1. Ebɛnadze ntsi na ɔsɛ dɛ yehyia mu afe biara kaa Christ no wu no?

 HOM mma yɛnka na werdam no dze, ɔyɛ akyɛdze a ɔsom bo ankasa! (2 Cor. 9:15) Osiandɛ Jesus dze no nkwa bɔɔ afɔr ntsi, ibotum afa Jehovah Nyankopɔn nyɛnko. Ibotum so enya enyidado dɛ daakye ebɛtsena ase daa. Dɛm ntsi sɛ yɛkyerɛ dɛ hɛn enyi sɔ werdam afɔrbɔ no a, ɔyɛ no kwan do. Na osiandɛ Jehovah dɔ hɛn ntsi na ɔdze werdam no maa hɛn no, ntsi ɔsɛ dɛ yɛda no ase paa. (Rom. 5:8) Jesus maa hɛn ahyɛdze dɛ afe biara yenhyia mu na yɛnkaa no wu no mbrɛ ɔbɛyɛ a ɔbɔboa hɛn ma yɛakɔ do akyerɛ dɛ hɛn enyi sɔ werdam afɔrbɔ no na yɛnntoto no adze koraa.—Luke 22:​19, 20.

2. Ebɛnadze na yebosusu ho wɔ adzesua yi mu?

² Afe yi, Nkaadzi da no besi Memenda, April 12, 2025. Yɛgye dzi dɛ hɛn mu biara rototo ne ndzɛmba yie ama yeetum akɔ bi. Sɛ yɛgye ber dwendwen a dza Jehovah na ne Ba no ayɛ ama hɛn no ho wɔ Nkaadzi ber no mu a, ɔbɔboa hɛn paa. Yebosusu dza werdam no ma yehu fa Jehovah na ne Ba no ho wɔ adzesua yi mu. Afei, wɔ adzesua a odzi hɔ no mu no, yɛbɔhwɛ mfaso a werdam no ma yenya nye mbrɛ yebesi akyerɛ ho enyisɔ.

 DZA WERDAM NO MA YEHU FA JEHOVAH HO

3. Ɔbɛyɛ dɛn na nyimpa kor no wu etum agye nyimpa ɔpepem pii nkwa? (Hwɛ mfonyin no so.)

³ Werdam no ma yehu dɛ Jehovah bu atsɛntsenenee. (Deut. 32:4) Ebɛnadze ntsi na yɛreka dɛm? Ɔwodze dwen ho hwɛ o: Osiandɛ Adam yɛɛ bɔn na yɛyɛ ne mba ntsi, wɔdze bɔn awo hɛn, na iyi ntsi na yewu no. (Rom. 5:12) Jehovah maa Jesus bowui dze no nkwa yɛɛ werdam maa hɛn mbrɛ ɔbɛyɛ a ɔbɛgye hɛn efi bɔn na owu mu. Naaso, ɔbɛyɛ dɛn na nyimpa kor a bɔn nnyi noho no etum ewu dze agye nyimpa ɔpepem pii nkwa? Ɔsomafo Paul kyerɛɛ mu dɛ: “Dɛ mbrɛ dodowara nam nyimpa kor [Adam] n’asoɔdzen do bɛyɛɛ ndzebɔnyɛfo no, mbrɛ dodowara nam ɔbaakofo [Jesus] ne setsie do bɛyɛ atseneneefo nye no.” (Rom. 5:19; 1 Tim. 2:6) Sɛ yɛbɛka no wɔ kwan fofor do a, osian asoɔdzen a nyimpa kor a bɔn biara nnyi noho yɛe ntsi na wɔama bɔn na owu dze hɛn nyina ayɛ nkowaa no. Dɛm ntsi, nna ɔsɛ dɛ nyimpa kor a bɔn biara nnyi noho yɛ setsie ma Nyankopɔn ama yeetum adze hɛnho efi bɔn na owu mu.

