1-2. Aber a yegu do rotweɔn wiadze fofor a Jehovah dze ahyɛ hɛn bɔ no, ebɛnadze na no ho hia dɛ yɛyɛ?

 JEHOVAH ahyɛ bɔ dɛ ɔrennkyɛr ɔbɛsɛɛ wiadze bɔn yi na ɔdze wiadze fofor a tsenenee tse mu aba. Dɛm asɛm yi da hɛn akoma do paa. (2 Pet. 3:13) Ɔwɔ mu, yennyim ber pɔtsee a wiadze fofor no bɛba dze, naaso nsɛm ahorow a orisisi wɔ wiadze yi mu ndɛ no kyerɛ dɛ ɔrennkyɛr koraa na wɔaba.​—Matt. 24:32-34, 36; Andw. 1:7.

² Naaso, ɔmmfa ho mfe dodow a yɛdze asom Jehovah no, ɔsɛ dɛ hɛn nyina hyɛ gyedzi a yɛwɔ wɔ dɛm bɔhyɛ yi mu no dzen. Ebɛnadze ntsi a? Osiandɛ, sɛ obi wɔ gyedzi kɛse wɔ biribi mu mpo na ɔannhyɛ mu dzen a, dɛm gyedzi no botum ayɛ mberɛw. Ntsi, ɔsomafo Paul kaa gyedzi a obi nnyi ho asɛm dɛ ɔyɛ “bɔn a ɔnnkyɛr na ɔatoto hɛn ananmu no.” (Heb. 12:1) Adze a obotum aboa hɛn ma hɛn gyedzi akɔ do ayɛ dzen nye dɛ, yɛbɔkɔ do adwendwen adanse ahorow a ɔkyerɛ dɛ ɔrennkyɛr na wiadze fofor no aba no ho akɔ ekyir.​—Heb. 11:1.

3. Ebɛnadze na yebosusu ho wɔ adzesua yi mu?

³ Adzesua yi mu no, yɛbɔhwɛ akwan ebiasa a yebotum afa do ahyɛ gyedzi a yɛwɔ wɔ wiadze fofor a Jehovah ahyɛ hɛn ho bɔ no mu dzen. Dɛm akwan ebiasa no nye: (1) yɛbɔdwendwen werdam no ho, (2) yɛbɔdwendwen tum a Jehovah wɔ no ho, na (3) yɛbɛyɛ ndzɛmba a ɔbɛma yɛabɛn Jehovah kɛse. Afei so, yɛbɔhwɛ mbrɛ asɛm a Jehovah kaa kyerɛɛ Habakkuk no hyɛ hɛn gyedzi dzen ndɛ. Naaso, ɔwodze ma yendzi kan nhwɛ tsebea ahorow bi a yebotum ehyia no ndɛ a no ho behia dɛ yenya gyedzi kɛse wɔ Nyankopɔn no bɔhyɛ a ɔfa wiadze fofor no ho no mu.

 ABER A ƆSƐ DƐ YENYA GYEDZI KƐSE

4. Gyinae a yebehia gyedzi kɛse ana yeetum esisi no, ibi nye dɛn?

⁴ Adzekyee biara yesisi gyinae a no ho behia dɛ yɛda gyedzi kɛse edzi ana yeetum esisi. Dɛ nhwɛdo no, yesisi gyinae fa hɔn a yɛpɛ dɛ yɛfa hɔn nyɛnko, ndzɛmba a yɛpɛ dɛ yɛdze gyegye hɛn enyi, nwomasua a yɛpɛ dɛ yenya, edwuma a yɛpɛ dɛ yɛyɛ, awar, nye abawoo ho. Dɛm ntsi, no ho hia dɛ yebisa hɛnho dɛ: ‘Ana gyinae a misisi no kyerɛ dɛ megye dzi paa dɛ ɔrennkyɛr Nyankopɔn bɛsɛɛ wiadze bɔn yi na ɔdze no wiadze fofor no aba? Anaa gyinae a misisi no kyerɛ dɛ menye hɔn a wɔka dɛ yewu a nna asa no yɛ adwen?’ (Matt. 6:19, 20; Luke 12:16-21) Gyedzi a yɛwɔ dɛ ɔrennkyɛr wiadze fofor no bɛba no, sɛ yɛhyɛ mu dzen a, ɔbɛma yeesisi gyinae pa.

