1. Ebɛn botae na yebotum dze esisi hɛn enyi do wɔ Nyankopɔn no som mu?

 OSIANDƐ yɛyɛ nokwar Christianfo ntsi yɛdɔ Jehovah paa. Dɛm ntsi, yɛpɛ dɛ yefi hɛn akoma nyina mu yɛ dza yebotum biara dze som no. Naaso, sɛ yebotum ayɛ dɛm a, no ho hia dɛ yɛdze Nyankopɔn no som mu botae ahorow sisi hɛn enyi do. Dɛm botae no bi nye dɛ yɛbɛda suban pa edzi, yebosũa biribi a ɔbɔboa hɛn ma yaayɛ pii wɔ Nyankopɔn no som mu, nye yɛbɔhwehwɛ akwan ahorow a yebotum afa do asom afofor. *

2. Ebɛnadze ntsi na ɔsɛ dɛ yɛdze Nyankopɔn no som mu botae sisi hɛn enyi do na yɛyer hɛnho dɛ yebodu ho?

² Ebɛnadze ntsi na no ho hia dɛ yɛyɛ ndzɛmba a ɔbɛma yɛasom Jehovah yie? Siantsir paa nye dɛ yɛpɛ dɛ yɛsɔ hɛn sor Egya a ɔwɔ ɔdɔ no enyi. Sɛ Jehovah hu dɛ yɛdze hɛn adomakyɛdze ridzi dwuma yie wɔ no som mu a, n’enyi gye dɛ! Ɔno da nkyɛn a, yɛpɛ dɛ yenya nkɔenyim wɔ Nyankopɔn no som mu mbrɛ ɔbɛyɛ a yebotum aboa hɛn nuanom kɛse. (1 Thess. 4:9, 10) Ɔmmfa ho mfe dodow a yɛdze asom Jehovah no, ɔsɛ dɛ yɛbɔ mbɔdzen dɛ yebenya nkɔenyim. Hom mma yɛnhwɛ mbrɛ yebesi ayɛ dɛm.

3. Dɛ mbrɛ 1 Timothy 4:12-16 ma yehu no, ebɛnadze na ɔsomafo Paul hyɛɛ Timothy nkuran dɛ ɔnyɛ?

³ Aber a ɔsomafo Paul kyerɛɛw ne krataa a odzi kan kɛmaa Timothy no, nna ɔyɛ aberantsɛ a ɔbɔ noho mbɔdzen nye asafo mu panyin a noho akokwaa. Naaso, Paul hyɛɛ no nkuran dɛ ɔnyer noho dɛ obenya nkɔenyim wɔ Nyankopɔn no som mu.  (Kenkan 1 Timothy 4:12-16.) Sɛ ehwɛ Paul n’asɛm no mu a, ibohu dɛ nna ɔpɛ dɛ Timothy nya nkɔenyim wɔ ndzɛmba ebien bi mu. Odzi kan, nna ɔpɛ dɛ Timothy da suban a ɔsɔ Nyankopɔn n’enyi tse dɛ ɔdɔ, gyedzi nye ahotsew edzi. Otsĩa ebien, nna ɔpɛ dɛ onya nkɔenyim wɔ bagua mu akenkan, afotu nye nkyerɛkyerɛ mu. Yɛbɔhwɛ nhwɛdo a Timothy yɛe no, na ɔbɔboa hɛn ma yeehu dɛ sɛ yɛdze botae a yebotum edu ho sisi hɛn enyi do a, ɔbɔboa hɛn ma yeetum asom Jehovah yie. Afei so, yɛbɔhwɛ akwan ahorow a yebotum afa do ayɛ pii wɔ Jehovah no som mu.