4. Ebɛnadze ntsi na Jehovah amma kwan ma Adam n’asefo a wɔwɔ akoma pa no antsena ase daa?

⁴ Ehwɛ a, nna ohia paa dɛ Jesus wu ansaana oetum agye hɛn nkwa anaa? Nkyɛ ɔnnyɛ ɔno ara nye dɛ Jehovah bɛma Adam n’asefo a wɔwɔ akoma pa no atsena ase daa? Osiandɛ bɔn wɔ hɛnho ntsi, bi a hɛn adwen bɛyɛ hɛn dɛ sɛ Jehovah yɛɛ dɛm a, nkyɛ ɔbɛkyerɛ dɛ ne yamu ye na ɔtse asɛm ase so. Naaso asɛm no nye dɛ, sɛ Jehovah yɛɛ dɛm a, nkyɛ ɔbɛkyerɛ dɛ ommbu atsɛntsenenee. Osiandɛ Jehovah bu atsɛntsenenee aber nyina ntsi, nna ɔnnyɛ adze a obobu n’enyi egu asoɔdzen a Adam hyɛɛ da ara yɛe no do da.

5. Ebɛnadze ntsi na yebotum enya awerɛhyɛmu dɛ Jehovah bɛyɛ dza ɔtsen aber nyina?

⁵ Sɛ Jehovah enntua werdam no, nna obuu n’enyi guu n’atsɛntsenenee do maa Adam n’asefo a bɔn wɔ hɔnho no tsenaa ase daa a, nkyɛ ebɛn asɛm besi? Nkyɛ bi a nkorɔfo rinnya Nyankopɔn mu ahotodo dɛ obobu atsɛntsenenee aber nyina. Bi mpo a nkyɛ yɛrenngye nndzi dɛ obedzi no bɔhyɛ ahorow bi do. Naaso ɔnnsɛ dɛ yɛdze nsɛm bi a ɔtse dɛm haw hɛnho koraa. Ebɛnadze ntsi a? Siantsir nye dɛ, nna ɔnnda famu mma Jehovah dɛ ɔdze no Dɔba no bɔbɔ afɔr ama hɛn, naaso osiandɛ obu atsɛntsenenee ntsi ɔyɛɛ dɛm. Na dza Jehovah yɛe yi ma yenya awerɛhyɛmu dɛ ɔbɛyɛ dza ɔtsen aber nyina.

6. Ebɛnadze na ɔma yehu dɛ werdam no a Jehovah dze maa hɛn no kyerɛ dɛ ɔdɔ hɛn? (1 John 4:​9, 10)

⁶ Ɔwɔ mu dɛ werdam no ma yehu dɛ Jehovah bu atsɛntsenenee dze, naaso ɔsan so ma yehu dɛ ɔdɔ hɛn paa. (John 3:16; kenkan 1 John 4:​9, 10.) Werdam no ma ɔda edzi dɛ Jehovah pɛ dɛ yɛtsena ase daa, na afei so, ɔma yehu dɛ ɔpɛ dɛ yɛbɛka n’ebusua ho. Ɔwodze dwen dɛm  asɛm yi ho hwɛ: Aber a Adam yɛɛ bɔn no, Jehovah paam no fii n’ebusua mu. Dɛm ntsi, hɛn mu biara nnyi hɔ a wɔwoo no too Nyankopɔn n’ebusua mu. Naaso osian werdam no ntsi, Jehovah dze hɛn bɔn kyɛ hɛn, na adasamba a wɔgye no dzi na wotsie no no, ewiei koraa no, ɔbɛma wɔabɛka n’ebusua ho. Ndɛ mpo yebotum nye Jehovah nye hɛn nuanom Christianfo enya ebusuabɔ a no mu yɛ dzen. Nokwasɛm nye yi, Jehovah dɔ hɛn paa.—Rom. 5:​10, 11.

