1-2. Ebɛnadze nye werdam no, na ebɛnadze ntsi na yehia?

ABER a Adam a ɔyɛ nyimpa a odzi mũ no yɛɛ bɔn no, ɔhweer ho kwan a nna ɔwɔ dɛ ɔbɛtsena ase daa no. Nnyɛ nanko na ɔhweer dɛm ho kwan no, mbom nna n’asefo a wɔbɛba daakye nyinara so ka ho. Nna Adam runntum mmfa biribiara nnyi noho ano wɔ dza ɔyɛe no ho. Ɔhyɛɛ da ara na ɔyɛɛ bɔn. Na n’asefo no so ɛ? Hɔndze, bɔn a Adam yɛe no, nna wɔnnka ho. (Rom. 5:12, 14) Adam dze, nna ɔfata dɛ owu. Na n’asefo no so ɛ, ana biribi wɔ hɔ a wobotum ayɛ dze agye hɔn? Nyew! Adam yɛɛ bɔn no, wɔannkyɛr koraa na Jehovah hyɛɛ ase dɛ ɔreda no edzi mbrɛ obesi agye Adam n’asefo ɔpepem pii efi bɔn nye owu mu. (Gen. 3:15) Wɔ Jehovah ne ber a ɔsɛ mu no, nna ɔbɔsoma ne Ba no efi sor aba “ma ɔdze no nkwa aayɛ werdam ama dodowara.”—Mark 10:45; John 6:51.

² Ebɛnadze nye werdam no? Sɛ wɔkã werdam no ho asɛm wɔ Christianfo Greek Kyerɛwnsɛm no mu a, ogyina hɔ ma bo a Jesus tuae dze gyee dza Adam hweree no. (1 Cor. 15:22) Ebɛnadze ntsi na yehia werdam no? Osiandɛ, nna Jehovah n’atsɛntsenenee gyinapɛn a ɔwɔ Mbra no mu no hwehwɛ dɛ wɔdze nkwa hyɛ nkwa ananmu. (Ex. 21:23, 24) Adam hweer nkwa a odzi mũ a nna ɔwɔ no. Mbrɛ ɔbɛyɛ a Nyankopɔn n’atsɛntsenenee bɛyɛ edwuma no, Jesus dze no nkwa a odzi mũ no bɔɔ afɔr. (Rom. 5:17) Dɛm ntsi, Jesus abɛyɛ “Ɔdomankoma Egya” ama hɔn a wɔkyerɛ werdam no mu gyedzi nyina.—Isa. 9:6; Rom. 3:23, 24.

3. Dɛ mbrɛ John 14:31 nye 15:13 kyerɛ no, nna ebɛnadze ntsi na Jesus wɔ ɔpɛ dɛ ɔdze no nkwa a odzi mũ no bɔbɔ afɔr?

³ Osian ɔdɔ kɛse a Jesus wɔ ma no sor Egya no nye hɛn ntsi,  nna ɔwɔ ɔpɛ dɛ ɔdze no nkwa bɔbɔ afɔr. (Kenkan John 14:31; 15:13.) Dɛm ɔdɔ no kaa no ma osii no bo dɛ ɔbɔkɔ do ekura n’emudzi mu ekesi ase, na oeewie n’Egya n’apɛdze yɛ. Jesus yɛɛ dɛm dze nam nokwar a odzii kesii owu mu no do. Iyi ntsi, tsirmpɔw a ahyɛse no nna Jehovah wɔ ma adasamba nye asaase no bɛba mu. Adzesua yi mu no, yɛbɔhwɛ siantsir a Nyankopɔn maa kwan ma Jesus hun amandze pii ana oruwu no. Yɛbɛsan so ahwɛ Bible kyerɛwfo bi a ɔkyerɛɛ werdam no ho enyisɔ kɛse no ho asɛm kakra. Afei, yɛbɔhwɛ dza yebotum ayɛ dze akyerɛ werdam no ho enyisɔ, nye mbrɛ yebesi ahyɛ enyisɔ a yɛwɔ ma dza Jehovah na Jesus ayɛ ama hɛn no mu dzen.

