Ebɛnadze ntsi na aka kakra ma Jesus ewu no ɔkãa asɛm a David kãe wɔ Ndwom 22:1 no?

Asɛm a wɔayɛ ho kyerɛwtohɔ wɔ Matthew 27:46 no ka nsɛm a otwa tun a Jesus kãe ana oruwu no ho. Hɔ kã dɛ: “Me Nyankopɔn, me Nyankopɔn, ɔyɛ dɛn na apa me yi?” Dɛm asɛm yi a Jesus kãe no maa asɛm a ɔdwontofo David kãe a ɔwɔ Ndwom 22:1 no nyaa ne mbamu. (Mark 15:34) Ɔbɛyɛ mfom dɛ yɛbɛkã dɛ Jesus tsee nka dɛ Nyankopɔn maa ne nsa sii famu, anaa ɔhweer gyedzi wɔ Nyankopɔn mu ber tsiabaa bi ntsi na ɔkãa dɛm asɛm yi. Nna Jesus tse siantsir a no ho hia dɛ owu no ase yie; nna ɔwɔ ɔpɛ so dɛ obowu. (Matt. 16:21; 20:28) Afei so, nna onyim dɛ, ɔnnsɛ dɛ Jehovah bɔ noho ‘ban hyia’ ber a woruku no no. (Job 1:10) Dɛm ntsi, Jehovah maa kwan ma Jesus daa no edzi dɛ ɔmmfa ho mbrɛ obesi ewu biara no ɔbɔkɔ do edzi nokwar.—Mark 14:35, 36.

Sɛ dɛm a, ebɛnadze ntsi na Jesus kãa asɛm a ɔwɔ dɛm ndwom yi mu no? Ɔwɔ mu, yerunntum nnkã nnsi no pi siantsir a ɔkãa dɛm asɛm no, naaso hom mma yɛnhwɛ siantsir a obotum aba dɛ ɔkãa dɛm no. *

Aber a Jesus kãa dɛm asɛm no, aso nna orisi do dua dɛ Jehovah rommbɔ noho ban mmfi no wu no ho anaa? Nna ɔnnsɛ dɛ Jehovah boa Jesus ma otua werdam no. Nna Jesus yɛ nyimpa na ɔsɛ dɛ owu mbrɛ ɔbɛyɛ a ɔbɔsɔ “owu ahwɛ ama nyimpa biara.”—Heb. 2:9.

Aber a Jesus kãa dɛm ndwom no mu asɛm kakraabi no, aso nna ɔrotwe adwen esi  ndwom no nyina do anaa? Dɛm aber no, nna ɔyɛ Jewfo hɔn ntɔyɛɛ dɛ wɔkyer ndwom no mu nsɛm pii gu hɔn tsirmu. Sɛ wɔtse ndwom bi no mu nsɛm kakraabi mpo a, nna wobotum akaa ndwom no mu nsɛm nyina a wɔmmberɛ ho koraa. Sɛ nna dɛm na ɔwɔ Jesus n’adwen mu a, ɔnodze ɔboaa n’ekyirdzifo a nna wɔyɛ Jewfo no ma wɔkaa nkɔnhyɛ pii a ɔwɔ dɛm ndwom no mu a nna ɔfa nsɛm a obesisi wɔ no wu mu no ho. (Ndw. 22:7, 8, 15, 16, 18, 24) Afei so, aber a dɛm ndwom no reba ewiei no, ɔdwontofo no yii Jehovah ayɛw na ɔkãa dɛ ɔyɛ Ɔhen a odzi tum wɔ asaase nyina do.—Ndw. 22:27-31.

Aber a Jesus kãa nsɛm a David kãe yi no, aso nna ɔrotwe adwen esi do dɛ noho nnyi asɛm biara anaa? Ansaana woruboku Jesus no, wɔammfa kwan pa do enndzi n’asɛm na wobuu no fɔ dɛ ɔyɛ mbusubɔfo; nna ɔsɛ dɛ ogyina ne nyina ano. (Matt. 26:65, 66) Anafua a wɔkyeer no no ntsɛmara na baguafo no hyiaa mu dzii n’asɛm, na kwan a wɔfaa do dzii n’asɛm no, nna ɔmmfa mbra mu koraa. (Matt. 26:59; Mark 14:56-59) Aber a Jesus bisaa dɛ, “Me Nyankopɔn, me Nyankopɔn, ɔyɛ dɛn ntsi na apa me yi?” no, obotum aba dɛ nna ɔrotwe adwen esi do dɛ, ɔnnyɛɛ adze bɔn biara a ntsi ɔsɛ dɛ woku no wɔ kwan a ɔtse dɛm do.