5-6. Sɛ yerihyia ɔhaw a, ebɛnadze ntsi na yehia gyedzi kɛse? Fa mfatoho kyerɛkyerɛ mu.

⁵ Afei so, yehyia ɔhaw ahorow a no ho behia dɛ yɛda gyedzi kɛse edzi. Dɛ nhwɛdo no, afofor botum asoɛr etsia hɛn, yarba koannkɔ bi botum abɔ hɛn, anaa ndzɛmba bi botum ama hɛn abaw mu ebu. Ahyɛse no dze, ɔbɛyɛ hɛn dɛ yebotum egyina ano. Naaso mpɛn pii no ebɔhwɛ no nna ɔhaw no abɛgye egua. Sɛ ɔba no dɛm a, yebehia gyedzi kɛse paa ana yeetum egyina ano na yaakɔ do dze enyigye asom Jehovah.​—Rom. 12:12; 1 Pet. 1:6, 7.

⁶ Sɛ yerihyia ɔhaw a, annhwɛ a yebenya adwen dɛ Jehovah no wiadze fofor no remmba da. Sɛ yenya dɛm adwen no a, aso ɔno kyerɛ dɛ hɛn gyedzi ayɛ mberɛw anaa? Ɔnntse dɛm ankasa. Ɔwodze, ma yɛnyɛ dɛm mfatoho yi. Sɛ nsu tɔ toa do adapɛn pii a, annhwɛ a yebenya adwen dɛ gyama ewia mpo rommbɔ bio. Naaso, mbrɛ ɔtse biara, nsu no begyaa tɔ ma ewia aabɔ. Dɛmara so na sɛ ɔhaw a yerihyia no ama hɛn abaw mu ebu paa a, annhwɛ a yebenya adwen dɛ wiadze fofor no remmba da. Naaso sɛ yɛwɔ gyedzi kɛse a, yebenya awerɛhyɛmu dɛ Nyankopɔn no bɔhyɛ ahorow no bɛba mu. (Ndw. 94:3, 14, 15; Heb. 6:17-19) Sɛ yɛwɔ gyedzi a ɔtse dɛm a, ɔbɛma yɛakɔ do dze Jehovah no som edzi kan wɔ hɛn asetsena mu.

7. Ebɛn adwen na ɔnnsɛ dɛ yenya?

⁷ Yehia gyedzi kɛse ana yeetum ayɛ asɛnka edwuma no so. Hɔn a yɛka asɛm no kyerɛ hɔn no, hɔn mu pii wɔ hɔ a hɔn adwen yɛ hɔn dɛ “asɛmpa” a ɔfa Nyankopɔn no wiadze fofor a ɔdze reba no ho no nnyɛ nokwar. (Matt. 24:14; Ezek. 33:32) Naaso hɛn dze, yɛmmpɛ dɛ yenya hɔn adwen no bi da. Ebɛnadze na ɔbɔboa hɛn amma yeennya hɔn adwen no bi? Ɔno nye dɛ yɛbɔkɔ do ahyɛ hɛn gyedzi dzen. Hom mma yɛnhwɛ ndzɛmba ebiasa a yebotum ayɛ.

DWENDWEN WERDAM NO HO

8-9. Sɛ yɛdwendwen werdam no ho a, ebɛn kwan do na ɔbɛhyɛ hɛn gyedzi dzen?

