Wɔkyerɛ ntam ase dɛ “obi bɛfrɛ Nyankopɔn dɛ ne dasefo dze akã enyibersɛm bi, anaa ɔdze abɔ anohoba bi dɛ ɔbɛyɛ biribi.” Yebotum dze hɛn ano akã ntam anaadɛ yɛakyerɛw ato hɔ.

Jesus kãa dɛ: “Mma hom nnkã ntam koraa . . . Hom mma hom Nyew, nyɛ Nyew; na hom Oho, nyɛ Oho; osiandɛ biribi a ɔkyɛn yinom no fi bɔn mu.” (Matt. 5:33-37, Baebor) Dɛm asɛm a Jesus kãa yi ntsi, nyimpa binom botum enya adwen dɛ ɔnnsɛ dɛ yɛkã ntam. Dza ɔwɔ mu nye dɛ, nna Jesus nyim paa dɛ Moses Mbra no hwehwɛ dɛ Israelfo no kã ntam ahorow bi. Afei so, nna onyim dɛ ber bi a abɛsen kɔ no, Nyankopɔn n’asomfo anokwafo binom kãa ntam. (Gen. 14:22, 23; Ex. 22:10, 11) Iyi da nkyɛn a, nna Jesus nyim dɛ ɔyɛ mpo a, Jehovah nankasa koraa kã ntam. (Heb. 6:13-17) Ntsi, dza nna Jesus rekã no nnkyerɛ dɛ yerunntum nnkã ntam koraa. Mbom nna ɔrobɔ hɛn kɔkɔ dɛ mma yɛnnkã ntanhun anaa yenngyina ndzɛmba a no ho nnhia do nnkã ntam. Sɛ yɛkã ntam a, ɔsɛ dɛ yedzi do, osiandɛ dɛm pɛpɛɛpɛ na Jehovah pɛ dɛ yɛyɛ.

Naaso, sɛ tsebea bi hwehwɛ dɛ ekã ntam a, ebɛnadze na ɔsɛ dɛ eyɛ? Odzi kan no, ɔsɛ dɛ ihu dɛ ibotum edzi ntam a erebɛkã no do. Sɛ enngye nndzi dɛ ibotum edzi ntam a erebɛkã no do a, ɔnodze mma nnkã koraa. Nyankopɔn n’Asɛm no bɔ hɛn kɔkɔ dɛ: “Ɔfanyim dɛ ennkɔbɔ anohoba, sen dɛ ebɔbɔ anohoba na innkotua.” (Ɔsɛnk. 5:5) Afei, hwehwɛ Bible mu afotusɛm a ɔfa ntam no ho, na gyina dza esũa efi Kyerɛwnsɛm no mu no do fa wo tsibowa si ho gyinae. Bible mu afotusɛm no bi nye hendze?

Ntam bi wɔ hɔ a ɔnye Nyankopɔn ne pɛ hyia. Dɛ nhwɛdo no, sɛ Jehovah Adasefo rowar a, wɔkã ntam. Ɔbarimba na ɔbaa no nyina kã ntam wɔ Nyankopɔn nye nyimpa a woehyia mu wɔ hɔ no enyim dɛ, “ber tsentsen a hɔn beenu bɛtsena ase abɔ mu wɔ asaase do no, wɔbɔdodɔ hɔnho, wɔbobu hɔnho na obiara bɔhwɛ ne nyɛnko yie.” (Binom wɔ hɔ a, nnyɛ dɛm nsɛm pɔtsee yi na wɔkã aber a wɔrowar no, naaso mbrɛ ɔtse biara wɔkã awar ntam wɔ Nyankopɔn enyim.) Ɔno ekyir no, wɔda hɔn edzi kyerɛ hɔn a wɔwɔ hɔ no dɛ wɔyɛ awarfo a ɔsɛ dɛ wɔtsena bɔ mu afebɔɔ. (Gen. 2:24; 1 Cor. 7:39) Awar ho ntam no yɛ nhyehyɛɛ pa, na ɔnye Nyankopɔn ne pɛ hyia.

Ntam bi wɔ hɔ a ɔnye Nyankopɔn ne pɛ nnhyia. Ntam bi wɔ hɔ a nokwar Christiannyi rennkã da. Bi nye dɛ ɔbɛkã dɛ ɔdze akodze bɔkõ ama ne man. Anaadɛ ɔbɛkã ntam dɛ ɔnngye Nyankopɔn nndzi bio. Sɛ Christiannyi bi yɛ dɛm a, ɔkyerɛ dɛ oebu Nyankopɔn ne mbra do. Nokwar Christianfo “mmfi wiadze.” Dɛm ntsi, yɛmmfa hɛnho nnhyehyɛ ekyingyegye nye akodzi a ɔkɔ do wɔ wiadze yi mu no mu.​—John 15:19; Isa. 2:4; Jas. 1:27.