7. Jesus hun amandze ana orutua werdam no. Ebɛnadze na iyi ma yehu fa Jehovah ho?

⁷ Sɛ yɛdwendwen yaw a Jehovah faa mu ana orutua werdam no ho a, ɔbɛma yɛatse mbrɛ Jehovah si dɔ hɛn no ase yie paa. Satan se Nyankopɔn no somfo biara nnyi hɔ a ɔbɔkɔ do edzi no nokwar aber a oruhu amandze no. Naaso Jehovah maa kwan ma Jesus hun amandze ansaana oruwu ama obiara eehu dɛ sombo a Satan abɔ no nnyɛ nokwar. (Job 2:​1-5; 1 Pet. 2:21) Jesus n’atamfo dzii no ho fɛw, asogyafo hwee no, na wɔbɔɔ no asɛndua mu. Afei, Jehovah no Dɔba no wui yayaayaw. Iyi nyina nna Jehovah n’enyi tua. (Matt. 27:​28-31, 39) Nkyɛ Jehovah botum etwa amandze a nna Jesus ruhu no nyina do. Aber a Jesus n’atamfo kaa dɛ: “Sɛ Nyankopɔn pɛ n’asɛm a, ɔmbɛgye no” no, nkyɛ Jehovah botum ayɛ dɛm. (Matt. 27:​42, 43) Naaso sɛ Jehovah dze noho gyee asɛm no mu a, nkyɛ hɛn nsa rennka werdam no. Na sɛ ɔbaa no dɛm so a, nkyɛ yennyi enyidado biara. Ntsi Jehovah maa kwan ma ne Ba no faa atseetsee mu kesii dɛ owui.

8. Aber a Jehovah hun dɛ ne Ba no ruhu amandze no, ɔyɛɛ no yaw anaa? Kyerɛkyerɛ mu. (Hwɛ mfonyin no so.)

⁸ Ɔnnsɛ dɛ yenya adwen dɛ osiandɛ Nyankopɔn yɛ adze nyina do tumfo ntsi onnyi atsenka biara. Jehovah bɔɔ hɛn wɔ no suban do, ntsi dɛ mbrɛ hɛn enyi tum gye na hɛn werɛ how no, dɛmara so na ɔtse wɔ Jehovah n’afamu. Bible no ma yehu dɛ Jehovah no werɛ tum how na odzi yaw so. (Ndw. 78:​40, 41) Hom mma yɛnhwɛ Abraham na Isaac hɔn asɛm no. Nkyɛ ekaa dɛ Jehovah kaa kyerɛɛ Abraham dɛ ɔmfa ne ba kortsee no mbɔ afɔr. (Gen. 22:​9-12; Heb. 11:​17-19) Awerɛhow nye yaw a Abraham dzii wɔ n’akoma mu aber a ɔyɛɛ dɛ ɔdze sekan ruboku Isaac no dze, ɔbɛyɛ dzen ama hɛn dɛ yɛbɛtse ase. Naaso, awerɛhow na yaw a Jehovah dzii aber a ndzebɔnyɛfo tseetsee ne Ba no na wokum no yayaayaw no, sɛ yɛdze toto dza Abraham faa mu no ho a, Abraham nedze no nndu beebiara koraa.—Hwɛ video a wɔato dzin Suasua Hɔn Gyedzi—Abraham, Ɔfa 2. Ɔwɔ jw.org do.

