1. Ebɛnadze ntsi na sɛ yɛkɔ asafo nhyiamu a yɛma mbuae?

 EBƐNADZE ntsi na yɛkɔ asafo nhyiamu? Adze tsitsir ntsi a yɛkɔ nye dɛ yɛpɛ dɛ yeyi Jehovah ayɛw. (Ndw. 26:12; 111:1) Siantsir fofor ntsi a yɛkɔ asafo nhyiamu nye dɛ, yɛpɛ dɛ yɛhyehyɛ hɛnho nkuran wɔ mber a no mu yɛ dzen yi mu. (1 Thess. 5:11) Dɛm ntsi sɛ yɛkɔ asafo nhyiamu na yɛma mbuae a, ɔyɛ hokwan a yɛdze yi Jehovah ayɛw na yɛdze hyɛ hɛn nuanom nkuran.

2. Ebɛn aber na yebotum ama mbuae wɔ asafo nhyiamu ase?

² Dapɛn biara yenya hokwan ma mbuae wɔ asafo nhyiamu ase. Dɛ nhwɛdo no, dapɛn ewiei biara yenya hokwan ma mbuae aber a yɛreyɛ Ɔweɔn-Aban Adzesua no. Afei so, wɔ dapɛn finimfin nhyiamu ase no, yebotum ama mbuae aber a yɛreyɛ Pɛnsapɛnsa Bible Mu, Asafo Bible Adzesua nye afa afofor a enuanom botum ama mbuae no.

3. Ebɛnadze na obotum ama ayɛ dzen ama hɛn dɛ yɛbɛma mbuae, na Hebrewfo 10:24, 25 no bɔboa hɛn dɛn?

³ Nokwasɛm nye dɛ, hɛn nyina pɛ dɛ yeyi Jehovah ayɛw na yɛhyɛ hɛn nuanom nkuran wɔ asafo nhyiamu ase. Naaso ndzɛmba bi botum ama wɔaayɛ dzen ama hɛn dɛ yɛbɛma mbuae. Bi a hɛn yamu bɛhyehye hɛn aber a yɛpɛ dɛ yɛma mbuae no, anaa bi a hɛn afamu dze, yɛpɛ paa dɛ yɛma mbuae pii naaso ɔnnyɛ aber nyina na yɛma hɛn nsa do a wɔfrɛ hɛn. Ebɛnadze na ɔbɔboa hɛn ama yeetum edzi dɛm ɔhaw yi ho dwuma? Ɔsomafo Paul kaa dza obotum aboa hɛn wɔ krataa a ɔkyerɛwee kɛmaa Hebrewfo no mu. Aber a ɔreka siantsir a no ho hia dɛ yɛkɔ asafo nhyiamu no ho asɛm no, ɔkaa dɛ ɔsɛ dɛ yɛdze hɛn adwen si hɛn nuanom a yɛbɛhyɛ hɔn nkuran no do.  (Kenkan Hebrewfo 10:24, 25.) Sɛ yɛma ɔtsena hɛn adwen mu dɛ mbuae tsiabaa bi mpo a yɛbɛma no botum ahyɛ hɛn nuanom nkuran a, ɔremma hɛn yamu nnhyehye hɛn dɛ yebefi hɛn akoma mu ama mbuae. Afei so, sɛ wɔammfrɛ hɛn mpɛn pii dɛ mbrɛ yɛhwɛ kwan no a, ɔsɛ dɛ yɛtse ase, osiandɛ ɔno bɛma hɛn nuanom so enya hokwan ama mbuae.​—1 Pet. 3:8.

4. Ebɛn ndzɛmba ebiasa na yebosusu ho wɔ adzesua yi mu?

⁴ Adzesua yi mu no, yebedzi kan ahwɛ mbrɛ yebesi ahyɛ hɛnho nkuran aber a yɛwɔ asafo a enuanom a wɔwɔ mu no suar mu. Ɔno ekyir no, yɛbɔhwɛ mbrɛ yebesi ahyɛ hɛnho nkuran aber a yɛwɔ asafo a enuanom a wɔwɔ mu no dɔɔ so mu. Afei so, yɛbɔhwɛ mbrɛ yɛbɛma nsɛm a yɛka aber a yɛrema mbuae no ahyɛ hɛn nuanom nkuran paa.