4. Dɛ mbrɛ Philippifo 2:19-22 ma yehu no, ebɛnadze na ɔmaa Jehovah dze Timothy dzii dwuma wɔ no som mu?

⁴ Ebɛnadze na ɔmaa Jehovah dze Timothy dzii dwuma wɔ no som mu? Ɔyɛ suban pa a nna ɔwɔ no a. (Kenkan Philippifo 2:19-22.) Mbrɛ Paul sii kãa Timothy ho asɛm no ma yehu dɛ, nna Timothy brɛ noho adze, odzi nokwar, ɔyer noho yɛ edwuma, na afofor wɔ no mu ahotodo so. Nna ɔdɔ enuanom no na ɔdwen hɔnho paa. Iyi ntsi nna Paul dɔ Timothy na ɔanntwentweɔn n’ananadze dɛ ɔdze dwumadzi akɛse bɛhyehyɛ ne nsa. (1 Cor. 4:17) Hɛn so sɛ yɛda suban pa ahorow a Jehovah n’enyi gye ho edzi a, Jehovah bɔkɔ do adɔ hɛn na ɔdze hɛn bedzi dwuma pii wɔ n’ahyehyɛdze no mu.​—Ndw. 25:9; 138:6.

5. (a) Sɛ epɛ dɛ eda suban pa pɔtsee bi edzi a, ebɛnadze na ɔsɛ dɛ eyɛ? (b) Dɛ mbrɛ yehu wɔ mfonyin no mu no, ebɛnadze na akyerɛbaa no reyɛ dze akyerɛ dɛ ɔreda tsema kɛse edzi akyerɛ afofor?

⁵ Fa suban pɔtsee bi si w’enyi do dɛ ibotu mpon wɔ mu. Bɔ mpaa na susu ho hwɛ dɛ, suban pa a ewɔ no, no mu hendze na ɔwɔ dɛ ebɔ mbɔdzen dɛ ebɛda no edzi kɛse. Fa suban pɔtsee bi si w’enyi do. Dɛ nhwɛdo no, bi a tsema a ewɔ anaa ɔpɛ a ewɔ dɛ ebɔboa wo nuanom Christianfo no, no ho behia dɛ ehyɛ mu dzen. Anaadɛ bi a ɔsɛ dɛ ebɔ mbɔdzen dɛ ebɔkɔ do ara nye afofor atsena asomdwee mu na edze hɔn mfom akyɛ hɔn. Ibotum ebisa wo nyɛnko bi a ewɔ no mu ahotodo ma ɔaaboa wo ma eehu dza ɔsɛ dɛ eyɛ ma eetum edu dɛm botae no ho. Sɛ eyɛ dɛm a, ɔbɔboa wo paa.​—Mbɛ. 27:6.

6. Ibesi dɛn ayɛ suban bi a edze esi w’enyi do no ho edwuma?

⁶ Yɛ dza edze esi w’enyi do no ho edwuma. Ebɛyɛ no dɛn? Kwan kor nye dɛ ebɔbɔ mbɔdzen esũa suban no ho adze yie. Fa no dɛ epɛ dɛ eyer woho dɛ edze afofor hɔn mfom bɛkyɛ hɔn. Dza ibotum ayɛ nye yi: Bible mu  nhwɛdo a ɔfa hɔn a wofii hɔn akoma mu dze binom hɔn mfom kyɛɛ hɔn, nye hɔn a wɔammfa afofor mfom annkyɛ hɔn no, kenkan na dwendwen ho. Yɛmfa Jesus dɛ nhwɛdo. Ofii n’akoma mu dze nkorɔfo hɔn bɔn kyɛɛ hɔn. (Luke 7:47, 48) Afei so, ɔammfa n’adwen ennsi afofor hɔn sintɔ do, mbom no ɔdze sii suban pa a wɔwɔ no do. Naaso, Phariseefo a nna wɔwɔ Jesus n’aber do no dze, nna “wommbu” afofor anaa wɔmmfa hɔn nnyɛ hwee. (Luke 18:9) Sɛ edwendwen dɛm nhwɛdo ahorow yi ho wie a, bisa woho dɛ: ‘Ebɛn suban na muhu wɔ nkorɔfo ho? No mu hendze na medze m’adwen si do?’ Sɛ ɔyɛ dzen ma wo dɛ edze obi no mfom bɛkyɛ no a, bɔ mbɔdzen kyerɛw suban pa a nyimpa no wɔ no nyina to hɔ. Afei, bisa woho dɛ: ‘Jesus hu dɛm nyimpa yi dɛn? Sɛ ɔyɛ Jesus a, nkyɛ ɔdze nyimpa yi no mfom bɛkyɛ no anaa?’ Sɛ yɛyɛ dɛm a, ɔbɔboa hɛn ma yɛdze nyimpa no mfom aakyɛ no. Bi a ahyɛse no dze, ɔbɛyɛ dzen ama hɛn dɛ yɛdze obi a ɔafom hɛn no mfom bɛkyɛ no. Naaso, sɛ yɛyer hɛnho dɛ yɛbɛyɛ dɛm a, ber rokɔ do no, ɔrennyɛ dzen mma hɛn koraa dɛ yɛdze afofor hɔn mfom bɛkyɛ hɔn.

