1. Ndɛ, ebɛnadze na nkorɔfo dze hɔn adwen si do?

 AHYƐ no nsew dɛ ndɛ nyimpa piinara dwen hɔnho kyɛn afofor? Dɛ mfatoho no, sɛ yɛfa sohyial media dɛm yi a, nyimpa binom yɛ dza wobotum biara dze twe afofor adwen ba hɔn ho do na wɔma nkorɔfo hu ndzɛmba a woetum ayɛ. Naaso ndɛ, nyimpa kakraabi pɛ na wɔhyɛ Jehovah Nyankopɔn enyimnyam. Adzesua yi mu no, yɛbɔhwɛ dza yɛyɛ a ɔkyerɛ dɛ yɛrehyɛ Jehovah enyimnyam, nye dza ɔsɛ dɛ okenyan hɛn ma yɛyɛ dɛm. Yɛbɛsan so ahwɛ mbrɛ yebesi dze enyimnyam a ɔsɛ fata Nyankopɔn no ama no, nye mbrɛ Nyankopɔn nankasa bɛhyɛ ne dzin no enyimnyam ndaansa yi ara.

SƐ WƆKA DƐ YƐNHYƐ JEHOVAH ENYIMNYAM A, ƆKYERƐ DƐN?

2. Ebɛn kwan na Jehovah faa do daa n’enyimnyam edzi wɔ Bepɔw Sinai do? (Hwɛ mfonyin no so.)

² Ebɛnadze nye enyimnyam? Sɛ yɛhwɛ Bible mu a, kasafua “enyimnyam” botum akyerɛ biribi a wɔyɛ a ɔma obi tse nka dɛ ɔwɔ tum anaa noho hia. Jehovah gyee Israelman no fii Egypt nkowaasom mu no, wɔannkyɛr biara na ɔyɛɛ anwanwadze bi dze daa n’enyimnyam edzi kyerɛɛ hɔn. Ɔwodze twa asɛm yi ho mfonyin hwɛ: Israelmba ɔpepem pii aboaboa hɔnho ano ebegyina Bepɔw Sinai n’ase dɛ woribehyia hɔn Nyankopɔn. Mununkum kebii abɛkata bepɔw no do. Awerɛfirmu ara na asaasewosow kɛse bi sii, na ɔbɛyɛ dɛ gya mpo tutui fii bepɔw no mu. Ber kor no ara so, nna asenaman repaapaa, enyinam robobɔ mu, na abɛn bi regyegye dzendzenndzen. (Ex. 19:​16-18; 24:17; Ndw. 68:8) Hwɛ mbrɛ nna Israelmba yi ho besi edwuruw hɔn aber a Jehovah yɛɛ anwanwadze dze daa n’enyimnyam edzi kyerɛɛ hɔn no.

3. Sɛ wɔka dɛ yɛnhyɛ Jehovah enyimnyam a, ɔkyerɛ dɛn?

³ Na hɛn nyimpa so ɛ? Yebotum ayɛ biribi dze ahyɛ Jehovah  enyimnyam anaa? Nyew, yebotum. Kwan kor a yɛfa do hyɛ Jehovah enyimnyam nye dɛ, yɛka no tum a ɔyɛ nwanwa nye no suban ahorow a ɔyɛ fɛw no ho asɛm kyerɛ nkorɔfo. Afei so, sɛ Nyankopɔn boa hɛn ma yetum yɛ biribi na yɛdze ho nkamfo no ma no a, nna yɛrehyɛ no enyimnyam. (Isa. 26:12) Sɛ yɛreka hɔn a wɔhyɛɛ Jehovah enyimnyam a, yerunntum nnyi Ɔhen David nnsi nkyɛn. Mpaa bi a David gyinaa Israel bagua no enyim bɔe no, ɔkaa kyerɛɛ Nyankopɔn dɛ: “Ɔwo, [Jehovah], na akɛseyɛ, ahoɔdzen, enyimnyam, konyimdzi na tumdzi dzi wɔ wo: na dza ɔwɔ ɔsor na asaase nyinara yɛ wodze.” Aber a David dze ne mpaabɔ no baa ewiei no, ‘bagua no nyinara yii Jehovah ayɛw.’—1 Mber. 29:​11, 20.

