1. Aber a Jesus yɛɛ n’anwanwadze a odzi kan no, nna ebɛnadze na ɔrokɔ do?

 TWA asɛm yi ho mfonyin hwɛ. Osii aber a Jesus hyɛɛ no som edwuma ase wɔ afe 29 H.B. n’ewiei hɔ beebi no. Jesus nye ne maame Mary nye Jesus n’esuafo no mu bi kɔr ayeforhyia bi ase wɔ ekuraase bi a wɔfrɛ hɔ Cana. Nna dɛm ekuraase yi da Jesus no kurow Nazareth n’etsifi afamu. Ebusua a nna wɔreyɛ ayefor no, nna Mary yɛ hɔn nyɛnko, ntsi obotum aba dɛ nna ɔroboa hɔn ma wɔaahwɛ ahɔho a wɔaba no. Naaso aber a ayefor no rokɔ do no, biribi sii a nkyɛ obotum egu awarfo no nye hɔn ebusua no enyim ase pɔtɔɔ. Nsa a wɔdze reyɛ ayefor no sae. b Ɔbɛyɛ dɛ hɔn a wɔbaa ayeforhyia no ase no, nna wɔbor nyimpa dodow a wɔrohwɛ kwan dɛ wɔbɛba no do koraa. Hɔ no ara na Mary kɔr Jesus hɔ kɛkaa kyerɛɛ no dɛ: “Hɔn nsa asa.” (John 2:1-3) Ebɛnadze na Jesus yɛe wɔ asɛm no ho? Ɔyɛɛ biribi a ɔyɛ nwanwa paa! Ɔno nye dɛ, ɔdaan nsu ma ɔyɛɛ “nsa papa.”​—John 2:9, 10.

2-3. (a) Ebɛn anwanwadze ahorow bio na Jesus yɛe? (b) Sɛ yesusu anwanwadze ahorow a Jesus yɛe no ho a, ebɛn mfaso na yebenya efi mu?

² Nnyɛ anwanwadze a yɛaka ho asɛm yi nkotsee na Jesus yɛe. Ɔyɛɛ pii kaa ho aber a nna ɔreyɛ no som edwuma no. c Ɔdze tum a ɔwɔ no boaa nyimpa mpempem pii. Dɛ nhwɛdo no, ber bi Jesus maa mbarimba 5,000 edziban na ɔno ekyir  no ɔsanee maa mbarimba 4,000 edziban. Sɛ yɛdze mbofra na mbasiafo a nna wɔwɔ hɔ no nyina bɔ mu a, ɔbɛyɛ dɛ hɔn a Jesus maa hɔn edziban no dodow bɔbor 27,000. (Matt. 14:15-21; 15:32-38) Mpɛn ebien a Jesus yɛɛ dɛm anwanwadze no, ɔsaa hɔn a nna wɔyar wɔ hɔn mu so yarba. (Matt. 14:14; 15:30, 31) Hwɛ mbrɛ nyimpadodow no enyi sii gyee fae aber a Jesus nam anwanwa kwan do saa hɔn yarba na ɔmaa hɔn edziban no!

³ Yebotum esua ndzɛmba pii efi anwanwadze ahorow a Jesus yɛe no mu. Adzesua yi mu no, yɛbɔhwɛ esuadze ahorow a ɔhyɛ gyedzi dzen a yebotum enya efi anwanwadze ahorow a Jesus yɛe no mu. Afei so, yɛbɔhwɛ dza yebotum ayɛ dze esuasua ahobrɛadze nye tsema a Jesus daa no edzi aber a nna ɔreyɛ anwanwadze ahorow no.

