AHYƐ no nsew dɛ ndɛ nkorɔfo tse nka dɛ ɔsɛ dɛ wonya hokwan soronko bi anaa wɔnye hɔn dzi no wɔ kwan soronko bi do a? Hɔn enyi nnsɔ hokwan a wɔwɔ no, na hɔn adwen yɛ hɔn dɛ ɔsɛ dɛ wonya pii mpo ka ho. Hɔn a wɔtse dɛm no yɛ pɛsɛankonya na wɔnnkyerɛ ndzɛmba ho enyisɔ. Na dɛm suban yi ara so na Bible no kaa dɛ nkorɔfo bɛda no edzi wɔ ewiei mber yi mu.—2 Tim. 3:2.

Naaso ɔnnyɛ ndɛ na suban a ɔtse dɛm hyɛɛ ase. Adam na Eve sii gyinae dɛ hɔnankasa bɛyɛ dza wɔpɛ. Dɛm gyinae bɔn a wosii no na wɔama ndɛ na ndɛ nyina yɛreberɛ yi. Mfe pii ekyir no, Judahhen Uzziah nyaa adwen dɛ obotum akɛhyew eduhuam wɔ asɔrfie hɔ, naaso nna onnyi dɛm hokwan no. (2 Mber. 26:​18, 19) Phariseefo na Sadduceefo no so, nna hɔn adwen yɛ hɔn dɛ osiandɛ wɔyɛ Abraham n’asefo ntsi, ɔsɛ dɛ Nyankopɔn nye hɔn dzi no yie kyɛn afofor.—Matt. 3:9.

Ndɛ, nkorɔfo a woetwa hɛnho ehyia no bu hɔn ho kyɛn afofor na wɔyɛ pɛsɛankonya, ntsi sɛ yɛannhwɛ no yie a, yebosuasua hɔn suban bɔn no. (Gal. 5:26) Bi a hɛn adwen bɛyɛ hɛn dɛ ɔsɛ dɛ yenya hokwan bi anaa wɔnye hɛn dzi no wɔ kwan soronko bi do. Naaso ebɛnadze na obotum aboa hɛn amma yeennya adwen a ɔtse dɛm? Odzi kan, ɔsɛ dɛ yehu Jehovah n’adwen wɔ asɛm yi ho. Bible mu afotusɛm ebien bi botum aboa hɛn.

 Jehovah na ɔkyerɛ hokwan a ɔsɛ dɛ yenya. Hom mma yensusu dɛm hokwan ahorow no mu bi ho nhwɛ.

• Sɛ yɛfa ebusua dɛm yi a, ɔsɛ dɛ okun tse nka dɛ ne yer bu no, na dɛmara so na ɔsɛ dɛ ɔyer so tse nka dɛ no kun dɔ no. (Eph. 5:33) Ɔsɛ dɛ okun anaa ɔyer ma no hokafo hu dɛ ɔno nkotsee na n’enyi gye no ho. (1 Cor. 7:3) Ɔsɛ dɛ mbofra tsie hɔn awofo asɛm, na ɔwɔ dɛ awofo so hwɛ hɔn mba yie na wɔma wɔtse nka dɛ wɔdɔ hɔn.—2 Cor. 12:14; Eph. 6:2.

• Sɛ yɛba asafo no mu so a, osian edwumadzen a asafo mu mpanyimfo yɛ ntsi, ɔsɛ dɛ yebu hɔn. (1 Thess. 5:12) Naaso, wonnyi hokwan dɛ wɔhyɛ enuanom no do.—1 Pet. 5:​2, 3.

• Afei so, Nyankopɔn ama wiadze etumfo no kwan dɛ wɔngyegye tow mfi amamfo no hɔ, na ɔhwɛ kwan dɛ amamfo no so bedzi dɛm etumfo yi nyi.—Rom. 13:​1, 6, 7.