Aso nna Jesus rema afofor ehu dɛ ɔwɔ mu dɛ David a ɔkyerɛɛw dɛm ndwom yi hun amandze dze naaso nna ɔnnkyerɛ dɛ ɔahwer Jehovah n’enyimpa anaa? Asɛm a David bisae no nnkyerɛ dɛ nna onnyi gyedzi. Aber a obisaa asɛm a ɔtse dɛm no, ɔkɔr do nyaa ahotodo dɛ Jehovah wɔ tum a ɔdze gye no nkorɔfo, na Jehovah kɔr do hyiraa no. (Ndw. 22:23, 24, 27) Dɛmara so na aber a Jesus a ɔyɛ “David ba no” ruhu amandze wɔ asɛndua no do no, nna ɔno nnkyerɛ dɛ Jehovah nngye no nnto mu bio.—Matt. 21:9.

Aso nna Jesus reda no edzi dɛ awerɛhow ahyɛ no do osiandɛ Jehovah ammbɔ noho ban mbrɛ ɔbɛyɛ a obokura n’emudzi mu ekesi ase ntsi anaa? Ahyɛse no, nna nnyɛ Jehovah ne tsirmpɔw nye dɛ ne Ba no bohu amandze na oeewu. Iyi ho behiae aber a Adam nye Eve tseew etũa no. Nna Jesus nnyɛɛ bɔn biara, naaso nna ɔsɛ dɛ ohu amandze na owu mbrɛ ɔbɛyɛ a obesiesie nsɛm a Satan ama asoɛr no, na oeetua werdam no dze agye dza nna nyimpa ahwer no. (Mark 8:31; 1 Pet. 2:21-24) Sɛ iyi botum ayɛ yie a, nna ɔsɛ dɛ Jehovah gyaa dɛ ɔbɔbɔ Jesus noho ban ber tsiabaa bi mu. Iyi nye ber a odzi kan a Jehovah yɛɛ dɛm wɔ Jesus n’asetsena mu.

Aso nna Jesus robɔ mbɔdzen dɛ ɔbɛma n’ekyirdzifo no dze hɔn adwen esi siantsir a Jehovah maa kwan dɛ onwu wɔ asɛndua do no do anaa? * Nna Jesus nyim dɛ owu a obowu wɔ asɛndua do dɛ ɔdzebɔnyɛnyi no bɔto nyimpa piinara fintsidua. (1 Cor. 1:23) Sɛ nna Jesus n’ekyirdzifo no dze hɔn adwen si siantsir a obowui no do a, wobohu mfaso ankasa a ɔwɔ no wu no do no. (Gal. 3:13, 14) Afei nna ɔno bɛma woehu no dɛ hɔn Agyenkwa na nnyɛ dɛ ɔdzebɔnyɛnyi bi.

Ɔmmfa ho dza ɔmaa Jesus kãa dɛm asɛm yi no, ɔgyee too mu dɛ, nna dza ɔrefa mu no ka Jehovah n’apɛdze a ɔbɛma ayɛ hɔ no ho. Aber a Jesus kãa asɛm a ɔwɔ ndwom yi mu wiei ekyir ber tsiabaa bi no, ɔkãa dɛ: “Woewie!” (John 19:30; Luke 22:37) Nokwasɛm nye dɛ, Jehovah ne bambɔ a oyii fii Jesus noho mber kakraabi no maa Jesus nyaa kwan a ɔdze bowie biribiara a wɔsomaa no baa asaase do dɛ ɔmbɛyɛ no korakora. Afei so, ɔmaa nsɛm a wɔkyerɛwee faa noho “wɔ Moses mbra, nye nkɔnhyɛfo, nye ndwom no mu” no nyina nyaa ne mbamu.—Luke 24:44.