7. Dɛ mbrɛ Mbɛbusɛm 22:29 ma yehu no, ebɛn kwan do na Jehovah dze enuanom a wɔwɔ ndwuma bi ho nyimdzee no ridzi dwuma ndɛ?

⁷ Botae fofor a ibotum dze esi w’enyi do nye dɛ ibosũa edwuma a ibotum dze aboa Jehovah n’ahyehyɛdze no. Ɔwodze, hwɛ enuanom dodow ara a wɔboa ma wosisi Bethel adan, Ehyiadzi Asa nye Ahendzi Asa. Dɛm enuanom yi mu pii wɔ hɔ a, wɔnye enuanom binom a wɔwɔ ndwuma ahorow bi ho nyimdzee bɔɔ mu yɛɛ edwuma. Na dɛm enuanom yi na wɔboaa hɔn ma hɔn so wosũaa dɛm ndwuma ahorow no. Dɛ mbrɛ yehu wɔ mfonyin no mu no, enuanom mbarimba na mbaa nyina rusũa mbrɛ wosi siesie Ehyiadzi Asa nye Ahendzi Asa. Dɛm akwan yi nye akwan afofor a ɔtsetse dɛm do na Jehovah Nyankopɔn a ɔyɛ “mbersantsen Hen” nye Jesus Christ a ɔyɛ “ahemfo Hen” no afa do reyɛ ndzɛmba akɛse. Wɔnam hɛn nuanom a wɔyɛ edwumadzen do na wɔreyɛ iyi. (1 Tim. 1:17; 6:15; kenkan Mbɛbusɛm 22:29.) Yɛpɛ dɛ yɛyer hɛnho yɛ edwuma na yɛdze nyimdzee biara a yɛwɔ no hyɛ Jehovah enyimnyam kyɛn dɛ yɛdze bɛhyɛ hɛnho enyimnyam.​—John 8:54.

8. Ibesi dɛn ehu biribi pɔtsee a ɔsɛ dɛ itu mpon wɔ mu?

⁸ Fa biribi pɔtsee a epɛ dɛ itu mpon wɔ mu no si w’enyi do. Ebɛnadze pɔtsee na epɛ dɛ itu mpon wɔ mu? Bisa w’asafo mu mpanyimfo anaa bi a ɔmansin do hwɛfo no ma wɔmboa wo ma hu biribi pɔtsee a ɔsɛ dɛ itu mpon wɔ mu. Dɛ nhwɛdo no, sɛ wɔkã kyerɛ wo dɛ ɔsɛ dɛ itu mpon wɔ mbrɛ isi ma ɔkasa na ekyerɛkyerɛ mu a, bisa hɔn ma wɔnkyerɛ wo ahwehwɛdze pɔtsee bi a ɔsɛ dɛ itu mpon wɔ mu no. Ɔno ekyir no, bɔ mbɔdzen dɛ ibotu mpon wɔ dɛm ahwehwɛdze no mu. Ibesi dɛn ayɛ iyi?

9. Ibesi dɛn ayɛ dza edze esi w’enyi do no ho edwuma?

⁹ Yɛ dza edze esi w’enyi do no ho edwuma. Fa no dɛ epɛ dɛ itu mpon wɔ wo nkyerɛkyerɛ mu. Sɛ dɛm a, sũa Ma W’enyi Nku Akenkan Na Nkyerɛkyerɛ Ho nwomaba no yie. Sɛ wɔma wo dwumadzi wɔ dapɛn finimfin nhyiamu ase a, ibotum edzi kan ayɛ dwumadzi no akyerɛ onua bi a noho akokwaa na ama ɔaakyerɛ wo beebi a ɔsɛ dɛ itu mpon wɔ mu. Dzi kan sũa wo dwumadzi no yie ama wo mbɔdzembɔ aada edzi na enuanom ehu dɛ wobotum dze hɔnho ato wo do.​—Mbɛ. 21:5; 2 Cor. 8:22.