5. Sɛ yɛwɔ asafo a enuanom a wɔwɔ mu suar mu a, yebesi dɛn ahyɛ hɛnho nkuran?

⁵ Mbrɛ ɔtse nye dɛ, kuw anaa asafo a enuanom a wɔwɔ mu suar mu no, ɔyɛ a ɔyɛ dzen dɛ onua a ɔrohwɛ adzesua bi do no benya enuanom pii ma wɔaama mbuae. Ɔtɔ da a, ɔsɛ dɛ ɔtweɔn kakra ana obi ama ne nsa do dɛ ɔbɛkasa. Iyi ma adzesua no kyɛr, na sɛ ɔba no dɛm a, ɔnnhyɛ nkuran. Sɛ dɛm na ɔtse wɔ w’afamu a, ebɛnadze na ibotum ayɛ? Bɔ mbɔdzen ma wo nsa do mpɛn pii. Sɛ eyɛ dɛm a, ɔbɛhyɛ afofor nkuran ma hɔn so wɔaama hɔn nsa do.

6-7. Sɛ ɔyɛ na hɛn yamu hyehye hɛn dɛ yɛbɛma mbuae a, ebɛnadze na obotum aboa hɛn?

⁶ Sɛ ɔyɛ na wo yamu hyehye wo dɛ ebɛma mbuae so ɛ? Sɛ dɛm a, ka w’akoma to wo yamu. Enuanom pii so tse nka dɛmara. Naaso, ibotum ayɛ ndzɛmba ahorow bi a ɔremma wo yamu nnhyehye wo kɛse aber a epɛ dɛ ema mbuae no ama eetum ahyɛ wo nuanom nkuran paa. Ebɛnadze na ibotum ayɛ?

⁷ Sɛ egye mber susu nyansahyɛ ahorow a wɔaka ho asɛm wɔ Ɔweɔn-Aban ahorow a wɔabɛsen kɔ mu a, ɔbɔboa wo paa. b Dɛm nyansahyɛ no mu bi nye dɛ, sua dza yebosusu ho wɔ asafo nhyiamu ase no yie ana akɔ. (Mbɛ. 21:5) Sɛ etse dza yebosusu ho no ase yie a, ɔremma innsuro dɛ ebɛma mbuae. Afei so, sɛ erema mbuae a, mma nnkasa pii. (Mbɛ. 15:23; 17:27) Sɛ wo mbuae no yɛ tsia a, irunnsuro dɛ ebɛkasa. Ɔno da nkyɛn a, sɛ erema mbuae na annkasa pii a, ɔbɛma enuanom atse dza ereka no ase akyɛn dɛ ebɛkasa tsentsenntsen na aka ndzɛmba pii ho asɛm. Sɛ erema mbuae na annkenkan dza wɔakyerɛw no, mbom edze woara wo nsɛm ka, na ema w’asɛm no yɛ tsia a, ɔbɛkyerɛ dɛ esiesie woho yie na etse dza worususu ho no ase paa.

8. Jehovah hu mbɔdzen a yɛrobɔ dɛ yɛbɛma mbuae no dɛn?

⁸ Sɛ edze dɛm nyansahyɛ yi mu bi yɛ edwuma, na eda ho ara suro dɛ ebɛma mbuae ebien anaa dza ɔbor dɛm so ɛ? Nya awerɛhyɛmu dɛ, Jehovah n’enyi sɔ mbɔdzen biara a erobɔ dɛ ebɛma mbuae no. (Luke 21:1-4) Kaa dɛ, Jehovah remma ennyɛ biribi a ɔbor w’ahoɔdzen do. (Phil. 4:5) Ntsi hu dza ibotum ayɛ na fa si w’enyi do dɛ ibodu ho. Afei so, bɔ Jehovah mpaa na serɛ no dɛ ɔmma wo akokodur a ibotum dze ama mbuae. Ahyɛse no dze, ibotum dze esi w’enyi do dɛ ebɛma mbuae tsiabaa kor.

