EHYIA ɔhaw bi wɔ w’asetsena mu ma atse nka dɛ innyi ɔboafo biara? Mbrɛ ɔtse nye dɛ, yɛtse ‘mber a no mu yɛ dzen mu’ ntsi ɔtɔ da a hɛn abaw mu botum ebu ma yaatse nka dɛ yɛayɛ ankonam. (2 Tim. 3:1) Naaso, sɛ yerihyia ɔhaw wɔ hɛn asetsena mu a, afofor botum aboa hɛn. Bible no mpo ma yehu dɛ sɛ yɛwɔ nyɛnko berɛbo a, obotum aboa hɛn wɔ “abɛbrɛsɛ ber” mu.—Mbɛ. 17:17.

Ɔsomafo Paul n’asɛmpatserɛw akwantu ahorow no mu no, nna n’anyɛnkofo binom ka no ho, na wɔboaa no ankasa. (Col. 4:​7-11) Na aber a wɔkyeer Paul hyɛɛ ne fie wɔ Rome so no, n’anyɛnkofo yɛɛ ndzɛmba ahorow bi a nna Paul nankasa runntum nnyɛ dze boaa no. Dɛ mfatoho no, enuanom a wɔwɔ Philippi no dze ndzɛmba a nna Paul behia somaa Epaphroditus ma ɔdze kɛmaa no. (Phil. 4:18) Tychicus so dze nkrataa a Paul kyerɛwee no kɛmaa nsafo ahorow no. (Col. 4:7) Aber a wɔkyeer Paul hyɛɛ ne fie nye aber a wɔnye no kɔtoo efiadze no nyina, n’anyɛnkofo boaa no ma otumii yɛɛ no som edwuma no. Woara so, ibesi dɛn ayɛ nyɛnko pa?

Ndɛ, enuanom pii ama wɔada edzi dɛ sɛ ewɔ nyɛnko berɛbo a, mfaso wɔ do paa. Ɔwodze ma yɛnhwɛ dza ɔtoo Elisabet. Ɔyɛ daa kwampaafo bi a ɔtse Spain. Nna Elisabet ne maame enya cancer ma wɔse obowu. Naaso akyerɛbaa bi kyerɛɛ dɛ ɔyɛ nyɛnko pa, na ɔdze kyerɛwnsɛm ahorow bi sɛndee Elisabet dze hyɛɛ no nkuran. Elisabet kaa dɛ: “Dɛm tɛst mɛsegye ahorow no hyɛɛ me dzen paa, na ɔmaa metsee nka dɛ ɔnnkaa manko.”—Mbɛ. 18:24.

Sɛ yɛboa hɛn nuanom Christianfo ma wotum kɔ asafo nhyiamu na asɛnka a, obotum ama anyɛnkofa a ɔda yɛnye hɔn ntamu no mu aayɛ dzen. Dɛ mfatoho no, ibotum dze wo kaar akɛfa onua anaa akyerɛbaa bi a n’enyi efir nye no akɔ asafo nhyiamu anaa asɛnka. Sɛ eyɛ dɛm a, obotum ama hom eenya hokwan ahyehyɛ homho nkuran. (Rom. 1:12) Naaso hɛn nuanom Christianfo binom wɔ hɔ a, wɔaka dan mu. Yebesi dɛn aboa enuanom a wɔtse dɛm no na yaama woehu dɛ yɛyɛ hɔn anyɛnkofo?

Hɛn nuanom Christianfo binom wɔ hɔ a, yarba anaa nsɛm afofor bi ntsi wonntum mmba asafo nhyiamu wɔ Ahendzi Asa do. Hom mma yɛnhwɛ asɛm bi a ɔtoo onua bi a wɔfrɛ no David. Onyaa cancer, ntsi wɔnye no too edur do abosoom esia. Aber a nna ɔregye ayarsa no nyina, nna ɔnye ne yer Lidia fa video kɔnferɛns do tsie asafo nhyiamu no bi.

Ebɛnadze na hɔn anyɛnkofo a wɔwɔ asafo no mu no yɛe dze boaa hɔn? Sɛ wɔpon asafo nhyiamu biara a, nna enuanom a wɔwɔ Ahendzi Asa do hɔ no bɔ mbɔdzen nye David na Lidia kasa wɔ video kɔnferɛns no do. Afei so, sɛ David na Lidia ma mbuae a, ekyir yi nna enuanom no bi sɛnd hɔn tɛst  mɛsegye dze kamfo hɔn. Dza wɔyɛe no maa David na Lidia tsee nka dɛn? Ɔmaa wɔtsee nka dɛ wɔnnyɛ ankonam na hɔn nuanom no so dɔ hɔn.