4. Jesus sii dɛn hyɛɛ Jehovah enyimnyam?

⁴ Aber a Jesus baa asaase do no, ɔmaa nkorɔfo hun dɛ tum a ɔdze yɛ anwanwadze no fi Jehovah hɔ, na ɔyɛɛ dɛm dze hyɛɛ n’Egya enyimnyam. (Mark 5:​18-20) Afei so, mbrɛ Jesus kaa n’Egya ho asɛm kyerɛɛ nkorɔfo nye kwan a ɔfaa do nye hɔn dzii no maa wɔhyɛɛ Jehovah enyimnyam. Mber bi, nna Jesus rekyerɛkyerɛ wɔ nhyiamudan mu. Nna maame bi a sunsum fi atseetsee no mfe 18 ka hɔn a woritsie no no ho. Nna sunsum fi no ama maame no mu akom araa ma onntum nntsen no mu. Nna maame yi reberɛ ankasa! Aber a Jesus hun maame no, n’asɛm yɛɛ no mbɔbɔr, ntsi ɔkɔr ne nkyɛn na ɔtɔɔ bo ara kaa kyerɛɛ no dɛ: “Ɔbaa, woeyi wo efi wo mberɛwyɛ mu.” Afei, Jesus dze ne nsa too maame no no do, na hɔ ara na ɔtseen no mu na “ɔhyɛɛ ase dɛ oriyi Nyankopɔn ayɛw.” Maame no noho tɔɔ no, na osii ne dadaw mu bio! (Luke 13:​10-13) Nna maame no nyim siantsir a oriyi Jehovah ayɛw no, na dɛmara na hɛn so, yenyim siantsir a yeyi Jehovah ayɛw.

EBƐNADZE NA OKENYAN HƐN MA YƐHYƐ JEHOVAH ENYIMNYAM?

5. Ebɛnadze ntsi na ɔsɛ dɛ yebu Jehovah?

⁵ Yeyi Jehovah ayɛw osiandɛ yebu no paa. Jehovah ayɛ ndzɛmba ahorow bi a ɔma yebu no. Jehovah nye adze nyina do tumfo; no tum nnyi ano. (Ndw. 96:​4-7) Ne nyansaa a no mu dɔ no da edzi pefee wɔ ndzɛmba a ɔabɔ mu. Ɔno nye hɛn Nkwamafo, na ɔma hɛn ndzɛmba so a ɔma yetum tsena ase. (Nyi. 4:11) Ɔyɛ nokwafo. (Nyi. 15:4) Biribiara a ɔyɛ no kɔ yie, na odzi no bɔhyɛ do aber nyina. (Josh. 23:14) Ntsi ɔnnyɛ nwanwa dɛ nkɔnhyɛnyi Jeremiah kaa Jehovah ho asɛm dɛ: “Amanaman enyansafo nyinara mu na hɔn ahendzi nyinara mu, obiara nnyi hɔ a ɔtse dɛ ɔwo”! (Jer. 10:​6, 7) Ampa, ndzɛmba pa pii na hɛn sor Egya no ayɛ ama hɛn a ɔno ntsi ɔsɛ dɛ yebu no. Naaso ɔnnyɛ obu nkotsee na yebu Jehovah, mbom yɛdɔ no so.

6. Ebɛnadze ntsi na yɛdɔ Jehovah?

⁶ Yɛhyɛ Jehovah enyimnyam osiandɛ yɛdɔ no paa. Ɔwodze ma yɛnhwɛ Jehovah no suban ahorow a ɔma yɛdɔ no no bi. Ɔwɔ ehumbɔbɔr nye ayamuhyehye. (Ndw. 103:13; Isa. 49:15) Ɔma hɛn asɛm yɛ n’asɛm; sɛ yedzi yaw a, noara so dzi yaw. (Zech. 2:8) Ɔfa hɛn nyɛnko, na ɔmma ɔnnyɛ dzen mma hɛn dɛ yɛbɔtwe abɛn no. (Ndw. 25:14; Andw. 17:27) Afei so, ɔbrɛ noho adze. Bible no ka dɛ: ‘Ɔbɔ no mu adze hwɛ ndzɛmba a ɔwɔ sor na ase, ɔma ɔbɔbɔnyi do fi huntuma mu.’ (Ndw. 113:​6, 7) Suban ahorow a ɔyɛ fɛw a hɛn Nyame kɛse wɔ yi, ehwɛ a ɔnnsɛ dɛ ɔka hɛn ma yɛhyɛ no enyimnyam anaa?—Ndw. 86:12.