9. Sɛ yɛwɔ asafo a enuanom a wɔwɔ mu dɔɔ so mu a, ebɛn ɔhaw na yebotum ehyia?

⁹ Sɛ ewɔ asafo a enuanom a wɔwɔ mu dɔɔ so mu a, ibotum ehyia ɔhaw fofor bi. Obotum aba dɛ enuanom a wɔpɛ dɛ wɔma mbuae no  dɔɔ so araa ma mpɛn pii no sɛ ema wo nsa do a, wɔmmfrɛ wo. Dɛ nhwɛdo no, Danielle yɛ obi a sɛ ɔkɔ asafo nhyiamu a n’enyi gye paa dɛ ɔbɛma mbuae. c Ohu no dɛ mbuae a ɔbɛma no ka ɔsom a ɔdze ma Jehovah no ho. Afei so, ɔyɛ kwan kor a ɔfa do hyɛ no nuanom nkuran na ɔhyɛ gyedzi a noara so wɔ wɔ Bible mu nokwasɛm mu no dzen. Naaso, ber a ɔkɔr asafo a enuanom a wɔwɔ mu dɔɔ so mu no, nna ɔma ne nsa do a wɔnntaa mmfrɛ no. Ɔtɔ da mpo a, nna onnya mbuae kor mpo na ɔama. Ɔkaa dɛ: “Iyi maa meyɛɛ basaa, na metsee nka dɛ mahwer hokwan bi. Sɛ biribi a ɔtse dɛm taa kɔ do a, ɔma inya adwen dɛ wɔahyɛ da ara na wɔmmpɛ dɛ wɔfrɛ wo.”

10. Ebɛnadze na eyɛ a obotum ama enya hokwan pii ama mbuae?

¹⁰ Ana Danielle n’asɛm no bi ato wo pɛn? Sɛ dɛm a, annhwɛ a dza ebɛka ara nye dɛ ma mentsena hɔ na mintsie bi dɛmara. Naaso, mma w’abaw mu mmbu atse. Bɔ mbɔdzen dɛ ebɛma mbuae. Ebɛnadze na ibotum ayɛ? Bɔ mbɔdzen dɛ ibosua mbuae beberee ama adzesua biara a ebɔkɔ no. Dɛm no, sɛ adzesua no ahyɛse no ara mpo wɔammfrɛ wo a, ebɛsan enya hokwan bio aber a adzesua no rokɔ do no. Sɛ irusua Ɔweɔn-Aban no a, ɔyɛ a susu mbrɛ nkyekyɛmu biara nye asɛntsir no hyia no ho. Sɛ eyɛ dɛm a, ɔfa biara a wobodu no, ibotum ama mbuae a ɔhyɛ nkuran. Afei so, sua nkyekyɛmu ahorow a ɔka Bible mu nokwasɛm a no mu dɔ ho asɛm no yie ama sɛ odu hɔ a eetum ama mbuae. (1 Cor. 2:10) Ebɛnadze ntsi na yɛreka dɛm? Osiandɛ, sɛ odu nkyekyɛmu ahorow a ɔtse dɛm no a, enuanom pii nntaa mma hɔn nsa do. Sɛ ɔba no dɛ edze nyansahyɛ a yɛaka ho asɛm nyina ayɛ edwuma, naaso akɔ adzesua mpɛn dodow bi na innyaa hokwan mpo mmaa mbuae so ɛ? Ibotum ama onua a ɔbɔhwɛ adzesua no do no ehu beebi a epɛ dɛ ema mbuae no ansaana wɔahyɛ adzesua no ase.

11. Ebɛnadze na Philippifo 2:4 tu hɛn fo dɛ yɛnyɛ?

¹¹ Kenkan Philippifo 2:4. Nyankopɔn maa ɔsomafo Paul kyerɛwee kɛmaa Christianfo a nna wɔwɔ Philippi no dɛ wɔndwen afofor ho. Sɛ yɛwɔ adzesua ase a, yebesi dɛn dze dza ɔsomafo Paul kae no ayɛ edwuma? Ɔsɛ dɛ yɛkaa dɛ, dɛ mbrɛ yɛpɛ dɛ yɛma mbuae no, dɛmara na hɛn nuanom so pɛ dɛ wɔyɛ.

12. Kwan kor a yebotum afa do ahyɛ hɛn nuanom nkuran wɔ asafo nhyiamu ase nye dɛn? (Hwɛ mfonyin no so.)

 ¹² Ɔwodze ma yɛnhwɛ no wɔ dɛm kwan yi do. Sɛ enye w’anyɛnkofo robɔ nkɔmbɔ a, ɔyɛ a wankotsee na ekasa anaa ema kwan ma hɔn so wɔkasa? Yɛgye dzi dɛ ema hɔn kwan ma wɔkasa. Dɛmara so na sɛ yɛkɔ asafo nhyiamu ase a, yɛpɛ dɛ yɛma hɛn nuanom dodow no ara kwan ma wɔma mbuae. Nokwasɛm nye dɛ, ndzɛmba etsitsir a yebotum ayɛ dze ahyɛ hɛn nuanom nkuran no, no mu kor nye dɛ yɛbɛma hɔn kwan ma wɔaama mbuae wɔ asafo nhyiamu ase. (1 Cor. 10:24) Hom mma yɛnhwɛ mbrɛ yebesi ayɛ dɛm.