Ebɛnadze na yebotum ayɛ dze aboa enuanom a wɔaka dan mu no ama hɔn so woeetum ayɛ asɛnka edwuma no bi? Yebotum ayɛ nsesa kakra wɔ mber a yɛdze kɔ asɛnka no mu ama yeetum nye hɔn abɔ mu ayɛ asɛnka edwuma no. Sɛ yɛyɛ dɛm a, ɔremma wɔnntse nka dɛ yeeyi hɔn baako ahyɛ hɔn nsa. (Mbɛ. 3:27) Ibotum nye hɔn abɔ mu akyerɛw nkrataa anaa hom afa tɛlefon do edzi dase. Enuanom a wɔaka dan mu no botum afa video kɔnferɛns do etsie asɛnka nhyiamu no bi. Nna ɔyɛ David na Lidia dɛw dɛ wotum fa video kɔnferɛns do tsie asɛnka nhyiamu no bi. David kaa dɛ: “Sɛ yetum ka enuanom ho ma yɛdze mber kakra susu dza yebotum aka wɔ asɛnka mu no ho na yɛbɔ mpaa a, ɔhyɛ hɛn nkuran ankasa.” Afei so, ɔwɔ mu ara a, ibotum nye wo Bible suanyi no ekosua adze wɔ ɔdawurbɔfo bi a ɔaka dan mu no ne fie. Naaso, ɔsɛ dɛ idzi kan bisa ɔdawurbɔfo no ma ɔgye to mu ansaana ayɛ dɛm.

Sɛ yɛnye enuanom a wɔaka dan mu no bɔ mu yɛ asɛnka edwuma no, na yehu hɔn suban ahorow a ɔyɛ fɛw no a, ɔma yɛnye hɔn anyɛnkofa no mu yɛ dzen. Dɛ mfatoho no, sɛ yɛnye hɔn nam asɛnka mu, na yehu mbrɛ wɔdze Nyankopɔn n’Asɛm no kyerɛkyerɛ ma ɔka nkorɔfo hɔn akoma no a, ɔma yɛpɛ hɔn asɛm paa. Sɛ yɛboa hɛn nuanom Christianfo ma wotum yɛ asɛnka edwuma no na wɔba asafo nhyiamu a, obotum ama yeenya anyɛnkofo afofor pii.—2 Cor. 6:13.

Aber a nna Paul wɔ ahohia mu no, ne nyɛnko Titus kɛseraa no na ɔkyekyee no werɛ. (2 Cor. 7:​5-7) Dɛm asɛm yi ma yehu dɛ, ɔnnyɛ awerɛkyekyesɛm nkotsee na yebotum aka akyerɛ hɛn nuanom dze ahyɛ hɔn nkuran, mbom yebotum so akɛsera hɔn anaa yɛayɛ ndzɛmba ahorow bi a wobehia dze aboa hɔn.—1 John 3:18.

Wɔretan hɛn nuanom a wɔwɔ Russia no enyi naaso wɔyɛ dza wobotum biara boa hɔnho hɔnho, na iyi yɛ biribi a yebotum esuasua. Ɔwodze ma yensusu Sergey na ne yer Tatyana hɔn asɛm no ho. Aporisifo kɔr hɔn fie kɔhwehwɛɛ hɔn ndzɛmba mu, na wowiei no wɔdze hɔn kɔr poris steehyɛn dɛ worikebisabisa hɔn nsɛm. Wodzii kan gyaa Tatyana ma ɔkɔr fie. Sergey kaa dɛ: “Aber a [Tatyana] kodur fie ara pɛr na akyerɛbaa bi a ɔwɔ akokodur kɛseraa no. Ekyir yi, enuanom pii kɔr hɛn fie hɔ kɔboae ma wosiesiee hɛn dan mu hɔ kama.”

Sergey sanee so kaa dɛ: “Asɛm a ɔwɔ Mbɛbusɛm 17:17 no yɛ me dɛw paa. Hɔ ka dɛ: ‘Ɔnyɛnko berɛbo dɔ aber nyinara, na ɔyɛ onua a wɔwo no ma abɛbrɛsɛber.’ Naaso dɛm aber yi a wɔretan m’enyi yi na matse dɛm kyerɛwsɛm yi ase yie, osiandɛ sɛ enuanom ammboa me a nkyɛ murunntum nngyina ano. Jehovah ama me anyɛnkofo a wɔwɔ akokodur ma wɔataa m’ekyir.” a

Sɛ yebotum egyina ɔhaw na amandzehu a yerihyia no ano a, yehia anyɛnkofo a wobotum aboa hɛn. Na yebehia anyɛnkofo so a wɔtse dɛm no hɔn mboa paa wɔ ahohiahia kɛse no mu so. Dɛm ntsi, ndɛ nye ber a ɔsɛ dɛ yɛyɛ dza yebotum biara dze kyerɛ dɛ yɛyɛ anyɛnkofo apapa!—1 Pet. 4:​7, 8.