7. Ebɛn hokwan soronko na yɛwɔ?

⁷ Yɛhyɛ Jehovah enyimnyam osiandɛ yɛpɛ dɛ nkorɔfo so hu no. Nyimpa pii nnyim nokwasɛm a ɔfa Jehovah ho. Ebɛnadze ntsi a? Siantsir nye dɛ, Satan akeka atorsɛm a ɔyɛ hu afa Jehovah ho dze efura dɛm nkorɔfo yi hɔn adwen enyi. (2 Cor. 4:4) Satan adaadaa nkorɔfo ma wɔagye edzi dɛ sɛ wɔyɛ Jehovah bɔn a, ɔremmfa nnkyɛ hɔn da, Jehovah nndwen nyimpa ho, na afei so, wiadze yi mu haw no mu fa kɛsenara fi Jehovah. Naaso hɛn dze, yenyim hɛn Nyankopɔn no ho nokwasɛm! Yeenya hokwan dɛ yɛbɔboa nkorɔfo ma woeebohu nokwar a ɔwɔ asɛm no mu, na sɛ yɛyɛ dɛm a, ɔbɔboa hɔn ma woeebohu Nyame kor a Jehovah yɛ na wɔaahyɛ no enyimnyam.  (Isa. 43:10) Ndwom 96 ka enyimnyam a ɔsɛ dɛ yɛdze ma Jehovah no ho asɛm. Aber a yerususu nsɛm bi a Jehovah maa wɔkyerɛwee wɔ dɛm ndwom yi mu ho no, ɔyɛ a woara so dwendwen ndzɛmba bi a ibotum ayɛ ama edze enyimnyam a ɔsɛ fata Jehovah no ama no.

YEBESI DƐN DZE ENYIMNYAM A ƆFATA JEHOVAH NO AMA NO?

8. Ebɛnadze na yebotum ayɛ dze ahyɛ Jehovah enyimnyam? (Ndwom 96:​1-3)

⁸ Kenkan Ndwom 96:​1-3. Yebotum dze nsɛm a yɛka fa Jehovah ho no ahyɛ no enyimnyam. Dɛm ndwom yi mu no, wɔreka akyerɛ Jehovah no nkorɔfo dɛ, ‘wɔntow ndwom mma Jehovah,’ ‘wonyi ne dzin no ayɛw,’ ‘wɔnka no nkwagye ho asɛm nkyerɛ,’ na ‘wɔnka n’enyimnyam nkyerɛ wɔ amanaman mu.’ Iyinom nyina yɛ ndzɛmba a yebotum ayɛ dze ahyɛ hɛn sor Egya no enyimnyam. Jewfo anokwafo nye Christianfo a wɔtsenaa ase wɔ asomafo no hɔn aber do no, nna hɔnho per hɔn dɛ wɔbɛka ndzɛmba pa a Jehovah ayɛ ama hɔn no ho asɛm akyerɛ nkorɔfo na wɔaaboa hɔn ma woeehu suban pa ahorow a ɔwɔ no. (Dan. 3:​16-18; Andw. 4:29) Hɛn so, yebesi dɛn ayɛ dza wɔyɛe no bi?

9-10. Ebɛnadze na yesua fi Angelena n’asɛm no mu? (Hwɛ mfonyin no so.)

⁹ Hom mma yɛnhwɛ asɛm bi a ɔtoo akyerɛbaa bi a ɔtse United States. Wɔfrɛ no Angelena. a Ɔdze akokodur dzii Jehovah ho adanse wɔ n’edwuma mu. Angelena kɔr edwuma mu hɔ fofor no, wɔyɛɛ nhyiamu bi a nna ɔbɛma hɔn a wɔfaa hɔn nnkyɛree no aka hɔnho nsɛm kakra ama edwuma mu hɔfo no eehu hɔn yie. Osiandɛ nna wɔfaa Angelena nnkyɛree ntsi, wɔtoo nsa frɛɛ no dɛ ɔno so mbra bi. Angelena yɛɛ dɛ ɔbɛma woehu dɛ ɔyɛ Jehovah Dasefo, na ɔdze mfonyin ahorow bi akyerɛ hɔn ma woeehu dɛ n’enyi gye. Naaso, aka kakra ma woedu no do no, n’edwumamunyi bi kasae, na ɔkaa dɛ n’awofo a wɔyɛ Jehovah Adasefo na wɔtsetsee no. Na ɔhyɛɛ ase dɛ oridzi dza yɛgye dzi no ho fɛw. Angelena kaa dɛ: “Nna m’akoma bɔ me kinkim dɛmara! Naaso mekaa kyerɛɛ moho dɛ, ‘Ntsi mebɛma dɛm aberantsɛ yi akeka nsɛm a ɔnnyɛ nokwar afa Jehovah ho a? Anaa mebɛma oehu dɛ dza ɔrekeka no nnyɛ nokwar?’”