10. Ma nhwɛdo a ɔkyerɛ mbrɛ yebesi etu mpon wɔ biribi a yɛdze esi hɛn enyi do mu.

¹⁰ Sɛ ihu dɛ dza edze esi w’enyi do dɛ ebɛyɛ no yɛ dzen ma wo so ɛ? Mma mmpa abaw! Nna onua bi a wɔfrɛ no Garry n’akenkan nnyɛ papa. Mber bi a woetwa mu no, sɛ nna ɔrekenkan  adze wɔ asafo nhyiamu ase a, nna ɔfɛr. Naaso, ɔbɔɔ mbɔdzen dɛ obotu mpon wɔ n’akenkan mu. Ndɛ, asɛm a ɔkã nye dɛ mboa a onyae fii enuanom hɔ nye asafo nwoma mu no aboa no ma otum ma ɔkasa wɔ Ahendzi Asa do, ɔmansin nye ɔmantɔw ehyiadzi ase!

11. Dɛ mbrɛ Timothy yɛe no, ebɛnadze na obotum aboa hɛn ma yaayɛ pii wɔ Jehovah no som mu?

¹¹ Aso Timothy bɛyɛɛ obi a onyim ɔkasa ma na ne nkyerɛkyerɛ tu mpon? Bible no nnkã ho asɛm. Naaso, ɔda edzi kofee dɛ aber a Timothy dze Paul n’afotu no yɛɛ edwuma no, otumii yɛɛ dwumadzi a nna ɔhyehyɛ ne nsa no yie. (2 Tim. 3:10) Hɛn so, sɛ yɛbɔ mbɔdzen dɛ yebotu mpon wɔ ndzɛmba ahorow bi mu a, yebotum ayɛ pii wɔ Jehovah no som mu.

12. Ebɛn mboa na enuanom binom dze ama wo?

¹² Enuanom yɛ ndzɛmba ahorow pii dze boa hɛn. Dɛ nhwɛdo no, sɛ yɛyar kɛda ayarsabea, na mpanyimfo a wɔwɔ Ayarsabea Ntamu Nkitahodzi Egyinatukuw anaa Ayarfo Nserahwɛ Kuw mu no bɛsera hɛn a, hɛn enyi gye paa. Afei, sɛ yerihyia nsɛndzendzen bi, na yɛkã ho asɛm kyerɛ asafo mu panyin bi, na onya abotar tsie hɛn na ɔkã nsɛm bi dze kyekye hɛn werɛ a, ɔma hɛn akoma tɔ hɛn yamu. Bio so, sɛ yehia mboa bi ama yeetum ayɛ hɛn Bible adzesua na ɔkwampaaefo bi a noho akokwaa nye hɛn kɛyɛ adzesua no na ɔma hɛn nyansahyɛ a, ɔma hɛn enyi gye. Sɛ dɛm enuanom yi boa hɛn a, ɔma hɔn enyi gye. Dɛmara na hɛn so sɛ yɛpɛ dɛ hɛn enyi gye a, ɔsɛ dɛ yɛyɛ krado aber biara dɛ yɛbɔsom hɛn nuanom. Jesus kãa dɛ: “Ɔma yɛ nhyira kyɛn ɔgye.” (Andw. 20:35) Sɛ epɛ dɛ efa dɛm akwan yi do anaa akwan afofor do yɛ pii wɔ Jehovah no som mu a, ebɛnadze na obotum aboa wo?

13. Sɛ epɛ dɛ edze botae bi si w’enyi do a, ebɛnadze na ɔsɛ dɛ eyɛ?

¹³ Mma nnkã no kɛkɛ dɛ epɛ dɛ eyɛ pii wɔ Jehovah no som mu, mbom fa botae pɔtsee bi si w’enyi do. Dɛ nhwɛdo no, bi a ebɛkã no kɛkɛ dɛ, ‘Mepɛ dɛ meyɛ pii wɔ asafo no mu.’ Naaso osiandɛ annkyerɛ botae pɔtsee bi a epɛ dɛ idu ho ntsi, bi a ɔbɛyɛ dzen dɛ ibohu mbrɛ ibesi edu ho, anaadɛ idu ho mpo a irunnhu. Ntsi fa botae pɔtsee bi si w’enyi do. Bi a no ho behia mpo dɛ ekyerɛw botae a epɛ dɛ idu ho no nye dza epɛ dɛ eyɛ ama eetum edu ho no to hɔ.