 Ntamkã bi wɔ hɔ a, ɔyɛ tsibowa ho asɛm. Ɔtɔfabi a, ansaana yɛbɛkã ntam bi no, ɔsɛ dɛ yɛma asɛm a Jesus etu hɛn fo dɛ yɛndan “dza ɔyɛ Caesar dze mma Caesar, na dza ɔyɛ Nyankopɔn dze mma Nyankopɔn” no tsena hɛn adwen mu. Ntsi, sɛ yɛrebɛkã ntam bi a, bi a no ho behia dɛ yedzi kan susu dɛm afotu no ho yie ansaana yɛakã.​—Luke 20:25.

Dɛ nhwɛdo no, yɛmmfa no dɛ Christiannyi bi pɛ dɛ onya tum krataa a ɔbɛma oetum atsena ɔman fofor bi mu dɛ ɔmamba, anaadɛ ɔpɛ dɛ ɔkɛyɛ passport. Bi a wɔbɛkã akyerɛ no dɛ ɔsɛ dɛ ɔkã ntam dze kyerɛ dɛ ɔbɔkɔ do edzi ɔman no nokwar na ɔbɔboa ɔman no. Sɛ ntam a ɔman no pɛ dɛ ɔkã no bɛma oebu Nyankopɔn ne mbra do a, osian dza oesũa efi Bible mu no ntsi ne tsibowa remma no kwan. Wɔ tsebea a ɔtse dɛm mu no, bi a aban no botum ama no kwan ma ɔaasesa nsɛm a ɔbɛkã wɔ ntam no mu no, amma ne tsibowa annhaw no.

Sɛ Christiannyi bi kã ntam a wɔayɛ nsesa wɔ mu yi a, ɔkyerɛ dɛ oridzi asɛm a ɔwɔ Romefo 13:1 no do. Hɔ kã dɛ: “Hom mma akra nyina mbrɛ hɔnho adze mma etum a ɔkrɔn.” Dɛm ntsi, Christiannyi no botum esi gyinae dɛ sɛ Nyankopɔn ama kwan dɛ yentsie etumfo no dze a, ɔno onndzii mfom biara.

Bio so, no ho hia paa dɛ yɛdze hɛn tsibowa yɛ edwuma ber a wɔakã akyerɛ hɛn dɛ yɛmfa biribi nkã ntam, anaa yɛnyɛ asɛnkyerɛdze bi aber a yerekã ntam no. Nna Romefo nye Scythiafo suo hɔn mfõwa mu dze kã ntam kyerɛ hɔn bosom bi a odzi akõ. Nna wɔyɛ dɛm dze kyerɛ hɔn nokwardzi. Greekfo so, sɛ nna wɔrekã ntam a, wɔma hɔn nsa do wɔ sor. Nna wɔyɛ dɛm dze kyerɛ dɛ wɔgye to mu dɛ tum bi wɔ sor a ɔtse asɛm na ohu dza nyimpa yɛ, na ɔnoara so na nyimpa bobu akontaa akyerɛ no.

Yenyim paa dɛ sɛ obi yɛ Jehovah no somfo a, ɔremmfa ɔman n’asɛnkyerɛdze a wɔdze dzi dwuma wɔ ator som mu no nnkã ntam. Naaso, fa no dɛ akɔ kɔɔt, nna wɔse fa Bible kã ntam dɛ ebɛkã nokwar. Sɛ ɔba no dɛm a, ebɛnadze na ɔsɛ dɛ eyɛ? Sɛ edze Bible no kã ntam wɔ tsebea a ɔtse dɛm mu a, ennyɛɛ bɔn. Ebɛnadze ntsi a? Sɛ yɛhwɛ Kyerɛwnsɛm no mu a, yehu dɛ Nyankopɔn n’asomfo anokwafo binom suoo ndzɛmba bi mu dze kãa ntam. (Gen. 24:2, 3, 9; 47:29-31) Dza ohia paa a ɔsɛ dɛ yɛkaa nye dɛ, sɛ yɛkã ntam a ɔtse dɛm a, nna yɛrekã akyerɛ Nyankopɔn dɛ yɛbɛkã asɛm no mu nokwar a yenyim nyina. Dɛm ntsi, asɛm biara a wobebisa hɛn no, ɔsɛ dɛ yɛkã nokwar a ɔwɔ mu no.

Ebusuabɔ a yɛnye Jehovah wɔ no ho hia hɛn paa. Ntsi sɛ yerebɛkã ntam bi a, ɔsɛ dɛ yɛbɔ mpaa na yesusu ho yie ansaana yɛakã. Afei so, ɔsɛ dɛ yɛhwɛ hu dɛ ntam a ɔtse dɛm no remma hɛn tsibowa nnhaw hɛn, na onntsia Bible mu mbra biara so. Sɛ isi gyinae dɛ ebɛkã ntam a, hwɛ hu dɛ ibedzi do.​—1 Pet. 2:12.