⁸ Kwan kor a yebotum afa do ahyɛ hɛn gyedzi mu dzen nye dɛ, yɛbɔdwendwen werdam no ho. Werdam no ma yenya awerɛhyɛmu dɛ, Nyankopɔn no bɔhyɛ ahorow no bɛba mu ɔkwan biara do. Ɔsɛ dɛ yɛtɔ hɛn bo adze dwendwen siantsir a Jehovah maa ne Ba no bowui, nye mbrɛ dɛm afɔr no som bo no ho. Sɛ yɛyɛ dɛm a, yɛbɛhyɛ gyedzi a yɛwɔ wɔ Nyankopɔn no bɔhyɛ a ɔnye dɛ ɔbɛma yɛatsena ase daa wɔ wiadze papa bi mu no mu dzen, na yeenya awerɛhyɛmu dɛ ɔbɛba mu kwan biara do. Ebɛnadze ntsi na yɛreka dɛm?

⁹ Ma yembisa dɛ, ebɛnadze na Jehovah hweree dze tuaa werdam no maa hɛn? Ɔsomaa n’abakan a ɔdɔ no nye ne nyɛnko berɛbo fii sor ma wɔwoo no baa asaase do dɛ nyimpa a bɔn nnyi noho. Aber a Jesus wɔ asaase do no, ohyiaa ɔhaw pii. Afei, ɔfaa atseetsee mu na wokum no yayaayaw. Nokwasɛm nye yi, Jehovah hweer biribi a ɔsom bo paa ana orutua werdam no! Ɔwodze dwen ho hwɛ o, sɛ hɛn Nyankopɔn a  ɔdɔ hɛn no pɛ dɛ yɛtsena ase mfe kakraabi wɔ asetsena papa bi mu a, aso nkyɛ ɔbɛma ne Ba no afa atseetsee mu na ɔama woeku no yayaayaw dɛm? (John 3:16; 1 Pet. 1:18, 19) Sɛ Jehovah etum dze no Dɔba a ɔsom bo dɛm no ama hɛn dze a, nna ɔno kwan biara do no ɔbɔhwɛ ma yeetum atsena ase daa wɔ wiadze fofor no mu.

DWENDWEN TUM A JEHOVAH WƆ NO HO

10. Dɛ mbrɛ Ephesusfo 3:20 ma yehu no, ebɛnadze na Jehovah tum yɛ?

¹⁰ Adze a ɔtɔ do ebien a yebotum ayɛ dze ahyɛ hɛn gyedzi dzen nye dɛ, yɛbɔdwendwen tum a Jehovah wɔ no ho. Mbrɛ ɔtse nye dɛ, ɔwɔ tum a ɔdze bɛyɛ biribiara a ɔaka dɛ ɔbɛyɛ no. Nkorɔfo pii hɔn adwen yɛ hɔn dɛ asɛm a Jehovah aka dɛ ɔbɛma yɛatsena ase daa wɔ wiadze fofor no mu no runntum mmba mu. Naaso, yenyim dɛ ndzɛmba a Jehovah ka dɛ ɔbɛyɛ no, sɛ nyimpa twe hɔn mu tann mpo a worunntum nnyɛ bi da. Siantsir nye dɛ Jehovah nye adze nyina do Tumfo Nyankopɔn no. (Job 42:2; Mark 10:27) Iyi ntsi, ɔnnyɛ hɛn nwanwa dɛ ɔhyɛ bɔ a ɔbor hɛn adwen na hɛn ntseasee do!​—Kenkan Ephesusfo 3:20.

11. Jehovah no bɔhyɛ a nna ɔtse dɛ mbrɛ orunntum mmba mu no, bi nye dɛn? (Hwɛ adakaba a wɔato dzin “ Bɔhyɛ Akɛse Bi A Ɔbaa Mu.”)