4. Anwanwadze ahorow a Jesus yɛe no ma yenya woananom ho esuadze a ɔhyɛ gyedzi dzen?

⁴ Anwanwadze ahorow a Jesus yɛe no ma yesua biribi a ɔhyɛ gyedzi dzen fa ɔno na n’Egya ho. Nyew, yesua biribi fa Jehovah ho, osiandɛ ɔno na ɔmaa Jesus tum ma ɔyɛɛ dɛm anwanwadze ahorow no. Asomafo Ndwuma 10:38 ka dɛ: “Nyankopɔn dze sunsum krɔnkrɔn nye ahoɔdzen seraa [Jesus], na okyinii yɛɛ yie, na ɔyɛɛ hɔn a Abɔnsam dzi hɔn do tum no nyina edur, osiandɛ Nyankopɔn ka no ho.” Afei so, kaa dɛ nsɛm a Jesus kae nye dza ɔyɛe a anwanwadze ahorow no ka ho no ma yehu mbrɛ Jehovah si susu ndzɛmba ho, nye mbrɛ osi tse nka ankasa. (John 14:9) Hom mma yɛnhwɛ ndzɛmba ebiasa bi a yebotum esua efi anwanwadze ahorow a Jesus yɛe no mu.

5. Ebɛnadze na okenyaan Jesus ma ɔyɛɛ anwanwadze ahorow no? (Matthew 20:30-34)

⁵ Esuadze a odzi kan nye dɛ, Jesus na n’Egya dɔ hɛn paa. Aber a Jesus wɔ asaase do no, ɔdze tum a ɔwɔ no boaa hɔn a nna woruhu amandze no dze kyerɛɛ dɛ ɔdɔ nyimpa paa. Dɛ nhwɛdo no, ber bi, enyifurafo beenu bi serɛɛ no dɛ ɔnsa hɔn yarba. (Kenkan Matthew 20:30-34.) Hyɛ no nsew dɛ Jesus “ne yamu hyehyee no” maa hɔn na ɔsaa hɔn yarba. Greek nyɛe kasafua a wɔkyerɛɛ ase wɔ ha dɛ “ne yamu hyehyee no” no, ɔkyerɛ tsema a no mu yɛ dzen a obi nya wɔ no mu. Sɛ obi wɔ tsema a ɔtse dɛm a, ɔkyerɛ dɛ ɔwɔ ɔdɔ, na dɛm su yi na okenyaan Jesus ma ɔmaa hɔn a ɔkɔm dze hɔn no edziban na ɔsaa kwatanyi bi yarba no. (Matt. 15:32; Mark 1:41) Yebotum enya awerɛhyɛmu dɛ, Jehovah a ɔyɛ “mbɔbɔrhu” Nyankopɔn nye ne Ba no dɔ hɛn paa, na sɛ wohu dɛ yeruhu amandze a, ɔyɛ hɔn yaw. (Luke 1:78; 1 Pet. 5:7) Iyi ma yehu dɛ, wɔpɛ paa dɛ woyi ɔhaw a adasamba rihyia no nyina fi hɔ koraa!

6. Ebɛn tum na Nyankopɔn dze ama Jesus?

⁶ Esuadze a otsia ebien nye dɛ, Nyankopɔn ama Jesus tum a ɔdze beyi adasamba haw nyina efi hɔ. Anwanwadze ahorow a Jesus yɛe no da no edzi dɛ ɔwɔ tum a ɔdze beyi ɔhaw ahorow a ɔbor nyimpa n’ahoɔdzen do nyina efi hɔ. Dɛ nhwɛdo no, ɔwɔ tum a ɔdze beyi ɔhaw a bɔn a wɔdze woo hɛn no dze aba hɛn do no nyina efi hɔ. Ɔhaw no mu bi nye yarba nye owu. (Matt. 9:1-6; Rom. 5:12, 18, 19) Anwanwadze ahorow a ɔyɛe no ma yehu dɛ obotum asa yarba ahorow “nyina,” na oeenyan hɔn a woewuwu mpo. (Matt. 4:23; John 11:43, 44) Afei so, Jesus botum ama ehum akɛse ayɛ dzinn na obotum so etu esunsum fi. (Mark 4:37-39; Luke 8:2) Nyim a yenyim dɛ Jehovah dze tum a ɔtse dɛm ama ne Ba no ma hɛn akoma tɔ hɛn yamu paa!

7-8. (a) Ebɛn awerɛhyɛmu na anwanwadze a Jesus yɛe no ma yenya? (b) Ebɛn anwanwadze paa na erohwɛ kwan dɛ obesi wɔ wiadze fofor no mu?