Jehovah dɔ hɛn, ntsi dza ɔdze ma hɛn no dɔɔ so kyɛn dza ɔsɛ dɛ yenya. Osiandɛ bɔn wɔ hɛnho ntsi, nkyɛ owu ara na ɔsɛ dɛ yewu. (Rom. 6:23) Naaso osian Jehovah no nokwar dɔ ntsi, ɔama hɛn nsa aka ndzɛmba pa pii. (Ndw. 103:​10, 11) Nhyira anaa hokwan biara a ɔama hɛn nsa aka no, ɔyɛ n’adom ara kwa.—Rom. 12:​6-8; Eph. 2:8.

Hwɛ woho yie wɔ suban a wiadze no da no edzi no ho. Sɛ yɛannhwɛ no yie a, yebenya adwen dɛ ɔsɛ dɛ yenya hokwan ahorow kyɛn afofor. Jesus ne mfatoho a ɔfa edwumayɛfo a wɔdze denare tuaa hɔn kaw no ho no ma yehu dɛ ɔnnyɛ dzen dɛ yebenya adwen a ɔtse dɛm. Edwumayɛfo no bi gyinaa ewia mu yɛɛ edwumadzen fitsi anapa araa kesii ewimbir. Binom so yɛɛ edwuma dɔnhwer kor pɛ. Edwumayɛfo a wɔyɛɛ edwuma da mu no nyina nyaa adwen dɛ osian edwuma a wɔyɛe no ntsi ɔsɛ dɛ wotua hɔn kaw kɛse. (Matt. 20:​1-16) Jesus dze dɛm mfatoho yi boaa n’ekyirdzifo no ma wohun dɛ ɔsɛ dɛ wɔma hɔn enyi sɔ biribiara a Nyankopɔn dze bɛma hɔn no.

Kyerɛ ndzɛmba ho enyisɔ, na mma nnhyɛ nkorɔfo nngye ndzɛmba mmfi hɔn hɔ. (1 Thess. 5:18) Nna ɔsomafo Paul wɔ hokwan dɛ ɔgye ndzɛmba ahorow bi a obehia no fi enuanom a wɔwɔ Corinth no hɔ, naaso ɔannyɛ dɛm, ntsi bɔ mbɔdzen suasua  no. (1 Cor. 9:​11-14) Ɔsɛ dɛ yɛkyerɛ dza nkorɔfo dze bɛma hɛn biara ho enyisɔ, na ɔnnsɛ dɛ yɛhyɛ hɔn gye ndzɛmba ahorow bi fi hɔn hɔ.

Brɛ woho adze. Mpɛn pii no, sɛ obi bu noho dɛ ɔkyɛn afofor a, onya adwen dɛ ɔsɛ dɛ onya ndzɛmba anaa hokwan pii kyɛn dza ɔwɔ no. Adwen a ɔtse dɛm no yɛ hu paa, naaso sɛ yɛbrɛ hɛnho adze a, adwen a ɔtse dɛm no remmba hɛn tsirmu mpo.

Nna nkɔnhyɛnyi Daniel brɛ noho adze, ntsi yebotum esuasua no. Nna ofi adehye ebusua mu, noho yɛ fɛw, onyim adze paa na nna otum yɛ ndwuma ahorow bi so. Ntsi nkyɛ obotum enya adwen dɛ hokwan soronko a onyae no fata no. (Dan. 1:​3, 4, 19, 20) Naaso Daniel ennya dɛm adwen no, mbom ɔkɔr do ara brɛɛ noho adze, na dɛm suban yi maa Jehovah pɛɛ n’asɛm paa.—Dan. 2:30; 10:​11, 12.

Mma hom mma yennsuasua pɛsɛankonya na enyimnyampɛ su a woebu do wɔ dɛm wiadze yi mu no. Mbom hom mma yɛnkɔ do ara mfa enyigye nkyerɛ ndzɛmba a Jehovah dze adom hɛn no ho enyisɔ.