¹¹ Hom mma yɛnhwɛ bɔ ahorow bi a Jehovah dze hyɛɛ no nkorɔfo wɔ tsetse mber mu a nna ɔtse dɛ mbrɛ orunntum mmba mu. Nna Abraham abɔ akɔkora na Sarah so abɔ aberwa, naaso Jehovah kaa kyerɛɛ hɔn dɛ wɔbɔwo babanyin. (Gen. 17:15-17) Afei so, ɔkaa kyerɛɛ Abraham dɛ ɔdze Canaan asaase no bɛma n’asefo. Sɛ ehwɛ mfe pii a nna Israelfo a wɔyɛ Abraham n’asefo no yɛ nkowaa wɔ Egypt no a, nna ɔtse dɛ mbrɛ dɛm bɔhyɛ no remmba mu da. Naaso, dza Jehovah kae yi baa mu ampa. Ekyir yi, Jehovah kaa dɛ Elizabeth a nna ɔabɔ aberwa no bɔwo babanyin. Afei so, Jehovah kaa kyerɛɛ Mary a nna ɔyɛ ɔbaabun no dɛ ɔbɔwo noara Nyankopɔn ne Ba. Nna iyi bɛma bɔ bi a Jehovah hyɛe wɔ Eden ture no mu mfe pii a etwa mu no aba mu!​—Gen. 3:15.

12. Ebɛn nsɛm na Joshua 23:14 nye Isaiah 55:10, 11 ka a ɔma yehu dɛ Jehovah wɔ tum?

¹² Sɛ yɛdwendwen Jehovah no bɔhyɛ ahorow nye mbrɛ osii maa ɔbaa mu no ho a, ɔma yehu dɛ ɔwɔ tum kɛse paa. Iyi ma gyedzi a yɛwɔ wɔ wiadze fofor a ɔdze ahyɛ hɛn bɔ no mu no yɛ dzen. (Kenkan Joshua 23:14; Isaiah 55:10, 11.) Afei so, dɛm gyedzi no boa hɛn paa ma yetum boa afofor ma wohu dɛ, wiadze fofor a Jehovah dze ahyɛ hɛn bɔ no nnyɛ anansesɛm anaa adaaso bi kɛkɛ. Jehovah nankasa kaa ɔsor fofor nye asaase fofor no ho asɛm dɛ: “Nsɛm no yɛ ampa nye nokwar.”​—Nyi. 21:1, 5.

YƐ NDZƐMBA A ƆBƐMA ABƐN JEHOVAH KƐSE

13. Sɛ yɛkɔ asafo nhyiamu a, ebɛn kwan do na ɔhyɛ hɛn gyedzi dzen? Kyerɛkyerɛ mu.

¹³ Adze a ɔtɔ do ebiasa a obotum ahyɛ hɛn gyedzi dzen nye dɛ yɛbɛyɛ ndzɛmba a ɔbɛma yɛabɛn Jehovah kɛse. Dɛm ndzɛmba no mu kor nye dɛ yɛbɔkɔ asafo nhyiamu. Ɔwodze ma yɛnhwɛ mfaso ahorow a yenya aber a yɛakɔ asafo nhyiamu no. Anna yɛ akyerɛbaa bi a ɔdze mfe beberee ayɛ ber nyina som edwuma no n’afa ahorow pii. b Dza ɔkae nye dɛ: “Sɛ mokɔ asafo nhyiamu a, ɔma me gyedzi yɛ kɛse. Sɛ ɔba no dɛ obi a ɔrekyerɛkyerɛ no nnyim nkyerɛkyerɛ yie anaa ɔannka asɛm fofor biara mpo a, ebɔhwɛ no nna ɔaka biribi a ɔma metse Bible no ase yie, na iyi hyɛ me gyedzi dzen paa.” Ekyingye biara nnyi ho dɛ, hɛn so, sɛ yɛkɔ asafo nhyiamu na afofor ma mbuae a, ɔhyɛ hɛn gyedzi dzen.​—Rom. 1:11, 12; 10:17.

14. Ebɛn kwan do na asɛnka edwuma no hyɛ hɛn gyedzi dzen?

¹⁴ Ndzɛmba a yɛyɛ wɔ Jehovah no som mu a  ɔhyɛ hɛn gyedzi dzen no, no mu kor so nye dɛ yɛbɔkɔ asɛnka. (Heb. 10:23) Barbara yɛ hɛn akyerɛbaa a ɔdze bɔbor mfe 70 asom Jehovah. Dza ɔkae nye dɛ: “Ofitsi aber a mehyɛɛ asɛnka ase dze besi ndɛ nyina, mehu dɛ asɛnka edwuma no hyɛ gyedzi dzen paa. Sɛ meka Jehovah no bɔhyɛ ahorow a ɔka akoma no ho asɛm kyerɛ afofor a, ɔma me gyedzi yɛ kɛse.”

