1. Ebɛnadze na yebotum ayɛ ama Jehovah n’enyi aagye?

 FA NO dɛ edze adze bi a ɔyɛ fɛw na mfaso wɔ do akyɛ obi a epɛ n’asɛm paa. Sɛ ɔdze w’akyɛdze no kesie beebi na ɔto n’adwen mu a, ebɛtse nka dɛn? Ekyingye biara nnyi ho dɛ ɔbɛyɛ wo yaw. Naaso sɛ ɔkyerɛ dɛ n’enyi sɔ w’akyɛdze no na ɔdze dzi dwuma a, ɔbɛma w’enyi agye paa. Dɛm asɛm yi fa Jehovah ho dɛn? Hɛn ntsi na Jehovah maa ne Ba no bowui. Ntsi sɛ yɛkyerɛ ɔdɔ a Jehovah ada no edzi akyerɛ hɛn nye werdam no ho enyisɔ a, ɔma n’enyi gye paa.—John 3:16; Rom. 5:​7, 8.

2. Ebɛnadze na yerubosusu ho wɔ adzesua yi mu?

² Sɛ yɛannhwɛ no yie a, ber rokɔ do no yebegyaa dɛ yɛrekyerɛ werdam no ho enyisɔ. Ɔbɛyɛ tse dɛ mbrɛ yɛdze Nyankopɔn n’akyɛdze yi akɔto beebi. Ɔbɛyɛ hɛn dɛw dɛ hɛn nsa aka akyɛdze no, naaso ɔbɛyɛ tse dɛ mbrɛ yɛdze akɛhyɛ beebi a hɛn enyi mpo rommbɔ do. Naaso sɛ yɛmmpɛ dɛ biribi a ɔtse dɛm besi a, ɔsɛ dɛ yɛtaa yɛ ndzɛmba a ɔbɛkyerɛ dɛ hɛn enyi sɔ dza Nyankopɔn na Christ ayɛ ama hɛn no. Adzesua yi botum aboa hɛn ma yaayɛ dɛm. Yɛrebɛka mfaso a werdam no ma yenya no ndɛ nye nhyira a ɔbɛma yeenya no daakye ho asɛm. Afei so, yɛbɔhwɛ mbrɛ yebesi akyerɛ ɔdɔ a Jehovah ada no edzi akyerɛ hɛn no ho enyisɔ, nkanka wɔ Nkaadzi ber yi mu.

MFASO A YENYA NO NDƐ

3. Yesi dɛn nya werdam no do mfaso ndɛ?

³ Yegu do ara rinya Christ no werdam afɔrbɔ no do mfaso. Dɛ mfatoho no, osian werdam no ntsi Jehovah dze hɛn bɔn kyɛ hɛn. Ɔnnyɛ nhyɛ dɛ ɔdze hɛn bɔn bɛkyɛ hɛn naaso ɔpɛ dɛ ɔyɛ dɛm. Ɔdwontofo no kyerɛɛ Jehovah no bɔnfakyɛ ho enyisɔ. Ɔkaa dɛ:  “Ɔwo, [Jehovah], iye, na edze kyɛ.”—Ndw. 86:5; 103:​3, 10-13.

4. Woananom na Jehovah dze werdam no maa hɔn? (Luke 5:32; 1 Timothy 1:15)

⁴ Bi a binom bɛtse nka dɛ wɔnnsɛ mmfata dɛ Jehovah dze hɔn bɔn bɛkyɛ hɔn. Naaso nokwasɛm nye dɛ, hɛn nyina, yɛnnsɛ mmfata. Nna ɔsomafo Paul gye to mu dɛ ‘ɔnnsɛ mmfata dɛ wɔfrɛ no ɔsomafo.’ Naaso ɔkaa dɛ: “Ɔnam Nyankopɔn adom do na metse dɛ mbrɛ metse yi.” (1 Cor. 15:​9, 10) Sɛ yenu hɛnho wɔ hɛn bɔn ho a, Jehovah dze hɛn bɔn bɛkyɛ hɛn. Ebɛnadze ntsi a? Ɔnnyɛ dɛ yɛfata dɛ ɔdze hɛn bɔn kyɛ hɛn araa ntsi na ɔdze kyɛ hɛn. Mbom ɔyɛ dɛm osiandɛ ɔdɔ hɛn. Ntsi sɛ etse nka dɛ emmfata dɛ Jehovah dze wo bɔn bɛkyɛ wo a, ɔsɛ dɛ ekaa dɛ Jehovah ammfa werdam no amma hɔn a bɔn nnyi hɔnho, mbom ɔdze maa ndzebɔnyɛfo a wonu hɔnho.—Kenkan Luke 5:32; 1 Timothy 1:15.