9. Mbrɛ Jehovah si dɔ ɔwo nye wo nuanom Christianfo no, Romefo 8:​32, 38, 39 si dɛn boa wo ma etse ase yie?

⁹ Werdam no ma yehu dɛ obiara nnyi hɔ a ɔdɔ hɛn kyɛn Jehovah. Hɛn busuanyi a yɛpɛ n’asɛm paa anaa hɛn nyɛnko berɛbo mpo runntum nndɔ hɛn nkyɛn mbrɛ Jehovah si dɔ hɛn no. (Kenkan Romefo 8:​32, 38, 39.) Ekyingye biara nnyi ho dɛ, Jehovah dɔ hɛn mpo kyɛn mbrɛ  yesi dɔ hɛnho no. Epɛ dɛ etsena ase daa anaa? Jehovah pɛ no dɛm koraa kyɛn wo. Epɛ dɛ wɔdze wo bɔn kyɛ wo a? Jehovah pɛ dɛ ɔdze wo bɔn kyɛ wo koraa mpo kyɛn wo. Dza ɔpɛ dɛ yɛyɛ ara nye dɛ, yɛbɛkyerɛ dɛ hɛn enyi sɔ werdam no. Yɛbɛyɛ no dɛn? Ɔno nye dɛ yɛbɛgye no edzi na yeetsie no. Nokwasɛm nye dɛ, werdam no ma yehu dɛ Nyankopɔn dɔ hɛn paa. Na wɔ wiadze fofor no mu so, yebosua ɔdɔ a Jehovah wɔ ma hɛn no ho adze pii aka ho.—Ɔsɛnk. 3:11.

DZA WERDAM NO MA YEHU FA JESUS HO

10. (a) Nna ebɛnadze paa na ɔhaw Jesus wɔ owu a nna orubowu no ho? (b) Ebɛn kwan na Jesus faa do tseew Jehovah n’Egya ne dzin ho? (Hwɛ adakaba a wɔato dzin “ Nokwar A Jesus Dzii Kesii Owu Mu No Tseew Jehovah Ne Dzin Ho” no so.)

¹⁰ Jehovah ne dzin a no ho bɛtsew no ho hia Jesus paa. (John 14:31) Nna ɔyɛ Jesus yaw dɛ sombo a wɔdze abɔ no dɛ ɔkeka ebususɛm na ɔsoɛr tsia aban no botum egu n’Egya ne dzin ho fi. Dɛm ntsi ɔbɔɔ mpaa dɛ: “M’Egya sɛ ɔbɛyɛ yie a, nkyɛ ma dɛm kɔɔpow yi mpa moho nkɔ.” (Matt. 26:39) Osiandɛ Jesus dzii Jehovah nokwar kesii owu mu ntsi, ɔtseew n’Egya ne dzin ho.

11. Ebɛnadze na Jesus yɛe dze kyerɛɛ dɛ ɔdɔ nyimpa paa? (John 13:1)

¹¹ Afei so, werdam no ma yehu dɛ Jesus dwen nyimpa ho paa, nkanka n’ekyirdzifo no. (Mbɛ. 8:31; kenkan John 13:1.) Dɛ mfatoho no, nna Jesus nyim dɛ, no som edwuma a ɔrebɛyɛ wɔ asaase yi do no n’afa ahorow bi wɔ hɔ a, nna ɔbɛyɛ dzen paa, na ɔrennyɛ bɛtɛɛ. No mu kor nye owu yayaayaw a nna obowu no. Iyi nyina ekyir no, Jesus annyɛ no som edwuma no biarabiara. Mbom ofii n’akoma nyina mu kaa asɛmpa no, ɔkyerɛkyerɛe, na ɔyɛɛ ndzɛmba ahorow bi dze soom afofor. Da a nna Jesus rubowu no mpo, ɔhohoor n’asomafo no hɔn nan ho na ɔkaa nsɛm pii dze hyɛɛ hɔn nkuran, na ɔkyekyee hɔn werɛ so. (John 13:​12-15) Afei so, aber a nna Jesus sɛn dua do na ɔrefa yaw mu  mpo no, ɔmaa nsɛmbɔndzinyi bi a nna ɔno so sɛn dua do wɔ ne nkyɛn no nyaa enyidado. Dɛm aber no ara so, ɔkaa kyerɛɛ obi dɛ ɔnhwɛ ne maame mma no. (Luke 23:​42, 43; John 19:​26, 27) Ɔnnyɛ owu a Jesus wui maa nyimpa no nkotsee na ɔma yehu dɛ ɔdɔ hɔn paa, mbom ndzɛmba a ɔyɛe maa hɔn aber a nna ɔwɔ asaase do no nyina kyerɛ dɛ ɔpɛ hɔn asɛm paa.