4. Kã kwan a Jesus faa do wui no ho asɛm.

⁴ Twa da a otwa tun wɔ Jesus n’asetsena mu wɔ asaase do ho mfonyin hwɛ. Ɔwɔ mu dɛ nkyɛ Jesus botum aserɛ abɔfodɔm ma wɔaabɔbɔ noho ban, naaso ɔmaa kwan ma Rome nsordaafo no kyeer no na wɔhwee no finamm. (Matt. 26:52-54; John 18:3; 19:1) Abaa a wɔdze hwee no no tsetseew no honam. Ekyir yi, wɔdze dua duudur bi too n’ekyir a wɔahwe no ma hɔ atsetsew no dɛ ɔmfa nkɔ beebi a wɔbɛsɛn no no. Naaso aber a ɔhyɛɛ ase dɛ ɔrotwe dua no, wohun obi a ogyina hɔ na wɔhyɛɛ no dɛ ɔnsoa nkɔ mma no. (Matt. 27:32) Ber a Jesus dur beebi a wɔbɛsɛn no no, hɔn a woboku no no dze mprɛgow bobɔɔ ne nsa nye n’anan mu bɔɔ dua no mu. Osian Jesus no mu dur ntsi, mprɛgow a wɔdze bɔɔ no asɛndua mu no tseew no honam. N’anyɛnkofo no dzii awerɛhow na ne maame so sũi, naaso Jewfo mpanyimfo no dze, wosii no atwetwe. (Luke 23:32-38; John 19:25) Jesus hun amandze ndɔnhwer pii. Osian mbrɛ nna Jesus sɛn hɔ ntsi, nna ɔsɛ dɛ n’akoma nye no horɔhorɔw yɛ edwuma ntsɛntsɛm ntsɛntsɛm, na iyi maa ɔyɛɛ dzen maa no dɛ ɔbɛgye ahom. Nna Jesus nyim dɛ oedzi konyim, ntsi wɔaka kakraabi ma oeewu no, ɔbɔɔ mpaa a otwa tun. Afei, osii ne tsir adze na ogyaa no sunsum mu. (Mark 15:37; Luke 23:46; John 10:17, 18; 19:30) Nokwasɛm nye dɛ, Jesus brɛe ana oruwu; ɔfaa yaw nye enyimguase pii mu!

5. Nna ebɛnadze na ɔyɛ Jesus yaw kyɛn kwan a wɔfaa do kum no no?

⁵ Jesus dze, nna nnyɛ kwan a wɔrefa do eku no no na ɔyɛ no yaw. Mbom dza nna ɔyɛ no yaw papaapa nye sombo a wɔdze bɔɔ no a nna worigyina do eku no no. Wotwaa asɛm too no do dɛ ɔyɛ mbusubɔfo, kyerɛ dɛ, ɔyɛ obi a onnyi obu ma Nyankopɔn anaa Nyankopɔn ne dzin. (Matt. 26:64-66) Dɛm sombo no haaw Jesus papaapa ma nna ne yamu a nkyɛ n’Egya beyi no efi dɛm enyimguase no mu. (Matt. 26:38, 39, 42) Ebɛnadze ntsi na Jehovah maa kwan ma no Dɔba no hun amandze na owui? Hom mma yɛnhwɛ siantsir ebiasa.

6. Nna ebɛnadze ntsi na ɔsɛ dɛ wɔsɛn Jesus wɔ dua do?

⁶ Odzi kan, nna ɔsɛ dɛ wɔsɛn Jesus wɔ dua do mbrɛ ɔbɛyɛ a ɔbɛgye Jewfo no efi ndom tsitsir bi ase. (Gal. 3:10, 13) Dɛm ndom yi baa hɔn do, osiandɛ wɔbɔɔ anohoba dɛ wobedzi Nyankopɔn ne Mbra do, naaso woenndzi do. Iyi ntsi, nna dɛm ndom yi abɛka afɔbu a wɔwɔ dada dɛ Adam n’asefo no ho. (Rom. 5:12) Nyankopɔn ne Mbra a ɔdze maa Israelfo no kãa dɛ sɛ nyimpa bi yɛ bɔn a ɔsɛ owu a, ɔsɛ dɛ woku no. Ɔno ekyir no, bi a wɔdze no fun no bɛsɛn dua do. * (Deut. 21:22, 23; 27:26) Ntsi aber a wɔsɛɛn Jesus wɔ dua do no, ɔmaa ɔyɛɛ yie maa Jewfo a wɔpoow no no dɛ wobenya n’afɔrbɔ no do mfaso.