15. Ebɛn kwan do na ankorankor adzesua hyɛ hɛn gyedzi dzen? (Hwɛ mfonyin ahorow no so.)

¹⁵ Adze fofor so a yɛyɛ wɔ Jehovah no som mu a ɔhyɛ hɛn gyedzi dzen nye ankorankor adzesua. Hɛn akyerɛbaa bi a wɔfrɛ no Susan ebohu dɛ, nhyehyɛɛ a ɔayɛ a ɔdze sua adze no boa no paa. Ɔkaa dɛ: “Sɛ odu Kwesida a, musua Ɔweɔn-Aban a yebosua no dapɛn a odzi hɔ no. Afei odu Dwowda na Benada a, musua dza yebosusu ho wɔ dapɛn finimfin adzesua ase no. Nda a wɔaka no dze, medze yɛ m’ankorankor adzesua.” Osiandɛ Susan dzi nhyehyɛɛ a ɔayɛ do aber nyina ntsi, ne gyedzi kɔ do yɛ kɛse. Irene yɛ akyerɛbaa bi a ɔdze mfe pii asom wɔ wiadze nyina edwumayɛbea tsir. Dza oehu nye dɛ, sɛ ɔgye ber sua Bible nkɔnhyɛ a, ɔhyɛ ne gyedzi dzen paa. Ɔkaa dɛ: “Sɛ muhu mbrɛ Jehovah no nkɔnhyɛ nyina si ba mu pɛpɛɛpɛ no a, ɔyɛ me nwanwa paa.” c

‘ƆBƐBA MU AMPAARA’

16. Ebɛnadze ntsi na yebotum aka dɛ asɛm a Jehovah kaa kyerɛɛ Habakkuk no hyɛ hɛn so hɛn gyedzi dzen? (Hebrewfo 10:36, 37)

¹⁶ Jehovah n’asomfo binom wɔ hɔ a, wɔhwɛɛ kwan dɛ dɛm wiadze bɔn yi bɛba n’ewiei nnyɛ ndɛ. Mbrɛ ɔtse nye dɛ, hɛn nyimpa dze, annhwɛ a hɛn adwen bɛyɛ hɛn dɛ ber a Nyankopɔn dze bɛsɛɛ wiadze bɔn yi rekyɛr. Naaso Jehovah tse hɛn ase. Ɔkaa kyerɛɛ nkɔnhyɛnyi Habakkuk mpo dɛ ‘Enyido-adzehu no bɛba wɔ ber a wɔahyɛ no mu, na ɔrepɛ ntsɛm aba mu, na orinndzi ator da: sɛ ɔkyɛr mpo a, tweɔn, na ɔbɛba mu ampaara, ɔrennka ekyir’! (Hab. 2:3) Ɔnnyɛ Habakkuk nkotsee na asɛm a Nyankopɔn kae yi  hyɛɛ ne gyedzi dzen, mbom ɔhyɛ hɛn so hɛn gyedzi dzen. Ebɛnadze ntsi na yɛreka dɛm? Christianfo a wɔrohwɛ wiadze fofor no kwan no, Jehovah maa ɔsomafo Paul kyerɛɛw asɛm a ɔtse dɛmara maa hɔn. (Kenkan Hebrewfo 10:36, 37.) Ntsi, sɛ ɔyɛ hɛn dɛ ber a Jehovah dze bɛgye hɛn nkwa no rekyɛr mpo a, ɔsɛ dɛ yenya awerɛhyɛmu dɛ ɔkwan biara do no ‘ɔbɛba mu ampaara, ɔrennka ekyir’!