12. Ndɛ, ebɛnadze na Jesus reyɛ ma hɛn?

¹² Ɔwɔ mu dɛ Christ wui “prɛko” maa hɛn dze, naaso ogu do ara reyɛ ndzɛmba pii dze roboa hɛn. (Rom. 6:10) Ebɛn kwan do? Ogu do ara reyɛ ndzɛmba ahorow a ɔbɛma yeenya werdam no do mfaso. Hom mma yɛnhwɛ ndzɛmba ahorow a ɔreyɛ no bi. Yɛrekasa yi, Jesus yɛ Ɔhen, Ɔsɔfopanyin, nye asafo no ne tsir. (1 Cor. 15:25; Eph. 5:23; Heb. 2:17) Ɔno na ɔrohwɛ ma wɔaaboaboa hɔn a wɔasera hɔn no nye nyimpadodow kɛse no ano. Obowie dɛm edwuma yi ansaana ahohiahia kɛse no aba n’ewiei. b (Matt. 25:32; Mark 13:27) Afei so, ɔma n’asomfo anokwafo nya ndzɛmba a ɔbɛma wɔnye Jehovah ntamu ayɛ kama wɔ ewiei mber yi mu. (Matt. 24:45) Na wɔ ne Mfrenhyia Apem Tumdzi no mu no so, ɔbɔkɔ do ara ama hɛn ndzɛmba a yehia. Hom mma yɛnka, Jehovah dze ne Ba no maa hɛn ampa!

KƆ DO ARA SUA ADZE

13. Ɔdɔ a Nyankopɔn na Christ ada no edzi akyerɛ hɛn no, sɛ ekɔ do ara dwendwen ho a, ebɛn mfaso na ibenya efi mu?

¹³ Ɔdɔ a Jehovah Nyankopɔn na Christ Jesus ada no edzi akyerɛ hɛn no, sɛ ekɔ do ara dwendwen ho a, ɔbɔboa wo ma aakɔ do ara ehu hɔn yie. Wɔaka adapɛn kakra ma afe yi Nkaadzi no aaso nye adapɛn kakra wɔ ɔno ekyir no, ibotum agye ber akenkan Nsɛmpa anan no mu kor anaa dza ɔbor dɛm. Sɛ itum kenkan tsir kor anaa ebien bi a oye, mma nnkenkan pii. Mbom ɔyɛ a tɔ wo bo ara, na hwehwɛ ndzɛmba afofor bi so wɔ Jehovah na Jesus ho a ɔno ntsi ɔsɛ dɛ yɛdɔ hɔn. Afei, dza ibosua biara no, ka ho asɛm kyerɛ afofor.

14. Dɛ mbrɛ Ndwom 119:97 ma yehu no, sɛ eyɛ nhwehwɛmu a obesi dɛn aboa wo ma eesua werdam no nye nkyerɛkyerɛ afofor ho adze pii? (Hwɛ mfonyin no so.)

¹⁴ Sɛ edze mfe pii asom Jehovah a, bi a w’adwen bɛyɛ wo dɛ nsɛm bi a yɛtaa ka ho asɛm tse dɛ Nyankopɔn n’atsɛntsenenee, no dɔ, nye werdam no, biribi fofor biara nnyi hɔ bio a ibotum esua afa ho. Naaso nokwasɛm nye dɛ, yerunntum nnsua dɛm nsɛm yi nye nsɛm afofor a ɔtsetse dɛm ho adze nnwie da. Ntsi, ebɛnadze na ibotum  ayɛ? Nkyerɛkyerɛmu ahorow a ɔfa nsɛm a ɔtsetse dɛm ho a ɔwɔ asafo nwoma ahorow mu no, ɔsɛ dɛ ebɔ mbɔdzen sua no yie. Sɛ ekenkan asɛm bi wɔ Bible no mu na enntse ase a, yɛ ho nhwehwɛmu. Afei dza ibohu no, ofi anapa araa kesi ewimbir no, dwendwen ho hwɛ dɛ ebɛnadze na ɔkyerɛ wo fa Jehovah, Jesus nye ɔdɔ a wɔwɔ ma wo no ho.—Kenkan Ndwom 119:97.