¹⁰ Aber a Angelena n’edwumamunyi no kasae wiei no, ntsɛmara na Angelena bɔɔ mpaa tsiabaa bi wɔ ne tsirmu. Afei, ɔtɔɔ bo ara kaa kyerɛɛ no dɛ: “M’asɛm no reyɛ ayɛ tse dɛ wodze no. Mara so, awofo a wɔyɛ Jehovah Adasefo na wɔtsetsee me, na merekasa yi, mara so meyɛ Jehovah Dasefo.” Angelena kaa dɛm asɛm yi wiei no, hɔ yɛɛ dzinn, naaso ɔamma hu annhyɛ no do, mbom  ɔtoaa n’asɛm no do. Ɔdze mfonyin a ɔnye enuanom bi twitwae wɔ ehyiadzi ahorow bi ase a ɔbɛma woehu dɛ n’enyi gye wɔ Jehovah no som mu no kyerɛɛ hɔn. Na onyaa abotar kyerɛkyerɛɛ ne gyedzi mu. (1 Pet. 3:15) Okesii dɛn? Aber a Angelena dze n’asɛm no baa ewiei no, nna banyin no ho agow no. Afei, banyin no mpo kaa dɛ, aber a osuar a nna ɔnye Jehovah Adasefo bɔ no, mber bi wɔ hɔ a, nna n’enyi gye paa. Angelena kaa dɛ: “Ɔfata paa dɛ yɛma nkorɔfo hu suban pa a Jehovah wɔ no. Ɔyɛ hokwan kɛse paa na menya dɛ mebɛka no ho nokwasɛm akyerɛ nkorɔfo.” Ntsi sɛ nkorɔfo kasa tsia Jehovah mpo a, hɛn dze, yeenya hokwan soronko dɛ yebeyi no ayɛw na yaahyɛ no enyimnyam.

11. Ofi tsetse dze besi ndɛ, ebɛn kwan do na Jehovah n’asomfo dze asɛm a ɔwɔ Ndwom 96:8 no ayɛ edwuma?

¹¹ Kenkan Ndwom 96:8. Yebotum dze hɛn ahodze ahyɛ Jehovah enyimnyam. Ofi tsetse nyinara, Jehovah n’asomfo enyi gye ho dɛ wɔdze ndzɛmba a wɔwɔ no bɛhyɛ no enyimnyam. (Mbɛ. 3:9) Dɛ mfatoho no, Israelfo no yii ntoboa dze boae ma wɔdze sii asɔrfie no na wɔdze bi so siesiee hɔ. (2 Ahe. 12:​4, 5; 1 Mber. 29:​3-9) Christ n’esuafo binom so ‘dze hɔn ahodze soom’ ɔno nye n’asomafo no. (Luke 8:​1-3) Christianfo a wɔtsenaa ase wɔ asomafo no hɔn aber do so yii ntoboa dze kɔboaa hɔn nuanom Christianfo a nna hɔn ho akyer hɔn no. (Andw. 11:​27-29) Dɛmara na ndɛ so yebotum efi hɛn pɛ mu eyi ntoboa dze ahyɛ Jehovah enyimnyam.