5. Ɔsɛ dɛ hɛn mu biara tse nka dɛ ɔfata dɛ Jehovah hu no mbɔbɔr anaa? Kyerɛkyerɛ mu.

⁵ Sɛ yɛdze mfe pii asom Jehovah mpo a, ɔnnsɛ dɛ yɛtse nka dɛ osian ɔno ntsi ɔsɛ dɛ Jehovah hu hɛn mbɔbɔr na ɔdze hɛn bɔn kyɛ hɛn. Ɔwɔ mu, Jehovah n’enyi sɔ dɛ yɛdze nokwardzi asom no ara besi ndɛ. (Heb. 6:10) Naaso Jehovah dze ne Ba no kyɛɛ hɛn kwa, na ɔnnyɛ dɛ ɔdze rutua ndzɛmba bi a yɛayɛ wɔ no som mu no kaw. Ntsi sɛ yɛtse nka dɛ ɔsɛ dɛ Jehovah hu hɛn mbɔbɔr anaa ɔnye hɛn dzi no wɔ kwan soronko bi do a, nna ɔtse dɛ mbrɛ yɛreka dɛ mfaso biara nnyi do dɛ Christ bowui maa hɛn.—Fa toto Galatiafo 2:21 ho.

6. Ebɛnadze ntsi na Paul yeer noho wɔ Jehovah no som mu?

⁶ Nna Paul nyim dɛ ɔnnyɛ mbɔdzen a ɔbɔbɔ wɔ Jehovah no som mu no nkotsee na ɔbɛma oenya Nyankopɔn n’enyim adom. Sɛ dɛm dze a, nna ɔno ebɛnadze ntsi na ɔyeer noho wɔ Jehovah no som mu dɛm? Nna ɔnnyɛ dɛ ɔreyɛ biribi ama Jehovah eehu dɛ ɔfata dɛ ohu no mbɔbɔr. Mbom no nna ɔrekyerɛ adom a Jehovah dze adom no no ho enyisɔ. (Eph. 3:7) Dɛ mbrɛ Paul yɛe no, hɛn so ɔnnyɛ dɛ yɛpɛ dɛ Jehovah hu hɛn mbɔbɔr ntsi na yɛkɔ do dze ahokeka som no no, mbom yɛyɛ dɛm dze kyerɛ dɛ hɛn enyi sɔ dza ɔayɛ ama hɛn no.

7. Ebɛn mfaso fofor na werdam no ma yenya no ndɛ? (Romefo 5:1; James 2:23)

⁷ Mfaso fofor a werdam no ma yenya no ndɛ nye dɛ, ɔboa hɛn ma hɛn mu biara tum nye Jehovah nya ebusuabɔ a no mu yɛ dzen. a Dɛ mbrɛ yɛaka ho asɛm wɔ adzesua a odzi iyi enyim mu no, hɛn mu biara nnyi hɔ a wɔwoo no no nna ɔyɛ Nyankopɔn ne nyɛnko. Naaso osian werdam no ntsi, yetum nye ‘Nyankopɔn tsena asomdwee’ mu na iyi ma yetum twe bɛn no.—Kenkan Romefo 5:1; James 2:23.

8. Ebɛnadze ntsi na ɔsɛ dɛ yɛkyerɛ hokwan a Jehovah dze ama hɛn dɛ yɛmbɔ no mpaa no ho enyisɔ?

⁸ Ebusuabɔ a yɛnye Jehovah wɔ no ma yenya hokwan ahorow bi. Hom mma yensusu no mu kor pɛ ho. Ɔno nye hokwan a yɛwɔ dɛ yɛbɔbɔ no mpaa. Sɛ Nyankopɔn n’asomfo hyia mu bɔ no mpaa a, otsie. Hɛn mu biara so bɔ no mpaa a, otsie. Sɛ yɛbɔ mpaa a, hɛn akoma tɔ hɛn yamu, na hɛn asomu so dwe hɛn. Afei so, mpaabɔ botum ama yɛnye Nyankopɔn ntamu ebusuabɔ no mu aayɛ dzen. (Ndw. 65:2; Jas. 4:8; 1 John 5:14) Aber a nna Jesus wɔ asaase do no, nna ɔtaa bɔ Jehovah mpaa osiandɛ nna onyim dɛ obetsie no. Afei so, nna onyim dɛ mpaabɔ bɔboa no ma ebusuabɔ a ɔnye n’Egya wɔ no mu aayɛ dzen. (Luke 5:16) Ɔyɛ hɛn dɛw dɛ osian Jesus n’afɔrbɔ no ntsi yebotum abɛyɛ Jehovah n’anyɛnkofo na yetum bɔ no mpaa so.