15. Ebɛnadze ntsi na ɔsɛ dɛ yɛkɔ do hwehwɛ akoradze a ɔwɔ Bible mu no?

¹⁵ Sɛ erekenkan biribi anaa ereyɛ nhwehwɛmu na ennsua biribi fofor biara mpo a, mma mma w’abaw mu mmbu. Kwan bi do no etse dɛ obi a ɔrohwehwɛ sika kɔkɔɔ. Hɔn a wɔhwehwɛ sika kɔkɔɔ no dze abotar yɛ hɔn edwuma no. Ɔtɔ da a ɔsɛ dɛ wɔdze ndɔnhwer anaa nda pii hwehwɛ sika kɔkɔɔ no ansaana bi a woenya ketseketse bi mpo. Naaso ne nyina mu no wɔmmpa abaw, osiandɛ sika kɔkɔɔ ketseketse bi a wobenya no som bo ma hɔn. Akoradze a yenya fi Bible mu no som bo sen sika kɔkɔɔ koraa. (Ndw. 119:127; Mbɛ. 8:10) Ntsi ɔyɛ a sie abotar, na nhyehyɛɛ a edze kenkan Bible no so, bɔ mbɔdzen ara dzi do.—Ndw. 1:2.

16. Ebɛnadze na yebotum ayɛ dze esuasua Jehovah na Jesus?

¹⁶ Sɛ irusua adze a, hwehwɛ akwan ahorow a ibotum afa do dze dza irusua no ayɛ edwuma. Dɛ mfatoho no, dza ibotum ayɛ dze esuasua Jehovah n’atsɛntsenenee no bi nye dɛ erennyɛ enyimhwɛ. Suasua ɔdɔ a Jesus wɔ ma n’Egya nye afofor no bi. Na sɛ Jehovah n’apɛdze a ebɛyɛ no bɛma ehu amandze mpo a, ɔsɛ dɛ eyɛ krado dɛ ebɛyɛ dɛm, na ɔwɔ dɛ eyer woho boa wo nuanom Christianfo so. Afei so, suasua Jesus na ka asɛmpa no bi kyerɛ afofor mbrɛ ɔbɛyɛ a hɔn so wobenya hokwan ebohu Jehovah na woeenya n’akyɛdze a ɔyɛ werdam no do mfaso.

17. Ebɛnadze na yebosusu ho wɔ adzesua a odzi hɔ no mu?

¹⁷ Sɛ yɛkɔ do sua werdam no ho adze a, ɔbɛma ɔdɔ a yɛwɔ ma Jehovah nye ne Ba no ayɛ kɛse. Sɛ ɔdɔ a yɛwɔ ma hɔn no yɛ kɛse a, ɔbɛma hɔn so wɔadɔ hɛn paa. (John 14:21; Jas. 4:8) Ntsi ndzɛmba a Jehovah dze ama hɛn a ɔboa hɛn ma yɛkɔ do sua werdam no ho adze no, hom mma yɛmfa ne nyina ndzi dwuma. Adzesua a odzi hɔ no mu no, yɛbɔhwɛ nhyira ahorow a werdam no ma yenya nye dza yebotum ayɛ dze akyerɛ ɔdɔ a Jehovah ada no edzi akyerɛ hɛn no ho enyisɔ.