⁷ Esuadze a otsia ebiasa nye dɛ, yebotum enya awerɛhyɛmu a osi pi dɛ ndzɛmba pa a Bible no ahyɛ ho bɔ dɛ Nyankopɔn n’Ahendzi no dze bɛba  no, ne nyina bɛba mu kwan biara do. Anwanwadze ahorow a Jesus yɛe ber a ɔwɔ asaase do no ma yehu dɛ, dɛ Nyankopɔn n’Ahendzi no do Hen no, ɔbɛyɛ ndzɛmba akɛse pii wɔ asaase do nyina daakye. Ɔwodze ma yɛnhwɛ ndzɛmba pa a ɔrennkyɛr yebenya wɔ Christ no tumdzi ase no. Bi nye dɛ, obeyi nyarba nye dzɛm biara a ɔhaw adasamba no efi hɔ, na iyi bɛma yeenya apɔwmudzen a odzi mu. (Isa. 33:24; 35:5, 6; Nyi. 21:3, 4) Ɔkɔm renndze obiara bio na atoyerɛnkyɛm so renntseetsee hɛn. (Isa. 25:6; Mark 4:41) Afei so, yɛbɛma hɛn adɔfo a ‘wɔwɔ nkaa nda mu nyina’ akɔaba, na iyi bɛma hɛn enyi agye paa. (John 5:28, 29) Sɛ wobisa wo dɛ, ebɛn anwanwadze paa na erohwɛ kwan dɛ obesi wɔ wiadze fofor no mu a, nkyɛ ebɛka dɛn?

⁸ Ber a Jesus reyɛ anwanwadze no, ɔdaa su ebien bi edzi a ɔsɛ dɛ yesuasua. Dɛm su no nye ahobrɛadze na tsema. Ma yɛnhwɛ anwanwadze ahorow no mu ebien. Yɛmfa dza ɔyɛe wɔ ayeforhyia a ɔkɔr do wɔ Cana no nhyɛ ase.

9. Ebɛnadze na Jesus yɛe wɔ ayeforhyia no ase? (John 2:6-10)

⁹ Kenkan John 2:6-10. Aber a nsa no sae wɔ ayeforhyia no ase no, nna ɔnnyɛ nhyɛ dɛ ɔsɛ dɛ Jesus yɛ ho biribi, anaa? Nna nkɔnhyɛ biara nnyi hɔ a ɔka dɛ Messiah no bɛfa anwanwa kwan do ayɛ nsa. Naaso ɔwodze, fa no dɛ ɔyɛ w’ayeforhyia ase na nsa a wɔrekyekyɛ no asa. Nkyɛ w’adwen nyina botu afora, anaa ɔnntse dɛm? Ntsi asɛm a ɔtoo ebusua no, nkanka okun  na ɔyer no, ɔbɛyɛ dɛ ɔyɛɛ Jesus mbɔbɔr. Ntsi, nna ɔpɛ dɛ ɔyɛ biribi boa hɔn amma hɔn enyim eenngu ase, na dɛmara so na ɔyɛe. Ɔyɛɛ anwanwadze a yeedzi kan aka ho asɛm no. Ɔdaan nsu bɛyɛ galɔn 103 (lita 390) ma ɔyɛɛ nsa papa. Ɔbɛyɛ dɛ nna nsa no dɔɔ so araa ma nna bi mpo botum aka ma wɔdze aayɛ biribi fofor ekyir yi. Anaa mpo dɛ nna awarfo no botum atɔn na wɔdze ahwɛ hɔnho. Dza Jesus yɛe yi maa awarfo no enyi gyee na hɔn akoma tɔɔ hɔn yamu!