7. Siantsir a otsĩa ebien a Nyankopɔn maa kwan ma ne Ba no hun amandze nye dɛn?

 ⁷ Hom mma yɛnhwɛ siantsir a otsĩa ebien a Nyankopɔn maa kwan ma ne Ba no hun amandze no. Nna ɔretsetse Jesus ama dwuma a daakye obedzi dɛ hɛn Sɔfopanyin no. Jesus hun mbrɛ ɔyɛ dzen dɛ obi betsie Nyankopɔn ber a ɔrefa nsɔhwɛ a no mu yɛ dzen mu no. Nsɛm hyɛɛ no do araa ma “ɔdze nkekamu a ɔyɛ dzen nye nyinsu” bɔɔ mpaa hwehwɛɛ mboa. Nokwasɛm nye dɛ, osiandɛ Jesus afa tsebea a no mu yɛ dzen dɛm mu ntsi, ɔtse hɛn ase na “otum boa [hɛn]” ber a ‘wɔsɔ hɛn hwɛ no.’ Yɛda Jehovah ase papaapa dɛ ɔama hɛn Sɔfopanyin ‘a ɔtse hɛn mberɛwyɛ ase’!—Heb. 2:17, 18; 4:14-16; 5:7-10.

8. Siantsir a otsĩa ebiasa a Nyankopɔn maa kwan ma ne Ba no hyiaa nsɔhwɛ a no mu yɛ dzen no nye dɛn?

⁸ Otsĩa ebiasa, Jehovah maa kwan ma Jesus hun amandze a no mu yɛ dzen, mbrɛ ɔbɛyɛ a yebenya asɛmbisa bi a no ho hia ho mbuae. Asɛmbisa no nye dɛ: Ana nyimpa botum akɔ do edzi Jehovah nokwar ber a worihyia nsɔhwɛ a no mu yɛ dzen no? Satan se dɛ obiara runntum! Ɔkã dɛ biribi a nyimpa repɛ efi Nyankopɔn hɔ ntsi na wɔrosom no. Na n’adwen nye dɛ, dɛ mbrɛ nna Adam nndɔ Jehovah no, dɛmara na n’asefo nyinara so nndɔ no. (Job 1:9-11; 2:4, 5) Osiandɛ nna Jehovah wɔ ahotodo dɛ Jesus bɔkɔ do edzi nokwar ntsi, ɔmaa kwan ma ne Ba no hyiaa nsɔhwɛ a no mu yɛ dzen. Jesus kɔr do kuraa n’emudzi mu na ɔdaa no edzi dɛ Satan yɛ ɔtorfo.

9. Ebɛn nhwɛdo na ɔsomafo John ayɛ ama hɛn?

⁹ Nkyerɛkyerɛ a ɔfa werdam no ho no ahyɛ Christianfo piinara hɔn gyedzi dzen. Wɔakɔ do egyina nsɔhwɛ a wohyia no ano, na ɔmmfa ho ɔsoɛrtsia a wohyia no, wɔakɔ do akã asɛm no dze abɔ nkɔkora na mberwa. Hom mma yɛmfa ɔsomafo John dɛ nhwɛdo. Ofii nokwardzi mu kãa nokwasɛm a ɔfa Christ nye werdam no ho asɛm; ɔbɛyɛ dɛ mfe 60 na no mboree na ɔdze yɛɛ dɛm. Wɔaka kakra ma oeedzi mfe 100 no, ɔbɛyɛ dɛ Rome Ahenman no buu no dɛ ɔyɛ obi a noho yɛ hũ a obotum ahaw hɔn tumdzi no, ntsi wɔdze no kɔtoo efiadze wɔ Patmos supɔw no do. Ebɛn bɔn na ɔyɛe? No bɔn a ɔyɛe ara nye dɛ ɔkãa ‘Nyankopɔn ho asɛm na odzii Jesus Christ ho dase.’ (Nyi. 1:9) Hwɛ gyedzi nye abotar a wɔdze tsim ho nhwɛdo a ɔtse dɛm!

10. Ebɛn kwan do na John no nwoma ahorow a ɔkyerɛwee no da no edzi dɛ ɔkyerɛɛ werdam no ho enyisɔ?

¹⁰ John kãa ɔdɔ a no mu yɛ dzen a ɔwɔ ma Jesus nye enyisɔ a ɔwɔ ma werdam no ho asɛm wɔ ne nkrataa a sunsum kaa no ma ɔkyerɛwee no mu. Wɔ ne nkrataa no mu no, nsɛm bɔbor 100 na ɔwɔ mu a ɔfa werdam no nye mfaso a werdam no ma yenya no ho. Dɛ nhwɛdo no, John kyerɛɛw dɛ: “Sɛ obi yɛ bɔn a, yɛwɔ ɔkasagyefo wɔ Egya no nkyɛn, Jesus Christ ɔtseneneenyi no.” (1 John 2:1, 2) John no nwoma ahorow a ɔkyerɛwee no san twe adwen si hia a no ho hia dɛ yebedzi ‘Jesus ho dase’ no do. (Nyi. 19:10) Ɔda edzi kofee dɛ John kyerɛɛ werdam no ho enyisɔ kɛse. Hɛn so, yebesi dɛn akyerɛ dɛ yɛwɔ enyisɔ a ɔtse dɛm?