14. Sɛ yɛdze botae risisi hɛn enyi do a, ebɛnadze ntsi na ɔnnsɛ dɛ yenya adwen dɛ mbrɛ ɔtse biara yebotum edu ho?

¹⁴ Sɛ yɛdze botae risisi hɛn enyi do a, ɔnnsɛ  dɛ yenya adwen dɛ mbrɛ ɔtse biara yebotum edu ho. Ebɛnadze ntsi a? Osiandɛ yennyim ɔkyena asɛm. Yɛmfa dza ɔtoo ɔsomafo Paul no dɛ mfatoho. Ɔboae ma wɔtseew asafo wɔ Thessalonica. Yebotum akã paa dɛ dza nna osi n’enyi do nye dɛ ɔbɛtsena kurow no mu na ɔaaboa enuanom a wɔwɔ asafo fofor yi mu no. Naaso awerɛhosɛm nye dɛ, asoɛrtsiafo yɛɛ araa ma Paul fii kurow no mu. (Andw. 17:1-5, 10) Sɛ Paul emmfi kurow mu hɔ a, nkyɛ ɔdze no nuanom no nkwa bɔto esian mu. Naaso, Paul ammpa abaw. Mbom no, ɔgyee tsebea no too mu. Ekyir yi, ɔsomaa Timothy dɛ ɔnkɛhyɛ enuanom a wɔwɔ Thessalonica no hɔn gyedzi dzen. (1 Thess. 3:1-3) Enuanom a wɔwɔ Thessalonica no enyi gyee paa dɛ Timothy fii ne pɛ mu dɛ ɔbɔsom wɔ beebiara a mboa ho hia no!

15. Sɛ hɛn nsɛm tsebea sesa a, ebɛn kwan do na obotum asesa botae bi a yɛdze esi hɛn enyi do no? Ma ho nhwɛdo.

¹⁵ Dza ɔtoo Paul wɔ Thessalonica no, yebotum esũa biribi efi mu. Bi a yɛdze botae bi besi hɛn enyi do, naaso hɛn nsɛm tsebea botum asesa ma wɔaayɛ dzen ama hɛn dɛ yebodu botae a ɔtse dɛm ho. (Ɔsɛnk. 9:11) Sɛ dɛm na ɔtse wɔ w’afamu a, bɔ mbɔdzen fa botae fofor a ibotum edu ho si w’enyi do. Dɛm na Ted na ne yer Hiedi yɛe. Hɔn apɔwmudzen ntsi no ho behiaa dɛ wofi Bethel. Naaso osiandɛ wɔdɔ Jehovah ntsi, wɔhwehwɛɛ akwan afofor a wobotum afa do ayɛ pii wɔ Jehovah no som mu. Wofii Bethel no, dza wodzii kan yɛe nye dɛ wɔdze hɔnho hyɛɛ daa akwampaae edwuma no mu. Ekyir yi, wɔbɛyɛɛ akwampaaefo etsitsir, na ber kɔr do no Ted nyaa ntsetsee a nna ɔbɛma oetum akɛhyɛ ɔmansin do hwɛfo bi ananmu asom. Ɔno ekyir no, ahyehyɛdze no yɛɛ nsesa wɔ mfe a obi dzi a orunntum nnsom dɛ ɔmansin do hwɛfo no mu. Ted na Hiedi bohun dɛ osian hɔn mfe ntsi worunntum nnyɛ dɛm edwuma no. Ɔwɔ mu dɛ iyi maa hɔn abaw mu bui dze, naaso wobohun dɛ wobotum afa akwan afofor do asom Jehovah. Ted kãa dɛ: “Yeebohu dɛ yebotum afa akwan pii do asom Jehovah.”