 NHYIRA A YEBENYA NO DAAKYE

9. Ebɛn nhyira na werdam no dze bɛbrɛ Nyankopɔn n’asomfo anokwafo daakye?

⁹ Ebɛn nhyira na werdam no dze bɛbrɛ Nyankopɔn n’asomfo anokwafo daakye? Wɔbɛtsena ase daa. Naaso, nyimpa pii susu dɛ iyi nnkotum ayɛ yie ara da, osiandɛ adasamba hyɛɛ ase dɛ woruwu no, ɔnnyɛ ndɛ. Naaso asɛm no nye dɛ, Jehovah bɔɔ nyimpa dɛ wɔntsena ase afebɔɔ. Ɔnnyɛ bɔn a Adam yɛe a, nkyɛ obiara mpo rinnya adwen dɛ onnyiewiei nkwa yɛ anansesɛm bi. Asɛm no nye dɛ, osiandɛ Jehovah ama no Dɔba no ebowu ama hɛn ntsi, ɔsɛ dɛ yɛgye dzi dɛ yebotum atsena ase daa; ɔnnsɛ dɛ yɛfa onnyiewiei nkwa dɛ ɔyɛ anansesɛm.—Rom. 8:32.

10. Ebɛnadze na hɔn a wɔasera hɔn nye nguan fofor no rohwɛ kwan?

¹⁰ Ɔwɔ mu dɛ daa nkwa yɛ nhyira a yebenya no daakye dze, naaso Jehovah pɛ dɛ yɛdwendwen ho ndɛ. Hɔn a wɔasera hɔn no rohwɛ kwan dɛ wɔbɔkɔ sor na wɔaakɛka Christ ho ma woeedzi asaase yi do. (Nyi. 20:6) Nguan fofor no so rohwɛ kwan dɛ wɔbɛtsena paradise asaase do. Dɛm aber no, biribiara a ɔma yedzi yaw na awerɛhow no, wobeyi efi hɔ. (Nyi. 21:​3, 4) Eka nguan fofor a wɔrohwɛ kwan dɛ wɔbɛtsena asaase yi do afebɔɔ no ho anaa? Ɔnodze nya awerɛhyɛmu dɛ Jehovah nnsisii wo; akatua a hɔn a wɔbɔkɔ sor no benya no nnkyɛn wodze no. Jehovah bɔɔ nyimpa dɛ wɔntsena asaase yi do. Ntsi sɛ yɛtsena asaase yi do daa a, hɛn enyi bɛgye paa.

11-12. Nhyira ahorow a yebotum ahwɛ kwan dɛ yebenya wɔ Paradise no, bi nye dɛn? (Hwɛ mfonyin ahorow no so.)

¹¹ Fa w’adwen bu mbrɛ asetsena bɛyɛ wɔ Paradise asaase do. Dɛm aber no, erennyar na eronnwu so. (Isa. 25:8; 33:24) Biribiara a ɔda w’akoma do a ɔnye Jehovah n’apɛdze hyia no, ɔbɛma wo nsa aka. Ebɛn ndzɛmba na erohwɛ kwan dɛ ibosua ho adze pii? Epɛ dɛ isua mbowa anaa nnoma ho adze? Anaa epɛ dɛ isua mbrɛ wosi tow ndwom? Anaa ɔwodze epɛ dɛ isua mbrɛ wosi dorɔw mfonyin? Ɔda edzi pefee dɛ, yebehia nkorɔfo a wonyim mbrɛ wosi dorɔw dan ne plan, adansifo na ekuafo. Afei  so, yebehia nkorɔfo a wɔbɛyɛ edziban, wɔbɛyɛ edwindadze ahorow a yɛdze bɛyɛ edwuma, wɔbɔhwɛ esiesie asaase yi do ma no do aayɛ fɛw nye dza ɔkeka ho. (Isa. 35:1; 65:21) Osiandɛ yɛbɛtsena ase daa ntsi, yebenya mber pii dze esua biribiara a yɛpɛ dɛ yesua ho adze no.