13. Ebɛnadze na yebotum ayɛ ama enuanom pii enya kwan ama mbuae wɔ asafo nhyiamu ase?

¹³ Adze kor a yebotum ayɛ nye dɛ, yɛbɛma hɛn mbuae ayɛ tsia. Yɛyɛ dɛm a, ɔbɛma hɛn nuanom so enya kwan ama mbuae. Sɛ asafo mu mpanyimfo nye enuanom a wɔwɔ Bible ho nyimdzee pii no ma hɔn mbuae yɛ tsia a, ɔbɛma afofor so esuasua hɔn. Sɛ wo mbuae no yɛ tsia mpo a, mma nnka nsɛntsitsir a ɔwɔ mu no nyina ho asɛm. Dza nkyekyɛmu no reka ho asɛm no, sɛ eka ne nyina a, wo nuanom rinnya bi nnka. Dɛ nhwɛdo no, wɔ nkyekyɛmu a yerususu ho yi mu no, wɔama hɛn nyansahyɛ ebien bi. Ɔno nye dɛ yɛbɛma hɛn mbuae ayɛ tsia na yɛrennka nsɛntsitsir a ɔwɔ nkyekyɛmu no mu no nyina aber a yɛrema mbuae no. Sɛ ɔwo na wobedzi kan afrɛ wo dɛ ma dɛm nkyekyɛmu yi ho mbuae a, ka nsɛntsitsir yi mu kor pɛ ho asɛm na gya dza wɔaka no ma wo nua.

14. Ebɛnadze na obotum aboa hɛn ama yeehu mpɛn dodow a ɔsɛ dɛ yɛma hɛn nsa do? (Hwɛ mfonyin no so.)

¹⁴ Ɔsɛ dɛ yɛdze nhumu yɛ edwuma ama yeehu mpɛn dodow a ɔsɛ dɛ yɛma hɛn nsa do. Mbrɛ ɔtse nye dɛ, sɛ yɛma hɛn nsa do mpɛn pii a, ɔbɛma obi a ɔrohwɛ adzesua no do no atse nka dɛ ɔsɛ dɛ ɔtaa frɛ hɛn. Naaso ebɔhwɛ no, nna enuanom binom wɔ hɔ a wɔnnkasae. Iyi botum ebu hɔn abaw mu, na annhwɛ mpo a wɔremma hɔn nsa do bio.​—Ɔsɛnk. 3:7.

15. (a) Sɛ yɛma hɛn nsa do na wɔammfrɛ hɛn a, ɔsɛ dɛ yɛyɛ hɛn adze dɛn? (b) Ebɛnadze na hɔn a wɔhwɛ adzesua do no botum ayɛ ama obiara eetum enya hokwan ama mbuae? (Hwɛ adakaba a wɔato dzin “ Dza Ibotum Ayɛ Aber A Erohwɛ Adzesua Bi Do.”)

 ¹⁵ Sɛ enuanom pii ma hɔn nsa do a, bi a iyi remma yennya hokwan mma mbuae dodow bi a yɛpɛ. Ɔtɔ da mpo a, yɛma hɛn nsa do araa nko naaso obi a ɔrohwɛ do no mmfrɛ hɛn. Nokwasɛm nye yi, sɛ ɔba no dɛm a ɔyɛ yaw, naaso mma ɔnnhaw wo dɛ wɔammfrɛ wo.​—Ɔsɛnk. 7:9.

16. Ebɛnadze na yebotum ayɛ dze ahyɛ hɔn a wɔma mbuae no nkuran?

¹⁶ Sɛ enntum amma mbuae mpɛn dodow bi a epɛ mpo a, dza ibotum ayɛ nye dɛ ebɛyɛ aso etsie enuanom afofor a wɔrema mbuae no, na akamfo hɔn aber a wɔapon adzesua no. Sɛ onua anaa akyerɛbaa bi ma mbuae, na ekamfo no a, obotum ahyɛ no nkuran paa. Sɛ eyɛ dɛm a, ɔtse dɛ mbrɛ ama mbuae dze ahyɛ no nkuran no ara pɛr. (Mbɛ. 10:21) Kaa dɛ, kwan kor a ibotum afa do ahyɛ afofor nkuran nye dɛ ebɛkamfo hɔn.