10. Nsɛntsitsir a ɔwɔ John tsir 2 no, no mu bi nye dɛn? (Hwɛ mfonyin no so.)

¹⁰ Ma yɛnhwɛ nsɛntsitsir bi so a ɔwɔ John tsir 2 no mu. Ehyɛɛ no nsew dɛ nnyɛ Jesus nankasa na ɔdze nsu no guu abo esuhina no mu, mbom asomfo no na ɔmaa wɔyɛɛ dɛm? Ɔyɛɛ dɛm mbrɛ ɔbɛyɛ a ɔronntwetwe adwen mmba noho do. (Nyiyimu 6, 7) Afei so, aber a Jesus daan nsu no ma ɔyɛɛ nsa no, nnyɛ ɔnoara na ɔdze bi kɛmaa obi a ɔhwɛ edziban do no, mbom ɔdze maa asomfo no ma wɔdze kɔree. (Nyiyimu 8) Yebotum aka paa dɛ Jesus ammfa nsa no bi ennkegyina ahɔho no enyim na oenndwa n’anomu dɛ, ‘Obiara nka me nsa yi bi nhwɛ, seseiara na meyɛe!’

11. Ebɛnadze na yebotum esua efi anwanwadze a Jesus yɛe no mu?

¹¹ Anwanwadze a Jesus yɛe a yɛaka ho asɛm yi, ebɛnadze na yebotum esua efi mu? Ɔno nye dɛ, ɔsɛ dɛ yɛbrɛ hɛnho adze. Jesus ammfa anwanwadze a ɔyɛe yi enntuw noho. Nokwasɛm nye dɛ, ndzɛmba ahorow a ɔyɛe nyina, ɔammfa no mu biara enntuw noho da! Mbom ɔbrɛɛ noho adze, na ɔkɔr do dze dza ɔyɛe nyina no ho enyimnyam nye ayɛyi maa n’Egya. (John 5:19, 30; 8:28) Sɛ yesuasua Jesus na yɛbrɛ hɛnho adze a, biribiara nnyi hɔ a yɛbɛyɛ a yɛdze botuw hɛnho da. Ntsi, ɔnnsɛ dɛ yɛdze biribiara a yɛbɛyɛ wɔ Jehovah no som mu no tuw hɛnho. Mbom hokwan a yeenya dɛ yɛrosom Nyankopɔn a ne yamu ye no, ɔno na ɔsɛ dɛ yɛdze tuw hɛnho. (Jer. 9:23, 24) Ɔsɛ dɛ yɛdze enyimnyam nye ayɛyi a ɔsɛ fata Jehovah no ma no. Yɛreka yi ara, sɛ ɔammboa hɛn a, adze papa biara nnyi hɔ a yebotum ayɛ.​—1 Cor. 1:26-31.

12. Adze fofor a yebotum ayɛ dze esuasua ahobrɛadze a Jesus daa no edzi no nye dɛn? Ma ho nhwɛdo.

¹² Ma yɛnhwɛ adze fofor a yebotum ayɛ dze esuasua ahobrɛadze a Jesus daa no edzi no. Hom mma yɛnyɛ dɛm nhwɛdo yi: Fa no dɛ asafo mu panyin bi agye ber pii dze aboa asafo mu somfo bi a ɔrebɛma ne bagua mu ɔkasa a odzi kan. Osiandɛ panyin no boaa no ntsi, asafo mu somfo no ne kasa no kɔr yie. Nna ɔhyɛ nkuran, na enuanom no so enyi gyee ho paa. Aber a wɔpoon adzesua no, onua bi baa asafo mu panyin no ne nkyɛn bɛkaa kyerɛɛ no dɛ: ‘Innhu dɛ Onua Osimesi yɛɛ adze paa?’ Ana ɔsɛ dɛ asafo mu panyin no ka dɛ: ‘Oh ɔyɛɛ adze, naaso mara na megyee ber boaa no’? Anaa ɔsɛ dɛ ɔpanyin no kyerɛ dɛ ɔbrɛ noho adze na ɔka dɛ: ‘Nyew, menye wo yɛ adwen, ɔyɛɛ adze paa. M’enyi agye paa dɛ otumii maa ɔkasa a ɔtse dɛm’? Sɛ yɛbrɛ hɛnho adze a, yɛrenngye ndzɛmba pa a yɛyɛ ma afofor no ho enyimnyam mmfa. Yenyim dɛ Jehovah hu dza yɛyɛ nyinara, na n’enyiwa sɔ. Iyi nkotsee mpo ma hɛn akoma tɔ hɛn yamu. (Fa toto Matthew 6:2-4 ho; Heb. 13:16) Ampa, sɛ yesuasua Jesus na yɛbrɛ hɛnho adze a, yɛma Jehovah n’enyiwa gye paa.​—1 Pet. 5:6.