12. Ebɛn kwan do na ntoboa a yeyi no botum ahyɛ Jehovah enyimnyam? (Hwɛ mfonyin no so.)

¹² Hom mma yɛnhwɛ asɛm bi a ɔma yehu mbrɛ hɛn ntoboa ahorow no si hyɛ Jehovah enyimnyam. Afe 2020 mu no, ɔpɛ bi sii wɔ Zimbabwe, na ɔkyɛɛr paa. Wɔbɔɔ amandzɛɛ dɛ dɛm ɔpɛ no dze ɔhaw pii brɛɛ amamfo no. Nyimpa ɔpepem pii na ɔpɛ no maa ɔkɔm fitaa dzee hɔn, na nna akyerɛbaa bi a wɔfrɛ no Prisca so ka ho. Nna Prisca wɔ nhyehyɛɛ a ɔdze kɔ asɛnka Wukuda na Fida biara, na ɔmmfa ho dɛ nna ndzɛmba mu ayɛ dzen no, oenngyaa asɛnka kɔ. Ber a nna ɔsɛ dɛ wɔdze pam asaase no mpo no, nna ɔmmfa ber a ɔdze kɔ asɛnka no nndzi agor koraa. Sɛ n’apaamuhɔfo no hu dɛ ɔannkɔ haban mu na mbom ɔrokɔ asɛnka a, nna wodzi no ho fɛw, na wɔka kyerɛ no dɛ: “Ɔwo, edze no dɛmara na ɔkɔm eku wo.” Nna Prisca gye dzi paa dɛ Jehovah bɔhwɛ no, ntsi nna ɔtaa ka kyerɛ hɔn dɛ: “Jehovah mmaa n’asomfo hɔn nsa nnsii famu da.” Iyi ekyir no, wɔannkyɛr koraa na Jehovah n’ahyehyɛdze no dze edziban nye ndzɛmba afofor kɔboaa enuanom a nna wɔwɔ hɔ no, na Prisca so nyaa bi. Ntoboa ahorow a yeyi no na otumii boae ma Prisca ne nsa kaa edziban nye ndzɛmba  ahorow a nna ohia no. Aber a Prisca n’apaamuhɔfo no hun dza ahyehyɛdze no ayɛ no, ɔkaa hɔn akoma paa na wɔkaa kyerɛɛ Prisca dɛ: “Ɔyɛ nokwar, Nyankopɔn ennyi wo baako annhyɛ wo nsa ampa, ntsi hɛn so yɛpɛ dɛ yesua no ho adze.” Yɛrekasa yi, Prisca n’apaamuhɔfo beesuon ahyɛ ase rokɔ asafo nhyiamu.

13. Yebesi dɛn dze hɛn abrabɔ ahyɛ Jehovah enyimnyam? (Ndwom 96:9)

¹³ Kenkan Ndwom 96:9. Yebotum dze hɛn abrabɔ pa ahyɛ Jehovah enyimnyam. Nna ɔsɛ dɛ asɔfo a wɔsom wɔ Jehovah n’asɔrfie hɔ no ma hɔnho tsew. (Ex. 40:​30-32) Dɛmara na hɛn so, ɔsɛ dɛ yɛma hɛnho tsew. Naaso dza no ho hia paa nye dɛ yɛbɔbɔ bra pa. (Ndw. 24:​3, 4; 1 Pet. 1:​15, 16) Ɔsɛ dɛ yɛbɔ mbɔdzen dɛ yebeyi ‘suban dadaw no’ egu hɔ, na yaahyɛ ‘suban fofor no.’ Dza iyi kyerɛ nye dɛ, yɛbɔtwe hɛnho efi suban bɔn nye ndzeyɛɛ biara a no ho nntsew no ho, na yaabɔ mbɔdzen dɛ yebenya Jehovah n’adwen wɔ ndzɛmba ho na yeesuasua no suban ahorow a ɔyɛ fɛw no. (Col. 3:​9, 10) Jehovah aboa nkorɔfo a nna hɔn bra asɛɛ na wodzi nsɛmbɔn no mpo ma woetum asesa hɔn suban na wɔahyɛ suban fofor no.