17. Ebɛn kwan do na akyerɛbaa bi dze afotu a Jehovah dze maa Habakkuk no yɛɛ edwuma?

¹⁷ Jehovah n’asomfo beberee dze n’afotu a ɔnye dɛ ‘yɛntweɔn’ no ayɛ edwuma. Hɔn mu binom mpo dze, mfe pii na wɔdze ayɛ dɛm. Ɔwodze, ma yɛnhwɛ hɛn akyerɛbaa bi a wɔfrɛ no Louise n’asɛm no. Ɔhyɛɛ ase dɛ ɔrosom Jehovah wɔ afe 1939. Ɔkaa dɛ: “Dɛm aber no dze, nna m’adwen yɛ me dɛ, murunnwie ntoado skuul mpo na Har-Magedon aba. Naaso, wɔammba no dɛm. Dza wɔaboa me nye dɛ, nkorɔfo a Bible no ka hɔnho asɛm dɛ wɔdze abotar tweɔnee dɛ Jehovah bɛma no bɔhyɛ ahorow aba mu no, medze mfe pii esua hɔnho adze. Makenkan kyerɛwtohɔ ahorow a ɔfa Noah, Abraham, Joseph, nye nyimpa afofor bi a wɔtweɔɔn mfe pii ana hɔn nsa reka nhyira a Jehovah dze hyɛɛ hɔn bɔ no. Ntsi, megye dzi paa dɛ, Jehovah no bɔhyɛ ahorow nyina bɛba mu. Enuanom afofor so gye dɛm asɛm yi dzi. Iyi aboa hɛn ma yeenya awerɛhyɛmu dɛ, ɔrennkyɛr koraa, wiadze fofor no bɛba.” Hɔn a wɔdze mfe pii asom Jehovah no, hɔn mu beberee nye hɛn akyerɛbaa yi yɛ adwen!

18. Sɛ yɛhwɛ ndzɛmba a Nyankopɔn abɔ no a, ebɛn kwan do na ɔhyɛ gyedzi a yɛwɔ dɛ wiadze fofor no bɛba no mu dzen?

¹⁸ Ɔyɛ nokwar dɛ sesei wiadze fofor no mmbae. Naaso, ɔwodze hwɛ ndzɛmba ahorow bi a ɔwɔ hɔ ndɛ tse dɛ nworaba, ndua, mbowa nye nyimpa. Ɔwɔ mu dɛ mber bi nna dɛm ndzɛmba yi nnyi hɔ dze, naaso ndɛ obiara nnyi hɔ a ɔbɛka dɛ dɛm ndzɛmba yi nnyi hɔ. Jehovah na ɔbɔɔ dɛm ndzɛmba yi, ntsi na ndɛ yehu dɛ wɔwɔ hɔ no. (Gen. 1:1, 26, 27) Hɛn Nyankopɔn no asan ahyɛ bɔ dɛ ɔdze wiadze fofor bi bɛba. Yɛgye dzi paa dɛ, ɔbɛma dɛm bɔhyɛ yi aba mu. Enyigyesɛm nye dɛ, sɛ yɛkɔ wiadze fofor no mu a, yɛbɛtsena ase daa, na yebenya apɔwmudzen papa so. Ntsi nya awerɛhyɛmu dɛ, sɛ ber a Nyankopɔn ahyɛ no so a, ɔdze wiadze fofor no bɛba ma yɛdze hɛn enyi ehu dɛ mbrɛ yehu ɔsor nye asaase no.​—Isa. 65:17; Nyi. 21:3, 4.

19. Ibesi dɛn ahyɛ wo gyedzi mu dzen?

¹⁹ Naaso seseiara a wiadze fofor no mmbae yi, hom mma yɛmfa hokwan biara a yebenya no nhyɛ hɛn gyedzi dzen. Ma enyisɔ a ewɔ ma werdam no nyɛ kɛse. Afei so, dwendwen tum a Jehovah wɔ no ho. Bio so, yɛ ndzɛmba a ɔbɛma abɛn Jehovah kɛse. Sɛ eyɛ dɛm ndzɛmba yi a, ebɛba abɛka “hɔn a wɔnam gyedzi nye abotar do nya anohoba no” ho.​—Heb. 6:11, 12; Rom. 5:5.