13. Aber a Jesus bɛɛn Nain kurow no, ebɛnadze na ohunii, na ebɛnadze na ɔyɛe faa dza ohunii no ho? (Luke 7:11-15)

¹³ Kenkan Luke 7:11-15. Ɔwodze ma yɛnhwɛ asɛm bi a osii wɔ afe 31 H. B. aber a nna Jesus reyɛ no som edwuma no. Nna Jesus etu kwan kɔ kurow bi a ɔwɔ Galilee a wɔfrɛ no Nain. Nna kurow no bɛn Shunem, beebi a nkɔnhyɛnyi Elisha nyaan maame bi ne ba bɛyɛ mfe 900 a nna woetwa mu no. (2 Ahe. 4:32-37) Aber a Jesus  bɛɛn kurow no no pon ano no, ohun dɛ worikesie obi. Nna asɛm no yɛ awerɛhow paa, osiandɛ nna kunafo bi ne ba kor pɛ a ɔwɔ no na oewu no. Naaso, nna nnyɛ kunafo a oridzi awerɛhow no nkotsee na ɔnam. Mbom nna nyimpadɔm bi so ka no ho. Jesus maa wogyinaa hɔ, na ɔyɛɛ biribi a ɔyɛ nwanwa maa kunafo no. Onyaan ne ba no! Nyimpa baasa a Jesus nyaan hɔn a Nsɛmpa no ka ho asɛm pɔtsee no, no mu dza odzi kan nye yi.

14. Nsɛntsitsir bi a ɔwɔ Luke tsir 7 no, no mu bi nye dɛn? (Hwɛ mfonyin no so.)

¹⁴ Ma yensusu nsɛntsitsir bi a ɔwɔ Luke tsir 7 no ho nhwɛ. Ana ehyɛɛ no nsew dɛ Jesus “hun” maame no a oridzi awerɛhow no, na afei “ne yamu hyehyee no maa no”? (Nyiyimu 13) Bi a Jesus hun dɛ kunafo no dze nyinsuwa dzi ne ba no no fun no enyim. Maame no n’asɛm no yɛɛ Jesus mbɔbɔr. Jesus ne yamu hyehyee no maa maame no, ɔamma annso hɔ ara, mbom ɔyɛɛ ho biribi. Jesus nye maame no kasae, na ɔda edzi dɛ ɔkaa n’akoma too ne yamu. Ɔkaa kyerɛɛ no dɛ: “Mma nnsu.” Afei, ɔyɛɛ biribi dze boaa no. Onyaan ne ba no “na ɔdze no hyɛɛ ne na nsa.”​—Nyiyimu 14, 15.

15. Ebɛnadze na yebotum esua efi anwanwadze a Jesus yɛe no mu?

¹⁵ Kunafo ne ba no a Jesus nyaan no no, ebɛnadze na yebotum esua efi mu? Dza yebotum esua efi mu nye dɛ, ɔsɛ dɛ yɛda tsema edzi kyerɛ hɔn a woridzi awerɛhow no. Ɔyɛ nokwar, obi a oewu dze, yerunntum nnyan no dɛ mbrɛ Jesus yɛe no. Naaso yebotum dze hɛn enyi ato famu na yaada tsema edzi akyerɛ hɔn a hɔn biribi ewu no. Yebotum aka asɛm bi dze akyekye hɔn werɛ anaa yɛayɛ biribi dze aboa hɔn dze akyerɛ dɛ yɛtse nka ma hɔn. d (Mbɛ. 17:17; 2 Cor. 1:3, 4; 1 Pet. 3:8) Asɛm kakraabi a ebɛka akyerɛ hɔn anaa biribi ketseketse bi a ebɛyɛ ama hɔn no botum ama hɔn akoma atɔ hɔn yamu.