14. Ebɛnadze na isua fi Jack n’asɛm no mu? (Hwɛ mfonyin no so.)

¹⁴ Hom mma yensusu Jack n’asɛm no ho kakra. Osian nsɛmbɔn na ewudzisɛm a nna odzi ntsi, nna nkorɔfo pii suro no. Ne nsɛmbɔn no ntsi wɔtoo no dzin Abɔnsam. Iyi ntsi wɔkyeer no na wobuu no kumfɔ. Aber a nna ɔda efiadze rotweɔn ekesi dɛ woboku no no, onua bi a nna ɔkɔ efiadze hɔ nye nkorɔfo kosua Bible no kaa kyerɛɛ Jack dɛ ɔpɛ dɛ ɔnye no sua Bible no, na Jack so gyee too mu. Ɔwɔ mu dɛ nna Jack edzi bɔn akɛse pii dze, naaso oyii no suban dadaw no guu hɔ, na odur beebi no, wonumaa no ma ɔbɛyɛɛ Jehovah Dasefo. Jack no suban sesae koraa ma ber soe dɛ worukoku no mpo, aweɔmfo a wɔwɔ efiadze hɔ no mu bi a nna worikegya no kwan no sui. Ɔpanyin kor a nna ɔyɛ edwuma wɔ efiadze hɔ no kaa dɛ: “Mber bi a abɛsen kɔ no, nna Jack muo koraa kyɛn hɔn a wogu efiadze ha no. Naaso seseiara dze, ɔka hɔn a hɔn suban ye paa no ho.” Nna wɔyɛ asafo nhyiamu dapɛn biara wɔ efiadze hɔ. Aber a wokum Jack no, asafo nhyiamu a wɔyɛɛ no ndaawɔtwe a odzi hɔ no, enuanom no hun dɛ banyin bi a ɔda efiadze hɔ a ɔmmbaa nhyiamu no bi da no aba bi. Ebɛnadze na ɔkaa dɛm banyin yi ma ɔbaa asafo nhyiamu no bi? Nsesa a Jack yɛe no kaa dɛm banyin yi n’akoma paa, ntsi nna ɔno so pɛ dɛ ohu dza ɔsɛ dɛ ɔyɛ ama oeetum asom Jehovah. Dɛm asɛm yi ma yehu pefee dɛ hɛn abrabɔ pa no botum aka nkorɔfo ma wɔaahyɛ hɛn sor Egya no enyimnyam!—1 Pet. 2:12.

 EBƐNADZE NA JEHOVAH BƐYƐ DZE AHYƐ NE DZIN NO ENYIMNYAM NDAANSA YI ARA?

15. Ebɛnadze na Jehovah bɛyɛ dze ahyɛ ne dzin no enyimnyam ndaansa yi ara? (Ndwom 96:​10-13)

¹⁵ Kenkan Ndwom 96:​10-13. Dɛm nsɛm yi na ɔdze Ndwom 96 ba ewiei, na ɔka Jehovah ho asɛm dɛ ɔyɛ Ɔhen nye Ɔtsɛmbuafo a obu atsɛntsenenee. Ebɛnadze na Jehovah bɛyɛ dze ahyɛ ne dzin no enyimnyam ndaansa yi ara? Ɔno nye dɛ, obobu atsɛntsenenee. Ɔrennkyɛr koraa Jehovah bɛsɛɛ Babylon Kɛse a woegu ne dzin krɔnkrɔn no ho fi no. (Nyi. 17:​5, 16; 19:​1, 2) Sɛ wɔsɛɛ Babylon Kɛse a, bi a nyimpa a wɔdze hɔn enyi bohu no, hɔn mu bi bɛba abɛka hɛnho ma yaasom Jehovah. Ewiei koraa no, Jehovah bɛsɛɛ Satan no wiadze bɔn yi nyina wɔ Amagedon ko no mu, na obeyi hɔn a wɔsoɛr tsia no na wɔkeka atorsɛm dze sɛɛ ne dzin no nyina efi hɔ. Naaso, hɔn a wɔdɔ Jehovah na wotsie no na wɔhyɛ no enyimnyam no, ɔbɛgye hɔn nkwa. (Mark 8:38; 2 Thess. 1:​6-10) Nsɔhwɛ a otwa tun a ɔbɛba wɔ Christ ne Mfrenhyia Apem Tumdzi no n’ekyir no, ɔntɔ ara dɛ ɔbɛba n’ewiei no dze, nna Jehovah atsew ne dzin ho korakora. (Nyi. 20:​7-10) Dɛm aber no, “[Jehovah] n’enyimnyam ho nyimdzee bɛhyɛ asaase ma, dɛ mbrɛ esu kata po do.”—Hab. 2:14.

16. Ebɛnadze na esi wo bo dɛ ebɛyɛ? (Hwɛ mfonyin no so.)

¹⁶ Sɛ ɔkɛba no dɛ hɛn a yɛtse ase nyinara dze enyimnyam a ɔsɛ fata Jehovah no rema no a, hwɛ mbrɛ hɛn enyi besi agye afa! Naaso, onkesi dɛ dɛm aber no bɛba no, hɛn nyina botum ayɛ hɛn afamudze na yɛdze hokwan biara a yebenya no ahyɛ hɛn Nyankopɔn no enyimnyam ndɛ. Mbrɛ ɔbɛyɛ a dɛm asɛm a no ho hia yi bɛtsena hɛn adwen mu no, Akwankyerɛ Kuw no eyi Ndwom 96:8 dɛ 2025 afe asɛm. Hɔ ka dɛ: “Hom mma [Jehovah] enyimnyam a ɔsɛ ne dzin.”