11. Ebɛnadze na obotum aboa hɛn ma yaakõ etsia nsɔhwɛ?

¹¹ Kõ tsia biribiara a ɔbɛma ayɛ bɔn. Sɛ yɛkyerɛ werdam no ho enyisɔ ampa a, yerinnya adwen dɛ: ‘No ho nnhia dɛ mobɔkõ etsia biribi a ɔbɛma mayɛ bɔn. Mubotum ayɛ bɔn na muwie a maaserɛ bɔnfakyɛ.’ Mbom sɛ yehyia biribi a ɔbɛma yɛayɛ bɔn a, yɛbɛkã dɛ: ‘Oho! Dza Jehovah na Jesus ayɛ ama me nyinara  ekyir no, ebɛnadze ntsi na ɔsɛ dɛ meyɛ biribi a ɔtse dɛm?’ Dza ɔbɔboa hɛn ma yaayɛ dɛm no, yebotum ebisa Jehovah hɔ ahoɔdzen na yaaserɛ no dɛ: ‘Mma mma monnkɔ nsɔhwɛ mu.’—Matt. 6:13.

12. Yebesi dɛn dze afotu a ɔwɔ 1 John 3:16-18 no ayɛ edwuma?

¹² Dɔ wo nuanom. Sɛ yɛdɔ hɛn nuanom a, ɔno so kyerɛ dɛ yɛkyerɛ werdam no ho enyisɔ. Ebɛnadze ntsi a? Osiandɛ nnyɛ hɛn nko na Jesus wui maa hɛn, mbom owui maa hɛn nuanom no so. Sɛ nna ɔwɔ ɔpɛ dɛ obowu ama hɔn a, nna ɔno ɔda edzi kofee dɛ wɔsom bo ma no papaapa. (Kenkan 1 John 3:16-18.) Yɛkyerɛ dɛ yɛdɔ hɛn nuanom dze nam kwan a yɛnye hɔn dzi no do. (Eph. 4:29, 31–5:2) Dɛ nhwɛdo no, sɛ wɔyar a yɛboa hɔn. Dɛmara na sɛ worihyia nsɔhwɛ a no mu yɛ dzen, tse dɛ atoyerɛnkyɛm a yɛboa hɔn. Naaso, sɛ hɛn nua Christiannyi bi yɛ biribi anaa ɔkã asɛm bi ma ɔyɛ hɛn yaw a, ebɛnadze na ɔsɛ dɛ yɛyɛ?

13. Ebɛnadze ntsi na ɔsɛ dɛ yɛdze bɔn kyɛ?

¹³ Ana ɔtɔ da a ɔyɛ dzen ma wo dɛ edze onua bi no bɔn bɛkyɛ no? (Lev. 19:18) Sɛ dɛm a, fa dɛm afotu yi yɛ edwuma: “Sɛ obi wɔ obi ho asɛm bi a, hom ntsetse mma homho, na hom mfa nkyekyɛ homho nkorkor; dɛ mbrɛ [Jehovah] dze akyɛ hom no, dɛmara na hom so nyɛ.” (Col. 3:13) Aber biara a yɛdze hɛn nua bi no bɔn bɛkyɛ no no, yɛma hɛn sor Egya no hu dɛ yɛkyerɛ werdam no ho enyisɔ papaapa. Yebesi dɛn akɔ do ahyɛ enyisɔ a yɛwɔ ma Nyankopɔn n’akyɛdze yi mu dzen?

14. Kwan kor a yebotum afa do ahyɛ werdam no ho enyisɔ a yɛwɔ no mu dzen nye dɛn?

¹⁴ Da Jehovah ase wɔ werdam no ho. Akyerɛbaa bi a wɔfrɛ no Joanna a oedzi mfe 83 a ɔwɔ India kãa dɛ: “Mususu dɛ no ho hia papaapa dɛ da biara mebɛkã werdam no ho asɛm wɔ me mpaabɔ mu na maada Jehovah ase wɔ ho.” Sɛ erobɔ mpaa a, kã mfom a edzi wɔ da no mu ho asɛm kyerɛ Jehovah na serɛ no hɔ bɔnfakyɛ. Naaso sɛ ayɛ bɔn a no mu yɛ dur a, ɔsɛ dɛ ehwehwɛ mboa fi asafo mu mpanyimfo no so hɔ. Wobetsie wo na woeefi ɔdɔ mu dze Nyankopɔn n’Asɛm no etu wo fo. Wɔnye wo bɔbɔ mpaa na wɔaaserɛ Jehovah dɛ ɔmfa Jesus n’afɔrbɔ no do ‘nsa wo yarba,’ ama enye no ntamu ebusuabɔ no aayɛ papa bio.—Jas. 5:14-16.