16. Dɛ mbrɛ yehu wɔ mfonyin no mu no, ebɛnadze na yebotum esua efi akyerɛbaa a nna ne babaa ewu no n’asɛm no mu?

¹⁶ Hom mma yensusu asɛm bi a osii mfe bi a etwa mu ho nhwɛ. Nna enuanom rotow ndwom wɔ asafo nhyiamu ase, na akyerɛbaa bi too n’enyi no, ohun dɛ akyerɛbaa bi rusu. Nna  ndwom no mu nsɛm no fa ewufo a wobenyan hɔn no ho. Awerɛhosɛm nye dɛ, nna akyerɛbaa a orusu no ne babaa wui nnkyɛree. Akyerɛbaa kor no hun dɛm no, hɔ no ara na okegyinaa ne nkyɛn na ɔdze ne nsa too no kɔn mu, na ɔnye no toow ndwom no kesii dɛ wowiei. Ekyir yi akyerɛbaa a nna orusu no kaa dɛ: “Dza enuanom yɛe no kaa m’akoma paa na iyi maa modɔɔ hɔn.” N’enyi gyee paa dɛ ɔkɔr asafo nhyiamu dɛm da no. Ɔtoaa do dɛ: “Hom mma yɛnka, asafo nhyiamu dze oye paa. Osiandɛ sɛ yɛkɔ a enuanom hyɛ hɛn nkuran ankasa.” Ndzɛmba nketsenketse a yɛyɛ dze boa hɔn a woridzi awerɛhow na hɔn “sunsum abotow” no, nya awerɛhyɛmu dɛ Jehovah hu ne nyina na n’enyi sɔ paa.​—Ndw. 34:18.

17. Ebɛnadze na yeesusu ho wɔ adzesua yi mu?

¹⁷ Sɛ yɛgye ber sua anwanwadze ahorow a Jesus yɛe a wɔaka ho asɛm wɔ Bible mu no ho adze a, ɔbɔboa hɛn paa. Anwanwadze ahorow a Jesus yɛe no ma yehu dɛ Jehovah na Jesus dɔ hɛn paa. Bio so, ɔma yehu dɛ Jesus wɔ tum a ɔdze beyi adasamba haw nyina efi hɔ. Afei so, ɔboa hɛn ma yenya awerɛhyɛmu kɛse dɛ, ɔrennkyɛr koraa, bɔ ahorow a ɔyɛ ahomka a Jehovah dze ahyɛ hɛn no bɛba mu aber a Nyankopɔn n’Ahendzi no ridzi asaase no do tum no. Aber a yɛrodwendwen kyerɛwtohɔ ahorow a ɔtse dɛm ho no, yebotum esusu kwan a yebotum afa do esuasua Jesus no su ahorow no ho. Sɛ ereyɛ w’ankorankor adzesua anaa Ebusua Som a, ibotum esua anwanwadze afofor a Jesus yɛe no ho adze. Esuadze a ibenya no, ɔyɛ a enye afofor nkyɛ. Sɛ eyɛ dɛm a, ibotum enya nsɛm pii a ɔhyɛ nkuran paa a enye afofor bɔbɔ ho nkɔmbɔ!​—Rom. 1:11, 12.

18. Ebɛnadze na yebosusu ho wɔ adzesua a odzi hɔ no mu?

¹⁸ Nkorɔfo baasa a Bible ka hɔnho asɛm dɛ Jesus nyaan hɔn no, Jesus nyaan dza otwa tun no aber a nna wɔaka kakra ma ɔdze no som edwuma aba ewiei no. Naaso dɛm owusoɛr yi dze, nna ɔyɛ soronko, osiandɛ nna obi a oewu no yɛ ne nyɛnko berɛbo. Afei so, nna oewu ma edzi ndaanan. Dza Bible no ka fa dɛm anwanwadze yi ho no, ebɛnadze na yebotum esua efi mu? Gyedzi a yɛwɔ dɛ daakye wobenyan ewufo no, yebesi dɛn ahyɛ mu dzen? Yebosusu dɛm nsɛmbisa yi ho wɔ adzesua a odzi hɔ no mu no.