17. (a) Awofo, hom besi dɛn aboa hom mba ma woeetum ama mbuae a ɔhyɛ nkuran? (b) Aber a ehwɛɛ video no, ebɛn ndzɛmba anan na ihun dɛ yebotum ayɛ aber a yerusua hɛn mbuae no? (Hwɛ ase hɔ asɛm no so.)

¹⁷ Ebɛnadze bio na yebotum ayɛ dze ahyehyɛ hɛnho nkuran wɔ adzesua ase? Awofo, hom nhwɛ mfe a hom mba no edzi na hom mboa  hɔn ma wonsua mbuae a wobotum ama wɔ adzesua ase. (Matt. 21:16) Ɔtɔ da a, yesusu nsɛm bi a ɔyɛ enyibersɛm tse dɛ ɔhaw a awarfo hyia anaa nsɛm a ɔfa hɛn abrabɔ a yɛbɛma no ho atsew ho. Dɛm nsɛm yi dze, ɔrennyɛ papa dɛ wɔfrɛ mbofra ma wɔma ho mbuae. Naaso bi a nkyekyɛmu ahorow bi wɔ adzesua no mu a mbofra botum ama ho mbuae. Afei so, ma wo mba no nhu dɛ, ɔnnyɛ aber nyina na sɛ wɔma hɔn nsa do a wɔbɛfrɛ hɔn. Sɛ eboa hɔn ma wɔtse ase dɛm a, ɔremma hɔn abaw mu mmbu aber a wɔammfrɛ hɔn no.​—1 Tim. 6:18. d

18. Ebɛnadze na yebotum ayɛ amma yaanntwe adwen ammba hɛnho do aber a yɛrema mbuae no? (Mbɛbusɛm 27:2)

¹⁸ Nokwasɛm nye dɛ, hɛn nyina botum ama mbuae a ɔhyɛ Jehovah enyimnyam na ɔhyɛ hɛn nuanom so nkuran. (Mbɛ. 25:11) Ɔtɔ da a yebotum aka suahu bi a yeenya ho asɛm tsiabaa aber a yɛrema mbuae no. Naaso, ɔnnsɛ dɛ yɛtwe afofor adwen ba hɛn do. (Kenkan Mbɛbusɛm 27:2; 2 Cor. 10:18) Mbom, ɔsɛ dɛ yɛtwe adwen si Jehovah, n’Asɛm no nye n’asomfo do. (Nyi. 4:11) Sɛ asɛmbisa bi hwehwɛ dɛ yɛma mbuae no fa hɛn ankasa hɛnho a, ɔnodze mfom biara nnyi ho dɛ yɛbɛyɛ dɛm. Ɔwodze ma yɛnhwɛ iyi ho nhwɛdo wɔ nkyekyɛmu a odzi hɔ no mu.

19. (a) Sɛ yɛdwen afofor ho aber a yɛwɔ asafo nhyiamu ase a, ebɛnadze na obefi mu aba? (Romefo 1:11, 12) (b) Ebɛnadze na ɔma w’enyi gye ho dɛ ebɛma mbuae?

¹⁹ Dza ɔwɔ mu nye dɛ, mbra biara nnyi hɔ a ɔkyerɛ hɛn mbrɛ yebesi ama mbuae. Naaso hɛn nyina botum abɔ hɛnho mbɔdzen na yɛama mbuae ahyehyɛ hɛnho nkuran. Bi a iyi bɔhwehwɛ dɛ yɛtaa ma mbuae. Anaa bi a ɔbɔhwehwɛ dɛ yɛma hɛn enyi sɔ hokwan biara a yenya dze ma mbuae no, na yɛma ɔyɛ hɛn dɛw dɛ afofor so wɔ hokwan a ɔtse dɛm. Sɛ yɛdwen afofor ho aber a yɛwɔ asafo nhyiamu ase a, ɔbɛma yeetum ahyehyɛ hɛnho nkuran.​—Kenkan Romefo 1:11, 12.