¹² Hwɛ enyigye ara a ɔbɛyɛ aber a yɛrema hɔn a wobenyan hɔn no akɔaba! (Andw. 24:15) Afei so, ndzɛmba ahorow a Jehovah abɔ no, sɛ yɛgye ber sua ho adze pii na ɔma yehu no yie a, hwɛ mbrɛ ɔbɛma hɛn enyi agye. (Ndw. 104:24; Isa. 11:9) Dza ɔkyɛn ne nyina no, yɛrennyɛ bɔn na yɛdze enyigye bɔsom Jehovah a hɛn tsibowa rummbu hɛn fɔ. Edze ‘bɔn ho dɛw a ibedzi no ber tsiabaa bi’ no bɛsesa nhyira kamakama a ibotum enya no daakye no anaa? (Heb. 11:25) Yɛnngye nndzi dɛ ebɛyɛ biribi a ɔtse dɛm da! Ntsi biribiara a ɔsɛ dɛ edze bɔ afɔr ndɛ ama wo nsa eetum aka dɛm nhyira yi bi no, ɔwɔ dɛ edze bɔ afɔr. Ɔyɛ a wɔka dɛ, sɛ kwan war dɛn ara mpo a, owie abow ano. Ntsi kaa dɛ, sɛ ehwɛ Paradise kwan kyɛr mpo a, da kor da kor ɔbɛba. Sɛ Jehovah nndɔ hɛn paa, nna ɔamma ne Ba no emmbowu amma hɛn a, nkyɛ dɛm nhyira ahorow yi nyina bɔbɔ hɛn.

KYERƐ DƐ W’ENYI SƆ ƆDƆ A JEHOVAH ADA NO EDZI AKYERƐ WO NO

13. Ebɛnadze na yebotum ayɛ dze akyerɛ ɔdɔ a Jehovah ada no edzi akyerɛ hɛn no ho enyisɔ? (2 Corinthfo 6:1)

¹³ Yebesi dɛn ama Jehovah ehu dɛ hɛn enyi sɔ werdam no a ɔdze ama hɛn no? Ɔno nye dɛ yɛbɛma Jehovah no som ho ehia hɛn sen biribiara wɔ hɛn asetsena mu. (Matt. 6:33) Adze yi ara Jesus wui, ama “hɔn a wɔtse ase aannda ho anntsena ase amma hɔnankasa hɔnho, na mbom wɔaatsena ase ama nyia osian hɔn ntsi owui na ɔsoɛɛr bio no.” (2 Cor. 5:15) Nokwasɛm nye dɛ, yɛmmpɛ dɛ yɛma Jehovah n’adom a ɔdze adom hɛn no yɛ kwa.—Kenkan 2 Corinthfo 6:1.

14. Yebesi dɛn dze akwankyerɛ a Jehovah dze ma hɛn no ayɛ edwuma?

¹⁴ Adze fofor so a yebotum ayɛ dze akyerɛ dɛ hɛn enyi sɔ ɔdɔ a Jehovah ada no edzi akyerɛ hɛn no nye dɛ yɛdze n’akwankyerɛ bɛyɛ edwuma. Yebesi dɛn ayɛ dɛm? Sɛ yɛpɛ dɛ yesisi gyinae ahorow bi tse dɛ beebi a yɛpɛ dɛ yɛkɔ skuul kodu, anaa edwuma kor a yɛpɛ dɛ yɛyɛ a, ɔwɔ dɛ yedzi kan susu dza Jehovah pɛ dɛ yɛyɛ ho. (1 Cor. 10:31; 2 Cor. 5:7) Sɛ yerisi gyinae bi na yɛdze hɛnho to Jehovah do a, ɔbɛma gyedzi a yɛwɔ wɔ no mu nye anyɛnkofa a ɔda yɛnye no ntamu no mu ayɛ dzen. Afei so, sɛ yɛyɛ dɛm a, awerɛhyɛmu a yɛwɔ dɛ hɛn enyidado no bɛba mu no, ɔbɛhyɛ mu dzen.—Rom. 5:​3-5; Jas. 2:​21, 22.