15. Ebɛnadze ntsi na ɔsɛ dɛ yɛgye mber kenkan werdam no ho asɛm na yɛdwendwen ho?

¹⁵ Dwendwen werdam no ho. Akyerɛbaa bi a  wɔfrɛ no Rajamani a oedzi mfe 73 kãa dɛ: “Aber biara a mebɛkenkan amandze a Jesus hunii no ho asɛm no, nna m’enyi atsetsɛw.” Bi a woara so, sɛ edwendwen amandze ara a Nyankopɔn ne Ba no hunii no ho a, ɔma wo werɛ how. Naaso mpɛn dodow a edwendwen afɔr a Jesus bɔe no ho no, mpɛn dodow no ara na ɔdɔ a ewɔ ma ɔno nye n’Egya no bɛyɛ kɛse. Dza ɔbɔboa wo ma aadwendwen werdam no ho no, ibotum dze ayɛ wo botae dɛ ibosusu ho wɔ w’ankorankor adzesua ase.

16. Sɛ yɛkyerɛkyerɛ afofor werdam no ho adze a, ɔbɔboa hɛn dɛn? (Hwɛ mfonyin a ɔwɔ Ɔweɔn-Aban yi enyim no.)

¹⁶ Kã werdam no ho asɛm kyerɛ afofor. Aber biara a yɛbɛkã werdam no ho asɛm akyerɛ afofor no, enyisɔ a yɛwɔ ma werdam no bɛyɛ kɛse. Yɛwɔ nwoma nye video ahorow a ɔfata papaapa a ɔboa hɛn ma yɛkyerɛkyerɛ afofor siantsir a nna no ho hia dɛ Jesus wu ma hɛn. Dɛ nhwɛdo no, yebotum dze esuadze a otsĩa 4 a ɔwɔ Asɛmpa A Ofi Nyankopɔn Nkyɛn! nwomaba no mu no edzi dwuma. Dɛm esuadze no n’asɛntsir nye “Woana Nye Jesus Christ?” Anaadɛ yebotum so ahwɛ Ebɛnadze na Bible no Kyerɛkyerɛ Hɛn? nwoma no ne tsir 5 a n’asɛntsir nye “Werdam no​—Nyankopɔn n’Akyɛdze a Ɔsom Bo Paa” no. Afei so yɛkɔ Jesus no wu ho Nkaadzi no ase afe biara, na yɛdze nsi to nsa frɛ afofor dɛ wɔmbɛka hɛnho; yɛyɛ dɛm dze hyɛ werdam no ho enyisɔ a yɛwɔ no mu dzen. Hwɛ ho kwan ara a Jehovah dze ama hɛn dɛ yɛnkyerɛkyerɛ afofor ne Ba no ho adze!

17. Ebɛnadze ntsi na werdam no yɛ Nyankopɔn n’akyɛdze a ɔsom bo paara a ɔdze ama adasamba?

¹⁷ Ekyingye biara nnyi ho dɛ yɛwɔ siantsir papa bi ntsi a ɔsɛ dɛ yɛkyerɛ werdam no ho enyisɔ na yɛhyɛ mu dzen. Ɔwɔ mu dɛ yɛyɛ nyimpa a yenndzi mũ dze, naaso osian werdam no ntsi yebotum nye Jehovah enya ebusuabɔ a no mu yɛ dzen. Osian werdam no ntsi, wɔbɛsɛɛ Abɔnsam no ndwuma korakora. (1 John 3:8) Afei so, osian werdam no ntsi, tsirmpɔw a ahyɛse no nna Jehovah wɔ ma asaase no bɛba mu. Asaase no nyinara bɛdan Paradise. Dɛm aber no, obiara a ibohu no no bɛyɛ obi a ɔdɔ Jehovah na ɔsom no. Dɛm ntsi, ɔmbra dɛ da biara yɛbɔhwehwɛ kwan a yɛbɛfa do akyerɛ werdam no a ɔyɛ Nyankopɔn n’akyɛdze a ɔsom bo paara a ɔdze ama adasamba no ho enyisɔ!