu. Nna metse nka dɛ murunntum nnyɛ dɛm dwumadzi yi naaso aber biara, nna Adel hyɛ me nkuran. Ɔkaa kyerɛɛ me mpɛn pii dɛ Jehovah bɛhyɛ me dzen ma meetum ayɛ dwumadzi fofor a wɔdze ahyɛ me nsa no. (Phil. 4:13) Nna Adel nyim dza ɔreka, osiandɛ nna nankasa n’apɔwmudzen nnyɛ papa naaso nna ɔda ho ara reyɛ dwumadzi a wɔdze ahyɛ ne nsa no.

 Afe 2006 mu no, aber a nna meda ho ara kyerɛ adze no, wɔkaa dɛ Adel enya Parkinson’s disease. Hɛnho dwuruuw hɛn o! Aber a mekaa kyerɛɛ Adel dɛ yɛmfa hɛn dwumadzi no nsi ha mbrɛ ɔbɛyɛ a mubotum ahwɛ no no, ɔkaa kyerɛɛ me dɛ, “Meserɛ wo hwehwɛ dɔkta a obotum ahwɛ me, na minyim dɛ Jehovah bɔboa hɛn ma yaatoa hɛn dwumadzi no do.” Mfe esia a odzi hɔ no mu no, Adel kɔr do ara yeer noho wɔ Jehovah no som mu na oennhwinhwin. Aber a nna onntum nnantsew no mpo, nna ɔtsena wheelchair mu kɔ asɛnka. Aber a nna onntum nnkasa papa no mpo, sɛ ɔkɔ asafo nhyiamu a, nna ɔdze kasafua kor anaa ebien bi ma mbuae. Nna mbɔdzen a Adel robɔ wɔ no som mu no yɛ enuanom beberee fɛw. Ntsi nna wɔtaa kyerɛw nsɛm bi a ɔhyɛ nkuran dze sɛnd no wɔ no fon do na wɔkyerɛw bi so gu kaad do dze brɛ no dze kyerɛ dɛ hɔn enyi sɔ dza ɔreyɛ no. Enuanom yɛɛ dɛm ara kesi dɛ Adel wui wɔ afe 2013 mu. Nna menye me yer ɔnokwafo Adel a minnsi no famu yi atsena bɔbor mfe 30, naaso aber a owui no, awerɛhow hyɛɛ mo do bio, na metsee nka dɛ mayɛ ankonam.

Nna Adel pɛ dɛ motoa mo dwumadzi no do, na dɛmara so na meyɛe. Meyeer moho yɛɛ dwumadzi a nna wɔdze ahyɛ me nsa no, na iyi boaa me ma manntse nka dɛ mayɛ ankonam. Ofi 2014 kesi 2017 no, aman ahorow bi a nna wɔdze nsa ato hɛn dwumadzi ahorow bi do no, wɔmaa mekɛseraseraa nsafo ahorow a wɔka Tagalog kasa a wɔwɔ hɔ no. Ɔno ekyir no, mokɔsoom nsafo a wɔka Tagalog kasa a wɔwɔ Taiwan, United States, na Canada no. Afe 2019 mu no, medze Borɔfo kasa kyerɛɛ adze wɔ Ahendzi Asɛmpakafo Skuul a wɔyɛe wɔ India na Thailand no. Dɛm dwumadzi ahorow yi nyina maa m’enyi gyee paa. Sɛ medze m’adwen nyina si dza meyɛ wɔ Jehovah no som mu no do a, ɔma m’enyi gye kɛse.

Dwumadzi fofor biara a minya no, sɛ mukodur hɔ a, mefa enuanom a wɔwɔ hɔ no nyɛnko dzendzenndzen, dɛm ntsi sɛ mirigya hɔn hɔ a, ɔyɛ a ɔnnda famu koraa. Mber a ɔtsetse dɛm mu no, mebohu dɛ ɔsɛ dɛ medze moho nyina to Jehovah do. Mehu dɛ Jehovah aboa me mpɛn pii wɔ m’asetsena mu, na iyi boa me ma mifi m’akoma nyina mu gye nsesa biara a ɔba m’akwan mu no to mu. Sesei a merekasa yi, meyɛ ɔkwampaafo tsitsir wɔ Philippines. M’enyi gye wɔ asafo fofor a maba mu yi mu, na mafa enuanom no dɛ m’ebusuafo; wɔboa me na wɔdwen mo ho so. Afei so, osiandɛ Samuel na Shirley rusuasua hɔn maame ne gyedzi ntsi, muhu hɔn a nna m’enyi agye.—3 John 4.

Ɔyɛ nokwar dɛ mehyia ɔhaw ahorow pii wɔ m’asetsena mu, na aber a nna yarba bɔn bi retseetsee me yer a ɔda m’akoma do no nyina, nna m’enyi tua. Afei so, mber adan wɔ m’asetsena mu mpɛn pii, na no mu biara so medan moho. Naaso iyi nyina mu no, mebohu dɛ Jehovah ‘nye hɛn mu biara ntamu kwan nnwar koraa.’ (Andw. 17:27) Jehovah ne nsa nnyɛ “tsia” dɛ ɔbɔboa n’asomfo na ɔaahyɛ hɔn dzen, na hɔn a wɔwɔ nsaasesin a wɔatsew hɔn ho mu no mpo ka ho. (Isa. 59:1) Jehovah a ɔyɛ mo Botan no aka moho wɔ m’asetsena nyina mu, na m’enyi sɔ dza ɔayɛ ama me no paa. Manntse nka dɛ wɔaka manko da.