15. Yebesi dɛn akyerɛ dɛ hɛn enyi sɔ ɔdɔ a Jehovah ada no edzi akyerɛ hɛn no wɔ Nkaadzi ber yi mu?

¹⁵ Naaso, adze fofor bi so wɔ hɔ a yebotum ayɛ dze akyerɛ dɛ hɛn enyi sɔ ɔdɔ a Jehovah ada no edzi akyerɛ hɛn no. Ɔno nye dɛ yɛbɛma Jehovah ehu dɛ hɛn enyi sɔ werdam no wɔ Nkaadzi ber yi mu. Ɔsɛ dɛ yɛtoto hɛn ndzɛmba yie ama yeetum akɔ Nkaadzi no bi. Afei so, ɔsɛ dɛ  yɛto nsa frɛ afofor so ma wɔba bi. (1 Tim. 2:4) Hɔn a yɛbɔto nsa afrɛ hɔn no, ɔwɔ dɛ yedzi kan kyerɛkyerɛ dza ɔbɔkɔ do wɔ Nkaadzi no ase no mu kyerɛ hɔn. Video a wɔato dzin Ebɛnadze Ntsi Na Jesus Wui? nye Kaa Jesus No Wu No a ɔwɔ jw.org do no, sɛ yeyi kyerɛ hɔn a, ɔbɔboa hɔn paa. Ɔsɛ dɛ asafo mu mpanyimfo hwɛ hu dɛ wɔbɔto nsa afrɛ hɔn a woegyaa asafo nhyiamu nye asɛnka kɔ no. Sɛ Jehovah no nguan a wɔayew no mu bi san bɛka no nguankuw no ho a, enyigye a ɔkɔ do wɔ sor nye asaase yi do dze, ɔsɛ w’enyi. (Luke 15:​4-7) Sɛ yɛkɔ Nkaadzi no ase a, ɔwɔ dɛ yɛbɔ mbɔdzen kyia obiara, nkanka hɔn a wɔmmbaa bi da nye hɔn a wɔbaa bi akyɛr no. Ɔsɛ dɛ yɛma hɔn akɔaba na yɛma wɔtse nka dɛ wɔaba fie.—Rom. 12:13.

16. Ebɛnadze ntsi na ɔsɛ dɛ yɛdze yɛ hɛn botae dɛ yɛbɛyɛ pii wɔ hɛn som edwuma no mu wɔ Nkaadzi ber yi mu?

¹⁶ Ndzɛmba ahorow a eyɛ wɔ Jehovah no som mu no, ibotum ayɛ no pii wɔ Nkaadzi ber no mu anaa? Sɛ eyɛ dɛm a ɔbɛkyerɛ dɛ dza Nyankopɔn na Christ ayɛ ama hɛn no nyina w’enyi sɔ paa. Sɛ yɛyɛ pii wɔ Jehovah no som mu a, yebohu dɛ ɔroboa hɛn, na sɛ ɔba no dɛm so a, ɔbɛma ahotodo a yɛwɔ wɔ no mu no ayɛ kɛse. (1 Cor. 3:9) Afei so, Nkaadzi Bible akenkan ho nhyehyɛɛ a wɔayɛ wɔ Daa Asɛm anaa dza ɔwɔ dapɛn mfinimfin nhyiamu dwumadzi nwoma no mu no, bɔ mbɔdzen dzi ekyir. Ibotum mpo ayɛ dɛm kyerɛwnsɛm ahorow no mu nhwehwɛmu akɔ ekyir.

17. Ebɛnadze na ɔma Jehovah n’enyi gye? (Hwɛ adakaba a wɔato dzin “ Mbrɛ Yebesi Akyerɛ Ɔdɔ A Jehovah Ada No Edzi Akyerɛ Hɛn No Ho Enyisɔ” no so.)

¹⁷ Yenyim dɛ bi a nsɛm kor anaa ebien bi ntsi, irunntum nnyɛ biribiara a yɛaka ho asɛm wɔ adzesua yi mu no. Naaso kaa dɛ Jehovah mmfa dza itum yɛ no nntoto dza afofor tum yɛ ho. Jehovah hu dza ɔwɔ w’akoma mu. Ntsi sɛ ohu dɛ efi w’akoma nyinara mu rekyerɛ werdam a ɔdze akyɛ wo no ho enyisɔ a, ɔma n’enyi gye paa.—1 Sam. 16:7; Mark 12:​41-44.

18. Ebɛnadze ntsi na hɛn enyi sɔ dza Jehovah Nyankopɔn na Jesus Christ ayɛ ama hɛn no?

¹⁸ Mbrɛ ɔtse nye dɛ, sɛ ɔnnyɛ werdam no a, nkyɛ Jehovah remmfa hɛn bɔn nnkyɛ hɛn, yerunntum mmfa no nyɛnko na yerinnya enyidado biara dɛ yɛbɛtsena ase daa. Ntsi hom mma yɛnkɔ do ara nkyerɛ dɛ hɛn enyi sɔ ɔdɔ a Jehovah ada no edzi akyerɛ hɛn no, osiandɛ dɛm ɔdɔ no na wɔama hɛn nsa aka dɛm nhyira yi nyina. (1 John 4:19) Jesus so dɔ hɛn paa, ntsi na ɔdze no nkwa too hɔ maa hɛn no. Dɛm ntsi, hom mma yɛnkyerɛ dza ɔno so ayɛ ama hɛn no ho enyisɔ.—John 15:13.