16. Ebɛn esuadze na yebotum enya efi Galatiafo 6:4 no mu?

¹⁶ Obi nnyim dza obesi ɔkyena; yɛrekã yi ara ho kwan bi a yɛwɔ no botum efi hɛn nsa. Naaso, ɔsɛ dɛ yɛkaa dɛ ɔnnyɛ ɔsom ho kwan a yɛwɔ no na ɔma yɛsom bo ma Jehovah. Afei so, ɔnnsɛ dɛ yɛdze ho kwan a yɛwɔ no toto dza afofor wɔ ho. Hiedi kãa dɛ: “Sɛ edze dza ɔrokɔ do wɔ w’asetsena mu no toto afofor dze ho a, obotum asɛɛ w’enyigye.” (Kenkan Galatiafo 6:4.) No ho hia paa dɛ yɛhwehwɛ akwan ahorow a yebotum afa do asom Jehovah na yaaboa hɛn nuanom. *

17. Sɛ epɛ dɛ inya ho kwan yɛ pii wɔ Jehovah no som mu a, ebɛnadze na ibotum ayɛ no seseiara?

 ¹⁷ Sɛ epɛ dɛ inya ho kwan yɛ pii wɔ Jehovah no som mu a, ɔsɛ dɛ ema w’asetsena ba famu na ɔnnsɛ dɛ ekɛfa kaw gyangyan biara bɔto woho do. Ibotum dze botae a ibodu ho ber tsiabaa bi mu no esisi w’enyi do. Iyi botum aboa wo ma botae a ɔbɛgye wo ber tsentsen ana eedu ho no, etum edu ho. Dɛ nhwɛdo no, sɛ wo botae paa nye dɛ ebɛyɛ daa kwampaaefo a, ana ibotum ayɛ akwampaae boafo edwuma no atoa do abosoom dodow bi? Sɛ eso wo botae nye dɛ ebɛyɛ asafo mu somfo a, ana ibotum dze mber pii ayɛ asɛnka edwuma no, anaa akɛserasera enuanom a wɔyar nye hɔn a hɔn mfe akɔ enyim a wɔwɔ w’asafo mu no? Sɛ eyɛ dɛm a, ɔbɛma enya suahu, na iyi bɔboa wo ma aafata ama ɔsom ho kwan ahorow daakye. Si wo bo dɛ ebɛyer woho wɔ edwuma biara a wɔdze bɛhyɛ wo nsa no mu.​—Rom. 12:11.

18. Dɛ mbrɛ yehu wɔ mfonyin no mu no, ebɛnadze na isũa fi dza akyerɛbaa Beverley yɛe no mu?

¹⁸ Mma nnya adwen dɛ enyin dodow ntsi irunntum mmfa botae nnsi w’enyi do wɔ Nyankopɔn no som mu na inndu ho. Hom mma yɛnhwɛ hɛn akyerɛbaa bi a oedzi mfe 75 a wɔfrɛ no Beverley. Yarba bi a no mu yɛ dzen bɔɔ no ma ɔno ntsi nna onntum nnantsew papa. Naaso, nna ɔpɛ paa dɛ ɔyɛ pii wɔ Nkaadzi ho ɔsatu no mu. Ntsi ɔdze botae pɔtsee bi sii n’enyi do. Aber a Beverley dur no botae no ho no, n’enyi gyee tam. Dza ɔyɛe no hyɛɛ enuanom afofor nkuran ma hɔn so wɔyeer hɔnho wɔ asɛnka edwuma no mu. Ɔwɔ mu dɛ hɛn nuanom a hɔn mfe akɔ enyim no nntum nnyɛ pii dze, naaso kakra a wotum yɛ no, Jehovah n’enyi sɔ paa.​—Ndw. 71:17, 18.

19. Ebɛn botae na yebotum dze esisi hɛn enyi do wɔ Nyankopɔn no som mu?

¹⁹ Fa botae a ibotum edu ho sisi w’enyi do. Da suban a ɔbɛma Jehovah adɔ wo edzi. Sũa biribi a ɔbɔboa wo ma eetum ayɛ pii ama Nyankopɔn nye n’ahyehyɛdze no. Hwehwɛ akwan ahorow a ibotum afa do aboa wo nuanom. * Tse dɛ Timothy no, Jehovah behyira wo “na wo mpontu aada edzi wɔ” nyimpa nyina enyim.​—1 Tim. 4:15.